BIBLIOTECA NI NUU LU INTERNET Watchtower
Watchtower
BIBLIOTECA NI NUU LU INTERNET
diidxazá
  • BIBLIA
  • PUBLICACIÓN
  • REUNIÓN
  • w06 1/8 yaza 27-32
  • Ziuʼnu nayecheʼ pa guidxíbinu Jiobá

Gastiʼ nin ti videu de ca ni guliluʼ riʼ.

Bitiidilaʼdxiʼ, guyuu ti error ora cayaca cargar videu riʼ.

  • Ziuʼnu nayecheʼ pa guidxíbinu Jiobá
  • Torre stiʼ ni rapa ni caníʼ de Reinu stiʼ Jiobá 2006
  • Subtítulo
  • Laaca zanda gúʼndaluʼ
  • Guyuucabe nayecheʼ sti biaje
  • Jma galán gacananu que gucheʼnu
  • Ziuʼnu nayecheʼ pa guidxíbinu Dios
  • Jiobá rudii stipa laanu
  • Ti herencia ni risaca stale
  • Gácanu binni nuu xpiaaniʼ: guidxíbinu Dios
    Torre stiʼ ni rapa ni caníʼ de Reinu stiʼ Jiobá 2006
  • Zabáninu nayecheʼ pa guidxíbinu Jiobá
    Torre stiʼ ni rapa ni caníʼ de Reinu stiʼ Jiobá 2007
  • «Bisiidiʼ naa guneʼ ni naluʼ»
    Torre stiʼ ni rapa ni caníʼ de Reinu stiʼ Jiobá 2012
  • Guiranu casi ñácanu tobi si gusisácanu lá Jiobá
    Torre stiʼ ni rapa ni caníʼ de Reinu stiʼ Jiobá 2007
Biiyaʼ jma
Torre stiʼ ni rapa ni caníʼ de Reinu stiʼ Jiobá 2006
w06 1/8 yaza 27-32

Ziuʼnu nayecheʼ pa guidxíbinu Jiobá

«Nayecheʼ nga hombre ni ridxibi Jiobá.» (SALMO 112:1.)

1, 2. Xi ribeendunu ora ridxíbinu Jiobá.

NABÉ nagana para guibáninu nayecheʼ ca dxi stinu riʼ. Para guibáninu nayecheʼ riquiiñeʼ gúninu ni jneza, guiníʼ ique chaahuinu xi gúninu ne guixélenu de guendaquéiquiiñeʼ. Jiobá, Dios ni bizáʼ laanu, maʼ bidiibe laanu Biblia para gusiidibe laanu guibáninu jma galán. Nga runi, caquiiñeʼ guizíʼdinu ne gúninu ni na Dios, purtiʼ zacá zusihuínninu ridxíbinu laabe. Pa gúninu zacá la? dxandipeʼ ziuʼnu nayecheʼ (Salmo 23:1; Proverbios 14:26).

2 Lu tema riʼ zadúʼyanu ejemplu ni zeeda lu Biblia ne ejemplu stiʼ binni nabani yanna ni rusihuinni pabiáʼ risaca guidxíbinu Dios. Zacané cani laanu para cadi gúninu xiixa cosa malu ora chuʼ tu gucaa laanu gúninu ni, ne laaca zacané cani laanu para gácanu binni nadxibalú ti gúninu ni jneza. Zazíʼdinu ribani binni nayecheʼ ora ridxibi Dios, purtiʼ rucaani laa guni chaahuiʼ modo canazá, cásica biʼniʼ rey David. Ne laaca zadúʼyanu nabé risaca gusiidiʼ binni ni xiiñiʼ, purtiʼ zeeda gácani casi ti herencia. Pur guiráʼ ca ndaayaʼ riʼ, Biblia cayabi laanu: «Nayecheʼ nga hombre ni ridxibi Jiobá» (Salmo 112:1).

