Guerra nuclear ¿Xi caníʼ Biblia de laani?

Nuu si de gaca ti guerra nuclear lu guidxilayú purtiʼ ca guidxi ni jma nadipaʼ ca nápacaʼ stale bomba para tíndecaʼ ne cayúnirucaʼ jma de laani. Nga runi nabé raca preocupar binni, purtiʼ nánnacaʼ ra chaʼ jma bomba la? jma nuu de guzulú ti guerra. Ne stale tu ridxibi ora guiníʼ ique, pa iquiiñe ti guidxi ti bomba nahuiiniʼ la? pur nga zanda guzulú ti guerra nuclear naroʼbaʼ ni zunitilú guidxilayú riʼ. Casi ruzeeteʼ, Bulletin of the Atomic Scientists (Boletín de Científicos Atómicos): «nabáninu né dxiibiʼ purtiʼ nánnanu ora tiica si zanda guzulú ti guerra nuclear».

¿Ñee zaca ti guerra nuclear la? ¿Nilá guidxilayú riʼ pa nizaaca ni la? ¿Xi zanda gúninu pa cadxíbinu guizaaca ti guerra? ¿Xi caníʼ Biblia de laani?

Raríʼ zucábinu ca pregunta riʼ:

• ¿Ñee maca bizeeteʼ Biblia ziuu ti guerra nuclear la?

• ¿Ñee zudii Dios lugar gaca ti guerra nuclear la?

• ¿Zalá guidxilayú riʼ la?

• ¿Xi zanda gacané lii para cadi guidxíbiluʼ pa nabé riníʼ íqueluʼ zanda guizaaca ti guerra nuclear?

• Ora ruzeeteʼ Biblia de Armagedón, ¿ñee caniʼni de ti guerra nuclear la?

• Casi riete lu Biblia, ¿ximodo chigunduuxeʼ Dios ca guerra ca?

• ¿Ñee ruzeeteʼ libru stiʼ Apocalipsis zaca ti guerra nuclear la?

¿Ñee maca bizeeteʼ Biblia ziuu ti guerra nuclear la?

Qué ruzeeteʼ diʼ Biblia de ca tipu guerra ca, peru luni riete modo zaca xpiáʼ binni, ni zúnicaʼ ne zazaaca cosa ni zándaca gucaa gaca ti guerra mundial.

Biiyaʼ ximodo cazaaca ni riete lu ca textu riʼ yanna:

Ni rusiidiʼ Biblia: Ca discípulo que gunabadiidxacaʼ Jesús: «Gudxi laadu [...] xi señal gusihuinni presencia stiluʼ ne dxi guiluxe guidxilayú riʼ». Óraque bicabi Jesús laacabe: «Zadinde ti guidxi ne sti guidxi ne zucaalú ti reinu sti reinu» (Mateo 24:3, 7).

Caadxi cosa ni zazaaca ca dxi stinu riʼ: Stale guidxi ni ruzáʼ arma ni runitilú jma ruʼ si cadindesaacaʼ ca dxi riʼ.

«Lu ca últimu iza riʼ jma cayaca stale guerra ne nabé nuu guendaquéiquiiñeʼ lu guidxilayú» (Proyecto de Datos de Localización y Eventos de Conflictos Armados).

Ni rusiidiʼ Biblia: «Lu tiempu ra mayaca gueeda fin zadindené rey del sur laabe [rey del norte]» (Daniel 11:40).

Caadxi cosa ni zazaaca ca dxi stinu riʼ: Casi maca bizeeteʼ Biblia nuudinde caadxi guidxi para gusihuínnicaʼ tuu nga napa jma poder. Neca cadi cahuinni cadinde ca guidxi roʼ riʼ peru cuzaʼcaʼ stale arma para chigunitilucaʼ.

«Lu ca últimu chii iza ca jma nga cadinde ca guidxi ca ne dede ca guidxi roʼ ca runi apoyarcaʼ ca guidxi ni cadinde ca» (Proyecto de Datos de Localización y Eventos de Conflictos Armados).

Ni rusiidiʼ Biblia: «Lu ca últimu dxi jma nagana zaca tiempu ne nadipaʼ zaca para binni guni huantar ni». Purtiʼ . . .«qué zanacaʼ chuʼcaʼ de acuerdu, zaniʼca mal de sti binni para guninacaʼ, ne qué zucueezacaʼ laacaʼ, zácacaʼ naduxhuʼ» (2 Timoteo 3:1-3).

Caadxi cosa ni zazaaca ca dxi stinu riʼ: Tiempu riʼ, ca xaíque stiʼ ca guidxi ca raca nagana para laacaʼ chuʼcaʼ de acuerdu. Lugar de guyúbicabe modo guni chaahuicabe ca guendanagana ca, laga ruchíbicabe binni ne rucaacabe laacaʼ gúnicaʼ ni racaláʼdxicabe. Ne pur guiráʼ ni cazaaca riʼ zándaca gueeda guizaaca ti guerra nuclear.

«Pa qué guyúbinu modo gacanenu gaca chaahuiʼ ca guendanagana ca jma ruʼ si zaroobaʼ ca ni ne zuniná ca ni» (Samir Saran ne Jane Harman, Foro Económico Mundial).

¿Ñee zudii Dios lugar gaca ti guerra nuclear la?

