Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la?

BINNI huanabadiidxaʼ stale cosa ni risaca. Zándaca huayuu dxi guinabadiidxaluʼ ca ndiʼ:

• Ñee rizaalaʼdxiʼ Dios laanu la?

• Ñee ziuu dxi maʼ qué ziuu guendaridinde ne yuubaʼ la?

• Xi rácanu ora maʼ gútinu

• Ñee ziuu dxi guiasa ca gueʼtuʼ ca la?

• Ximodo naquiiñeʼ guni orarnu Dios ti gucaadiaga laanu

• Ximodo zanda guibáninu nayecheʼ

Tu raʼbuʼ zanda guicabi cani rinabadiidxanu ca yaʼ. Nuu stale libru na zanda guicabi cani. Peru stale de ca libru ca gadxé gadxé ni rusiidicaʼ. Xcaadxi de laacani ruluíʼ jneza modo ricábicani ora nacubi bireecani peru despué maʼ guirutiʼ tu runi ni nácani o guiree xcaadxi libru xlugárcani.

Peru nuu ti libru ni zanda guni crenu modo ricabi cani rinabadiidxaʼ binni. Ora guniʼné Jesucristu Bixhoze lu ti oración, guníʼ sicaríʼ: «Dxandíʼ stiidxa luʼ» (Juan 17:17). Ni guníʼ Jesús ca runibiáʼ binni ni yanna casi Stiidxa Dios. Lu guiʼchiʼ riʼ zuuyaluʼ pabiáʼ jneza modo ricabi Biblia cani rinabadiidxaʼ binni ne zanda guni crenu cani.

Ñee rizaalaʼdxiʼ Dios laanu la?

XIÑEE RINABADIIDXAʼ BINNI ZACÁ YAʼ. Purtiʼ nabáninu ndaaniʼ ti guidxilayú ra nabé malu binni ne rúnicaʼ ni cadi jneza. Stale religión rusiidiʼ nápanu yuubaʼ purtiʼ nga nga ni na Dios.

NI RUSIIDIʼ BIBLIA. Dios qué runi diʼ ni nadxabaʼ. Job 34:10 na: «Zitu zuhuaa de ndaaniʼ ique Dios ni dxandíʼ ca guni ni malu, ne zitu zuhuaa de ni jma napa poder ca guni ni cadi jneza». Cumu nadxii Dios binni la? sicarú ni naguixhe ique guni para laacabe, ne pur nga bisiidiʼ Jesús laanu guinábanu lu oración: «Bixhózedu ni nuu guibáʼ [...]. Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mateo 6:9, 10, Traducción del Nuevo Mundo [NM]). Ni dxandíʼ nga rizaalaʼdxiʼ Dios laanu stálepeʼ, purtiʼ naroʼbaʼ ni bíʼnibe para ganda gaca ni gudixhe íquebe para laanu (Juan 3:16).

Laaca zanda gúʼndaluʼ Génesis 1:26-28; Santiago 1:13, ne 1 Pedro 5:6, 7.

Ñee ziuu dxi maʼ qué ziuu guendaridinde ne yuubaʼ la?

XIÑEE RINABADIIDXAʼ BINNI ZACÁ YAʼ. Lu ca guendaridinde ca huayati stale binni. Ne gadxé gadxé modo nga huayuninácani laanu.

NI RUSIIDIʼ BIBLIA. Dios maʼ bizabiruaa uguu guendariuudxi ndaaniʼ Guidxilayú. Ne ora maʼ guni mandar Reinu o gobiernu stibe ni nuu guibáʼ ca la? guiráʼ binni maʼ «qué zaziidirucaʼ tíndecaʼ», ne dede zaca ca «guiibaʼ duxhuʼ ca guiibaʼ derechu para aradu» (Isaías 2:4). Ne Dios zabee guiráʼ binni ni qué runi ni jneza ne guiráʼ yuubaʼ. Sicaríʼ na Biblia chiguni Dios: «Zuchaa [Dios] nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni [ne lade cani nuu guiráʼ ni cadi jneza runi binni ne yuubaʼ] uyuu chiqué» (Apocalipsis 21:3, 4).