Guyuucabe nayecheʼ sti biaje

3. Xi gucané David para guyuu galán ne Dios sti biaje dxi bichee.

3 Casi bidúʼyanu lu tema ni gudídinu ca, chonna biaje bichee David purtiʼ qué nidxíbipebe Dios. Peru ni bíʼnibe ora bidii Jiobá conseju laabe bisihuínnini qué nusaana de nidxíbibe Dios. Cumu gúpabe respetu ne bisisácabe Dios la? bicaani laabe gudiibe cuenta dxandíʼ bicheebe, guchaabe modo nabánibe ne guyúbibe chuʼbe galán ne Jiobá sti biaje. Cásica laabe ne xcaadxi binni gúpacabe stale yuubaʼ purtiʼ bicheebe, neca zaqué qué nusaana Jiobá de niguu ndaayaʼ laabe purtiʼ dxandíʼ guca arrepentirbe. Riquiiñeʼ gudii ejemplu stiʼ David stipa ca xpinni Cristu ni nabani yanna riʼ, pa maʼ bíʼnicaʼ xiixa cosa malu.

4. Ximodo ribiguetaʼ guendanayecheʼ stiʼ binni ora ridxibi Dios.

4 Guidúʼyanu ni bizaaca Sonia.a Dxi gúcabe precursora regular la? bidxaagabe binni ni qué runi ni na Dios ne bíʼnibe stale cosa malu, ngue runi guleecabe laabe ndaaniʼ xquidxi Dios. Ora bidiibe cuenta cadi jneza ni cayúnibe, bíʼnibe guiráʼ ni caquiiñeʼ gúnibe para chuʼbe galán ne Jiobá sti biaje, ne ra gudiʼdiʼ dxi maʼ bibiguétabe ndaaniʼ xquidxi Dios. Peru laabe qué liica ñuu dxi niníʼ íquebe maʼ qué zúnibe ni na Dios. Ra gudiʼdiʼ iza beeda gácabe precursora sti biaje ne bichaganabe ti xpinni Cristu ni naca binnigola lade ca binni ridagulisaa. Yanna riʼ, guirópacabe nuucabe nayecheʼ purtiʼ cayúnicabe ni na Jiobá. Nécapeʼ riuubaʼ ladxidóʼ Sonia ora rietenalaʼdxiʼ guyuu ti tiempu bixélebe de neza stiʼ Cristu la? maʼ nuube nayecheʼ yanna purtiʼ nánnabe bibiguétabe ndaaniʼ xquidxi Dios sti biaje purtiʼ ridxíbibe laa.

Jma galán gacananu que gucheʼnu

5, 6. Bizeeteʼ guiropaʼ biaje qué niná David ñuuti Saúl, ne bisiene xiñee qué ñúnibe ni.

5 Jma galán guidxíbinu Dios purtiʼ zacá qué zucheʼnu. Guidúʼyanu xiñee zacá ni pur ni biʼniʼ David. Dxi Saúl ne chonna mil soldadu stiʼ guzananda laabe la? yechuu biáʼsipeʼ ndaaniʼ cueva ra nucaachilú David ne ca xpinni. Laacaʼ gúdxicaʼ laabe ñuutibe Saúl. Ca xpínnibe guníʼ íquecaʼ Jiobá ngue cusaana xhenemígube que ndaaniʼ nabe para guutibe laa. David bidxiña dede ra nuu Saúl chaahuidugá ne bichuuguʼ ti ndaa xhábabe. Zándaca para laanu cadi málupeʼ ni biʼniʼ David, peru cumu ridxíbibe Dios la? bichiiñani xquendabiaanibe. Ngue runi bicueezabe ca xpínnibe ne ca diidxaʼ riʼ: «Naa qué zanda diʼ guneʼ ndiʼ señor stinneʼ ni gulí Jiobá, purtiʼ cadi jneza diʼ ruuyabe ni» (1 Samuel 24:1-7).b

