Referencia para Ni chigaca lu reunión Xhiiñaʼ Dios ne modo nabáninu
6-12 DE MAYO
CA TESORO ZEEDA LU BIBLIA | 2 CORINTIOS 4-6
«Qué rireʼnu gana»
w04-S 15/8 yaza 25 párr. 16, 17
Ridxáganu, peru qué riaananu sin stipa
16 Ni jma risaca nga, gápanu laanu en sentidu espiritual. Pa dxandíʼ xhamígunu Jiobá la? zanda guidxáganu en sentidu físicu, peru qué ziuu dxi guidxáganu de guni adorarnu laabe. Rudiibe «poder tuuxa ni maʼ bidxaga ne rudiibe stipa cani maʼ birá stipa stiʼ» (Isaías 40:28, 29). Ne apóstol Pablo biiyaʼ dxandíʼ ca diidxaʼ riʼ, ngue runi bicaa: «Nga runi, qué rireʼnu gana. Neca zeʼ dxi zirá stipa stiʼ xcuérpunu la? ladxidoʼno ne xquendabiaaninu ziyápacaʼ stipa cada dxi» (2 Corintios 4:16, TNM).
17 Guidúʼyanu xi riníʼ ca diidxaʼ «cada dxi». Ca diidxaʼ riʼ cayabi cani laanu, naquiiñeʼ guni aprovecharnu guiráʼ dxi ca cosa ni rudii Jiobá laanu. Ti misionera ni maʼ napa cuarenta y tres iza de cayuni xhiiñaʼ Jiobá, gudiʼdiʼ lu stale guendanagana ni bisidxaga ne gulee gana laa, peru neca zacá qué ñaanabe sin stipa. Laabe guniʼbe: «Napaʼ costumbre guiasaʼ tempranu para guneʼ orar Jiobá ne guundaʼ Stiidxabe ante guzuluáʼ guneʼ xcaadxi cosa. Programa riʼ, huayacané ni naa guneʼ huantar dede yanna». Zacá ni, pa guni orarnu ne guni meditarnu lu ca cualidad galán ne ca promesa stiʼ Jiobá «cada dxi» la? nanna dxíchinu zudiibe laanu stipa ni zacané laanu.
it-1-S yaza 70
Aguante
Laaca nabé risaca nga cadi gusaana de guiníʼ íquenu esperanza ni nápanu: laani nga guibáninu sin qué chuʼ dxi gátinu ne sin pecadu. Neca guuti binni laanu, peru qué zanda gáxhacabe laanu esperanza ni nápanu (Ro 5:4, 5; 1Te 1:3; Apo 2:10). Guiráʼ ca yuubaʼ ni cayuni huantarnu yanna riʼ, qué zanda diʼ guchaaganu cani né ca ndaayaʼ ni zápanu ora gaca cumplir esperanza sicarú nápanu riʼ (Ro 8:18-25). Pa qué gusaana de guiníʼ íquenu promesa de guibáninu sin qué chuʼ gátinu, intiica yuubaʼ gápanu neca jma naná gácani, peru nánnanu ti ratu si ni ne cadi naroʼbaʼ peʼ ni (2Co 4:16-18). Pa siempre guiníʼ íquenu tobi zidiʼdiʼ si ca prueba ni ridxaagalunu ne cadi gusaana de guiníʼ íquenu esperanza ni bidii Dios laanu la? zacané nga laanu para cadi chuʼ xhaatanu xizaa o guiníʼ íquenu gusaananu Jiobá Dios.
Guyúbinu ca perla ni gaʼchiʼ
w12-S 1/2 yaza 28
«Gusiéchenu Jiobá»
David Splane nga ti hermanu ni naca parte de Grupu ni Zaniruʼ, laabe nga bidiibe discursu riʼ, ni biree de lu Biblia (2 Corintios 4:7). ¿Xii nga tesoro ni cuzeetebe riʼ yaʼ? ¿Conocimientu la? ¿Guendanuuxpiaaniʼ la? «Coʼ, —laabe guniʼbe—. Tesoro ni bizeeteʼ Pablo nga, dxiiñaʼ nápanu de gusíʼdinu binni ni dxandíʼ» (2 Corintios 4:1, 2, 5). Bisietenalaʼdxiʼ hermanu Splane ca estudiante que xi pur biʼniʼ estudiarcaʼ gaayuʼ beeu: para guni preparar ni laacabe lu ti asignación especial, ti dxiiñaʼ nabé risaca stiʼ Dios.
