Zabáninu nayecheʼ pa guidxíbinu Jiobá
«Laguidxibi Jiobá, laatu ca binni ni maʼ gulibe, purtiʼ qué riaadxaʼ gastiʼ cani ridxibi laabe.» (SALMO 34:9.)
1, 2. 1) Xi chupa cosa rusiidiʼ stale religión ora maʼ caniʼcaʼ guidxibi binni Dios. 2) Gunáʼ nga ca guendarinabadiidxaʼ ni chiguicábinu.
STALE de ca xaíque stiʼ ca yuʼduʼ ca riniʼcaʼ naquiiñeʼ guidxibi binni Dios, purtiʼ runi castigarbe guiráʼ binni malu ti lugar ra cayaʼquiʼ dxi ne gueelaʼ. Peru ni rusiidicabe ca cadi zeeda diʼ ni lu Biblia ne cadi jneza ni purtiʼ Jiobá nga ti Dios ni nadxii binni ne runi ni jneza (Génesis 3:19; Deuteronomio 32:4; Romanos 6:23; 1 Juan 4:8). Peru laaca nuu xaíque stiʼ xcaadxi yuʼduʼ ni qué liica ruzeetecaʼ pa naquiiñeʼ guidxibi binni Dios, laga rusiidicaʼ qué liica rizaalaʼdxiʼ Dios pa runi binni ni jneza ne nacaʼ rudiibe lugar guibani binni modo gapa gana. Nga laaca qué rusiidiʼ diʼ Biblia ni (Gálatas 5:19-21).
2 Biblia nga cayabi laanu naquiiñeʼ guidxíbinu Dios (Apocalipsis 14:7). Ni rusiidiʼ Biblia riʼ rucaani binni guinabadiidxaʼ caadxi cosa: Xiñee racalaʼdxiʼ ti Dios ni nadxii laanu guidxíbinu laa yaʼ. Ximodo nga guidxíbinu Dios. Xi zabeendunu pa gúninu ni. Zánnanu ximodo guicábinu ca guendarinabadiidxaʼ ca ora guidúʼndanu ne guiénenu ni cá lu Salmo 34.
Xiñee riquiiñeʼ guidxíbinu Dios
3. 1) Ximodo ruuyaluʼ mandatu ni na naquiiñeʼ guidxíbinu Dios. 2) Xiñee nayecheʼ nuu ca binni ni ridxibi Jiobá.
3 Riquiiñeʼ guidxíbinu Jiobá purtiʼ laa bizáʼ laanu ne purtiʼ laa nga runi mandar guibáʼ ne lu guidubi naca Guidxilayú (1 Pedro 2:17). Peru Jiobá cadi naca diʼ ti dios malu ni guchibi laanu dede gaca diitinu, sínuque nácabe ti Dios ni naquiiñeʼ guni respetarnu ne guidxíbinu guchéʼnenu laa purtiʼ laabe nga ni jma nandxóʼ. Ora ridxíbinu Dios pur ca nga la? runi sentirnu jma galán ne nayecheʼ, ne qué ziúʼdinu triste. Cumu ti Dios ni nayecheʼ nga Jiobá la? laaca racaláʼdxibe guibáninu nayecheʼ (1 Timoteo 1:11). Peru para nga la? naquiiñeʼ gúninu guiráʼ ni nabe, ne zahuínnini ora gúninu stipa para guchaʼnu modo nabáninu. Ca binni ni ruchaa modo nabani rudiicaʼ cuenta dxandíʼ ni na ca diidxaʼ ni bicaa David riʼ: «Lagudii cuenta ne laguuyaʼ pabiáʼ nachaʼhuiʼ Jiobá; nayecheʼ nga riuu hombre ni nadipaʼ ni guyubi laabe para gápabe laa. Laguidxibi Jiobá, laatu ca binni ni maʼ gulibe, purtiʼ qué riaadxaʼ gastiʼ cani ridxibi laabe» (Salmo 34:8, 9). Ca binni ni ridxibi Jiobá nápacaʼ guiráʼ ni caquiiñecaʼ, purtiʼ nuucaʼ gaxha de laabe.
