Mayaca guiree guiráʼ yuubaʼ

Ñee huayuu ora guinabadiidxaluʼ laca lii: «Xiñee nuu stale yuubaʼ ndaaniʼ guidxilayú riʼ la?». Ca binni guidxilayú riʼ maʼ napa stale iza de cayacanacaʼ pur cani cayaca yanna riʼ, casi guendaridinde stiʼ ca guidxi ca, guendapobre, xu ne xcaadxi casi laani, guendarucheené ley, guendaquéruni jneza, guendahuará ne guendaguti. Ne lu ti gayuaa iza ni maʼ gudiʼdiʼ ca, maʼ bidale ca yuubaʼ ca jma. Ñee ziuu dxi guiluxe guiráʼ ndiʼ la?

Riéchenu nga gánnanu mayaca guiree cani. Biblia, Stiidxaʼ Dios la? cayabi laanu: «Binni malu maʼ qué ziuu [...]. Peru cani nadóʼ ca zacaacaʼ guidxilayú, ne zadxélacaʼ stale guendanayecheʼ purtiʼ ziuu stale guendariuudxi». Pabiáʼ zandaa guendanayecheʼ riʼ yaʼ. Biblia na: «Cani runi jneza ca zacaacaʼ guidxilayú, ne zabánicaʼ luni guiráʼ dxi» (Salmo 37:10, 11, 29).

Ora maʼ cuee Dios guiráʼ cosa malu ne ca yuubaʼ ca, Guidxilayú riʼ zaca ti paraísu. Racá zabani binni nayecheʼ, ziuucaʼ nazaaca ne qué ziuu dxi gáticaʼ. Biblia caníʼ xi chiguni Dios: «Zuchaa be nisa riete lú caʼ, ne maʼ qué ziuu ru enda guti nin enda ruuna nin enda racaná ladxidóʼ nin yuubaʼ, purti maʼ udiʼdi irá ni uyuu chiqué» (Apocalipsis 21:4).

Lu guidxilayú cubi ca, stale binni ni maʼ guti ziasa para guibani ne guicaa ca ndaayaʼ ca. Stiidxaʼ Dios caníʼ: «Zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ» (Hechos 24:15).

Xiñee bizulú ca yuubaʼ ca

Pa ni gudixhe ique Dios primé que nga nibani binni galán, xiñee bidiibe lugar guyuu stale yuubaʼ ne xiñee cudiirube lugar nuu cani yaʼ.

Dxi bizáʼ Dios Adán ne Eva la? bizaʼbe laacaʼ nazaaca ne bidiibe laacaʼ guendabiaaniʼ nayaguieʼ. Guluube laacaʼ ndaaniʼ ti paraísu ne bidiibe laacaʼ ti dxiiñaʼ nabé sicarú. Stiidxaʼ Dios na: «Biiyaʼ Dios guiráʼ ni biʼniʼ ne, ¡biaguʼyuʼ!, nabé galán cani» (Génesis 1:31). Pa nuzuubacabe stiidxaʼ Dios ni bizáʼ laacabe que la? ora ñápacabe xiiñicabe laaca ñácacaʼ nazaaca cásica laacabe, ne guidubi naca Guidxilayú riʼ ñaca ti paraísu ra nibani binni nayecheʼ sin qué ñuu dxi ñati ne ñápacaʼ guendariuudxi.

Dios bidiibe Adán ne Eva ti guenda ni napa guiráʼ binni: zanda cuícabe gúnicabe ni gacaláʼdxicabe. Nga runi, cadi casi robot diʼ laacabe. Peru para nibánicabe nayecheʼ la? riquiiñeʼ ñánnacabe niquiiñecabe guenda bidii Dios laacabe que jneza, ne nihuinni ni ra ñúnicabe ni na ca ley stibe. Nga runi Dios guníʼ: «Naa, Jiobá, naa nga Dios stiluʼ. Tobi ni rusiidiʼ lii para cheni lii jneza, ni cucaa lii guzuhuaa ñeeluʼ lu neza ni naquiiñeʼ saluʼ» (Isaías 48:17). Pa binni qué naʼ iquiiñeʼ guenda ni bidii Dios laa jneza la? zapa stale guendananá, purtiʼ binni cadi guyáʼ diʼ para guibani sin Dios. Biblia riníʼ: «Binni guidxilayú cadi lu náʼ diʼ nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jeremías 10:23).

Adán ne Eva guníʼ íquecaʼ zanda guibánicaʼ sin Dios ne chuʼcaʼ nayecheʼ. Peru ra maʼ qué ninácabe ñuni mandar Dios laacabe la? Dios maʼ qué ñacané diʼ laacabe ne pur ngue beeda gácacabe binni ruchee. De racá, chaahuidugá bióʼxhocabe ne gúticabe. Ne laanu cumu zanu de laacabe la? laaca nácanu binni ruchee ne rátinu (Romanos 5:12).