6 Sti biaje, dxi biaana Saúl lu ti layú para gasiʼ ti huaxhinni la? guizáʼ bisisiaasiʼ Jiobá laabe ne ca xpínnibe. David ne sobrínube Abisai, ti hombre nadxibalú, guyécabe ra nuu ca hombre que. Ca xpinni Saúl néxhecaʼ guidubi guriá ne laa nexheʼ galahuiʼ de laacabe. Nin tobi de ca xpínnibe qué nudii cuenta ora gudiʼdiʼ David ne Abisai ládecaʼ ne yendacaʼ dede ra nisiaasiʼ Saúl. Abisai gucalaʼdxiʼ nunduuxeʼ laabe oraqueca, peru David bicueeza laabe ne ca diidxaʼ riʼ: «Tu laa huasigaanáʼ luguiáʼ binni ni gulí Jiobá ne guiaana sin donda yaʼ» (1 Samuel 26:9, 12).

7. Xi gucané David para qué nucheené Dios.

7 Xiñee qué ñuuti David rey Saúl guiropaʼ biaje que yaʼ. Purtiʼ jma bidxíbibe Jiobá que Saúl. Cumu bidxíbibe Dios la? para laabe jma galán gacanabe que gucheenebe laa (Hebreos 11:25). Laabe gunna dxíchibe zapa Jiobá xquidxi ne laaca zapa laabe. Ne laaca bidiibe cuenta zabánibe jma nayecheʼ ne zudii Dios laabe stale ndaayaʼ pa guzuubabe stiidxaʼ, peru pa qué gúnibe ni zudxiideche Jiobá laabe (Salmo 65:4). Ne laaca nánnabe dxandíʼ zuni Dios laabe rey lugar stiʼ Saúl, casi maca guníʼ, peru zabézabe dede dxi maʼ na Jiobá ne laaca laa guiníʼ ximodo gácabe ni (1 Samuel 26:10).

Ziuʼnu nayecheʼ pa guidxíbinu Dios

8. Xi riquiiñeʼ gúninu ora guidxaagalunu guendanagana cásica biʼniʼ David.

8 Cani nácanu xpinni Cristu nánnanu zuni burla binni laanu, zaladxi laanu ne zadxaagalúrunu xcaadxi guendanagana (Mateo 24:9; 2 Pedro 3:3). Nuu tiru laaca zapanenu guendanagana ca bíʼchinu ne ca bizáʼnanu ni zinanda Cristu. Peru cadi guiaandaʼ laanu ruuyaʼ Jiobá guiráʼ ni cayaca, rucaadiágabe ora guni orarnu, ne zuni chaahuibe ca cosa ni cadi cayaca jneza ora gúʼyabe maʼ zanda gácani ne modo racaláʼdxibe (Romanos 12:17-21; Hebreos 4:16). Nga runi, qué ridxíbidinu cani cucaalú laanu, sínuque ridxíbinu Dios ne rinábanu gulabe laanu. Cásica David, qué ruyúbinu ximodo guquíxenu ni bíʼnicabe laanu, ne rúninu ni na ca ley stiʼ Dios neca gacananu. Ra tiidiʼ iza, zusiecheʼ nga laanu. Ximodo yaʼ.

9. Bizeeteʼ ti ejemplu ni rusihuinni zanda chuʼ binni nayecheʼ ora rizanándacabe laa purtiʼ ridxibi Dios.

9 Ti misioneru ni huayuni dxiiñaʼ África pur stale iza guníʼ sicaríʼ: «Rietenalaʼdxeʼ ni bizaaca ti gunaa ne ti dxaapahuiiniʼ stiʼ. Cumu xpinni Cristu laacabe la? qué ninácabe nizíʼcabe ti tarjeta stiʼ ti partidu políticu. Guizáʼ naná modo gudiñe caadxi hombre laacabe, ne de raqué biseendacaʼ laacabe ra lídxicabe. Ora zibíʼcabe, jñaabe biyubi ximodo niguixhedxí ladxidoʼbe purtiʼ cayuunabe ne cadi cayénebe xiñee bininá ca binni que laacabe. Dxandíʼ, qué ñuucabe nayecheʼ ora gucanácabe, peru cumu bizuubacabe stiidxaʼ Dios la? nayá guyuu xquendabiaanicabe ne ra gudiʼdiʼ dxi maʼ guyuucabe nayecheʼ. Pa ñaca nizíʼcabe ca tarjeta que la? maʼ gadxé ni ñuni ca hombre que: nudiicaʼ nagaʼndaʼ laacabe para nihuinni cayéchecaʼ pur ni bíʼnicabe ne dede nuyaacaʼ ora nisaanacaʼ laacabe ra lídxicabe. Pa ñaca ñuni gunaa riʼ ne xiiñiʼ ni na ca binni que la? maʼ qué ñuucabe nayecheʼ». Peru cumu bidxíbicabe Dios la? nga runi nuucabe nayecheʼ.

