Ni rusiidiʼ Stiidxaʼ Dios

Ximodo zanda ganna binni gunáʼ nga religión ni dxandíʼ

Tema riʼ zacaneni lii gánnaluʼ ximodo ricabi Biblia stiluʼ cani zándaca huanabadiidxaluʼ. Pa riuuláʼdxiluʼ la? ca testigu stiʼ Jiobá zanda gúʼndanecaʼ lii ca guendarinabadiidxaʼ riʼ.

1. Ñee nuu ti religión si ni dxandíʼ la?

Ti religión si nga bisiidiʼ Jesús ca discípulo stiʼ, ne laani nga religión ni dxandíʼ. Zeeda gácani casi ti neza ni riné binni lu guendanabani ne casi guníʼ Jesús, «huaxiéʼ tu ridxela ni» (Mateo 7:14). Ziuulaʼdxiʼ Dios modo cayuni adorarnu laa pa cayúninu ni cásipeʼ modo rusiidiʼ stiidxabe, Biblia. Nga runi, cani dxandíʼ xpinni Cristu tobi si ni runi crecaʼ. (Biindaʼ Juan 4:23, 24; 14:6; Efesios 4:4, 5.)

2. Xiñee nuu stale religión ni na zinanda Cristu

Ca profeta ni cadi dxandíʼ riníʼ pur Dios rusiidicaʼ ni cadi jneza ne riquiiñecaʼ religión para si gápacaʼ ni racaláʼdxicaʼ. Jesús maca guníʼ zusihuínnicabe nácacabe dendxuʼ stiʼ, peru ni gúnicabe zusihuinni nácacabe casi gueuʼ naduxhuʼ (Mateo 7:13-15, 21, 23). Ne guti si ca apóstol que nga jma maʼ bizulú bihuinni ca binni ni na naca xpinni Cristu peru gadxé ni rusiidicaʼ. (Biindaʼ Hechos 20:29, 30.)

3. Xi rusihuinni laacabe nga cani dxandíʼ xpinni Cristu

Runi respetárcabe Biblia casi Stiidxaʼ Dios. Qué rinándacabe ni rusiidiʼ binni guidxilayú sínuque rúnicabe stipa pur chinándacabe ni na ca conseju zeeda lu Biblia (Mateo 15:7-9). Qué rusiidicabe ti cosa ne gadxé ni rúnicabe. (Biindaʼ Juan 17:17; 2 Timoteo 3:16, 17.)

Rusisácacabe lá Dios, Jiobá. Jesús gucané binni ganna lá Dios ne gunibiáʼ modo nácabe. Bisiidibe laacaʼ gusisácacaʼ lá Dios lu oración ni gúnicaʼ (Mateo 6:9). Gunáʼ nga religión ni riquiiñeʼ lá Dios neza ra nabézaluʼ. (Biindaʼ Juan 17:26; Romanos 10:13, 14.)

4. Ximodo zanda gánnaluʼ tuu nga cani dxandíʼ xpinni Cristu

Cani dxandíʼ xpinni Cristu riniʼcaʼ de Reinu stiʼ Dios. Jesús beeda lu Guidxilayú para guiníʼ de gobiernu ca, ne laani nga tobi lucha ni zanda gacané binni guidxilayú. Ne bíʼnibe ni dede dxi gútibe (Lucas 4:43; 8:1; 23:42, 43). Biseendabe ca discípulo stibe guiniʼcaʼ de Reinu ca. Pa cheʼ tuuxa ra nuuluʼ ne guiniʼné lii de Reinu stiʼ Dios, xi religión rábiluʼ nápabe yaʼ. (Biindaʼ Mateo 10:7; 24:14.)

Ca discípulo stiʼ Jesús cadi de guidxilayú malu riʼ laacaʼ. Qué riuucabe lu política ne qué riuucabe lade ca binni ni ridindesaa (Juan 17:16). Laaca qué rúnicabe guiráʼ ni runi ca binni guidxilayú ne qué rinándacabe xpiaʼcaʼ. (Biindaʼ Santiago 1:27; 4:4.)

5. Xi rusihuinni dxandíʼ naca tuuxa xpinni Cristu

Cani dxandíʼ xpinni Cristu rihuinni nadxiisaacaʼ. Maʼ huasiidiʼ Stiidxaʼ Dios laacabe guni respetárcabe guiráʼ binni neca gadxé gadxé raza laacaʼ. Ca religión ni rusiidiʼ ni cadi dxandíʼ nabé riuucaʼ lu guendaridinde, peru cani dxandíʼ xpinni Cristu qué rúnicaʼ ni (Miqueas 4:1-4). Ni rúnicabe nga riquiiñecabe tiempu stícabe ne cani nápacabe para gacanécabe binni ne riguucabe gana laacaʼ, ne rúnicabe cani sin cuézacabe guicaacabe xiixa. (Biindaʼ Juan 13:34, 35; 1 Juan 4:20, 21.)

Gunáʼ nga grupu de binni ni riquiiñeʼ Biblia lu guiráʼ ni rusiidiʼ, rusisaca lá Dios ne rusiidiʼ Reinu si stiʼ Dios nga zanda gacané binni guidxilayú. Gunáʼ nga religión ni dxandíʼ nadxiisaa ca xpinni ne qué riuucaʼ lu guendaridinde. Stale binni riníʼ laacabe nga ca testigu stiʼ Jiobá (1 Juan 3:10-12).

Pa riuuláʼdxiluʼ gánnaluʼ jma de laani la? biiyaʼ capítulo 15 stiʼ libru riʼ, ni biʼniʼ ca testigu stiʼ Jiobá. Xipeʼ ndiʼ CUSIIDIʼ BIBLIA

[Dibuju/foto ni zeeda lu yaza 14]

«Na ca runi cre ca Dios, peru pur ni runi ca rihuinni cadi dxandí ni.» (Tito 1:16)