¿Xi zanda gúninu para guibáninu ndaaniʼ guidxilayú cubi ca?

Lu ca artículo ni maʼ gudiʼdiʼ ca, bizíʼdinu mayaca gunitilú Dios guiráʼ ca cosa malu ne ca guendanagana nuu lu Guidxilayú riʼ. Peru ¿ximodo nánnanu dxandíʼ zúnibe ni yaʼ? Purtiʼ lu Stiidxaʼ Dios, Biblia, ná:

«Zidiʼdiʼ guidxilayú» (1 JUAN 2:17).

Peru laaca nanna dxíchinu dxandíʼ zalá binni dxi ca, purtiʼ nga nga ni ruzeeteʼ sti ndaa de textu riʼ:

«Ni runi ni ná Dios la? qué ziuu dxi gatiʼ».

Nga runi, para ganda guilanu dxi ca, caquiiñeʼ guzúʼbanu stiidxaʼ Dios. Peru para guzúʼbanu stiidxabe, primeru caquiiñeʼ gunibiaʼnu laabe.

GUNIBIAʼNU DIOS TI GANDA GUILANU

Caadxi imagen: 1. Zuba ti enfermera ni maʼ bidxaga lu pisu stiʼ ti hospital. 2. Zúbabe ne cayuuyadxibe ti compañera stibe cayuundaʼ ti revista ne rihuinni nuu nayecheʼ. 3. Biindané compañera stibe laabe ti textu de lu Biblia ne cudii laabe ti tarjeta de contactu jw.org.

Jesús guníʼ: «Zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ» (Juan 17:3). Para ganda guilanu dxi guinitilú ca cosa malu nuu ndaaniʼ Guidxilayú riʼ ne guibáninu para siempre caquiiñeʼ gunibiaʼnu Dios. Nga riníʼ cadi caquiiñeʼ si guininu dxandíʼ nuube o gánnanu caadxi cosa de laabe, sínuque caquiiñeʼ gaca xhamígunu laabe. Para ganda gaca xhamígunu tuuxa caquiiñeʼ tidiʼ tiempu, zacaca nga rizaaca né Dios. Guidúʼyanu xi rusiidiʼ Biblia ni zacané laanu para cadi gusaana de gaca xhamígunu Dios.

Ni rusiidiʼ Biblia

Maca gudixhe ique Dios guibáninu ndaaniʼ ti paraísu.

Bizáʼ Dios primé hombre ne primé gunaa, Adán ne Eva, ne guluube laacaʼ ndaaniʼ ti lugar nabé sicarú ni biree lá jardín de Edén. Perfectu laacabe ne bidii Dios laacabe guiráʼ ni caquiiñecabe para guibánicabe nayecheʼ. Ñanda nibánicabe para siempre pa qué nusaana de ñaca xhamígucabe Dios. Peru lugar de ñúnicabe ni ná Dios, maʼ qué ninácabe nuzuubacabe stiidxaʼ.

Xiñee nápanu guendanagana ne runi sufrirnu.

Cumu qué nuzuubaʼ Adán stiidxaʼ Dios la? laabe ne ca xiiñibe maʼ qué nibánicabe para siempre. Biblia ná: «Pur ti hombre si biuu pecadu ndaaniʼ guidxilayú, ne pur pecadu ca biuu guendaguti, ne zacá gucuá guendaguti que guiráʼ binni» (Romanos 5:12). Cásica zanda galené tuuxa ti guendahuará ni napa bixhoze o jñaa, laanu laaca binni ruchee laanu purtiʼ zanu de Adán, nga runi rióxhonu ne rátinu.

Biʼniʼ Dios xiixa para gacané laanu.