Hermanu bidii discursu que bisiene, ca «guisu de yu» que runi representar cani cuerpu stiʼ binni. De raqué bichaagabe ti guisu de yu né ti guisu de oro. Ti guisu de yu la? guiráʼ dxi riquiiñecabe laa, cadi casi ti guisu de oro ni huaxiéʼ riquiiñecabe. Pa nigúʼchaahuinu xiixa cosa nabé risaca ndaaniʼ ti guisu de oro, cadi dxandíʼ biaʼca nusisácanu guisu que né ni nuu ndaaniʼ ni la?. Pur nga, gudxi hermanu Splane ca estudiante que ca diidxaʼ riʼ: «Cadi guyúbitu guisácatu. Ca misioneru naquiiñeʼ gacanecaʼ binni gusisácacaʼ Jiobá si. Naquiiñeʼ gácatu humilde casi ti guisu de yu».
Cadi gusaananu de gannaxhiinu ca xpinni Cristu jma
7 Yanna laanu, ximodo zanda gannaxhiinu ca xpinni Cristu jma yaʼ. Gastiʼ naca nga chuuláʼdxinu chuʼnu gaxha de ca binni ni biaʼca laanu laacaʼ o ni napa ngueca costumbre ni nápanu o ni riuulaʼdxiʼ laaca ni riuuláʼdxinu. Peru pa pur nga guixélenu de xcaadxi binni la? naquiiñeʼ gúninu stipa pur gápanu jma xhamígunu. Guníʼ ique: «Ñee ca xhamiguasiáʼ rucheecheniáʼ diidxaʼ la? Ñee raca nagana para naa guneʼ invitar xcaadxi xpinni Cristu guneniáʼ laacaʼ xiixa casi chizayaniáʼ laacaʼ la? Ñee qué ridxiñaʼ cani nacubi cadagulisaa ndaaniʼ Yoo stiʼ Reinu, purtiʼ rabeʼ gapa si dxi nga para gaca xhamígucabe naa la? Ñee rudieenaʼyaʼ guiráʼ ca binni ridagulisaa cásica nahuiiniʼ ne zaqueca ni huaniisi la?»
13-19 DE MAYO
CA TESORO ZEEDA LU BIBLIA | 2 CORINTIOS 7- 10
«Ministeriu de socorro»
w98-S 1/11 yaza 25 párr. 1
«Nadxii Dios ca binni ni rudii né guendanayecheʼ»
Primé la? guníʼ Pablo modo gucané ca xpinni Cristu de Macedonia lu ti campaña de socorro nezalú ca xpinni Cristu de Corinto. Sicaríʼ bicaa Pablo de laacabe: «Neca huadiʼdi cabe ra nagana peru nayeche nuu cabe. Nga runi neca huaxiéʼ napa cabe peru huadii cabe de idubi ladxidóʼcabe para acané cabe stobi». Cadi guyuu diʼ tu bisietenalaʼdxiʼ ca xpinni Cristu de Macedonia de campaña riʼ, sínuque de ladxidoʼcaʼ biale gacanecaʼ. Ngue runi Pablo guníʼ «nabé ucuá cabe lú du udíʼ du lugar acané cabe ca xcaadxi hermanu». Rihuinni dxiichiʼ bidii ca xpinni Cristu de Macedonia de ni nápacaʼ ne bidiicaʼ ni de guidubi ladxidoʼcaʼ né stale guendanayecheʼ, nécapeʼ laaca huaxiéʼ nápacaʼ (2 Corintios 8:2-4).
Racanenu ca xpinni Cristu
BIXUIʼLÚ nuunu iza 46 despué de ca dxi stiʼ Jesús ne cadúʼyanu modo naazeʼ dxiichiʼ ti gubiña guidxi Judea. Ca discípulo stiʼ Cristu ni nabeza raríʼ qué ganda diʼ sicaʼ ni gocaʼ. Xiñee yaʼ. Purtiʼ maʼ huaxiéʼ guendaró nuu guidxi Judea ne guizáʼ caru cadoo xcaadxi biidxiʼ nuu raqué, nga runi, pa qué chuʼ tu gacané ca xpinni Cristu la? zatiziicaʼ. Peru iza riʼ huaxa zuuyaʼ ca cristianu ni ruzuubaʼ diidxaʼ ximodo chigudii Jiobá ni caquiiñecaʼ ne qué huayuu dxi guʼyaʼ nin tobi de laacabe modo chigacané Jiobá laacabe biaje riʼ. Xi chigaca yaʼ.
