Xiñee cadi naquiiñeʼ gusiguiinu

GUNÍʼ ique de ti dxaapahuiiniʼ ni cayabi jñaa sicaríʼ: «Cásipeʼ guiree de scuela maca zedabiee». Peru biaanabe para quitenebe ca xhamígabe ne ora bibiguétabe rábibe jñaabe: «Maestra ca nga gudxi naa guiaanaruáʼ». Ñee jneza nga guiniʼbe zacá la?...

O zándaca ti hombrehuiiniʼ gabi bixhoze sicaríʼ: «Coʼ apá, qué niguitediáʼ pelota ndaaniʼ yoo», peru laabe dxandíʼ gudxítebe ni. Nouʼ galán nga guiniʼbe zacá la?...

Maestru Ni Jma Nanna Gusiidiʼ que gudxi laanu xii ndiʼ naquiiñeʼ gúninu ora guniʼbe sicaríʼ: Ora guiniʼtu Ya la? laguni ni, ne ora guiniʼtu Coʼ la? cadi gúnitu ni, purtiʼ ni guni gadxé de ni maʼ guníʼ la? zeeda ni de Binidxabaʼ (Mateo 5:37). Xi nuu Jesús nusiene ne ca diidxaʼ riʼ yaʼ.... Nabe naquiiñeʼ gúninu ni guininu.

Ndaaniʼ Biblia nuu ti historia ni culuíʼ pabiáʼ ndiʼ riquiiñeʼ guiníʼ binni ni dxandíʼ. Caníʼ ni de chupa binni ni guniʼcaʼ nácacaʼ discípulo stiʼ Jesús. Guidúʼyanu xi guca.

Nin chupa beeu de guti Jesús, stale binni de guidxi zitu guyé Jerusalén para gápacaʼ ti saa nabé risaca stiʼ ca judíu ni láʼ Pentecostés. Apóstol Pedru bidii ti libana guizáʼ sicarú ra guníʼnebe binni de Jesús ne ximodo gundisaʼ Jiobá laabe lade gueʼtuʼ. Stale de cani guyé Jerusalén que deruʼ primé ngue binadiágacabe de Jesús. Ca binni que guyuuláʼdxicaʼ gánnacaʼ jma. Ngue runi, xi bíʼnicabe yaʼ.

Biaanarúcabe ndaaniʼ guidxi que jma dxi de ni maca guníʼ íquecabe. Peru caadxi de laacabe birá xpuéltucabe ne maʼ qué gápacabe para sícabe ni gócabe. Ca discípulo ni nuu Jerusalén que gucanecaʼ caadxi de laacabe. Ngue runi stale de laacaʼ bitoocaʼ cani nápacaʼ ne bidiicaʼ bueltu que ca apóstol stiʼ Jesús. Ca apóstol que gudiiziʼ cani lu cani caquiiñeʼ ni.

Ananías ne xheelabe Safira, nácacabe de ca binni ni zinanda Cristu ni nuu Jerusalén, laacabe bitoocabe layú stícabe. Guirutiʼ tu gudxi laacabe gutoocabe ni; laasicabe guníʼ íquecabe ni. Peru cadi biʼnidicabe ni purtiʼ nadxiicabe cani chigaca discípulo stiʼ Jesús que. Bíʼnicabe ni purtiʼ nuucabe ganna binni jma nacháʼhuicabe que stuudxi. Ngue runi, guníʼ stiidxacabe para guiníʼcabe zudiicabe guiráʼ bueltu ni guidoo layú que ti gacanécabe binni. Laacabe guníʼ íquecabe guiaananécabe ti ndaa de laani, peru zaníʼcabe cudiicabe guiráʼ ni. Ximodo ruuyuʼ nga yaʼ....

Ananías guyé ra nuu ca apóstol que ne bidiibe laacaʼ bueltu ni bidoo layú que. Dios nanna cadi cudiibe guiráʼ ni, ngue runi gúdxibe apóstol Pedru cadi dxandíʼ diʼ ni caníʼ Ananías.

