¿Ximodo naquiiñe’ gaca ti xpinni Cristu? | ¿Xi caníʼ Biblia de laani?

Stale binni lu guidubi guidxilayú, rini’ca’ nácaca’ xpinni Cristu. Peru pur ni rúnica’, runinaca’ xcaadxi. Stale de laaca’ ruyúbica’ puru si para laaca’, rusiguiica’ ne cadi nachá’huica’. Xcaadxi la? riuuneca’ ni cadi xheelaca’. Ne ca cosa ri’ rucaacani binni guinabadiidxa’ ximodo pe’ nga naquiiñe’ gaca ti xpinni Cristu.

Xi rusihuinni dxandí’ naca tuuxa ti xpinni Cristu

Fácil nga guiní’ tuuxa naca ti xpinni Cristu, peru para gácanu ni cadi caquiiñe’ si guininu ni. Biblia ruzeete’ para gaca tuuxa ti xpinni Cristu naquiiñe’ gaca discípulo sti’ Jesucristu (Hechos 11:26). Jesús pe’ guní’: «Pa qué guixéletu de ni rusiide’, dxandí’ pe’ discípulo stinne’ laatu» (Juan 8:31). Dxandí’, cumu nácanu binni ruchee la? qué zanda gúninu guirá’ xixé ni bisiidi’ Jesús jneza. Neca zacá, ca xpinni Cristu naquiiñe’ gúnica’ bia’ gándati’ para chinándaca’ guirá’ ni bisiidiʼ Jesús ne guiráʼ dxi gúnica stipa guibánica modo nabe. Guidúʼyanu caadxi ejemplu.

Ca xpinni Cristu dxandí’ nadxiica’ xcaadxi binni

Ni guní’ Jesús: «Cudiee’ laatu ti mandamientu nacubi: gannaxhiisaatu, cásica huayannaxhieeʼ laatu, zacaca naquiiñeʼ gannaxhiisaatu. Sicaríʼ nga zanna binni nácatu discípulo stinneʼ: pa nadxiisaatu» (Juan 13:34, 35).

Ni bi’ni’ Jesús: Dxandí’ gunnaxhii Jesús guiráʼ binni, qué nisaca para laabe padé laacaʼ nin pa nápaca bueltu. Bisiándabe ca ni huará, bidiibe ni go ca ni candaana ne dede bidiibe xpídabe pur guiráʼ binni (Mateo 14:14-21; 20:28).

Ni runi ca xpinni Cristu: Rusihuínnicaʼ dxandí’ nadxiica’ binni purti’ rácaca’ nacha’hui’, que ribíca’ tu ridxaagaca’ ne runi perdonarca’. Laaca racanécabe xcaadxi ne rudiicabe ni caquiiñeca’ (1 Juan 3:16).

Ca xpinni Cristu nácaca honradu

Ni guní’ Jesús: «Naa nga [...] ni dxandíʼ» (Juan 14:6).

Ni bi’ni’ Jesús: Guca Jesús honradu lu guirá’ ni bi’ni’ ne ni guní’. Qué niguítebe binni ne qué nucaabe laaca’ nini íqueca’ cosa ni cadi jneza. Nabé binibiá’cabe laabe purti’ guni’be ni dxandí’, neca guyuu biaje guluu ni laabe lu guendanagana (Mateo 22:16; 26:63-67).

Ni runi ca xpinni Cristu: Qué rusiguiica’ ne qué ribá’naca’. Riguíxeca’ impuestu, rúnica’ dxiiña’ jneza ne runi cumplirneca’ horariu ni naquiiñe’ gúnica’ dxiiña’ (Romanos 13:5-7; Efesios 4:28). Qué riguítecabe binni para guiaananécabe xpueltu, qué rúnicabe trampa lu ca examen ne qué rusiguiicabe ora ma cuyúbicabe dxiiña’ (Hebreos 13:18).

Nacha’hui’ ca xpinni Cristu né guira’ binni

Ni guní’ Jesús: «Latáʼ ra nuaaʼ, guiráʼ ni cayuni dxiiñaʼ nadipaʼ ne ca ni nuáʼ stale cosa nanaa, ne zudieeʼ lugar guiziiláʼdxitu. Laquixhe ayubu stinneʼ xayánnitu ne laguiziidiʼ de naa, purtiʼ nacaʼ ti binni nadóʼ ne dxandíʼ humilde naa. Zaziiláʼdxitu ra nuaa. Purtiʼ nasisi ayubu stinneʼ ne cadi nanaa carga stinneʼ» (Mateo 11:28-30).

Ni bi’ni’ Jesús: Cumu guca Jesús nacha’hui’ la? nga runi bini sentir ca binni nuu gaxha de laabe que galán. Nabé gunnaxhibe ca xcuidihuini’, gudixhedxibe ladxidó’ ca ni caree gana ne qué ñunibe menú guiruti’ (Marcos 10:13-15; Lucas 9:11).

Ni runi ca xpinni Cristu: Nacha’huicabe ora rini’nécabe binni; qué ridindenécabe laaca’ ne qué rúnicabe menu guiruti’ (Efesios 4:29, 31, 32). Rizalá’dxicabe guirá’ binni ne ruyúbicabe ximodo gacanécabe laaca’ (Gálatas 6:10).

Qué rucheené ca xpinni Cristu xheelaca’

Ni guní’ Jesús: «Ni maʼ bichaaga Dios, cadi guchiá nin ti hombre» (Marcos 10:9).

Ni bi’ni’ Jesús: Neca qué nichagana’ Jesús, biidibe conseju ca ni ma’ bichagana’ para cadi gucheeneca’ xheelaca’ (Mateo 19:9). Laaca gúdxibe laaca’ xii nga ca cosa ni zándaca guindaa xquendaxheelaca’ (Mateo 5:28).

Ni runi ca xpinni Cristu: Qué rúnicabe xiixa ni gusihuiini qué runi respetárcabe xheelacabe (Hebreos 13:4). Ti hombre ne ti gunna ni ma’ bichagana’ rusihuinnica’ nadxisaaca’ ne runi respetarsaaca’ (Efesios 5:28, 33).