Gusíʼdinu binni guiráʼ ni caquiiñeʼ gánnacaʼ de Reinu stiʼ Dios
1. Xi libru chiguiuundaʼ lu Guendaridagulisaa ra Riuundaʼ Biblia ra guiuʼnu semana 14 stiʼ marzo.
1 Ra guiuʼnu semana 14 stiʼ marzo 2011, zuzulú ziuundaʼ libru “Testimonio cabal” del Reino de Dios lu Guendaridagulisaa ra Riuundaʼ Biblia. Libru riʼ nabé sicarú modo cusiéneni libru stiʼ Hechos, maca para guxuiʼlú binni ca relatu ni ruzeeteni. Laani cadi cusiene diʼ ni xiná cada tobi de ca versículo stiʼ libru ca, ni cusiéneni nga cada tobi de ca historia ni zeeda lu libru stiʼ Hechos, ne ca historia ca culuíʼ cani laanu ximodo zanda gúninu cani lu xquendanabáninu (Rom. 15:4).
2. Bisiene cani zeeda lu libru “Testimonio cabal”.
2 Cani zeeda lu libru riʼ. Lu guiropa yaza stiʼ libru ca zeeda ti carta nabé sicarú ni bicaa Grupu ni Zaniruʼ. Ne luni cusiene grupu ca ximodo zanda gacané libru riʼ laanu. Ra ruzulú cada capítulo stini zeeda caadxi diidxaʼ ni cusiene xi chiguieeteʼ lu capítulo ca, de racá zeeda ca versículo stiʼ Hechos ni chigusiéneni. Stale de ca capítulo ca nécani caadxi cuadru ni cusiene de ca guidxi ni guyuu dxiqué, de ca lugar ne cani ruzeeteʼ Hechos bizaaca ca xpinni Dios dxiqué. Ne cumu nuu xiroobaʼ lugar guriá libru ca la? zanda gucaa binni cueʼ ni. Neni caadxi dibuju ni cusiene ca relatu stiʼ Biblia. Nabé galán guca ca dibuju ca, nga runi zanda gacanécani laanu para gánnanu ximódopeʼ bizaaca ca relatu ca; lu últimu yaza stini zeeda ti lista ni cusiene chupa chonna de ca dibuju ne foto zeeda luni. Ra ruzulú libru ca ne ra rilúxeni zeeda chupa mapa ni zacané laanu gánnanu pa guidubi bicheeche ca xpinni Cristu ni bibani lu primé siglu que ca diidxaʼ nacubi ne galán que, ne zaqué yenécabe ca diidxaʼ que lu «idubi naca guidxilayú» (Hech. 1:8).
3. Guná nga ca cosa risaca ni zacabi libru stiʼ Hechos.
3 Ricábini ca cosa risaca rinabadiidxanu. Ora gúʼndanu libru stiʼ Hechos riʼ zacaneni laanu para gánnanu ca cosa risaca ni rinabadiidxanu ora rucheechenu diidxaʼ. Tobi de ca cosa ni zánnanu nga xi dxiiñaʼ ne xi diidxaʼ rucheeche cani dxandíʼ xpinni Cristu. Tuu nga zaniruʼ lu dxiiñaʼ riʼ ne ximodo cayúnibe ni. Xi randa runi ca xpinni Dios ora rizanándacabe ne rucaalúcabe laacaʼ. Ximodo racané espíritu santu laanu para gucheechenu diidxaʼ.
4. Ximodo zanda cueendunu ni galán ra guidúʼndanu libru riʼ.
4 Para ganda cueendunu ni galán la? naquiiñeʼ guʼndaʼ chaahuinu libru riʼ dede ante ti ganda guicábinu ora guidagulisaanu. Gúninu stipa pur cadi guiáʼdxanu cada tobi de ca guendaridagulisaa ca ne guiníʼ íquenu ximodo zanda iquiiñenu cani guizíʼdinu ora gucheechenu diidxaʼ. Ribézadu uguu libru riʼ gana laanu ora guidúʼndanu ni para ganda gusiidiʼ chaahuinu binni de Reinu stiʼ Dios (Hech. 28:23).