¿Xi riníʼ Biblia de Navidad?

Ni ricabi Biblia

Biblia qué riníʼ diʼ xi fecha gule Jesús, ne cadi caníʼ ni naquiiñeʼ guni celebrarnu dxi gúlebe. Ti enciclopedia ni runibiáʼ binni ná: «Cadi Dios biʼniʼ mandar guni celebrarnu Navidad, ne laaca cadi zeeda diʼ ni lu Nuevo Testamento» (Cyclopedia of Biblical, Theological, and Ecclesiastical Literature, stiʼ John McClintock ne James Strong).

Peru ora guidúʼndanu historia stiʼ Navidad zudiʼnu cuenta lade ca binni ni qué runi adorar Dios ni dxandíʼ nga biasastí ni. Biblia ná ora cadi jneza modo runi adorarnu Dios la? ridxiichibe (Éxodo 32:5-7).

Historia stiʼ ca costumbre ni rúnicabe lu Navidad

1. Runi celebrárcabe dxi gule Jesús.Ca primé xpinni Cristu qué ñuni celebrarcaʼ dxi gúlebe, purtiʼ «biiyacabe ca saa riʼ [...] casi ti costumbre ni biʼniʼ ca binni ni qué runi adorar Dios ni dxandíʼ» (Las cosas nuestras de cada día).

2. Veinticinco de diciembre. Gastiʼ xiixa prueba ni gusihuinni gule Jesús fecha ca. Ruluíʼ si ca xaíque yuʼduʼ nga gulicaʼ fecha ca ti guidxaaga ni né caadxi saa ni runi ca binni ni qué runi adorar Dios ni dxandíʼ ora rixeleʼ Guidxilayú de Gubidxa ne raca nananda.

3. Regalu, stale guendaró ne saa. Sicaríʼ ná ti enciclopedia: «Ca saa ni biʼniʼ ca binni de Roma para Saturno bíʼnicabe cani biaʼ galaa de beeu diciembre. Ni raca lu ca saa ca nga runi binni lu Navidad. De racá nga zeeda costumbre de gúnicabe stale guendaró, gudiicabe regalu ne ucaaguícabe vela» (The Encyclopedia Americana). Ne Diccionario de historia de la Iglesia caníʼ de laani: «Modo ridxécabe ne ca regalu ni rudiicabe ca biasastí cani lu ca saa ni biʼniʼ ca romanu para Saturno (17-24 de diciembre)». Ne laaca caníʼ Encyclopædia Britannica qué rúnicabe dxiiñaʼ ca dxi ca.

4. Biaanihuiiniʼ riquiiñecabe lu Navidad. The Encyclopedia ná runi chaahuiʼ ca europeu lídxicaʼ «né biaanihuiiniʼ ne bandaga de guiráʼ clase» para guni celebrarcaʼ ora rixeleʼ Guidxilayú de Gubidxa ne raca nananda ne para gápacaʼ laacaʼ de ca espíritu malu. Ne Diccionario de historia de la Iglesia ná: «Costumbre de iquiiñecabe ca yagahuiiniʼ nagaʼ ne ca biaanihuiiniʼ ca biasastí cani ra rúnicabe ca Calenda stiʼ enero (1 de en., iza cubi) pur Gubidxa».

5. Adorno ni guca de acebo ne de muérdago. «Ca druida [ca sacerdote celta ni guyuu dxiqué] nacaʼ napa ca muérdago ca poder. Ne bisisácacabe ca bandaga de acebo casi ti promesa para guibiguetaʼ Gubidxa» (The Encyclopedia Americana).

6. Pinu de Navidad. Encyclopædia Britannica ruzeeteʼ: «Dxiqué ca europeu ni qué runi adorar Dios ni dxandíʼ nabé biʼniʼ adorarcaʼ yaga gaʼ ne biʼnirúcabe ni despué de gúcacabe cristianu». Tobi de ca cosa ni rúnicabe lu adoración riʼ nga «ruzuhuaacabe ti pinu de Navidad ra puertaʼ lídxicabe o ndaaniʼ yoo ca dxi raca ca saa riʼ tiempu nanda».