Pedru guníʼ óraque: Ananías, xiñee bidiiluʼ lugar chuʼ Binidxabaʼ ladxidoʼloʼ pue, layú ca la? stiluʼ ni. Qué ñapuʼ xidé nutooloʼ ni pa qué ninaluʼ. Ne pa nutooloʼ ni la? lii ñuuyuʼ xi ñunineluʼ bueltu ca. Xiñee cayúnisiluʼ casi ora cudiiluʼ guiráʼ bueltu ca pa ti ndaa si ni cudiiluʼ yaʼ. Ne ni biʼnuʼ ca la? cadi laasidu cusiguiiluʼ sínuque ne Dios.

Guizáʼ nga nadá ni guca riʼ. Ananías bisiguii. Qué ñúnidibe ni guniʼbe; bíʼnisibe laabe. Biblia cayabi laanu xi guca despué: «Ora bina diaga Ananías ni na Pedru que, biaba guti». Dios biiti Ananías. Despué gundísacabe laabe ne bicaachicabe laabe.

Biaʼ chonna hora de ngue guyuu Safira. Cumu laabe qué gánnabe xi guca xheelabe la? Pedru gunabadiidxaʼ laabe: «Ñee biaʼ ri bitoo to layú stitu la?».

Safira bicabi: Ya, biáʼcapeʼ bitoodo ni. Peru laabe cusiguiibe. Laacabe biaananécabe ti ndaa de ni bitoocabe layú que. Ngue runi, Dios laaca biitibe Safira (Hechos 5:1-11).

Xi rizíʼdinu de ni guca Ananías ne Safira ca yaʼ.... Rizíʼdinu qué riulaʼdxiʼ diʼ Dios gusiguii binni. Laabe riuláʼdxibe guininu ni dxandíʼ guiráʼ ora. Peru stale binni na cadi malu diʼ nga gusiguiinu. Nouʼ neza nga modo nácabe ca la?... Ñee nannuʼ nuu guendahuará, yuubaʼ ne guendaguti pur bisiguii tuuxa la?...

Bietenalaʼdxiʼ, Binidxabaʼ bisiguii primé gunaa ni biree lá Eva que. Gúdxibe laa qué zati diʼ pa gucheené Dios ne gó cuananaxhi ni gudxi Dios laa cadi gó. Eva biʼniʼ crebe Binidxabaʼ ne gudobe cuananaxhi que. Despué bicuudxibe Adán para gó ni, ne zaqué guirópacabe bicheecabe. Ne pur nga, guiráʼ xiiñicabe zalenecaʼ donda, zacanacaʼ ne záticaʼ. Ximodo bizulú guendanagana riʼ yaʼ.... Guirani bizulú purtiʼ bisiguii tuuxa.

Yanna maʼ bíʼyanu xiñee guníʼ Jesús nabé rusiguii Binidxabaʼ ne laa nga bixhoze guendarusiguii, purtiʼ laabe nga bisiguiibe primé. Ora gusiguii tuuxa la? cayúnibe cásica biʼniʼ Binidxabaʼ. Naquiiñeʼ guietenaláʼdxinu ndiʼ ora uquiinde laanu gusiguiinu (Juan 8:44).

Pora ndiʼ ñándaca nuquiinde lii nusiguiiluʼ yaʼ.... Cadi dxandíʼ ora gúniluʼ xiixa ni cadi jneza la?... Zándaca ora guindaaluʼ xiixa neca cadi liipeʼ guʼnuʼ ni. Pa guinabadiidxacabe lii tu biʼniʼ ni, ñee zaniʼluʼ tobi de ca bíʼchiluʼ o béndaluʼ la? O zuʼnuʼ casi ora qué gannuʼ ximodo gúcani....

Yanna pa chigúniluʼ tariá stiluʼ ne qué nilúxeluʼ ni yaʼ. Ñee zaniʼluʼ bíʼniluʼ guiráʼ ni, neca cadi dxandíʼ la?... Guietenaláʼdxinu Ananías ne Safira. Qué niníʼdicabe ni dxandíʼ, ne Dios biluíʼ pabiáʼ malu ngue ni bíʼnicabe ra biiti laacabe.

Nga runi, neca intiica gúninu la? cadi naquiiñeʼ gusiguiinu, purtiʼ jma feu zareeni laanu. Ninla guininu chupa chonna si ni dxandíʼ. Biblia cayabi laanu guininu ni dxandíʼ ne cadi gusiguiisaanu. Jiobá riníʼ ni dxandíʼ guiráʼ ora ne ribézabe gúninu zacaca (Efesios 4:25; Colosenses 3:9).