Racanenu ca xpinni Cristu
4 Lu guiropa carta bicaa Pablu ra nuu ca xpinni Cristu de Corinto, bizeeteʼ xipeʼ nga dxiiñaʼ bisaanané Dios laacaʼ. Dxandíʼ gucuá carta que para ca ungidu, peru ca xpinni Cristu ni zeeda gaca casi «xcaadxi dendxu», laaca zanda gúnicaʼ ni guníʼ Pablu (Juan 10:16). Chupa cosa nga bisiene apóstol que naquiiñeʼ gúninu purtiʼ xpinni Cristu laanu. Primé la? «güi né [nu] binni stiidxa be», laani nga ni rúninu ora rucheechenu diidxaʼ ne ora rusíʼdinu binni de Dios (2 Cor. 5:18-20; 1 Tim. 2:3-6). Guiropa la? «acané [nu] xcaadxi hermanu» ora tiidicaʼ lu xiixa guendanagana (2 Cor. 8:4). Ora bizeeteʼ Pablu guiropaʼ dxiiñaʼ ni naquiiñeʼ guni ca xpinni Cristu la? biquiiñebe diidxaʼ griegu diakonía. Xiñee risaca ni bizéʼtenu riʼ yaʼ.
5 Ora biquiiñeʼ Pablu ti diidxaʼ griegu si para bizeeteʼ guiropaʼ dxiiñaʼ runi ca cristianu la? bicaabe laacaʼ guiénecaʼ ti cosa nabé risaca: tobi de ca dxiiñaʼ stiʼ ti neza binni ridagulisaa nga gacané ca hermanu stiʼ ora tiidicaʼ ra nagana. Maca bisiénebe «adxé adxé modo [r]uni nu xhiiña Señor, peru tobi si Señor nuu. Laca adxé adxé ni runi cada tobi de laanu, peru [ti] Espíritu [...] si runi irá ni» (1 Cor. 12:4-6, 11). Nga runi, guiráʼ dxiiñaʼ runi ca neza binni ridagulisaa, na Pablu laaca riquiiñeʼ cani para «usisaca [nu]» Dios «de idubi ladxidóʼ [no]» (Rom. 12:1, 6-8). Racá ridúʼyanu xiñee nabé guyuulaʼdxiʼ apóstol que iquiiñeʼ tiempu stiʼ para gacané «ca xpinni Cristu» (Rom. 15:25, 26).
6 Guiráʼ ni rúninu para gacanenu ca hermanu ni cadiʼdiʼ ra nagana, nuu cani lade ca cosa ni naquiiñeʼ guni ti xpinni Cristu ne zeeda cani lu adoración ni rudiʼnu Jiobá. Peru, xiñee rúninu cani yaʼ. Purtiʼ ruzúʼbanu «stiidxa Cristu», nga nga ni bisiene Pablu ca xpinni Cristu de Corinto ora bicaabe carta ra nuucaʼ (2 Cor. 9:13). Cumu racaláʼdxicabe gúnicabe guiráʼ ni bisiidiʼ Cristu la? racanécabe ca hermanu stícabe. Ndiʼ nga ni bisiene Pablu: guiráʼ ca cosa galán ni rúninu pur ca hermanu stinu, rúninu cani purtiʼ maʼ bisihuinni Dios «enda nachaʼhui sti» luguianu (2 Cor. 9:14; 1 Ped. 4:10). Yanna guidúʼyanu xi guníʼ revista La Atalaya 1 stiʼ junio iza 1976, ora cuzeeteʼ pabiáʼ naquiiñeʼ gacanenu ca hermanu stinu ni cadiʼdiʼ ra nagana: «Cadi guiaandaʼ ndiʼ laanu: para Jiobá Dios ne para Xiiñiʼ Jesucristu, nabé risaca gacanenu ca hermanu ni cadiʼdiʼ ra nagana». Zacá nga laani, cani rúninu ora racanenu xcaadxi nuu cani lu serviciu sagradu ni rudiʼnu Dios (Rom. 12:1, 7; 2 Cor. 8:7; Heb. 13:16).