4. Cásica David ne Jesús, xi biʼniʼ crécabe qué ziuu dxi guni Jiobá.
4 Ridúʼyanu bisisaca David ca xpinni ora gúdxibe laacaʼ «binni ni maʼ» gulí Jiobá, ne jneza ni guniʼbe que, purtiʼ de xquidxi Dios laacabe ne guzanécabe laabe neca guyuu tu gucalaʼdxiʼ ñuuti laacabe. Nécapeʼ canaguxooñecabe de rey Saúl la? David biʼniʼ cré qué ziuu dxi gusaana Jiobá de gudii ni caquiiñecabe para guibaninécabe. Laabe bicaabe: «Ca lionhuiiniʼ qué gápapecaʼ ni gocaʼ ne rindaanacaʼ; peru ca binni ni ruyubi Jiobá la? qué riaadxaʼ gastiʼ ni galán laacaʼ» (Salmo 34:10). Jesús laaca gudxi ca discípulo stiʼ guni crecaʼ zacané Jiobá laacaʼ (Mateo 6:33).
5. 1) Xi clase binni beeda gaca xpinni Jesús. 2) Tuu nga na Jesús naquiiñeʼ guidxíbinu.
5 Stale de ca binni judíu ni bicaadiaga Jesús que pobre laacaʼ; ngue runi «ora biʼya be irá ca binni que la? biá be laacaʼ, purti qué ganna ca xi guni ca ne iruti cayaca né laacaʼ. Nuu ca casi dendxu ni qué gapa pastor» (Mateo 9:36). Yanna, ñee zaca ca binni pobre que nadxibalú para chinándacaʼ laabe la? Para chinándacabe laabe la? naquiiñeʼ guidxíbicabe Jiobá, cadi binni diʼ. Jesús gudxi laacabe: «Cadi idxibi tu ni zanda guuti cuerpu si stitu ne ma qué zanda ru guni gastiʼ. Sínuque laidxibi Dios purti laa [zanda] guuti cuerpu stitu [...] ne zanda cuʼ laatu [ndaaniʼ Gehena]. Nga runi cayabe laatu, laidxibi laabe. Laaca tu nanna tu ridoo chupa mani huiini pur chupa domiʼ, peru neca qué risaca came, qué ziaba si tobi de laacame layú pa qué na Dios. Ne laatu la? jma risaca tu que stale mani huiiniʼ. Nga runi cadi idxibi tu, purti dede guicha ique tu ma bigaba Dios» (Lucas 12:4-7).
6. 1) Gunáʼ nga ca diidxaʼ guníʼ Jesús ni huayacané ca xpinni. 2) Xiñee Jesús nga ni bisaana ti ejemplu galán para gánnanu ximodo naquiiñeʼ guidxíbinu Dios.
6 Ora ca binni ni ridxibi Jiobá gutiidiʼ ca xhenemígucaʼ laacaʼ lu xiixa guendanagana para gusaanacaʼ de gúnicaʼ ni nabe la? galán guietenaláʼdxicaʼ ni guníʼ Jesús riʼ: «Tutiica iníʼ xpinne laa nezalú binni la? laca zanié xpinne laa nezalú ca ángel sti Dios. Peru tu iníʼ nezalú binni cadi xpinne laa la? laca zanié nezalú ca ángel sti Dios cadi xpinne laa» (Lucas 12:8, 9). Nabé maʼ huayacané ca diidxaʼ ca stale xpinni Cristu, ne jma racanécani ca xpínnibe ni nabeza ndaaniʼ ca guidxi ra nuu binni ni racalaʼdxiʼ gucueeza laacabe guni adorárcabe Dios. Peru laacabe cadi cusaana de gusisácacabe Jiobá lu ca guendaridagulisaa stícabe ne ora rucheechecabe diidxaʼ, ne ruyúbicabe modo gúnicabe ni para cadi gudii xcaadxi binni cuenta (Hechos 5:29). Jesús nga ni bisaana ti ejemplu galán para gánnanu ximodo naquiiñeʼ guidxíbinu Dios (Hebreos 5:7). Stiidxaʼ Dios ruzeeteʼ de laabe sicaríʼ: «Luguiabe ziuu espíritu stiʼ Jiobá, espíritu stiʼ [...] guendaridxibi Jiobá; ne ziéchebe purtiʼ ridxíbibe Jiobá» (Isaías 11:2, 3). Nga runi, Jesús nga ni jma zanda gusiidiʼ laanu xi zabeendunu pa guidxíbinu Dios modo riuulaʼdxiʼ.