Biblia ná: «Nabé gunnaxhii Dios guidxilayú, nga runi bidii tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16). Biseendaʼ Dios Jesús lu Guidxilayú riʼ para gatiʼ pur laanu. Prabhakar, ti hombre de la India ni napa 86 iza, guníʼ ique guiráʼ ni huayuni Dios pur laa, nga runi guniʼbe ca diidxaʼ riʼ: «Rudieeʼ cuenta guizáʼ nadxii Jehováa naa. Ne pur guendarannaxhii stibe, zanda guicaaʼ ti guendanabani ni qué zaluxe».

Zanda gusihuínninu rudiʼnu xquixe peʼ Dios pur ni biʼniʼ pur laanu.

Biblia ná zanda gusihuínninu rudiʼnu xquixe peʼ Dios pa «gúninu ni ná ca mandamientu» stiʼ (1 Juan 2:3). Né stale cariñu rusiidiʼ Jehová laanu xi zanda gúninu para guibáninu nayecheʼ dede ca yanna (Isaías 48:17, 18). Qué racalaʼdxiʼ Dios guni sufrirnu, nga runi cayabi laanu pa guzúʼbanu stiidxaʼ zabáninu nayecheʼ yanna ne despué zacaanu ti guendanabani ni qué zaluxe.

GUIDÚʼNDANU BIBLIA GUIRÁʼ DXI

Biluxe si biindaʼ enfermera riʼ Biblia cayuuyadxí guibáʼ. — Pa guinábanu Dios gacané laanu ne gúninu ni riuulaʼdxiʼ, zanda guilanu ora guinitilú guidxilayú.

Para ganda guibáninu caquiiñeʼ guidoʼno guiráʼ dxi, peru Jesús guníʼ: «Cadi de pan si nga guibani binni, sínuque de guiráʼ diidxaʼ ni guiree de ruaa Jehová» (Mateo 4:4).

Lu Biblia zanda guidxélanu guiráʼ ni cayabi Jehová laanu gúninu. Pa guidúʼndanu libru nabé sicarú riʼ, zazíʼdinu xi biʼniʼ Dios dxiqué, xi cayuni yanna ne xi chiguni despué.

GUINÁBANU DIOS GACANÉ LAANU

¿Xi zanda gúninu pa racaláʼdxinu guzúʼbanu stiidxaʼ Dios peru raca nagana para laanu gusaana de gúninu ca cosa ni qué riuuláʼdxibe? Ni zacané laanu nga gunibiáʼ chaahuinu laabe.

Guidúʼyanu ni bizaaca ti gunaa láʼ Sakura.b Biʼniʼ practicarbe pecadu sexual, peru ora bizulú cayuni estudiarbe Biblia biziidibe xi runi mandar Dios binni guni, lu 1 Corintios 6:18 ná: «¡Laguxooñeʼ de pecadu sexual!». Gunabaʼ Sakura Dios gacané laa ne zaqué gunda bichaa modo nabani. Peru cayúnirube stipa para cadi guiábabe luni sti biaje. Laa guníʼ: «Ora riníʼ iqueʼ ni cadi jneza, runeʼ orar Jehová de guidubi ladxiduáʼ, purtiʼ nanna naa siaʼ qué zanda gudxieeluáʼ ni. Ne ora runeʼ orar Jehová racaneni naa chuaaʼ jma gaxha de laa». Cásica Sakura, stale binni cayunibiáʼ Dios ne cudiibe stipa laacaʼ para guchaacaʼ modo nabánicaʼ ne guibánicaʼ modo riuuláʼdxibe (Filipenses 4:13).

Ra jma gunibiaʼnu Dios, jma zunibiaʼbe laanu ne zuuyabe laanu casi xhamígube (Gálatas 4:9; Salmo 25:14). Pa gúninu ni bizéʼtenu riʼ, zanda guilanu ora guinitilú ca cosa malu nuu ndaaniʼ Guidxilayú riʼ ne zanda guibáninu ndaaniʼ ti guidxilayú cubi ni cayuni prometer Dios. Peru ¿ximodo zaca guidxilayú ca yaʼ? Lu sti artículo ca zánnanu ni.

a Biblia ná Jehová nga lá Dios.

b Maʼ bidxaa labe.