13 ndaa

Ximodo zanda guidxeʼluʼ religión ni dxandíʼ

Ñee guiráʼ ca religión ca ruuyaʼ Dios jneza la? o tobi si (1)

Xiñee nuu stale religión ni na zinándacaʼ Cristu (2)

Ximodo zanda gunibiaʼluʼ ca ni dxandíʼ zinanda Cristu (3-7)

1. Jesús gulaquistí ti religión si ni dxandíʼ. Pur nga runi, naquiiñeʼ chuʼ ti grupu si ni dxandíʼ guni adorar Jiobá Dios (Juan 4:23, 24; Efesios 4:4, 5). Biblia rusiidiʼ de que huaxiéʼ si nga ca ni zeʼ lu neza ni nabéʼ ni ziné lu guendanabani (Mateo 7:13, 14).

2. Biblia maca guníʼ de que despué de gati ca apóstol que la? chaahuidugá ziuu ra ridagulisaa ca xpinni Cristu guendarusiidiʼ ni cadi dxandíʼ ne ni runi binni ni cadi jneza. Ziuu hombre zagubayú ca ni runi cré Cristu ne zuxhélecabe laacaʼ de chinándacaʼ laabe (Mateo 7:15, 21-23; Hechos 20:29, 30). Pur nga runi ridúʼyanu gadxé gadxé religión ni nacaʼ zinándacaʼ Cristu. Ximodo zanda gunibiaʼnu ca ni dxandíʼ zinanda Cristu yaʼ.

3. Ni jma rihuinni de ca ni zinanda Cristu nga, guendarannaxhiisaa ni dxandíʼ nápacabe (Juan 13:34, 35). Qué huaziidiʼcabe de que dxíbacabe jma que stuudxi binni de sti color o de sti raza. Laaca qué huaziidiʼcabe gaca nanaláʼdxicabe binni de sti guidxi roʼ (Hechos 10:34, 35). Pur nga runi qué rinaazecabe guiibaʼ para cheecabe lu guendaridinde stiʼ ca guidxi roʼ ca. Cani dxandíʼ xpinni Cristu laa la? nadxiisaacaʼ casi bíʼchicaʼ ne bizáʼnacaʼ (1 Juan 4:20, 21).

4. Sti modo zanda gunibiaʼnu religión ni dxandíʼ la? nga nga respetu ni nabé nápacabe Biblia. Ricaacabe ni casi Stiidxaʼ Dios ne runi crécabe ni na ni (Juan 17:17; 2 Timoteo 3:16, 17). Para laacabe la? Stiidxaʼ Dios jma risácani que ni riníʼ ique binni ne ni runi (Mateo 15:1-3, 7-9). Rúnicaʼ ti stipa pur chinándacaʼ ni na ni lu xquendanabánicaʼ. Pur nga runi qué riniʼcaʼ xiixa ne gadxé ni rúnicaʼ (Tito 1:15, 16).

5. Ca ni runi ni na religión ni dxandíʼ ca la? laaca nápacabe xidé gusisácacabe lá Dios (Mateo 6:9). Jesús bisiidibe lá Dios, Jiobá, ne ca ni dxandíʼ zinanda Cristu laaca naquiiñeʼ gúnicaʼ zacaca (Juan 17:6, 26; Romanos 10:13, 14). Tuu ndiʼ ca ni rusiidiʼ lá Dios neza raliʼdxuʼ.

6. Ca ni dxandíʼ zinanda Cristu nápacaʼ xidé gucheechecaʼ stiidxaʼ Reinu stiʼ Dios. Jesús biʼniʼ ni. Laabe nabé guniʼbe de Reinu ca (Lucas 8:1). Laaca biseendabe ca discípulo stibe gucheechecaʼ diidxaʼ riuu neza riʼ guidubi naca Guidxilayú (Mateo 24:14; 28:19, 20). Ca ni dxandíʼ xpinni Cristu runi crécabe de que Reinu si stiʼ Dios nga tobi lucha ni zeedané guendariuudxi ne zapachaahuiʼ laanu ndaaniʼ guidxilayú riʼ (Salmo 146:3-5).

7. Ca discípulo stiʼ Jesús cadi nácacaʼ de guidxilayú qué iquiiñeʼ riʼ (Juan 17:16). Qué riúʼchacabe lu política ne nin qué ridinde diidxacabe pur guiráʼ ni raca lu guidxilayú. Qué rúnicaʼ casi runi binni ne ca xpiaʼ, ne modo runinacaʼ binni, ni nabé raca lu guidxilayú riʼ (Santiago 1:27; 4:4). Ñee runibiaʼluʼ xiixa religión de neza raliʼdxuʼ ni napa ca seña stiʼ ca ni dxandíʼ xpinni Cristu la?

[Dibuju/foto ni zeeda lu yaza 27]

Ca ni dxandíʼ zinanda Cristu rannaxhiisaacaʼ, runi respetarcaʼ Biblia ne rucheechecaʼ stiidxaʼ Reinu stiʼ Dios