Guendarannaxhii stiʼ Jehová racané ni laanu cadi guidxíbinu

1. ¿Gunáʼ nga ca cosa ni zanda guchibi laanu?

GUZÉʼTENU ni bizaaca caadxi hermanu. Néstor ne María nga ti guendaxheelaʼ, ne racaláʼdxicaʼ chigacanecaʼ ti lugar ra caquiiñeʼ tu guni predicar.b Peru para ganda gúnicabe ni, naquiiñeʼ guiziidicabe guibaninécabe huaxiéʼ cosa. Ne ngue bichíbini laacabe. Guníʼ íquecabe qué ziuucabe nayecheʼ pa guibaninécabe huaxiéʼ cosa. Ti hermanu láʼ Biniam ni nabeza ndaaniʼ ti guidxi ra qué riná binni gucaadiaga stiidxaʼ Dios. Dxi gúcabe testigu stiʼ Jehová, bidiibe cuenta laaca zazananda binni laabe. Neca bichíbini laabe, peru ni jma bichibi laabe nga xi guni familia stibe ora ganna maʼ gadxé religión laabe. Ne últimu la? guidúʼyanu xi bizaaca Valeria, ti hermana ni gúdxicabe laa napa ti cáncer nabé malu. Cumu maʼ biziidibe cadi jneza nga guicá binni rini la? biyúbibe ti doctor ni guni respetar decisión stibe, neca bidiini dxiiñaʼ laabe. Ne cásica guiráʼ binni, bidxíbibe gátibe.

2. ¿Xiñee naquiiñeʼ gucueezanu laanu ora nuu xiixa ni cuchibi laanu?

² ¿Ñee huayuu ora huadxíbiluʼ casi ca hermanu ni bizéʼtenu lu párrafo ni gudiʼdiʼ ca la? Zándaca nuu ni huachibi laanu. Pa qué gucueezanu laanu la? zanda guicaanu xiixa decisión ni guxheleʼ laanu de Jehová. Ne nga peʼ nga ni racalaʼdxiʼ Binidxabaʼ. Racaláʼdxibe iquiiñebe ca cosa ni ruchibi laanu para cadi guzúʼbanu stiidxaʼ Jehová, casi guni predicarnu ca noticia galán stiʼ Reinu (Apoc. 12:17). Dxandíʼ malu laabe, qué riabe guirutiʼ ne nápabe poder. Peru nuu xiixa ni zacané laanu gudxíʼlunu laabe. ¿Xii ni yaʼ?

3. ¿Xi zacané laanu cadi guidxíbinu?

³ Qué zuchibi Binidxabaʼ laanu pa nuunu seguru nadxii Jehová laanu ne cayacané laanu (Sal. 118:6). Ti ejemplu nga ni bizaaca hombre ni bicaa Salmo 118, gúpabe stale guendanagana dede qué nusisiaasiʼ ca ni laabe. Gúpabe stale enemigu, ne ládecaʼ nuu binni risaca (versículo 9 ne 10). Guyuu biaje nuu tu gucalaʼdxiʼ nucaa laabe nucheebe, peru biʼniʼ huantarbe ni (versículo 13). Ne laaca nadipaʼ modo guluu jneza Jehová laabe (versículo 18). Neca gudíʼdibe lu guiráʼ ngue, bicaabe lu ti canción: «Qué zadxibediaʼ». ¿Xiñee qué nidxíbibe yaʼ? Purtiʼ gúnnabe, neca guluu jneza Bixhózebe ni nuu guibáʼ laabe, peru nadxiiruʼ laabe. Guyuu salmista que seguru, intiica si gueeda guizaaca, nadxii Dios laa ne nuu listu para gacané laabe (Sal. 118:29).

4. ¿Xi zanda gudxíʼlunu pa nanna dxíchinu nadxii Jehová laanu?

⁴ Cada xpinni Cristu naquiiñeʼ ganna dxichi dxandíʼ peʼ nadxii Jehová laa. Pa nuunu seguru zacá ni la? zacané nga laanu gudxíʼlunu chonna cosa ni nabé ruchibi binni. Primé, guidxíbinu cadi málasi qué ganda gudiʼnu ni caquiiñeʼ familia stinu. Guiropa, guidxíbinu binni. Ne guionna, guidxíbinu gátinu. Gunna dxichi ca hermanu ni bizéʼtenu lu primé párrafo que nadxii Jehová laacaʼ ne ngue gucané laacaʼ para gudxiilucaʼ guiráʼ ni ruchibi laacaʼ.

