10 Ndaa
Ximodo zanda guidxeʼluʼ relijión ni dxandíʼ
Pa racaláʼdxiluʼ gaca xhamíguluʼ Dios la? naquiiñeʼ guʼnuʼ ni na relijión ni Dios racalaʼdxiʼ. Jesús guníʼ, «ca ni dxandíʼ runi adorar ca la?» runi adorárcabe Dios casi modo na ni «dxandíʼ» ca (Juan 4:23, 24). Tobi si nga jneza modo gaca adorar Dios (Efesios 4:4-6). Relijión ni dxandíʼ la? ziné laanu lu guendanabani ni qué zaluxe, ne relijión ni cadi dxandíʼ la? ziné laanu lu guendaguti (Mateo 7:13, 14).
Zanda gánnaluʼ gunáʼ nga relijión ni dxandíʼ ra guuyaʼ chaahuiluʼ binni runi ni na ni. Cumu Jiobá nachaʼhuiʼ la? cani dxandíʼ runi adorar laabe laaca naquiiñeʼ gácacaʼ binni nachaʼhuiʼ. Cásica ti yaga naranja nazaaca rudii naranja chaʼhuiʼ, relijión ni dxandíʼ la? laaca rudii binni nachaʼhuiʼ (Mateo 7:15-20).
Ca xhamigu Jiobá nápacabe stale respetu Biblia. Nánnacabe de que Biblia zeedani de Dios. Nga runi, rusaanacabe gábini laacabe ximodo guibánicabe, ximodo guidxagalúcabe guendanagana ne gacaneni laacabe gunibiáʼ chaʼhuiʼcabe Dios (2 Timoteo 3:16). Laaca rúnicabe stipa pur gúnicabe ni rusiidicabe.
Ca xhamigu Jiobá nadxiisaacabe. Jesús bisihuinni de que gunaxhii binni ra bisiidiʼ laacabe de Dios ne ra bisiándabe cani huará. Cani runi ni na relijión ni dxandíʼ ca la? laaca nadxiicaʼ xcaadxi binni. Cásica Jesús qué rucaanádicabe binni pobre nin de sti rasa nin ni riníʼ sti diidxaʼ. Jesús guníʼ zanda ganna binni tuu nga cani caziidiʼ de laabe pur guendarannaxhii ni zapasaacaʼ (Juan 13:35).
Ca xhamigu Dios rusisácacaʼ labe: Jiobá. Pa tuuxa que naʼ guiníʼ lanu, ñábinu de que laabe nga ni jma xhamígunu la? Coʼ njaʼ. Ora nápanu ti xhamígunu la? rininu lá ne rininu ni galán de laa nezalú binni. Nga runi, cani racalaʼdxiʼ gaca xhamigu Dios la? naquiiñeʼ guiniʼcaʼ Labe ne guiníʼnecaʼ xcaadxi binni de laabe. Jiobá racalaʼdxiʼ gúninu zacá (Mateo 6:9; Romanos 10:13, 14, NM).
Cásica Jesús, ca xhamigu Dios rusiidicabe binni de Reinu stiʼ Dios. Reinu stiʼ Dios nga Gobiernu de guibáʼ ni zuni Guidxilayú riʼ ti paraisu. Ca xhamigu Dios riníʼnecaʼ binni de ca diidxaʼ nacubi ne galán stiʼ Reinu stiʼ Dios (Mateo 24:14).
Ca testigu stiʼ Jiobá rúnicabe stipa pur ganda gaca xhamígucabe Dios. Nápacabe respetu Biblia ne nadxiisaacabe. Laaca riníʼcabe ne rusisácacabe lá Dios ne rusiidicabe binni de Reinu stiʼ Dios. Ca dxi riʼ ca testigu stiʼ Jiobá cayúnicabe ni na relijión ni dxandíʼ ca lu Guidxilayú.