Tu rudii bueltu para gaca xhiiñaʼ Reinu
10 Primé, riale de laanu gudiʼnu purtiʼ nadxiinu Jiobá ne racaláʼdxinu «guni nu ni riulaʼdxi be» (1 Juan 3:22). Guizáʼ riecheʼ Jiobá ora ruuyaʼ riale de ndaaniʼ ladxidóʼ ca xpinni gudiicaʼ ni nápacaʼ. Guidúʼyanu xi guníʼ apóstol Pablu de ca cristianu ni riuulaʼdxiʼ guni zacá (biindaʼ 2 Corintios 9:7). Zacá nga laani, tuuxa ni nanna xi guiráʼ naquiiñeʼ guni ti xpinni Cristu la? riuulaʼdxiʼ gudii ne qué rudii purtiʼ si cucaacabe laa guni ni; sínuque «[r]udii biaʼ ruluiʼlaʼdxiʼ». Ora gúʼyabe caquiiñeʼ gaca xiixa, riníʼ íquebe ximodo gaca ni, peru cadi ngasi, sínuque laaca rudiibe ni caquiiñeʼ para laani. Binni casi laabe riʼ nga cani rusiecheʼ ladxidóʼ Jiobá, «purti nadxii Dios ni rudii ni laa de idubi ladxidóʼ», o casi na sti Biblia: «Rudii Dios xquixe ca binni ni rudii né stale gana».
Guyúbinu ca perla ni gaʼchiʼ
Ñee rudiʼnu xquíxepeʼ Dios pur ni biʼniʼ pur laanu la?
2 Nanna Pablu zaquiiñeʼ guendaguti stiʼ Jesús para gaca cumplir guiráʼ promesa ni maʼ biʼniʼ Dios para laanu (biindaʼ 2 Corintios 1:20). Nga runi, lade ca cosa sicarú ni biʼniʼ Dios «pur laanu» riʼ, nuu sacrificiu biʼniʼ Jesús, guiráʼ modo rusihuinni Dios nadxii laanu ne guiráʼ ca cosa galán rudii Dios laanu. Nabé sicarú regalu riʼ, dede qué ridxélanu diidxaʼ para guininu ximodo ni. Xi naquiiñeʼ gucaa regalu sicarú riʼ laanu guni sentirnu yaʼ. Xi naquiiñeʼ gúninu yanna ra maʼ zeeda dxiña dxi guietenaláʼdxinu guendaguti stiʼ Cristu yaʼ. Iza riʼ zaca ni miércoles 23 de marzo.
g99-S 8/7 yaza 20, 21
¿Ñee jneza nga gudxíʼbanu laca laanu la? o coʼ?
Lu Escrituras Griegas Cristianas, verbo kau·kjá·o·mai raca traducirni «gudxiibaʼ laca laa, chuʼ nayecheʼ pur xiixa ni biʼniʼ, o guni presumir laca laa», ne riquiiñeni de forma negativu ne positivu. Guidúʼyanu ximodo guníʼ Pablo de laani, laabe bizeetebe zanda «chuʼnu nayecheʼ purtiʼ nápanu esperanza zusisaca Dios laanu» ne laaca guniʼbe: «Ni runi presumir la? guni presumir ca cosa ni maʼ biʼniʼ Jiobá» (Romanos 5:2; 2 Corintios 10:17, TNM). Ndiʼ riníʼ naquiiñeʼ chuʼnu orgulloso purtiʼ Jiobá nga Dios stinu ne ra chuʼnu orgulloso la? zacaneni laanu chuʼnu nayecheʼ pur labe ne modo nácabe.
20-26 DE MAYO
CA TESORO ZEEDA LU BIBLIA | 2 CORINTIOS 11- 13
«Bidaabi ti guichi lu beela ladi Pablo»
Guzuhuaʼnu dxiichiʼ neca maʼ huaxiéʼ stipa nápanu
Apóstol Pablu, stobi de ca xpinni Cristu ni bibani dxiqué, gunábabe Jiobá chonna biaje cuee yuubaʼ o guendanagana ni zeeda gaca casi ti guichi ni cayuniná laabe que. Qué gánnanu xipeʼ nga yuubaʼ gúpabe, peru nabé bininani laabe casi runiná ti guichi. Zándaca bichiiñani laabe ne zándaca maʼ qué ñúnibe ni na Jiobá ne stale guendanayecheʼ. Peru Jiobá bicabi laabe sicaríʼ: «Naa nuaa para acaniá lii, ne nga si caquiiñuʼ. Purti jma rihuinni enda nandxóʼ stinne ora cayaadxa stipa lii». Jiobá qué nibee diʼ yuubaʼ stiʼ Pablu que, ne gúpabe xidé bidxiilube ni, laabe guniʼbe: «Nanna ora riaadxa stipa naa la? jma rusi racané Cristu naa» (2 Cor. 12:7-10). Ximodo zanda guiénenu ni guniʼbe ca yaʼ.
