LECCIÓN 83
Bidii Jesús ni gudó stale binni
Lu iza 32, ante gaca saa Pascua ti dxi biguetaʼ ca apóstol de yeguni predicarcaʼ. Guizáʼ maʼ bidxaga ca apóstol que, ngue runi yené Jesús laacabe ndaaniʼ ti canuá guidxi Betsaida para guiziiláʼdxicabe. Peru ante chindácabe guidxi que, biiyaʼ Jesús nanda stale binni laacaʼ. Racaláʼdxibe chuʼbe stúbibe né ca apóstol stibe, peru ora bíʼyabe ca binni que biabe laacaʼ ne biʼniʼ tratarbe laacaʼ né stale cariñu. Bisiándabe cani huará ne bizulú bisiidibe laacaʼ stale cosa. Guidubi dxi guníʼnebe laacaʼ de Reinu stiʼ Dios. Ra maʼ ziyaca huadxí, gudxi ca apóstol que laabe: «Zándaca maʼ candaana ca binni riʼ. Gudxi laacabe chibíʼcabe para guyúbicabe ni gócabe».
Para bicabi Jesús: «Cadi caquiiñeʼ chécabe. Lagudii ni gócabe raríʼ». Ca apóstol que gunabadiidxacaʼ laabe: «¿Nápaluʼ gana chisidu pan para gócabe la?». Felipe, tobi de ca apóstol que guníʼ: «Neca ñápanu stale bueltu, qué zadxélanu ni gó guiráʼ binni riʼ».
Gunabadiidxaʼ Jesús laacabe: «¿Pabiáʼ guendaró nápanu?». Para bicabi Andrés: «Nápanu gaayuʼ pan ne chupa bendahuiiniʼ. Peru qué zugaandani para gó guiráʼ binni riʼ». Jesús guníʼ: «Latané naa ca pan ne ca bendahuiiniʼ ca». De raqué, gunábabe ca binni que gácacaʼ grupu de cincuenta ne de ti gayuaa, ne cuicaʼ lu guixi que. Óraque gucuaabe ca pan ne ca benda que, gundisaʼ lube guibáʼ ne bíʼnibe ti oración. Bidiibe guendaró que ca apóstol para quíʼzicaʼ ni lu guiráʼ binni. Guiráʼ gaayuʼ mil hombre, ne aparte ca gunaa ne ca xcuidi nuu raqué, gudocaʼ dede bidxá ndaanicaʼ. Gudó si ca binni que, bitopa ca apóstol que guiráʼ ni biaana sobra para cadi gusáʼbicaʼ ni. ¡Biaʼsi 12 dxumi bitópacabe! ¿Cadi dxandíʼ ridxagayaanu milagru guca riʼ la?
Guizáʼ bidxagayaa ca binni que pur milagru biʼniʼ Jesús dede guyuucaʼ ñúnicaʼ laabe rey. Peru nanna Jiobá caʼruʼ diʼ guedandá ora gácabe rey, ne laaca nanna Jesús ni. Ngue runi gúdxibe ca binni que chibiʼcaʼ ne óraque gúdxibe ca apóstol stibe checaʼ sti ladu nisadóʼ stiʼ Galilea. Zeʼ si ca apóstol que, gudxíʼbabe lu ti dani stúbisibe. ¿Xiñee bíʼnibe ndiʼ yaʼ? Para ganda guiníʼnebe Bixhózebe. Siempre gulee Jesús tiempu para guni orar neca guyuu xhiiñaʼ.
«Cadi ucaa ique tu guni tu dxiiña para gapa tu endaró ni iquiiñe si tu ndaani guidxilayú riʼ, purti qué zandaa ni, sínuque laucaa ique guni tu dxiiña sti Dios para gapa tu enda nabani ni qué zaluxe. Naa nga Hombre Biseenda Dios ne naa udiee ni laatu» (Juan 6:27).