10, 11. Xi guleendú ti gunaa purtiʼ ridxibi Dios.

10 Cumu ridxíbinu Dios la? laaca riuʼnu nayecheʼ ora gápanu xiixa guendanagana ni gusihuinni pa dxandíʼ rusisácanu guendanabani stinu. Dxi guca xiiñiʼ María guionna baʼduʼ stiʼ, ti doctor gudxi laabe gutiidiʼ xiiñibe. Na rabi laabe: «Nabé nadá modo nuuluʼ. Zándaca guizaacaluʼ xiixa ora tiisi ne pa gaca nga qué zadiʼdiʼ veinticuatro hora para gátiluʼ. Baʼduhuiiniʼ ca laaca qué zalá diʼ. Ne pa qué gaca nga, qué gannadiáʼ pa zálebe jneza». Para dxi guca ndiʼ maʼ ziné María caadxi dxi de cayuundaʼ Biblia ne ca testigu stiʼ Jiobá, peru caʼruʼ diʼ chúʼnisabe. Laabe guniʼbe: «Neca zaqué, gudixhe iqueʼ guneʼ ni na Jiobá, ne guzuubaʼ stiidxabe neca guizaaca intiica si cosa» (Éxodo 21:22, 23).

11 Biaʼ dxi guca xiiñiʼ María la? biindarube Biblia ne gúpabe ca binnilídxibe. Dxi maʼ bidxiña dxi gápabe xiiñibe, guniʼbe xi guca: «Jma nagana modo gupaʼ laabe que xhupa xiiñeʼ, peru gúlebe jneza». Bíʼnibe zaqué purtiʼ bidxíbibe Dios, nga runi qué nuchiiña xquendabiaanibe ne qué nindaa diʼ guyuunísabe. Xiiñiʼ gunaa riʼ laaca biziidiʼ guidxibi Jiobá laga ziniisi, ne yanna cayúnibe dxiiñaʼ ndaaniʼ Betel stiʼ ca testigu stiʼ Jiobá.

Jiobá rudii stipa laanu

12. Ximodo gupa David stipa purtiʼ bidxibi Dios.

12 Casi maʼ bidúʼyanu, qué nuchee David purtiʼ bidxibi Jiobá. Peru laaca gucaneni laabe gúnirube sti cosa: bibánibe casi binni nuu xpiaaniʼ ne bíʼnibe ni jneza ora gudíʼdibe ra nagana. Dxi canagucaachilú David de Saúl la? laabe ne ca xpínnibe yeguiaanacabe ti iza ne tapa beeu Ziglag, guidxi ra biʼniʼ mandar ca filisteu (1 Samuel 27:5-7). Ti biaje, dxi qué guinni ca hombre de guidxi que, beeda caadxi amalequita guláʼnacaʼ ne bicaaguicaʼ guidxi que, ne laaca yenécabe xheelaʼ ca hombre que, ca baʼduhuiiniʼ ne ca maniʼ stícabe. Ora bibiguetaʼ David ne ca xpinni ne biiyacaʼ xi guca la? biinacaʼ. Peru, qué nindaa diʼ bidxiichiné ca binni que David, ne guníʼ stiidxacaʼ guchacaʼ guié laabe dede gátibe. Nécapeʼ biuubaʼ ladxidoʼbe ora gúnnabe ni, peru cadi pur ngue maʼ qué nidxélabe xi ñúnibe (Proverbios 24:10). Bidxíbibe Jiobá, ngue runi biyúbibe laa para gudii stipa laabe. Cumu gucané Dios laabe ne ca xpínnibe la? yeugaandacabe ca amalequita ne gúxhacabe laacaʼ guiráʼ ni guláʼnacaʼ (1 Samuel 30:1-20).