Qué ruzeeteʼ Biblia ni. Peru ruzeeteʼ Biblia «zuuyaʼ binni cosa ni guchibi laa», o zazaaca stale cosa feu ca dxi stinu riʼ (Lucas 21:11). Ne tobi de laacani nga dxi bisábacabe bomba lu Guiropa Guerra Mundial que. Biblia cusiene xiñee cudii Dios lugar gaca ca guerra ca. Pa riuuláʼdxiluʼ gánnaluʼ jma, zanda gúʼyaluʼ videu ni láʼ ¿Xiñee cudii Dios lugar chuʼ guendananá?

¿Zalá guidxilayú riʼ la?

Zalá ni. Ne neca iquiiñecabe guiibaʼ nadipaʼ qué zudii Dios lugar gunitilúcabe guidxilayú riʼ. Biblia ná qué zudii Dios lugar gunitilúcabe guidxilayú riʼ ne zabani binni ndaaniʼni para siempre.

Stale binni riníʼ ique huidxegá si, maʼ chupa chonna si binni ziaana ndaaniʼ guidxilayú ni maʼ gucadé ne ni maʼ nuu comtaminadu pur guiráʼ gas ni riquiiñecabe lu ca guerra. Peru Biblia ná zaca chaahuiʼ guidxilayú riʼ neca guniná ca guerra ca ni.

Bizáʼ Jehová guidxilayú riʼ para ganda gaca chaahuini stúbini, laaca nánnanu zaquiiñeʼ Jehová poder stiʼ para guni chaahuiʼ guidxilayú ne siempre zácani ti lugar galán ra ganda guibani binni (Salmo 37:11, 29; Apocalipsis 21:5).

¿Xi zanda gacané lii para cadi guidxíbiluʼ pa nabé riníʼ íqueluʼ zanda guizaaca ti guerra nuclear?

Nuu tu laa ridxibi gueeda guizaaca ti «guerra nuclear» ne guninani laa. ¿Ximodo racané ca promesa ne ca conseju ni zeeda lu Biblia laanu para cadi guídxibinu ne gatadxí ladxidoʼno yaʼ?

Biblia caníʼ de ti futuro galán para guidxilayú ne para ca binni ni cueeza luni. Ra gánnanu de esperanza riʼ rinaaze dxiichiʼni xpídanu «cásica rinaaze dxiichiʼ ti ancla barcu» ne racaneni laanu para cadi guidxibi xhaatanu (Hebreos 6:19, nota). Laaca galán guibáninu para yannadxí si, ne cadi guicá ique xhaatanu pur ni zanda guizaaca guixíʼ. Casi guníʼ Jesús, «guyuu conforme né ca problema si stiʼ cada dxi» (Mateo 6:34).

Galán gúninu guiranu pa gápanu xquendabiaaninu ne ca ni runi sentirnu, ti modo zanda gúninu ni nga cadi gucaadiáganu información ni zanda guchibi laanu. Casi ora maʼ caníʼcabe de ca guerra nuclear, ora ma’ caní’cabe xii chiguizaca’ ne ni riete lu ca noticia ca. Peru qué riní’ ndi nga guseegu’lunu ne cadi guidú’yanu xi pe’ cazaaca, sínuque gúninu ni nuu lu nanu para cadi guiní’ iquenu cosa ni qué zanda gucueezanu ne zándaca ni qué zazaaca.

Cadi guicá ique xhaatalu’ ca noticia feu ca ne maʼ qué guiníʼ íqueluʼ ca cosa galán ni nápaluʼ.

Ra gánnalu jma de ca promesa stiʼ Dios zanda gudiicani lii esperanza, zusiecheʼ ni lii ne zaguixhedxini ladxidoʼloʼ.

Ora ruzeeteʼ Biblia de Armagedón, ¿ñee caniʼni de ti guerra nuclear la?

Stale binni riní’ ique naca Armagedón ca ti guerra ni zunítilu guiráʼ binni lu guidubi guidxilayú. Ne riníʼ íquecabe guizáʼ feu zaca guerra ca.

Peru lu Biblia riete diidxaʼ Armagedón ca nga, ti guerra entre «ca rey nuu lu guidubi guidxilayú» o ca gobiernu ni cayuni mandar yanna, ne Diosa (Apocalipsis 16:14, 16). Qué zunitiluni guiráʼ binni nabeza ndanni guidxilayú dí’ cásica runi ti bomba nuclear, ne qué zunitilú Dios guiráʼ xixé binni lu Armagedón, sínuque ca binni malu si ne zacá zapa binni paz ne zabánicaʼ seguru (Salmo 37:9, 10; Isaías 32:17, 18; Mateo 6:10).

Casi riete lu Biblia, ¿ximodo chigunduuxeʼ Dios ca guerra ca?

Zusihuinni Jehováb poder stiʼ ra gunduuxeʼ ca guendaridinde stiʼ ca nación, zuxuuxe guiráʼ ca guiiba’ ni riquiiñecabe lu guerra ne zaquiiñebe Reinu stibe para gúnibe ni, laani nga ti gobiernu ni nuu guibá’ ni chiguni mandar guidxilayú (Daniel 2:44).

Zusiidi Reinu stiʼ Dios binni guibánicaʼ en paz ne chuʼcaʼ tobi si. Cumu ma’ ti gobiernu si nga chichuu lu guidubi guidxilayú la? ma’ qué zadindedi’ ca guidxi ca ne ma’ qué liica zasiidiʼ ca binni ca tíndeca para checa’ lu guerra (Miqueas 4:1-3). ¿Xii zazaaca óraca yaʼ? «Ne dxandipeʼ zabí cada tobi de laacaʼ xaʼnaʼ lubáʼ uva ne xaʼnaʼ yaga duʼgaʼ stiʼ, ne qué ziuu tu guchibi laacaʼ» (Miqueas 4:4).