GUIDXÍBINU CADI MÁLASI QUÉ GANDA GUDIʼNU NI CAQUIIÑEʼ FAMILIA STINU

5. ¿Xii nga ca cosa ni zanda cuʼ xizaa ca xaíque stiʼ familia? (Biiyaʼ foto ni zeeda lu portada).

⁵ Ca hermanu ni naca xaíque stiʼ familia rizaaláʼdxicaʼ gudiicaʼ ni caquiiñeʼ familia sticaʼ (1 Tim. 5:8). Pa nga nga ni cazaacaluʼ, zándaca lu pandemia stiʼ COVID-19 riʼ nuuluʼ xizaa gunítiluʼ dxiiñaʼ stiluʼ, ximodo gudiiluʼ ni gó familia stiluʼ o quíxeluʼ ra nabézatu. Ne dede zándaca guiníʼ íqueluʼ pa gunítiluʼ dxiiñaʼ stiluʼ qué zadxélaluʼ stobi. O guizaacaluʼ casi Néstor ne María, ca hermanu ni maca bizéʼtenu, ne guiníʼ íqueluʼ qué zanda guibanitu né caadxi si cosa. Huaquiiñeʼ Binidxabaʼ ca cosa ni ruchibi riʼ, ne huacaabe stale xpinni Cristu gusaana de gúnicaʼ ni ná Jehová.

6. ¿Xi racalaʼdxiʼ Binidxabaʼ guiníʼ íquenu?

⁶ Racalaʼdxiʼ Binidxabaʼ guiníʼ íquenu qué rizaalaʼdxiʼ Jehová cada tobi de laanu, ne ora caquiiñenu gacanebe laanu para gudiʼnu ni caquiiñeʼ familia stinu la? qué zulábibe laanu. Pa guiábanu lu trampa riʼ, zándaca guiníʼ íquenu jma galán cadi gusaananu dxiiñaʼ stinu, neca guchéʼnenu ca principiu ni zeeda lu Biblia.

7. ¿Xi cayabi Jesús laanu zuni Jehová?

⁷ Jesús nga ni jma runibiáʼ chaahuiʼ Bixhózenu ni nuu guibáʼ. Nga runi cayábibe laanu: «Maʼ nanna Bixhózetu xi caquiiñetu dede ante guinábatu ni laa» (Mat. 6:8). Ne laaca nanna Jesús nuu Jehová listu para gudii ni caquiiñenu. Guiranu, ca xpinni Cristu, nuunu ndaaniʼ familia stiʼ Dios. Ne cumu laabe nga xaíque stinu la? zanda chuʼnu seguru zúnibe ni rinábabe guni ca ni naca xaíque stiʼ familia casi ná 1 Timoteo 5:8.

8. a) ¿Xi zacané laanu cadi guidxíbinu ora guiníʼ íquenu qué zanda gudiʼnu ni caquiiñeʼ familia stinu? (Mateo 6:31-33). b) ¿Ximodo zanda chinándanu ejemplu stiʼ guendaxheelaʼ ni rihuinni lu foto stiʼ párrafo riʼ?

⁸ Pa dxandíʼ runi crenu nadxii Jehová laanu ne familia stinu, ziuʼnu seguru zacanebe laanu gápanu ni caquiiñenu (biindaʼ Mateo 6:31-33). Racalaʼdxiʼ Jehová gudii ni caquiiñenu, rúnibe ni purtiʼ nadxiibe laanu ne rudiibe laanu jma que biaʼ ni rinábanu laabe. Dxi bizaʼbe Guidxilayú riʼ, qué nuzáʼsibe ca cosa ni caquiiñenu para guibáninu, sínuque pur nadxiibe laanu bizaʼbe stale cosa sicarú ni gusiecheʼ laanu (Gén. 2:9). Neca nuu biaje ni tidinésinu dxi nápanu, gudiʼnu xquixe peʼ purtiʼ nápanu ni. Jehová nga rudii ni laanu ne qué zusaana de gudiibe laanu «pan para yannadxí» (Mat. 6:11). Cadi guiaandaʼ laanu, guiráʼ ca cosa ni qué gápanu yanna qué zanda guchaaganu ca ni né guiráʼ ni chigudii Jehová laanu lu guidxilayú nacubi. Nga peʼ nga ni biʼyaʼ Néstor ne María (Is. 65:21, 22).

9. ¿Xi rusiidiʼ ejemplu stiʼ Néstor ne María lii?