Jiobá rudii espíritu santu cani rinabaʼ ni laa
17 Sicaríʼ bicabi Dios apóstol Pablu: «Naa nuaa para acaniá lii, ne nga si caquiiñuʼ. Purti jma rihuinni enda nandxóʼ stinne ora cayaadxa stipa lii». Nga runi guníʼ Pablu: «Jma rieche ora huaxiéʼ stipa napaʼ, purti óraque jma rusi rihuinni enda nandxóʼ sti Cristu luguiaʼyaʼ» (2 Corintios 12:9; Salmo 147:5). Xi cusiidiʼ Pablu laanu ne ca diidxaʼ riʼ yaʼ. Cusiidibe laanu bisihuinni Dios guendanandxóʼ stiʼ ora biquiiñeʼ Cristu para gupa laabe, casi ñaca niguu laabe ndaaniʼ ti yoo de lari. Yanna riʼ laaca zacagá ricabi Jiobá ca oración stinu, purtiʼ rápabe laanu casi ora niguube laanu ndaaniʼ yoo de lari.
18 Ti yoo la? qué rucueeza diʼ de guiaba nisaguié o de gundubi bi, peru rulani laanu. Zacaca nga yanna riʼ, cadi purtiʼ si cayapa «enda nandxóʼ sti Cristu» laanu la? maʼ qué zápanu guendanagana. Peru racaneni laanu gudxíʼlunu guiráʼ guendaquéiquiiñeʼ ni nuu yanna ne cani culaa Binidxabaʼ luguianu ti cadi guixélenu de Dios (Apocalipsis 7:9, 15, 16). Nga runi, pa qué ganda tiidiʼ ca guendanagana stiluʼ la? gunna dxichi nanna Jiobá guiráʼ ni cadíʼdiluʼ ne maʼ bicaadiágabe ca oración stiluʼ (Isaías 30:19; 2 Corintios 1:3, 4). Sicaríʼ bicaa Pablu: «Peru jneza runi Dios, ne qué zudii lugar gueeda xiixa luguiá tu ni qué zanda gua tu, sínuque laga zacané laatu tidi tu ni ora idxiña tu ni, ti ganda gua tu ni» (1 Corintios 10:13; Filipenses 4:6, 7).
«Rudiibe poder tuuxa ni maʼ bidxaga»
8 (Biindaʼ Isaías 40:30). Neca randa rúninu stale cosa, cadi guiráʼ ni zanda gúninu né stipa si stinu. Ne nga nga ni cadi naquiiñeʼ guiaandaʼ laanu. Guiníʼ íquenu ejemplu stiʼ Pablo. Neca gúcabe ti hombre ni gunna stale cosa, qué ñanda ñúnibe guiráʼ ni racaláʼdxibe. Ora gúdxibe Dios cani naguu xizaa laabe, laa bicabi laabe: «Purti jma rihuinni enda nandxóʼ stinne ora cayaadxa stipa lii». Biene Pablo ni gúdxibe laa que ne guníʼ ora riaadxaʼ stipa laa jmaruʼ si nadipaʼ raca (2 Cor. 12:7-10). ¿Xidé ngue caníʼ Pablo yaʼ?
9 Biene Pablo qué zanda guni stale cosa pa qué gacané stobi jma nadipaʼ laa. Espíritu santu stiʼ Dios zanda gudii stipa laabe ora maʼ nuube débil. Ne cadi ngasi. Laaca zanda gacané ni laabe para gúnibe cosa ni qué ñuu dxi ñúnibe stúbisibe. Ngaca nga rizaaca né laanu. Rihuinni dxíchica pur poder stiʼ Dios zanda gápanu stipa.