Laaca zanda gúʼndaluʼ Salmo 37:10, 11; 46:9, ne Miqueas 4:1-4.

Xi rácanu ora maʼ gútinu

XIÑEE RINABADIIDXAʼ BINNI ZACÁ YAʼ. Purtiʼ stale religión rusiidicaʼ nuu xiixa ni qué rati lu xcuerpu binni ora maʼ guti. Ne nuu tu laa na zanda guniná ca gueʼtuʼ ca binni, o xcaadxi na ruseendaʼ Dios ca binni malu ca infiernu, ti lugar ra maʼ qué zusaana de gacanácabe.

NI RUSIIDIʼ BIBLIA. Ora rati ti binni la? maʼ qué zanda guibánibe sti lugar. Eclesiastés 9:5 na: «Cani maʼ guti la? [...] qué liica gánnacabe gastiʼ». Ora maʼ guti binni la? maʼ qué zanda ganna xiixa nin guni sentir, ne qué zanda guni gastiʼ. Nga runi, qué zanda guninácabe ca binni ni nabani ninca gacanécabe laacaʼ (Salmo 146:3, 4).

Laaca zanda gúʼndaluʼ Génesis 3:19 ne Eclesiastés 9:6, 10.

Ñee ziuu dxi guiasa ca gueʼtuʼ ca la?

XIÑEE RINABADIIDXAʼ BINNI ZACÁ YAʼ. Guiranu riuuláʼdxinu guibaninenu ca binni ni nadxiinu nayecheʼ. Nga runi, cadi guendaridxagayaa diʼ nga chuuláʼdxinu guidúʼyanu ca binni ni nadxiinu dxi guiásacaʼ lade ca gueʼtuʼ ca.

NI RUSIIDIʼ BIBLIA. Stale de cani maʼ guti zabani sti biaje. Ne Jesús peʼ guníʼ «zadxiña dxi guna diaga irá cani nuu ndaani baʼ stidxi [...], ne zaree caʼ» (Juan 5:28, 29). Ca binni ni guiasa de lade ca gueʼtuʼ ca zabánicaʼ lu Guidxilayú ne zuuyacaʼ gácani ti paraísu, cásica gudixhe ique Dios ni primé que (Lucas 23:43). Nga runi, guiráʼ ca binni ni guzuubaʼ stiidxaʼ Dios la? zabánicaʼ sin chuʼ dxi gáticaʼ ne qué ziuu dxi gaca huaracaʼ lu guidxilayú ni chiguni chaahuibe ca. Biblia na: «Cani runi jneza ca zacaacaʼ guidxilayú, ne zabánicaʼ luni guiráʼ dxi» (Salmo 37:29).

Laaca zanda gúʼndaluʼ Job 14:14, 15; Lucas 7:11-17, ne Hechos 24:15.

Ximodo naquiiñeʼ guni orarnu Dios ti gucaadiaga laanu

XIÑEE RINABADIIDXAʼ BINNI ZACÁ YAʼ. Ndaaniʼ stale religión rusiidicabe binni guni orar. Peru, stale tu na qué ricabi diʼ Dios oración sticaʼ.

NI RUSIIDIʼ BIBLIA. Jesús guníʼ cadi jneza diʼ guininu ngueca ca ngueca lu oración ni gúninu. Laabe guniʼbe sicaríʼ: «Ora guni orarluʼ la? cadi guiniʼluʼ ngueca ca ngueca» (Mateo 6:7, NM). Pa racaláʼdxinu gucaadiaga Dios oración ni gúninu la? naquiiñeʼ gúninu ni casi riuuláʼdxibe. Para nga la? naquiiñeʼ guizíʼdinu xii nga ni riuuláʼdxibe ne zacá nga guni orarnu laabe. Lu 1 Juan 5:14 na: «Pa inaba nu ni riulaʼdxi Dios gaca la? zucaa diaga laanu».

Laaca zanda gúʼndaluʼ Salmo 65:2; Juan 14:6, 14, ne 1 Juan 3:22.