⁹ Néstor ne María nga ti guendaxheelaʼ de Colombia. Guyuu ti tiempu gúpacabe stale cosa risaca. Sicaríʼ guníʼcabe: «Gucaláʼdxidu nibaninedu huaxiéʼ cosa para ganda guni predicardu jma, peru bidxíbidu purtiʼ guníʼ íquedu qué zabánidu nayecheʼ». ¿Xi bíʼnicabe para cadi guidxíbicabe yaʼ? Bietenaláʼdxicabe guiráʼ biaje bisihuinni Jehová nadxii laacabe. Guyuucabe seguru zapa Jehová laacabe, bisaanacabe dxiiñaʼ stícabe ra riáxacabe stale, bitoocabe lídxicabe ne yendézabe ti lugar ra caquiiñeʼ jma binni para guni predicar. ¿Ximodo runi sentírcabe pur decisión ni gucuaacabe yaʼ? Sicaríʼ guníʼ Néstor: «Huadúʼyadu dxandíʼ raca cumplir ca diidxaʼ ni cá lu Mateo 6:33. Qué huayaadxaʼ laadu gastiʼ. Ne dede jma nayecheʼ nuudu».

GUIDXÍBINU BINNI

10. ¿Xiñee qué ridxagayaanu gánnanu ridxibi binni sti binni?

¹⁰ Biaʼ tiempu huabani binni lu Guidxilayú riʼ, huayuninásaacaʼ laacaʼ (Ecl. 8:9). Nuu tu laa riquiiñeʼ autoridad ni napa para guniná binni, rúnicaʼ cosa malu ne ridíndecaʼ, ridindenecaʼ ne runi amenazarcaʼ ca compañeru de scuela o runinacaʼ familia sticaʼ. ¡Ngahuaʼ runi ridxibi binni sti binni! ¿Xi runi Binidxabaʼ ora guʼyaʼ cadxíbinu binni yaʼ?

11, 12. ¿Xi runi Binidxabaʼ ora ruuyaʼ ridxíbinu sti binni?

¹¹ Ora ruuyaʼ Binidxabaʼ ridxíbinu binni, riquiiñebe ni para gucaabe laanu gusaana de guni predicarnu ne cadi gúninu xcaadxi cosa ni rinabaʼ Jehová laanu. Huacaa Binidxabaʼ caadxi gobiernu gucueezacaʼ dxiiñaʼ stinu ne sanándacaʼ laanu (Luc. 21:12; Apoc. 2:10). Ndaaniʼ guidxilayú ni naazeʼ Binidxabaʼ riʼ stale binni riníʼ cosa feu ne ni cadi dxandíʼ de ca testigu stiʼ Jehová. Nga runi, ca ni runi cré ni riníʼcabe riʼ runi búrlacaʼ ne dede runinacaʼ laanu (Mat. 10:36). Peru qué ridxagayaanu riquiiñeʼ Binidxabaʼ ca cosa riʼ para guchibi laanu, purtiʼ ngaca biquiiñebe lu primé siglu (Hech. 5:27, 28, 40).

¹² Peru cadi ca gobiernu si nga riquiiñeʼ Binidxabaʼ para guchibi laanu. Nuu tu qué riná gaca Testigu purtiʼ ridxibi xi guiníʼ familia stiʼ. Jma ridxíbicabe ni qué guniná binni laacabe. Cumu guizáʼ nadxiicabe familia stícabe ne racaláʼdxicabe guiziidicaʼ ne gannaxhiicaʼ Jehová la? nga runi racanácabe ora guiniʼcaʼ mal de Dios ni dxandíʼ ne de ca xpinni. Peru nuu biaje ca familia ni bicaalú laacabe dxiqué, maʼ riziidicaʼ de lu Biblia. Yanna, ¿xi gúninu pa nuu tuuxa de familia stinu maʼ qué naʼ guiniʼné laanu yaʼ?

13. ¿Xiñee risaca gánnanu nadxii Jehová laanu ora gucaanáʼ familia stinu laanu? (Salmo 27:10).

¹³ ¡Guizáʼ riguu ca diidxaʼ ni zeeda lu Salmo 27:10 gana laanu! (Biindaʼ ni). Pa qué gusiáʼndanu guizáʼ nadxii Jehová laanu, qué zadxíbinu ora gucaalú binni laanu ne zaguube ndaayaʼ laanu pa guni huantarnu. Zudii Jehová laanu ni caquiiñenu para guibáninu, zacanebe laanu cadi guidxíbinu, chuʼnu nayecheʼ ne cadi guixélenu de laabe. Ne laasibe zanda gúnibe ni. Huayuuyaʼ Biniam dxandíʼ ni, laa nga hermanu ni bizéʼtenu lu primé párrafo que.