13, 14. Ximodo gunda biʼniʼ ti xpinni Cristu ni jneza purtiʼ ridxibi Dios.

13 Yanna riʼ laaca caquiiñeʼ guni cré ca xpinni Dios laabe de guidubi ladxidoʼcaʼ ne gácacaʼ nadxibalú, ti ganda gúnicaʼ ni jneza. Guiníʼ íquenu ni bizaaca Cristina. Laabe bizulú biindabe Biblia ne ca testigu stiʼ Jiobá dede dxi jma nahuiinibe, peru laaca guizáʼ guyuuláʼdxibe guiziidibe guxhídxibe pianu para guxhídxibe nezalú stale binni ne biziidibe ni. Cumu laaca natuibe la? guca nagana para laabe gucheechebe diidxaʼ, ne laaca nabé bidxíbibe ora gúnnabe xi guiráʼ naquiiñeʼ gúnibe ora maʼ guyuunísabe. Peru ra ziyapa dxi de cayuundabe Stiidxaʼ Dios, biʼniʼ sentirbe zigudiini stipa laabe. Cumu caziidibe guidxíbibe Jiobá la? biénebe rinabaʼ Dios gannaxhii ca xpinni laa de guidubi ladxidóʼ, guidubi xquendabiaaniʼ, guidubi xhialma ne guiráʼ stipa stiʼ (Marcos 12:30). Ora biénebe ni la? bicaani laabe gudiibe laabe Jiobá ne chúʼnisabe.

14 Gunabaʼ Cristina gacané Jiobá laa para guiniisi jma lu Stiidxabe. Cristina guníʼ: «Ti binni ni nanna guxhidxi pianu nezalú stale binni napa xidé cheʼ stale guidxi para guxhidxi dede biaʼ 400 biaje lu ti iza purtiʼ zacá nga contratu ni biʼniʼ firmar. Ngue runi beeda gacaʼ maestra, zaqué gunda bidxelaʼ ni guibaneniáʼ ne guca precursora regular». Ca dxi que mápeca nexheʼ padxí chiguxhídxibe ndaaniʼ tobi de ca yoo ra jma rié binni ni nuu xquídxibe. Laabe guniʼbe: «Ngue nga primé ne últimu biaje bixhidxeʼ nezalú stale binni». Ra gudiʼdiʼ iza beeda guichaganabe ti binnigola stiʼ ca xpinni Cristu, yanna riʼ guirópacabe rúnicabe dxiiñaʼ Betel. Guizáʼ riecheʼ Cristina purtiʼ bidii Dios stipa laabe para gunda bíʼnibe ni jneza, yanna maʼ caquiiñebe guiráʼ tiempu ne stipa stibe para gúnibe ni na Jiobá.

Ti herencia ni risaca stale

15. Xi bisiidiʼ David ca xiiñiʼ, ne ximodo bíʼnibe ni.

15 David bicaa ca diidxaʼ riʼ: «Latáʼ xiiñecaʼ, lagucaadiaga naa; chigusiideʼ laatu guidxíbitu Jiobá» (Salmo 34:11). David laaca gupa xiiñiʼ, ne gudixhe íquebe gusiidibe laacaʼ guidxíbicaʼ Jiobá, guidxíbicaʼ laabe jneza, purtiʼ zeeda gácani casi ti herencia ni risaca. Pur cani guníʼ David ne modo bibani, gucanebe laacaʼ gunibiaʼcaʼ Jiobá. Dios cadi naduxhuʼ diʼ ne qué ruchibi diʼ laanu, ne cadi nisi maʼ culuíʼ paraa cucheené binni ley stiʼ. Coʼ, sínuque laabe nga Bixhózenu ni nabé nadxii laanu ne rutiidilaʼdxiʼ donda stiʼ ca xiiñiʼ ni nuu ndaaniʼ Guidxilayú riʼ. David guníʼ: «Guirutiʼ qué zanda gudii cuenta de guiráʼ ra ruchee». Ne para bisihuínnibe cadi dxandíʼ diʼ nisi cuyubi Jiobá paraa cucheʼnu la? guniʼbe xcaadxi diidxaʼ riʼ: «Nga runi, rinabaʼ lii gacaneluʼ naa ti cadi guchee sin gudiéʼ cuenta». Laabe gunna dxíchibe ziuulaʼdxiʼ Jiobá guiráʼ ni guiniʼbe ne guiráʼ ni guiníʼ íquebe, pa gúnibe stipa para gaca cani jneza (Salmo 19:12, 14, La Palabra de Dios para Todos).

