Ca cosa feu ni raca lu guerra
Gastiʼ sti cosa ni jma feu que guʼyaʼ binni gaca guerra ne chuʼ guendaridinde. Ca soldadu ne ca binni ni nabeza ca lugar ra raca guerra nánnacaʼ xi guiráʼ cosa feu rizaaca luni ne guizáʼ huayuniná ni laacaʼ.
CA SOLDADU
«Guiráʼ dxi nga ruuyaluʼ ximodo cayuninácabe ne dede cayuuticabe binni. Ne nisi maʼ cadxibi stúbiluʼ purtiʼ qué gánnaluʼ xi zándaca gueeda guizaacaluʼ» (Gary, Gran Bretaña).
«Gucuá ti bala decheʼ ne luaʼ, ne biiyaʼ ximodo biiticabe jma binni dede ca xcuidi ne ca binnigola. Ne ora gúʼyaluʼ guiráʼ ndiʼ maʼ qué rialuʼ ne maʼ qué runi sentirluʼ gastiʼ pur binni» (Wilmar, Colombia).
«Ora gucuaagucabe tuuxa nezaluluʼ, qué ziuu dxi guiaandaʼ lii modo bicaabe ridxi ne pabiáʼ cayacanabe. . . , qué ziuu dxi guiaandaʼ lii binni ca» (Zafirah, Estados Unidos).
BINNI NI NABEZA RA CAYACA GUERRA
«Guníʼ iqueʼ maʼ qué zanda guibaneʼ nayecheʼ. Ridxibeʼ gateʼ ne laaca ridxibeʼ guuticabe familia stinneʼ o ca xhamiguaʼ» (Olexandra, Ucrania).
«Napa xidé gúnidu fila jma de gande hora para guicaadu guendaró. Né dxiibi maʼ zuhuaʼdu lu fila que purtiʼ zándaca gueeda guicá ti bala laadu» (Daler, Tayikistán).
«Biiticabe bixhozeʼ ne jñaaʼ lu guerra ni guca xquídxidu. Biaanaʼ stubeʼ, guirutiʼ ñapa naa ne niguixhedxí ladxiduáʼ» (Marie, Ruanda).
Neca gudiʼdiʼ ca binni riʼ stale cosa feu pur ca guerra ca, peru bidxélacabe xiixa ni gudixhedxí ladxidóʼcabe. Ne cadi ngasi, laaca nánnacabe huidxe si maʼ qué ziuu guerra ne maʼ qué zadinde binni. Revista Torre stiʼ ni rapa riʼ caquiiñeni Biblia para gusiéneni ximodo zaca ndiʼ.