14. ¿Xi rusiidiʼ ejemplu stiʼ Biniam lii?

¹⁴ Gudixhe ique Biniam gaca testigu stiʼ Jehová neca nanna zazanándacabe laa. Sicaríʼ guniʼbe: «Qué lica niníʼ iqueʼ pabiáʼ nagana nga sananda gobiernu lii. Peru jma nga bidxibeʼ gucaalú familia stinneʼ naa. Bidxibeʼ guchiicheʼ bixhozeʼ ne maʼ cadi guni respetar familia stinneʼ naa pur nacaʼ Testigu». ¿Xi gucané laabe para maʼ cadi guidxíbibe yaʼ? Qué nusiaandabe nadxii Jehová laabe ne siempre rapa ca binni ni nadxii laa. Sicaríʼ bisiene Biniam: «Guníʼ iqueʼ xi guiráʼ huayuni Jehová para gacané ca xpinni ni huaxiéʼ napa bueltu, ca ni rúnicabe menu ne ca ni huayuniná binni laacaʼ. Gunnaʼ, pa qué guixeleʼ de Jehová la? laabe zaguube ndaayaʼ naa. Stale biaje biseguyoocabe ne gudíñecabe naa. Ne ora gudideʼ lu ca guendanagana que, bidieeʼ cuenta pa qué gusaananu Jehová la? guizáʼ zacanebe laanu». Para Biniam la? beeda gaca Jehová casi bixhoze, ne ca hermanu la? casi familia stiʼ.

GUIDXÍBINU GÁTINU

15. ¿Xiñee ridxíbinu gátinu?

¹⁵ Biblia ná enemigu stinu nga guendaguti (1 Cor. 15:25, 26). Guizáʼ riuʼnu xizaa ora guiníʼ íquenu zándaca gueeda gátinu, jmaruʼ si pa nápanu ti guendahuará o huará tuuxa binni ni nadxiinu. ¿Xiñee ridxíbinu gátinu yaʼ? Purtiʼ bizáʼ Jehová laanu para chuuláʼdxinu guibáninu sin qué chuʼ dxi gátinu (Ecl. 3:11). Peru cadi malu ndiʼ nga guidxíbinu gátinu, purtiʼ rucaani laanu gápanu laanu. Guzéʼtenu caadxi ejemplu, rucaani laanu gápanu ni ridoʼno, gúninu ejerciciu, cadi gúninu xiixa ni zanda cuʼ xquendanabáninu lu peligru, chuunu doctor ne guicaanu medicina ora caquiiñenu ni.

16. ¿Xi runi Binidxabaʼ purtiʼ nanna ridxíbinu gátinu?

¹⁶ Nanna Binidxabaʼ rusisácanu guendanabani. Nga runi laabe nabe zúninu intiica cosa dede gusaana de gaca xhamígunu Jehová para cadi gátinu (Job 2:4, 5). ¡Peru cadi dxandíʼ ni nabe ca! Cumu nápabe poder para guutibe ne nánnabe ridxíbinu gátinu la? nga runi racaláʼdxibe iquiiñebe ni para gudxiʼdéchenu Jehová (Heb. 2:14, 15). Nuu biaje, riquiiñeʼ Binidxabaʼ caadxi binni para guchíbicaʼ ne gábicaʼ laanu pa qué gusaana de gúninu ni ná Jehová la? zuuticaʼ laanu. O zándaca ora gápanu xiixa guendahuará iquiiñebe ni para guchíbibe laanu ne guchéʼnenu Jehová. Ne cumu nánnabe zuchéʼnenu Dios pa guicanu rini la? nga runi rucaabe ca doctor o familia stinu ni cadi naca Testigu para gábicaʼ laanu guicanu rini. O zándaca chuʼ tuuxa gucaa laanu guicaanu xiixa tratamientu ni cadi jneza guicaa ca xpinni Cristu.

