Carta stiʼ Grupu ni Zániru

Hermanu caʼ ni nadxiidu:

Guxuíʼlunu nácanu tobi de ca apóstol stiʼ Jesús ne zuhuaʼnu lu dani Olivo. Casi bihuinni Jesús nezalunu ne ante chebe guibáʼ gúdxibe laanu: «Zacaatu poder ora gueeda espíritu santu luguiatu. Ne zácatu testigu stinneʼ Jerusalén, guidubi Judea ne Samaria, ne dede ra jma zitu lu guidxilayú» (Hech. 1:8). ¿Xi gúninu yaʼ?

Cumu naroʼbaʼ dxiiñaʼ riʼ la? zándaca guidxíbinu ne guiníʼ íquenu: «Peru ¿ximodo guni predicardu dede ra jma zitu lu Guidxilayú pa huaxieʼdu yaʼ?». Zándaca guietenaláʼdxinu ni guníʼ Jesús gueelaʼ ante gatiʼ: «Qué risaca esclavu jma que xpixuaanaʼ. Pa guzanándacabe naa, laaca zazanándacabe laatu; pa maʼ bizuubacabe stiidxaʼ, laaca zuzuubacabe stiidxatu. Zúnicabe laatu guiráʼ cosa riʼ purtiʼ nácatu discípulo stinneʼ, purtiʼ qué runibiáʼcabe ni biseendaʼ naa» (Juan 15:20, 21). Pur ca diidxaʼ ni guníʼ Jesús riʼ, zándaca guinabadiidxanu: «¿Ximodo guni predicarnu guiráʼ binni pa nanaláʼdxicabe ne canazanándacabe laanu yaʼ?».

Peru yanna guiníʼ íquenu ca dxi nabáninu riʼ. Cumu nácanu testigu stiʼ Jehová la? laaca ngaca nga riníʼ íquenu. Purtiʼ laaca caquiiñeʼ gusiidiʼ chaahuinu binni de Reinu stiʼ Dios «dede ra jma zitu lu guidxilayú» ne ra nuu «binni de guiráʼ guidxi» (Mat. 28:19, 20). ¿Ximodo gúninu dxiiñaʼ naroʼbaʼ riʼ pa maca cá lu Biblia ziuu tu zucaalú laanu yaʼ?

Guizáʼ galán relatu zeeda lu libru stiʼ Hechos. Luni riete ximodo biʼniʼ ca apóstol ne xcaadxi xpinni Cristu ni bibani lu primé siglu que xhiiñaʼ Jehová. Guca libru riʼ para gacané ni laanu guni estudiarnu ca ni zeeda lu libru stiʼ Hechos ne guni sentirnu casi ñaca cadúʼyanu ora cazaaca ca ni riete luni. Nga runi, ra maʼ zidúʼndanu libru riʼ zánnanu xi bizaaca ca xpinni Cristu de dxiqué ne xi cazaaca ca xpinni Cristu de tiempu riʼ. Laaca zazíʼdinu ximodo naquiiñeʼ guni predicarnu ne ximodo nexheʼ chaahuiʼ dxiiñaʼ ni cayúninu. Zacané ca relatu riʼ laanu iguidxi fe stinu ne gápanu confianza Jehová nga cayuni dirigir xquidxi cásica bíʼnibe ni dxiqué.

Cayuni orardu pur laatu hermanu caʼ, canábadu Jehová ora gúʼndatu libru riʼ gacané ni laatu guiroobaʼ confianza nápatu laabe ne gacané ni laatu gusiiditu binni de Reinu stiʼ Dios ti ganda guilacaʼ (Hech. 28:23; 1 Tim. 4:16).