Guyúbinu ca perla ni gaʼchiʼ
Ni rinabadiidxaʼ cani ruundaʼ
«Guionna guibáʼ» ni riete lu 2 Corintios 12:2 zándaca laani nga Reinu mesíanicu ra chiguni mandar Jesucristu ne ca 144,000, o «ibáʼ cubi» (2 Ped. 3:13).
Runibiáʼcabe ni casi «guionna guibáʼ» purtiʼ Reinu ca nga gobiernu jma risaca.
Zándaca «paraísu» ra guyé apóstol Pablo lu visión que nga 1) Paraísu ni chichuu ndaaniʼ Guidxilayú 2) paraísu espiritual ni chichuu ne zaca ni jma naroʼbaʼ que ni nuu yanna, ne 3) «paraísu stiʼ Dios» ni nuu guibáʼ; guiráʼ cani bizéʼtenu riʼ ziuu cani juntu dxi gaca Guidxilayú riʼ ti paraísu.
it-1-S yaza 317
Bixiduʼ
«Bixiduʼ santo». Escrituras Griegas ruzeeteʼ de «bixiduʼ santo» (Ro 16:16, TNM; 1Co 16:20; 2Co 13:12; 1Te 5:26) o «bixiduʼ de amor» (1Pe 5:14, TNM). Zándaca né ti bixiduʼ nga bigapadiuxi binni dxiqué, gunaa né gunaa, hombre né hombre. Zándaca yenanda ca primé xpinni Cristu costumbre gupa ca hebreu bibani dxiqué de ugapadiúxicaʼ binni né ti bixiduʼ. Neca qué rudii Biblia detalle de laani, peru rihuinni dxichi «bixiduʼ santu» o «bixiduʼ de amor» ca bisihuinni ni guyuu ca hermanu ni nuu ndaaniʼ ca congregación que tobi si ne nabé guyuu guendarannaxhii ládecaʼ (Jn 13:34, 35).
27 DE MAYO HASTA 2 DE JUNIO
CA TESORO ZEEDA LU BIBLIA | GÁLATAS 1-3
«Udinde nia laa»
¿Ñee ridúʼyanu ni jneza casi ruuyaʼ Jiobá ni la?
16 (Biindaʼ Gálatas 2:11-14). Bidxibi Pedro purtiʼ qué ganna xi guiníʼ íquecabe de laa (Proverbios 29:25). Laabe nánnabe xi riníʼ ique Jiobá de ca binni ni naca gentil. Neca zaqué, bidxibi Pedro niníʼ ique ca xpinni Cristu de Jerusalén, ni yeganna lugar que, mal de laa. Bidxibi Pedro niníʼ íquecabe mal de laa purtiʼ ridxaaga ca xpinni Cristu ni naca gentil. Gudxi apóstol Pablo Pedro cayuni laa hipócrita. ¿Xiñee gúdxibe laa zaqué yaʼ? Purtiʼ binadiaga Pablo laabe dxi biʼniʼ defenderbe ca gentil lu reunión ni guca Jerusalén lu iza 49 (Hechos 15:12; Gálatas 2:13). ¿Xi zuni sentir ca xpinni Cristu ni naca gentil ni bininá Pedro que yaʼ? ¿Ñee zudiicabe lugar gusaba ndiʼ laacabe la? ¿Ñee ziaaxha Pedro ca privilegiu stiʼ pur bichee la?
Gastiʼ qué zanda gusaba ca binni ni nadxii Jiobá
12 Nabé bidxibi Pedru binni purtiʼ guníʼ ique zándaca gúnicabe laa xiixa, ne neca bicheebe chupa chonna biaje, qué nixélebe de Jesús ne de Jiobá. Guietenaláʼdxinu dxi guniʼbe qué runibiaʼbe Maestru stibe nezalú stale binni ne bíʼnibe ni chonna biaje (Luc. 22:54-62). Ra gudiʼdiʼ dxi laaca bíʼnibe sti cosa ni cadi jneza: gucaláʼdxibe nusihuínnibe huaxiéʼ risaca ca xpinni Cristu de sti guidxi que ca judíu ni maʼ naca xpinni Cristu. Peru nanna Pablu cadi jneza guiníʼ ique ca xpinni Cristu nuu tu jma risaca lade ca binni ridagulisaa. Racá ridúʼyanu cadi jneza ni biʼniʼ Pedru. Ngue runi, ante guni xcaadxi xpinni Cristu zaqueca la? gudxi Pablu laabe cadi jneza ni cayúnibe (Gál. 2:11-14). Ñee bidxiichi Pedru pur ni gudxi Pablu laa ne pur ngue nusaana carrera ra zanda guicaa guendanabani la? Coʼ, sínuque guníʼ íquebe lu conseju bidii Pablu laabe, bizuubabe diidxaʼ ne biaanabe lu carrera stibe.