Ximodo zanda guibáninu nayecheʼ

XIÑEE RINABADIIDXAʼ BINNI ZACÁ YAʼ. Stale tu riníʼ ique pa ti binni napa bidxichi o naca tuuxa nezalú binni o purtiʼ galán laa la? zabani nayecheʼ. Peru stale binni neca ugaanda guiráʼ nga qué ribani diʼ nayecheʼ.

NI RUSIIDIʼ BIBLIA. Jesús bisihuinni xii nga ni dxandíʼ zusiecheʼ binni ora guníʼ: «Nayecheʼ nga cani nanna naquiiñeʼ chuʼ gaxha de Dios» (Mateo 5:3, NM). Nga runi, zabáninu nayecheʼ pa guizíʼdinu ni dxandíʼ de Dios ne de cani naguixhe íquebe gúnibe para laanu. Ne ndaaniʼ Biblia nga zazíʼdinu cani, ne óraca zánnanu xii nga ni jma risaca ne xi qué risaca. Pa gudiʼnu lugar gacané Biblia laanu lu guiráʼ ni gúninu la? zabáninu jma nayecheʼ (Lucas 11:28).

Laaca zanda gúʼndaluʼ Proverbios 3:5, 6, 13-18 ne 1 Timoteo 6:9, 10.

Maʼ bidúʼyanu ximodo ricabi Biblia xhoopaʼ de ca cosa ni rinabadiidxaʼ binni. Racaláʼdxiluʼ gánnaluʼ jma la? Pa nácaluʼ tobi de ca binni ni «nanna naquiiñeʼ chuʼ gaxha de Dios» la? ziuuláʼdxiluʼ guiziidiluʼ jma. Zándaca guinabadiidxaluʼ, xiñee cudiiruʼ Dios lugar chuʼ cosa malu ne guendananá pa dxandíʼ rizaaláʼdxibe laanu yaʼ. O zándaca guinabadiidxaluʼ xi zanda gúniluʼ para guibánineluʼ binnilídxiluʼ jma galán. Biblia ricabi cani maʼ guninu ca ne xcaadxiruʼ ni rinabadiidxaʼ binni.

Peru stale binni qué riuulaʼdxiʼ diʼ guʼndaʼ libru ca. Nácabe nabé stale yaza nápani ne nagana para guiene binni ni. Ñuulaʼdxuʼ ñacané tuuxa lii para gúʼyaluʼ ximodo ricabi Biblia stale de cani rinabadiidxaʼ binni la? Ca testigu stiʼ Jiobá zanda gacanecaʼ lii.

Zanda gudiicabe lii ti libru ni láʼ Xipeʼ ndiʼ cusiidiʼ Biblia, laani gúcani para gacaneni ca binni ni jma nuu xhiiñaʼ, ti gúʼyacaʼ ximodo ricábini cani rinabadiidxaʼ stale binni. Laaca zanda gusiidicabe lii de Biblia sin quíxeluʼ laacabe. Pa naluʼ la? ti testigu stiʼ Jiobá ni nanna gusiidiʼ binni de lu Biblia ziganna lii guiráʼ semana raliʼdxuʼ o ratiica naluʼ para guʼndané lii de Biblia. Stale binni huasiidicabe laacaʼ zacá, ne stale de laacaʼ huaniʼcaʼ maʼ biziidicaʼ ni dxandíʼ de Dios.

Lii laaca zanda gúʼyaluʼ pabiáʼ risaca nga ganna binni ni dxandíʼ rusiidiʼ Biblia. Qué racanésini laanu gánnanu cadi jneza nga ni runi cré stale binni, nin cani cadi dxandíʼ riziidiʼ binni ni ruchenda laacaʼ, sínuque laaca racaneni laanu cuézanu zaca xiixa ni galán para laanu ne guibáninu nayecheʼ. Ne Jesús peʼ guníʼ: «Zanna tu ni dxandíʼ, ne zaladi tu ra cá tu yaga purti ma nanna tu ni» (Juan 8:32).