¿Ñee jneza nga cueza chupa binni juntu pa ca’ru’ guichaganacaʼ la?

Ni ricabi Biblia

Biblia rusiidiʼ qué racala’dxi’ Dios guni cometernu «pecadu sexual» (1 Tesalonicenses 4:3). Biblia ná «pecadu sexual» nga chuʼné binni ni cadi xheelaʼ, chuʼné muxeʼ o gatané tuuxa ante guichaganáʼ.

• ¿Xiñee nabé risaca para Dios guichaganáʼ binni?

• ¿Ñee jneza nga cueza chupa binni juntu ante guichaganacaʼ para si gúʼyacaʼ pa zié ni laacaʼ galán la?

• ¿Ximodo zanda guibani binni nayecheʼ lu xquendaxheelaʼ yaʼ?

¿Xiñee nabé risaca para Dios guichaganáʼ binni?

• Dios gudixhe guichaganáʼ binni. Gudíxhebe ni dxi bicheelabe primé pareja guyuu lu Guidxilayú riʼ (Génesis 2:22-24). Qué niná Dios nibeza si hombre ne gunaa que juntu sin nichaganacaʼ.

• Nanna Dios xii nga ni jma galán para laanu. Gudíxhebe guichaganáʼ hombre ne gunaa para chu’ca’ juntu biaʼ dxi guibánicaʼ. Gudixhe Dios gaca ni zacá para gapa cada tobi de ca binni ni nuu ndaaniʼ familia ne para ché ni laacaʼ galán. Guníʼ ique ndiʼ: Para guni armarnu ti mueble jneza la? caquiiñeʼ chinándanu instrucción stiʼ ni bizáʼ ni ca. Zacaca nga naquiiñeʼ gúninu, pa racaláʼdxinu guibaninenu familia stinu nayecheʼ la? naquiiñeʼ chinándanu ca instrucción ni rudii Dios laanu. Pa gúninu ni la? zié ni laanu galán (Isaías 48:17, 18).

  

• Rapa binni guendanagana ora ratané tuuxa ante guichaganáʼ. Caadxi de laani nga raca xiiñicaʼ neca qué gápacaʼ gana o ricá xiixa guendahuará laacaʼ ne dede rápacaʼ guendahuará emocional.

• Ti regalu ni bidii Dios binni guidxilayú nga ganda gápacaʼ xiiñicaʼ ora gápacaʼ relación sexual. Nabé risaca regalu riʼ purtiʼ para Dios guizáʼ risaca guendanabani, nga runi ribézabe iquiiñenu regalu riʼ né binni si ni bichagananu. Ne gúninu ni né respetu, zacá zusihuínninu rusisácanu guendaxheelaʼ (Hebreos 13:4).

¿Ñee jneza nga cueza chupa binni juntu ante guichaganacaʼ para si gúʼyacaʼ pa zié ni laacaʼ galán la?

Cadi caquiiñeʼ cueza chupa binni juntu ante guichaganáʼ para si gúʼyacaʼ pa zié ni laacaʼ galán, purtiʼ pa gúnicabe zacá la? ora tiica nácabe zanda guixélecabe. Peru ribani ca guendaxheelaʼ ca nayecheʼ ora guirópacabe rúnicabe ti compromisu ne rúnicabe stipa guni chaahuicabe ca guendanagana ni rápacabe.a Ne lu ti guendaxheelaʼ si nga randa rúnicabe ca ni bizéʼtenu riʼ (Mateo 19:6).

¿Ximodo zanda guibani binni nayecheʼ lu xquendaxheelaʼ yaʼ?

Gastiʼ guendaxheelaʼ perfectu. Peru zanda guibánicabe nayecheʼ pa gúnicabe ni ná ca conseju zeeda lu Biblia. Guidúʼyanu chupa chonna de laacani:

• Laguizaalaʼdxiʼ jma ni caquiiñeʼ xheelatu ne cadi ni caquiiñesitu (1 Corintios 7:3-5; Filipenses 2:3, 4).

• Guiráʼ dxi laguni stipa pur gannaxhiisaatu ne guni respetarsaatu (Efesios 5:25, 33).

• Ante guiniʼtu xiixa, laguiníʼ ique chaahuiʼ (Proverbios 12:18).

• Laguni perdonar nagueendaca ne lagapa paciencia (Colosenses 3:13, 14).