Ni jma risaca nga tu laa napa derechu guni mandar

Xiñee qué ñuutica Dios Adán ne Eva ne nuzaʼbe xhupa binni yaʼ. Purtiʼ ne ni bíʼnicabe que bisihuínnicabe qué riuláʼdxicabe modo runi mandar Dios. Yanna, ni jma risaca gánnanu nga: tu laa napa derechu guni mandar ne tu laa runi ni jma jneza. Nga runi, ñee zanda guibani binni galán sin Dios la? Ra gudii Dios tiempu guibani binni modo racalaʼdxiʼ la? zahuinni pa zabánicaʼ nayecheʼ o pa naquiiñeʼ guni mandarbe laacaʼ. Guiráʼ tiempu tiidiʼ para guibani binni sin chinanda ni na Dios la? zahuinni pa zabánicaʼ galán ra quíxhecaʼ gadxé gadxé modo gaca mandar ca guidxi ca, pa zanda guibánicaʼ jma galán ra quíxhecaʼ modo guibani binni ndaaniʼ ca guidxi ca, pa zanda laasicaʼ guyúbicaʼ modo gápacaʼ ni guibaninecaʼ ne chuʼcaʼ nayecheʼ o pa ziuu binni galán ra gapa gadxé gadxé religión.

Xi huabeendúcabe yaʼ. Ca mil iza ni maʼ gudiʼdiʼ de nabani binni lu guidxilayú riʼ maʼ huayaca stale cosa malu ni huayuniná binni. Ne lu ti gayuaa iza ni gudídinu ca gucaná jma binni. Millón de binni biiticabe purtiʼ guca nanaláʼdxicabe laacaʼ dxi guca guiropa guendaridinde roʼ que, ne laaca guti ti gayuaa millón de binni pur ca guendaridinde stiʼ ca guidxi ca. Ne yanna riʼ, nabé cucheené binni ley ne guiráʼ si ora cadíndecaʼ. Jma maʼ stale binni riguʼbaʼ gueza ne guixi ca dxi riʼ. Ne guiráʼ dxi jma binni ziyapa guendahuará casi sida ne xcaadxi casi laani. Laaca cayati millón de binni guiráʼ iza pur guendahuará ne guendarindaana. Ndaaniʼ stale familia maʼ guirutiʼ rizalaʼdxiʼ guni ni jneza ne binni maʼ nabani modo racalaʼdxiʼ, zacá nga nuu guiráʼ ladu. Rihuinni dxíchica nin ti gobiernu ni nuu lu Guidxilayú riʼ qué zanda guni chaahuiʼ ca guendanagana riʼ. Nin tobi de laacabe qué huabee guendarioʼxhoʼ, guendahuará nin guendaguti.

Modo nabani binni lu Guidxilayú riʼ cayaca ni cásipeʼ modo maca guníʼ Biblia zácani. Stiidxaʼ Dios culuíʼ maʼ nabáninu lu «ca últimu dxi» stiʼ ca cosa malu nuu yanna riʼ, ne jma nagana zaca para laanu guibáninu ca dxi riʼ. Ne cahuinni cayaca ca diidxaʼ ni zeeda lu Biblia: «Cani canauchee ne canausiguii la? zeʼ dxi jma rusi zinitilú caʼ» (2 Timoteo 3:1-5, 13).

Mayaca guiree guiráʼ yuubaʼ

Guiráʼ cani cayúʼyanu riʼ culuíʼ cani laanu maʼ cadi candaa diʼ zucueeza Dios guiráʼ modo racalaʼdxiʼ binni guibani sin laabe. Maʼ bihuinni qué ziuu dxi cueendú binni ni jneza ra guibani sin guni mandar Dios laa, ne gobiernu si stiʼ Dios nga zanda gudii laanu guendariuudxi, guendanayecheʼ, guendanazaaca ne guendanabani ni qué ziuu dxi guiluxe. Nga runi, maʼ cará tiempu bidii Jiobá lugar gaca ca cosa malu ne chuʼ ca yuubaʼ ca. Mayaca gunitilú Dios guiráʼ xixé cosa malu nuu lu guidxilayú riʼ.

Ti diidxaʼ riguixhená stiʼ Biblia caníʼ: «Ne dxi stiʼ ca rey que la? [ca gobiernu ni nuu yanna riʼ] Dios ni nuu guibáʼ zaguu ti reinu [guibáʼ] ni qué ziuu dxi guinitilú. Ne reinu riʼ [...] zunidé ni ne zunduxe ni guiráʼ ca reinu riʼ [ca gobiernu ni nuu yanna riʼ], ne laani ziaana ni ne qué ziuu dxi guiluxe ni» (Daniel 2:44). Ndiʼ nga ni jma risaca ni rusiidiʼ Biblia: Jiobá nga napa derechu para guni mandar ne gobiernu stibe ni nuu guibáʼ nga chiguluíʼ ni. Jesús guníʼ ti señal ni jma risaca stiʼ «ca últimu dxi» riʼ, nabe: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar[be], ne dxi que ru nga iluxe guidxilayú riʼ» (Mateo 24:14).

Ora maʼ guinitilú guiráʼ ca cosa malu riʼ, tu guiráʼ ndiʼ zalá yaʼ. Biblia cayabi laanu: «Cani runi jneza ca nga zabánicaʼ lu Guidxilayú riʼ, ne cani qué gapa donda ziaanacaʼ luni. Peru ca malu ca zaruugucaʼ de lu Guidxilayú; ne cani rudxii deche, ziaaxhacaʼ luni» (Proverbios 2:21, 22). Ca binni ni runi jneza nga cani riziidiʼ xii nga ni racalaʼdxiʼ Jiobá ne rúnicaʼ ni. Jesucristu guníʼ: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3). Dxandíʼ, «canitilú guidxilayú, [...] peru qué ziuu dxi initilú ni guni ni na Dios» (1 Juan 2:17).