Guyúbinu ca perla ni gaʼchiʼ
Biʼniʼ ni na Dios neca tiidiluʼ «stale ra nagana»
20 Yanna, xi zanda guininu de ora rucaalú Binidxabaʼ laanu sin gudiʼnu cuenta yaʼ. Xi zanda gúninu ora careʼnu gana yaʼ. Tobi de ca cosa ni jma zanda gacané laanu nga guiníʼ íquenu lu guendaguti stiʼ Cristu. Ne ngapeʼ nga ni biʼniʼ Pablu. Guyuu biaje biʼniʼ sentirbe qué risácabe pur nácabe binni ruchee, peru gúnnabe qué ñati Jesús pur binni ni qué gapa donda, sínuque guti pur ca binni ruchee casi laabe. Ngue runi bicaabe: «Rune cre Xiiñi Dios ni nadxii naa ne bidii xpida pur naa» (Gál. 2:20). Gunna Pablu guti Cristu pur laa ne bidii cuenta zanda gulá guendaguti que laa.
21 Pa gúʼyanu guendaguti stiʼ Jesús casi ti cosa ni bisigaʼdeʼ Jiobá cada tobi de laanu la? zanda gacané ni laanu. Peru qué riníʼ diʼ nga nagueendaca ziuʼnu gana. Nuu de laanu zándaca gudxíʼlunu guendanagana riʼ dede dxi gueeda guidxilayú cubi ca. Peru ¡cadi guireeluʼ gana! Bietenalaʼdxiʼ, cani guni huantar nga cani zacaa premiu riʼ. Zeʼ dxi jma gaxha para guni mandar Reinu stiʼ Dios ne guedané guendariuudxí ne zacané ni guiráʼ binni nachaʼhuiʼ gácacaʼ binni sin donda. Gudixhe ique chuʼluʼ lu guidxilayú cubi ra guni mandar Reinu stiʼ Dios neca yanna riʼ gápaluʼ stale guendanagana.
it-1-S yaza 984
Carta para ca gálatas
Ora guníʼ Pablo: «¡Aque nahuátitu xa binni de Galacia caʼ!», cadi caniʼbe de ti grupu de binni de raza galo ni nabeza ladu guiáʼ de Galacia (Gál 3:1, TNM), sínuque caguu jnézabe caadxi binni ni nuu ndaaniʼ ca congregación stiʼ Galacia purtiʼ cudiicaʼ lugar guicá xpiaʼ caadxi judaizante ni nuu ládecaʼ laacaʼ. Ca judaizante que nga caadxi judíu ni racalaʼdxiʼ gusihuinni cayuni ni jneza ra zinanda Ley ni gucuaa Moisés, lugar de ñúnicaʼ ni jneza ra ninándacaʼ pactu cubi que pur fe sticaʼ (2:15–3:14; 4:9, 10). Ndaaniʼ ca congregación de Galacia (1:2) ni bicaa Pablo carta ra nuu que, nuu binni judíu ne ni cadi judíu. Cani cadi judíu riʼ, nácacabe prosélito ni maʼ guca circuncidar ne nuu ca gentil ni caʼruʼ gaca circuncidar, nuu de laacaʼ zándaca zacaʼ de ca celta (Hch 13:14, 43; 16:1; Gál 5:2). Ca xpinni Cristu riʼ gúdxicabe laacaʼ gálatas, purtiʼ gulézacaʼ Galacia. Modo bicaa Pablo carta riʼ, rucaani laanu guiníʼ íquenu bicaabe ra nuu ca xpinni Cristu ni nabezaʼ ladu gueteʼ de Galacia, provincia stiʼ Roma, purtiʼ nabé runibiaʼbe laacaʼ, ne cadi ra nuu diʼ ca binni ni nabeza ladu guiá que nga bicaa Pablo, purtiʼ qué ñunibiaʼbe laacaʼ ne zándaca qué lica nigánnabe laacaʼ.