16, 17. Cani maʼ napa xiiñiʼ, ximodo zanda gusiidicaʼ laacabe guidxíbicabe Jiobá.

16 David naca ti ejemplu para guiráʼ cani napa xiiñiʼ yanna riʼ. Sicaríʼ guníʼ Rafael, ti hombre ni cayuniné biʼchiʼ dxiiñaʼ Betel: «Guizáʼ guyuuláʼdxidu modo bisiniisi bixhózedu ne jñaadu laadu ndaaniʼ xquidxi Dios. Dxi nahuiinidu nabé gúdxicabe laadu guiráʼ modo rúnicabe dxiiñaʼ lade ca binni ridagulisaa, ngue runi guizáʼ guyuuláʼdxidu gúnidu ni na Jiobá cásica laacabe. Bisiénecabe laadu ximodo zanda gúnidu stale lu xhiiñaʼ Jiobá. Ca binnilídxidu dede yebiʼcaʼ stale iza stiʼ guidxi ra jma caquiiñeʼ tu gucheeche stiidxaʼ Reinu ne raqué gucanedu bizulú stale neza binni ridagulisaa.

17 »Bixhózedu ne jñaadu biʼniʼ crecaʼ Jiobá de guidubi ladxidoʼcaʼ ne para laacabe guca Dios tuuxa ni nadxii laacabe ne nachaʼhuiʼ. Cani bíʼnicabe gucané cani laadu para biaanadu ndaaniʼ xquidxi Dios, ne cadi pur guiráʼ diʼ ni gudíxhecabe gúnidu. Nabé gucuá íquecabe gunibiáʼcabe laabe jma ne gúnicabe ni riuuláʼdxibe, ne pur laacabe bizíʼdidu ximodo guidxíbidu Dios ne gannaxhiidu laa. Qué ñuu dxi, nin ora qué nuzúʼbadu diidxaʼ niníʼcabe maʼ cadi nadxii Jiobá laadu; ne laaca qué ñuni castigárcabe laadu naná purtiʼ si cadxiichicabe. Stale biaje gurícabe ne guniʼnécabe laadu para gúʼyacabe xi nuu ndaaniʼ ladxidoʼdo, nuu tiru dede maʼ cayuunaʼ jñaadu. Ne gunda biiyacabe xi nuu ndaaniʼ ladxidoʼdo. Pur guiráʼ cani guníʼcabe ne ni bíʼnicabe bizíʼdinu guizáʼ sicarú nga guidxíbidu Jiobá, ne ziuʼdu nayecheʼ pa gácadu Testigu stibe, ne cadi guidúʼyadu ni casi xiixa ni nagana ni qué zanda gúnidu» (1 Juan 5:3).

