Modo nuudinde binni pur política rusihuinni cayaca cumplir ti profecía stiʼ Biblia
Ca dxi riʼ, maʼ cadi nuu binni tobi si pur política. Ne cadi jneza ruuyaʼ stale binni ca ley ni riguixhe gobiernu ne pur nga rucaalúcabe laacaʼ. Dede né ca ni riguixhe ca ley ca ne xcaadxi ni runi dxiiñaʼ ládecabe qué riuucaʼ de acuerdu. Pur ca cosa riʼ riuudinde ca ni nuu lu política ne pur laani maʼ qué randa runi gobiernu dxiiñaʼ jneza.
Pur modo runi mandar Estados Unidos ne Reino Unido maʼ cadi nuu binni xquídxicaʼ de acuerdu ne rucaalucaʼ laacabe. Ni cazaaca riʼ rusihuinni ni cayaca cumplir ni zeeda lu Biblia purtiʼ maca bizeeteni ora guizaaca ndiʼ, zeeda Reinu stiʼ Dios ne zuni chaahuiʼ ni modo nabáninu.
Zucaalúcabe gobiernu «ra maʼ ziluxe ca últimu dxi»
Cuzeeteʼ libru stiʼ Daniel ti profecía nabé risaca. Lu profecía ca guníʼ Dios xi chiguizaaca «ra maʼ ziluxe ca últimu dxi». Ora bicaa Daniel ca diidxaʼ ca guniʼbe zazaacacani despué, ne zuchaa modo nabani binni (Daniel 2:28).
Lu ti bacaandaʼ biluíʼ Dios profecía riʼ rey stiʼ Babilonia. Lu bacaandaʼ que, biiya rey que ti estatua ngola ne gadxé gadxé material gúcani. Despué bisiene profeta Daniel zeeda gaca cada parte stiʼ estatua que ti potencia mundial ni ziuu peru ra tidiʼ tiempu ziábacani.a Ra tidiʼ tiempu zadxelasaa ti guié estatua que ne zacadeni. Runi representar guié ca Reinu stiʼ Dios, ti gobiernu ni maʼ gudixhestibe (Daniel 2:36-45).
Profecía ca ná zunitilú Reinu stiʼ Dios guiráʼ gobiernu ni nuu yanna. Ne de Reinu ca nga bisiidiʼ Jesús ca xpinni guinábacaʼ Dios lu oración ora guníʼ: «Gueeda Reinu stiluʼ» (Mateo 6:10).
Peru ¿para peʼ cuzeeteʼ profecía ca zucaalúcabe gobiernu yaʼ? Profecía que ná naca batañeeni de «guiibaʼ nuchaʼ beñe» (Daniel 2:33). Ma’ gadxé si guca ca batañeeni purtiʼ cadi naguidxi peʼ cani casi ca xcaadxi parte stini. Ndiʼ rusihuinni maʼ gadxé potencia riʼ de xcaadxi potencia ni guyuu ante de laani. ¿Ximodo ndiʼ yaʼ? Guidúʼyanu xiruʼ bizeeteʼ profecía stiʼ Daniel de laani:
Profecía ca caníʼ runi representar batañee de guiibaʼ nuchaʼ beñe ca, ti potencia mundial ni qué zaca naguidxi. Ne qué zácani nadipaʼ purtiʼ laaca binni xquídxicabe zucaalú laacabe.
Ximodo cayaca cumplir profecía stiʼ Daniel
Batañee estatua que nga potencia mundial ni nuu ca dxi nabáninu riʼ, laani nga Estados Unidos ne Reino Unido. ¿Xi culuíʼ zacá ni yaʼ?
Casi maca bizéʼtenu naca batañee estatua ca de «guiibaʼ nuchaʼ beñe», nga runi cadi naguidxi diʼ ni (Daniel 2:42). Ca dxi stinu riʼ gobiernu stiʼ Estados Unidos ne Reino Unido qué gapa peʼ cani stipa purtiʼ nuudinde binni xquídxicaʼ ne cadi nuucaʼ tobi si. Ndaaniʼ guiropaʼ guidxi riʼ cucaalúcabe gobiernu, ne ridíndecaʼ pur ca derechu sticaʼ. Ne dede ca xaíque ni ribícabe laa peʼ caʼ qué riuucaʼ de acuerdu. Cumu riuudinde ca binni ca, nga runi qué randa runi ca gobiernu ca ni naguixhe íquecaʼ.
Lu capítulo 2 stiʼ Daniel maca cá ziuudinde binni pur política.
Guiduʼyaʼ chaahuinu profecía stiʼ Daniel, xi riniʼni ne ximodo cayaca cumplirni ca dxi stinu riʼ.
Profecía: «Qué ziuu reinu ca tobi si, peru zácani naguidxi casi guiibaʼ» (Daniel 2:41).
Xi riniʼni: Napa Estados Unidos ne Reino Unido ti ejércitu nabé nadipaʼ necaxa riuudinde ca políticu sticaʼ ne ca binni xquídxicaʼ. Nga runi zanda guininu nadipaʼ gobiernu stícabe casi guiibaʼ.
Modo guca cumplirni
Lu iza 2023 guca ti lista ra zeeda ca guidxi ni jma bi’ni’ gastu ra guzíʼcabe guiibaʼ ni riquiiñecabe lu guerra ne luni zeeda Estados Unidos ne Reino Unido nga ca guidxi ni jma biʼniʼ gastu que ca doce guidxi ni zeeda lu lista que (Stockholm International Peace Research Institute [Instituto Internacional de Estudios para la Paz de Estocolmo]).
