Chinándanu ejemplu stiʼ cani gupa fe
1. Xi libru chiguidúʼndanu lu Guendaridagulisaa ra Riuundaʼ Biblia dede semana 19 stiʼ octubre.
1 Zadúʼndanu libru Chinándanu ejemplu stiʼ cani gupa fe lu Guendaridagulisaa ra Riuundaʼ Biblia dede semana 19 stiʼ octubre 2015. Libru riʼ cusiene historia stiʼ 14 hombre ne gunaa ni qué nusaana de ñuni ni na Dios. Ora guidúʼndanu ni zuni sentirnu casi ñaca dxandíʼ cadúʼyanu ca binni rieeteʼ luni, xi guiráʼ bizaacacaʼ ne xi guendanagana gudíʼdicaʼ pur qué nusaanacaʼ Jiobá. Laaca zazíʼdinu stale cosa ni zanda iquiiñenu lu xquendanabáninu (Heb. 6:12).
2. Bizeeteʼ caadxi cosa zeeda lu libru Chinándanu ejemplu stiʼ cani gupa fe.
2 Cani zeeda lu libru riʼ. Chupa herramienta ni zanda iquiiñenu luni nga fecha ne mapa ni culuíʼ padxí ne paraa bibani ca binni rieeteʼ luni. Lu cada capítulo zeeda ndaa ra na «Para guiníʼ íquenu» ni zacané laanu guiníʼ ique chaahuinu ni cadúʼndanu lu ca relatu riʼ ne gúninu ni guizíʼdinu lúcani. Laaca napa ni stale dibuju sicarú ni culuíʼ ximódopeʼ bizaaca xiixa relatu ti ganda guxuíʼlunu cani.
3. Ximodo cueendunu ni galán ora guidúʼndanu libru riʼ.
3 Ximodo cueendunu ni galán ora guidúʼndanu ni. Lu carta zeeda ra ruzulú libru riʼ, guluu Grupu ni Zaniruʼ gana laanu gúninu ndiʼ: «Laguxuiʼlú cani gúʼndatu luni casi ñaca ñuutu ra cayaca cani. Laguni stipa pur guni sentirtu ni biʼniʼ sentir ca binni ni rieeteʼ luni ne laguuyaʼ cani bíʼyacabe. Ne laguiníʼ ique xi ñúnitu pa nizaacatu ni bizaacacabe». Peru cadi pur nga guxuíʼlunu xiixa ni qué gánnanu pa dxandíʼ guca, sínuque guxuíʼlunu ni zeeda lu relatu stiʼ Biblia ca ne guiene chaahuinu ximodo biʼniʼ sentir ca binni rieeteʼ luni. Ne para gúninu nga la? caquiiñeʼ cueenu tiempu guiníʼ íquenu ni cadúʼndanu (Neh. 8:8). Pa ni nexheʼ guiuundaʼ semana ca guzulú ni biaʼ galaa capítulo la? hermanu ni chiguni estudiu ca zaquiiñeʼ menu de ti minutu para guiníʼ xi biuundaʼ semana gudiʼdiʼ. Laaca zanda gúnibe tobi o chupa guendarinabadiidxaʼ para guietenalaʼdxiʼ cani cucaadiaga ni biziidicaʼ, pa cadi nexheʼ guiuundaʼ ndaa ra na «Para guiníʼ íquenu».
4. Xiñee risaca guidúʼndanu libru Chinándanu ejemplu stiʼ cani gupa fe.
4 Guiráʼ dxi riquiiñeʼ guidxilayú stiʼ Binidxabaʼ intiica cosa para gusirá fe stinu. Libru riʼ ne guiráʼ tema riree lu Torre stiʼ ni rapa ni láʼ casi laani, naca cani regalu stiʼ Jiobá para guquidxi fe stinu (Sant. 1:17). Para cueendunu stale cosa galán ora guidúʼndanu libru riʼ la? cadi guiáʼdxanu Guendaridagulisaa ra Riuundaʼ Biblia ne guicábinu luni.