NDAA 21

Xii nga Betel

Chupa testigu stiʼ Jiobá cayúnicaʼ dxiiñaʼ ra ribeecabe dibuju ne foto ra Yoo Betel — Departamentu ra ribeecabe dibuju ne foto (Estados Unidos)

Ti testigu stiʼ Jiobá cayuni dxiiñaʼ ndaaniʼ imprenta stiʼ Yoo Betel ni nuu Alemania — Alemania

Ti testigu stiʼ Jiobá cayuni dxiiñaʼ ra riaʼriʼ lari stiʼ Yoo Betel ni nuu Kenia — Kenia

Ca meseru cayuni dxiiñaʼ ra Yoo Betel ni nuu Colombia — Colombia

Diidxaʼ Betel ni gucuá lu diidxaʼ hebreu riniʼni «Lidxi Dios» (Génesis 28:17, 19, nota). Ne biáʼsipeʼ lá ca para ca yoo napa ca testigu stiʼ Jiobá lu guidubi Guidxilayú ne dede racá ruuyacabe ximodo guireeche diidxaʼ ne racanécabe para gácani. Grupu ni Zaniruʼ stiʼ ca testigu stiʼ Jiobá nuucabe Betel ni nuu Nueva York (Estados Unidos), ne dede racá ruuyacabe dxiiñaʼ ni raca ndaaniʼ guiráʼ Betel ni nuu lu stale guidxi roʼ. Guiráʼ ca xpinni Cristu ni runi dxiiñaʼ ca lugar riʼ runibiáʼcabe laacaʼ casi familia Betel. Cásica ti familia, rócabe gueta, rúnicabe dxiiñaʼ juntu, nabézacabe juntu ne ruundacabe Biblia juntu (Salmo 133:1).

Ti lugar risaca ra rúnicabe dxiiñaʼ biaʼ gándatiʼ. Ndaaniʼ guiráʼ ca familia Betel nuu hombre ne gunaa ni maʼ xadxí de cayuni xhiiñaʼ Dios ne riquiiñecabe xquendanabánicabe para gúnicabe ni nabe ne gúnicabe jma lu xhiiñaʼ Reinu (Mateo 6:33). Nin tobi de laacabe qué riaxa, peru guirácabe nápacabe ra gásicabe, ni gócabe, ne laaca ricaacabe ti ndaa bueltu para sícabe xiixa ni iquiiñecabe. Cada tobi de laacabe napa ti dxiiñaʼ ni runi: nuu tu laa runi dxiiñaʼ ndaaniʼ oficina, nuu tu runi dxiiñaʼ ra guzina o ndaaniʼ comedor; xcaadxi runi dxiiñaʼ ndaaniʼ imprenta o ndaaniʼ ti taller ra raca libru ne nuu tu laa rusiá ndaaniʼ cuartu, nuu tu runi dxiiñaʼ ra riaʼriʼ lari, xcaadxi rúnicaʼ dxiiñaʼ ra riá ne ra raca chaahuiʼ guiráʼ cani riquiiñecabe Betel ne rácaruʼ xcaadxi dxiiñaʼ.

Ti lugar ra raca stale dxiiñaʼ para gacanécabe guireeche stiidxaʼ Reinu. Guiráʼ dxiiñaʼ raca ndaaniʼ ca yoo Betel, rácacani para ganda guiziidiʼ jma binni de Biblia. Ne folletu riʼ rusihuinni zacá ni. Grupu ni Zaniruʼ nga biʼyaʼ xi guicá luni, ne biquiiñecabe computadora para guseendacabe ni ra nuu stale de ca equipu ni rutiixhi diidxaʼ ni nuu lu guidubi naca Guidxilayú, ne biquiiñecabe ca prensa ni nuu ndaaniʼ stale yoo Betel para biʼniʼ imprimírcabe ni. Últimu la? biseendacabe ni ra nuu jma de ti gayuaa chii mil de neza binni ridagulisaa. Lu cada dxiiñaʼ ni guca para gunda biree folletu riʼ, gucané ca familia Betel para ganda gaca dxiiñaʼ ni jma caquiiñeʼ gaca nagueenda: guireeche ca diidxaʼ nacubi ne galán (Marcos 13:10).

Tu runi dxiiñaʼ Betel ne xi ricaacabe.
Xi dxiiñaʼ nga jma caquiiñeʼ gaca nagueenda ne ximodo racané familia Betel gácani.