«Nuu Estados Unidos ne Reino Unido tobi si [...] para gacanésaacaʼ ne gápacaʼ ca cosa risaca sticaʼ ne riquiiñecabe tecnología de ni jma nacubi para gúnicabe ni [...;] racanésaadu ne rúnidu dxiiñaʼ juntu» (Comando Estratégico, Ministerio de Defensa del Reino Unido, abril de 2024).
Profecía: «Ne cumu ca bicuiniñeeni nuu parte de guiibaʼ ne nuu parte de beñe la? zacaca zaca reinu ca, nuu parte de laani zaca naguidxi ne nuu parte zaca nadá (Daniel 2:42).
Xi riniʼniʼ: Nécaxa nadipaʼ ejércitu ni napa Estados Unidos ne Reino Unido qué zanda gúnicabe guiráʼ ni racaláʼdxicabe pa cadi nuu binni xquídxicabe de acuerdu ne ni nuucabe gúnicabe.
Modo guca cumplirni
«Ca ni nanna de tema riʼ naca cumu nuu divididu gobiernu stiʼ Estados Unidos qué ganda diʼ guni guiráʼ ni naguixhe ique guni casi chuʼ jma seguridad ne negocio» (The Wall Street Journal).
«Huadxaagalú [Gran Bretaña] stale problema politicu [...] nga runi maʼ qué guidxélacabe xi gúnicabe para gacanécabe binni» (Institute for Government [Instituto de Gobierno]).
Profecía: «Ziúʼchacabe binni guidxi. Peru qué ziuucabe tobi si» (Daniel 2:43).
Xi riniʼniʼ: Nuu biaje zanda guchaaʼ ca binni guidxi ni cá ique ca gobiernu ca gúnicaʼ ne neca raca ni rinábacabe, nuu biaje laacabe ne ca políticu ca qué riuucabe de acuerdu.
Modo guca cumplirni
«Ca dxi riʼ stale de ca binni ni nabeza Estados Unidos riníʼ íquecaʼ cadi jneza guiráʼ ni runi gobiernu stiʼ guidxi ca» (Centro de investigación Pew Research Center).
«Lu ca 50 iza ni maʼ gudiʼdiʼ ca maʼ qué gapa ca binni ni nabeza Reino Unido confianza ca políticu ne ca gobiernu stiʼ xquídxicaʼ» (National Centre for Social Research [Centro Nacional de Investigación Social]).
Ximodo zaca cumplir profecía stiʼ Daniel
Profecía riʼ ná, Estados Unidos ne Reino Unido nga ziuucaʼ casi ti potencia nadipaʼ dxi gueeda Reinu stiʼ Dios ne gunitilú guiráʼ ca gobiernu ni nuu lu guidxilayú (Daniel 2:44).
Ti profecía ni laaca caníʼ de laani ni zeeda lu Apocalipsis ruzeeteʼ «ca rey ni nuu lu guidubi guidxilayú» zadaagucaʼ para gucaalucaʼ Jehováb lu Armagedón «guerra ni chigaca dxi roʼ stiʼ Dios ni jma napa poder» (Apocalipsis 16:14, 16; 19:19-21). Lu guerra riʼ, zunítiluʼ Jehová guiráʼ ca gobiernu ni nuu lu guidxilayú ne qué ziaana nin ti potencia mundial ni bizeeteʼ Daniel lu profecía que.
Pa racaláʼdxiluʼ gánnaluʼ jma, biindaʼ artículo ni láʼ «¿Xii nga Armagedón?”.
Xiñee risaca guiénenu profecía riʼ
Biblia maca bizeeteʼ xi guiráʼ cosa zazaaca Estados Unidos ne Reino Unido, ra guiénenu ni zacaneni laanu gudiʼnu cuenta xi tiempu nga nabáninu.
Ziéneluʼ xiñee gudxi Jesús ca xpinni cadi chuʼcaʼ lu política (Juan 17:16). Ne laaca ziéneluʼ xiñee guníʼ Jesús, Rey ni maʼ gulí Dios para guni mandar lu Reinu stiʼ ca diidxaʼ riʼ: «Cadi naca Reinu stinneʼ parte de guidxilayú riʼ» (Juan 18:36).
Zanda gápaluʼ confianza zuchaa Reinu stiʼ Dios modo nabani binni guidxilayú ne zedaneni stale ndaayaʼ casi maca guníʼ Dios ni (Apocalipsis 21:3, 4).
Maʼ qué zadxíbiluʼ ne qué zaníʼ íqueluʼ pa zunitilúcabe guidxilayú riʼ pur guiráʼ ca guerra ni cayaca ndaaniʼ ca guidxi ca (Salmo 37:11, 29).
Profecía ni bicaa Daniel cayabi laanu Estados Unidos ne Reino Unido nga últimu potencia ni zuni mandar lu guidxilayú ne runi representar ca ni ñee estatua que. ¿Xi zazaaca despué yaʼ? Ziuu ti gobiernu ni zuni ni jneza ne zuni mandar ni dede guibáʼ, laani nga Reinu stiʼ Dios.
Pa racaláʼdxiluʼ gánnaluʼ jma de ca ni chiguni Reinu stiʼ Dios pur binni guidxilayú, biiyaʼ videu ni láʼ ¿Xii nga Reinu stiʼ Dios?
a Biiyaʼ cuadru «¿Guná nga ca potencia mundial ni riete lu profecía bicaa Daniel yaʼ?”.
b Jehová nga lá Dios (Salmo 83:18). Biiyaʼ artículo «¿Tuu nga Jehová?».