17. Casi ná Romanos 8:37-39, ¿xiñee cadi naquiiñeʼ guidxíbinu gátinu?

¹⁷ Nin tobi de laanu qué racalaʼdxiʼ gatiʼ, peru nánnanu pa gueeda gátinu la? qué zusaana Jehová de gannaxhii laanu (biindaʼ Romanos 8:37-39). Qué rusiaandaʼ Jehová ca xhamigu ni maʼ guti, para laabe casi ñaca nabánirucaʼ (Luc. 20:37, 38). Ne racalaʼdxiʼ Jehová gusibani laacabe sti biaje (Job 14:15). Guizáʼ risaca ni gudixe Jehová para guicaanu guendanabani ni qué zaluxe (Juan 3:16). Nanna dxíchinu pabiáʼ nadxiibe ne rápabe laanu. Nga runi, pa huaranu o chuʼ tu gacalaʼdxiʼ guuti laanu, qué zudxiʼdéchenu Jehová. Ni zúninu nga zadxíñanu ra nuube para quixhedxibe ladxidoʼno, gudiibe laanu guendabiaaniʼ ne stipa. Nga peʼ nga ni biʼniʼ Valeria ne xheelaʼ (Sal. 41:3).

18. ¿Xi rusiidiʼ ejemplu stiʼ Valeria lii?

¹⁸ Dxi napa Valeria 35 iza, gudxi ca doctor laa napa ti cáncer nabé malu. Guidúʼyanu ximodo gucané guendarannaxhii stiʼ Jehová laabe para cadi guidxíbibe gátibe. Sicaríʼ guniʼbe: «Ni gudxi ca doctor que naa bichaani xquendanabánidu. Ni zanda si gúnicabe naa nga ti operación naroʼbaʼ. Guyaaʼ ra nuu stale doctor, peru nin tobi qué niná ñuni operar naa sin rini. Guizáʼ bidxibeʼ, peru cumu racalaʼdxeʼ guzuubaʼ stiidxaʼ Dios la? qué ninaʼyaʼ nucaacabe naa rini. Biaʼ dxi huabaneʼ maʼ bisihuinni Jehová pabiáʼ nadxii naa..., yanna maʼ naa chigusihuinneʼ pabiáʼ nadxieeʼ laabe. Cada biaje gudii ca doctor que naa ti noticia ni cadi galán la? jmaruʼ si rapaʼ stipa para cadi gudieeʼ lugar guireené Binidxabaʼ stema. Racalaʼdxeʼ chuulaʼdxiʼ Jehová ni cayuneʼ. Gudiʼdiʼ si tiempu, biʼniʼ operárcabe naa sin rini, ne biree operación que galán. Raparuáʼ guendanagana pur guendahuará stinneʼ, peru qué huasaana Jehová de gudii laadu ni caquiiñedu. Purtiʼ ti semana ante gábicabe naa napaʼ cáncer, biʼniʼ estudiarnu lu reunión artículo ni láʼ “Gácanu nadxibalú para gudxíʼlunu ca yuubaʼ stinu”.c Biaʼsi peʼ ngue nga ni caquiiñedu. Stale biaje bidúʼndadu ni. Pur ca artículo riʼ ne pur qué nusaana de ñuni estudiardu Biblia la? naa ne xheelaʼ gunda guyúʼdxidu, qué ñaca lúgudu ne gucuaadu decisión jneza».

GUDXÍʼLUNU CA COSA NI RUCHIBI LAANU

19. ¿Xi zazaaca maʼ cadi candaa?

¹⁹ Lu guidubi Guidxilayú nuu hermanu ni huayacané Jehová para gudxiilucaʼ ca guendanagana ni huayápacaʼ ne huadxiilucaʼ Binidxabaʼ (1 Ped. 5:8, 9). Lii laaca zanda gúniluʼ ni. Maʼ cadi candaa, zabi Jehová Jesús ne ca ni guni mandarné laa maʼ bedandá hora para gunitilucaʼ «guiráʼ ni cayuni Binidxabaʼ» (1 Juan 3:8). Despué de nga, zuuyaʼ ca xpinni Dios ni nuu lu Guidxilayú modo gaca cumplir promesa riʼ: «Gastiʼ qué zuchibi ne qué zuniditi lii» (Is. 54:14; Miq. 4:4). Laga guedandá dxi ca, gúninu stipa gudxíʼlunu ni ruchibi laanu.

20. ¿Xi zacané laanu gudxíʼlunu ca ni ruchibi laanu?

²⁰ Naquiiñeʼ gápanu stale confianza nadxii Jehová ne rapa ca xpinni. Para gápanu confianza ca, naquiiñeʼ guiníʼ íquenu ximodo huayapa Jehová ca xpinni ne guininu de laani né xcaadxi binni. Laaca cadi guiaandaʼ laanu ximodo huayacanebe laanu ora gudídinu lu xiixa guendanagana ni guluu xizaa laanu. Né stipa stiʼ Jehová, zanda gudxíʼlunu ni ruchibi laanu (Sal. 34:4).