¿Ñee bueltu nga xcu guiráʼ cosa malu la?

Ni ricabi Biblia

Coʼ. Biblia ná cadi malu nga bueltu ne cadi pur laani cazaaca cosa malu, nuu ti dichu ná «Bueltu nga xcu guiráʼ cosa malu», ne stale binni riníʼ ique zacá riete ni lu Biblia. ¿Peru ñee dxandíʼ nga la? Coʼ. Lu Biblia ná: «Guendarannaxhii bueltu nga xcu guirá cosa malu» (1 Timoteo 6:10, Reina- Valera, 2009).a

• Ni riníʼ Biblia de bueltu

• ¿Xiñee nabé malu gannaxhiinu bueltu?

• ¿Xi zabeendunu pa gúninu ni ná Biblia?

• Conseju ni rudii Biblia laanu de bueltu

Ni riníʼ Biblia de bueltu

Biblia ná, pa iquiiñenu ni jneza la? zapa ni laanu ne zacaneni laanu (Eclesiastés 7:12). Laaca ruzeeteʼ Biblia ora rudii binni de ni napa ne racané xcaadxi la? rié ni laacaʼ galán (Proverbios 11:25).

Laaca rusietenalaʼdxiʼ Biblia laanu cadi puru si bueltu guicá íquenu. Hebreos 13:5 ná: «Lagusihuinni cadi nadxiitu bueltu pur modo nabánitu, sínuque lachuu nayecheʼ né ca cosa si ni nápatu». ¿Xi rusiidiʼ versículo riʼ laanu yaʼ? Neca riquiiñenu bueltu peru cadi naquiiñeʼ gácani ni jma risaca lu xquendanabáninu. Nga runi caquiiñeʼ chuʼnu nayecheʼ né ca cosa si ni caquiiñenu: casi guendaró ni gácunu ne ti lugar ra cuézanu (1 Timoteo 6:8).

¿Xiñee nabé malu gannaxhiinu bueltu?

Biblia ná ca binni ni ricá ique gapa jma la? qué zacaacaʼ guendanabani ni qué zaluxe (Efesios 5:5). ¿Xiñee yaʼ? guidúʼyanu chupa razón. Primé, purtiʼ ca binni ni runi ni bizéʼtenu riʼ la? casi ñaca cayuni adorarcaʼ bidóʼ o cayuni adorarcaʼ Dios falsu (Colosenses 3:5). Ne guiropa, ca binni ni ricá ique gapa jma la? stale biaje qué rúnicaʼ ni ná Dios. Ne Proverbios 28:20 ná «ni cuyubi gaca ricu nagueenda la? qué ziaana sin castigu». Ora ricá ique binni gapa jma la? zanda gucaa ni laa cuanaʼ, guni secuestrar o guuti binni para gapa jma bueltu.

Neca qué gúninu cosa malu, peru pa gannaxhiinu bueltu la? zápanu guendanagana. Biblia ná: «Ca ni ricá ique gaca ricu la? riábacaʼ lu tentación ne lu trampa, rápacaʼ stale deseu malu ni runiná laacaʼ» (1 Timoteo 6:9).

¿Xi zabeendunu pa gúninu ni ná Biblia?

Pa guzúʼbanu stiidxaʼ Dios ne cadi gúninu xiixa cosa malu para si gápanu bueltu, qué zacananu ne ziuulaʼdxiʼ Dios ni gúninu. Nga runi pa gúninu stipa gúninu ni ná Dios laapebe cayuni prometerbe laanu: «Qué zusaanaʼ lii ne qué ziaanadxieeʼ de gacaniaʼ lii» (Hebreos 13:5, 6). Ne Biblia ná «ti hombre ni runi ni jneza la? zacaa stale ndaayaʼ» (Proverbios 28:20).