Gastiʼ qué nucueeza laacabe

Guiráʼ dxi ribí ti hombre ni qué rizá ra puertaʼ templu que para guinabaʼ bueltu. Ti huadxí biiyabe zedayuu Pedro ne Juan ndaaniʼ templu que para gúdxibe laacaʼ: «Lagudii naa xiixa». Pedro gudxi laabe: «Zanda gudieeʼ lii xiixa jma galán qué bueltu. De lu lá Jesús, ¡biasa ne guzá!». Óraque gucané Pedro hombre que guiasa ne maʼ gunda guzá. Guizáʼ bidxagayaa binni ora bíʼyacaʼ milagru que ne stale de laacaʼ gúcacaʼ xpinni Cristu.

Nabé bidxiichi ca sacerdote ne ca saduceu. Gunaazecabe ca apóstol que ne yenécabe laacaʼ ra nuu tribunal stiʼ ca judíu ni láʼ Sanedrín, ne gunabadiidxacabe laacaʼ: «¿Tuu bidii poder laatu para gusiándatu hombre riʼ?». Pedro bicabi: «Ni bidii poder laadu nga Jesucristu, hombre biititu que». Óraque gudindené tribunal stiʼ ca judíu que laacabe ne nacaʼ: «¡Maʼ cadi guiniʼtu de Jesús!». Ca apóstol que guniʼcaʼ: «Naquiiñeʼ guinidu de laabe, ne qué zusaanadu de gúnidu ni».

Óraque bindaacabe Pedro ne Juan, casi bireecaʼ de raqué yetídxicaʼ xcaadxi discípulo xi bizaacacaʼ. Guirácabe biʼniʼ orárcabe Jiobá: «Gucané laadu gápadu valor para cadi gusaana de guinínedu binni de lii». Bidii Jiobá laacabe espíritu santu, ne zaqué gunda biʼniʼ predicárcabe ne bisiándacabe binni. Ngue runi stale binni gúcacaʼ xpinni Cristu. Guizáʼ gupa ca saduceu envidia ca apóstol que ne guluucaʼ laacabe ndaaniʼ cárcel. Peru gueelaʼ que biseendaʼ Jiobá ti ángel guxheleʼ puertaʼ cárcel que ne gudxi laacabe: «Laché ra templu sti biaje ne laguni predicar raqué».

Sti dxi siadóʼ guyé ca soldadu que ra nuu Sanedrín ne gúdxicabe laaca: «¡Deʼguʼ dxiichiʼ cárcel ca, peru ca hombre ni biseguyooto maʼ qué guínnicaʼ ndaaniʼ ni! ¡Cayuni predicarcaʼ ndaaniʼ templu!». Ngue runi gunaazecabe ca apóstol que sti biaje ne yenécabe laacaʼ ra nuu Sanedrín que. Gudxi sumo sacerdote que laacabe: «¡Ma gúdxidu laatu cadi guiniʼtu de Jesús!». Pedro gudxi laacabe: «Jma naquiiñeʼ guzúʼbadu stiidxaʼ Dios qué stiidxaʼ binni».

Guizáʼ bidxiichi tribunal stiʼ ca judíu dede guyuucaʼ ñuuticaʼ ca apóstol que. Óraque bizuhuaa ti fariseu láʼ Gamaliel ne guníʼ: «¡Laguuyaʼ xii nga chigúnitu! Zándaca nuuné Dios ca hombre riʼ. ¿Dxandíʼ nga nuutu gucaalutu Dios la?». Bicaadiágacabe hombre que ne bindaacabe ca apóstol que, peru ante checaʼ gudíñecabe laacaʼ né palu ne gúdxicabe laacaʼ gusaanacaʼ de guni predicarcaʼ. Peru neca zaqué qué nucueezacabe ca apóstol de ñuni predicarcaʼ né stale valor ndaaniʼ templu que ne de yoo pur yoo.