18. Xi zabeendunu pa guidxíbinu Dios ni dxandíʼ.

18 Lade ca últimu stiidxaʼ David nuu ca ndiʼ: «Ora tuuxa ni runi jneza cayuni mandar binni, ne runi mandar purtiʼ ridxibi Dios la? zeeda gaca casi xtuxhu biaaniʼ ni rihuinni siadóʼ, ora ruzaaniʼ gubidxa» (2 Samuel 23:1, 3, 4). Rihuinni dxichi biene Salomón, xiiñiʼ David ni biaana lugar stibe de rey ca diidxaʼ riʼ, purtiʼ gunábabe Jiobá gudii laabe ti ladxidóʼ ni ruzuubaʼ diidxaʼ, ne gudii laabe guendabiaaniʼ para guiénebe xii nga jneza ne ni cadi jneza (1 Reyes 3:9). Laabe bidiibe cuenta zácanu binni nuu xpiaaniʼ ne zabáninu nayecheʼ pa guidxíbinu Jiobá. Gudiʼdiʼ si stale iza, bisiénebe ne chupa chonna si diidxaʼ guiráʼ ni zeeda lu libru stiʼ Eclesiastés ora guniʼbe: «Ora ti binni maʼ bicaadiaga guiráʼ ca diidxaʼ riʼ zaguixhe ique guni ca ndiʼ: Bidxibi Dios ni dxandíʼ ne biʼniʼ guiráʼ ni na ca mandamientu stiʼ. Purtiʼ nga nga guiráʼ ni naquiiñeʼ guni binni. Purtiʼ Dios ni dxandíʼ zabidxi cuenta guiráʼ cosa ni guca ra nagaʼchiʼ, pa jneza ni o pa cadi jneza ni» (Eclesiastés 12:13, 14). Ora chinándanu conseju riʼ la? zácanu binni nuu xpiaaniʼ ne ziuʼnu nayecheʼ purtiʼ qué rúninu laanu tuuxa ni risaca ne purtiʼ ridxíbinu Jiobá. Laaca zácanu ricu, zusisácacabe laanu ne zápanu guendanabani (Proverbios 22:4).

19. Xi zacané laanu guiénenu xii nga guidxíbinu Jiobá.

19 Ca ejemplu ni zeeda lu Biblia ne guiráʼ ni bizaaca ca binni nabani yanna ni bidúʼndanu lu tema riʼ, cayabi cani laanu bibánicabe nayecheʼ purtiʼ bidxíbicabe Dios. Pa ridxíbinu Jiobá la? qué zúninu xiixa ni qué riuuláʼdxibe ne laabe zacanebe laanu para gácanu binni nadxibalú para gudxíʼlunu ca binni ni cucaalú laanu. Ne laaca racaneni laanu para ganda guni huantarnu ca guendanagana ne ca yuubaʼ gápanu. Nga runi, guiranu, cásica ni nahuiiniʼ ne ni huaniisi, naquiiñeʼ guidúʼndanu ne guiénenu Stiidxaʼ Dios, guiníʼ íquenu de ni cazíʼdinu ne chuʼnu jma gaxha de Jiobá ora guni orarnu laabe gatigá ne gúninu ni de guidubi ladxidoʼno. Pa gúninu zacá la? cadi guendananna si stiʼ Dios zadxélanu, sínuque laaca ziénenu xii nga guidxíbinu Jiobá (Proverbios 2:1-5).

[Cani cá ñee yaza]

a Bidxaa lácabe.

b Zándaca ni bizaaca David riʼ ne xcaadxi casi laani nga ni bicaa laabe guiniʼbe ni cá lu Salmo 57 ne 142.

Zanda gusiéneluʼ ca ndiʼ la?

Pa laanu ridxíbinu Dios. . .

• . . . ximodo zacaneni laanu pa bíninu xiixa cosa malu.

• . . . ximodo zacaneni laanu chuʼnu nayecheʼ neca gápanu guendanagana o chuʼ tu sananda laanu.

• . . . ximodo zudiini stipa laanu para gúninu ni na Dios.

• . . . ximodo zeeda gácani casi ti herencia ni risaca para ca xiiñinu.

    Libru ne revista zapoteco del Istmo (1993-2025)
    Biteeguʼ sesión
    Bizulú sesión
    • diidxazá
    • Compartir
    • Configuración
    • Copyright © 2025 Watch Tower Bible and Tract Society of Pennsylvania
    • Modo iquiiñeʼ ni
    • Política de privacidad
    • Configuración de privacidad
    • JW.ORG
    • Bizulú sesión
    Compartir