Carta stiʼ Grupu ni Zaniruʼ

Hermanu ni nadxiidu:

Laanu cani runi adorarnu Jiobá nadxiinu Stiidxabe, Biblia. Nánnanu dxandíʼ guca ca historia zeeda luni, laaca racané ca conseju zeeda lu ni ca laanu ne rusihuinni cani pabiáʼ nadxii Jiobá binni guidxilayú (Salmo 119:105; Lucas 1:3; 1 Juan 4:19). Ni racaláʼdxidu nga gacanedu binni guiziidiʼ cani dxandíʼ zeeda lu Stiidxaʼ Dios. Nga runi, né stale guendanayecheʼ cayuni pres entardu laatu libru: Ca lección ni riziideʼ de lu Biblia. Chitídxidu laatu caadxi cosa ni zeeda lu libru riʼ.

Libru riʼ guca ni para ca xcuidi, peru laaca zanda gacané ni cani maʼ huaniisi ni racalaʼdxiʼ guiziidiʼ jma de lu Biblia. Ne cumu naca Biblia ti libru para guiráʼ xixé binni la? nánnanu zabeendunu stale ni galán ora guidúʼndanu ni, ne zanda gacané ni laanu chuʼnu nayecheʼ.

Ca historia ne ca binni zeeda lu libru riʼ biree cani de lu Biblia, ruzulú ni dede dxi guyáʼ guiráʼ ni nuu. Guca ti stipa naroʼbaʼ para ganda gaca ni modo guiene binni ne nexhechaahuiʼ ca historia ca cásipeʼ modo guca cani.

Cadi ti libru ni caníʼ si de historia biree lu Biblia nga laani. Ca historia ne ca dibuju zeeda lu libru riʼ guca cani para guxuíʼlunu ne guiénenu xi biʼniʼ sentir ca binni riete luni.

Publicación riʼ racané ni laanu gánnanu ruzeeteʼ Biblia de ca binni ni bizuubaʼ stiidxaʼ Jiobá ne cani qué nuzuubaʼ stiidxabe. Laaca racané ni laanu guizíʼdinu de ejemplu stiʼ ca binni riʼ (Romanos 15:4; 1 Corintios 10:6). Napa libru riʼ 14 sección. Ra ruzulú cada sección, zeeda ti resumen de cani zanda guizíʼdinu.

Pa nápaluʼ xiiñiluʼ, zanda gúʼndaneluʼ laacabe ti capítulo ne guiniʼtu de ca dibuju zeeda luni. De racá zanda gúʼndatu ca textu zeeda lu Biblia ra biree historia ca. Gucané xiiñiluʼ guiene tobi si nga guiráʼ ni rusiidiʼ ca capítulo stiʼ libru riʼ ne ni rusiidiʼ Biblia. Laaca zanda iquiiñeluʼ ni para gacaneluʼ ti binni huaniisi ganna xi rusiidiʼ Biblia.

Racaláʼdxidu gacané publicación riʼ ca binni ni nayá ladxidóʼ, cásica ni nahuiiniʼ zaqueca ni huaniisi para guiziidicaʼ ne chinándacaʼ ni zeeda lu Stiidxaʼ Dios. Zacá zanda guni adorárcabe Jiobá ne gácacabe parte de familia stiʼ ni nadxii.