7. 1) Xi invitación cacaa ca xpinni Cristu yanna ni zeeda gaca cásica invitación ni biʼniʼ David que. 2) Ximodo zanda chinanda cani maʼ napa xiiñiʼ ejemplu stiʼ David.
7 Guiráʼ cani zinanda ejemplu stiʼ Jesús ne runi guiráʼ ni rusiidibe la? cacaacaʼ ti invitación casi ni guníʼ David riʼ: «Latáʼ xiiñecaʼ, lagucaadiaga naa; chigusiideʼ laatu guidxíbitu Jiobá» (Salmo 34:11). Para laanu la? cadi guendaridxagayaa diʼ nga gudxi David ca hombre guzánebe que «xiiñecaʼ», purtiʼ laacabe biiyacabe laabe casi ti xaíque stícabe. Laabe gucanebe laacaʼ guidxíbicaʼ Dios ti ganda chúʼcabe tobi si ne chuulaʼdxiʼ Dios modo runi adorárcabe laa: guizáʼ galán ejemplu ca para ca xpinni Cristu ni napa xiiñiʼ, purtiʼ Dios cayabi laacabe: «Lausiniisi laacabe modo na Señor» (Efesios 6:4). Pa guiráʼ dxi guiniʼnécabe ca xiiñicabe de Dios ne guʼndanécabe laacaʼ Biblia gatigá la? zacanécabe laacaʼ guidxíbicaʼ Jiobá ne zabánicaʼ nayecheʼ (Deuteronomio 6:6, 7).
Ximodo rusihuínninu ridxíbinu Dios
8, 9. 1) Xiñee galán guidxibi binni Dios. 2) Ximodo zusihuínninu rucueezanu ruaʼnu.
8 Maʼ guninu ziuʼnu nayecheʼ ora ridxíbinu Jiobá. David gunabadiidxaʼ: «Tu hombre ndiʼ cadi nuu nayecheʼ pur nabani yaʼ. Tu hombre qué ñuulaʼdxiʼ nibani stale dxi para ñuu nayecheʼ yaʼ» (Salmo 34:12). Ni caquiiñeʼ guni binni para guibani xadxí ne nayecheʼ nga guidxibi Jiobá. Dxandíʼ, cadi nagana diʼ nga guiníʼ binni: «Naa ridxibeʼ Dios»; ni nagana nga gusihuinni binni ridxibi Dios lu cani runi. Nga runi David cusiene laanu ximodo gúninu ni.
9 «Bicueeza ruaaluʼ para cadi guiniʼluʼ cosa malu, ne cadi gusiguiiluʼ.» (Salmo 34:13.) Apóstol Pedru bizeeteʼ de versículo riʼ gúdxisibe ca xpinni Cristu naquiiñeʼ gannaxhiisaacaʼ (1 Pedro 3:8-12). Rusihuínninu rucueezanu ruaʼnu ora qué rininu chisme, purtiʼ nabé runinani binni. Riquiiñeʼ guicá íquenu gacanenu binni ora guininu ne cadi guidxíbinu guininu ni dxandíʼ (Efesios 4:25, 29, 31; Santiago 5:16).
10. 1) Bisiene ximodo zahuinni dxandíʼ caxélenu de ca cosa malu ca. 2) Xi guiráʼ zúninu para guihuinni rúninu ni jneza.
10 «Bixeleʼ de cosa malu, ne biʼniʼ ni jneza; biyubi gapuʼ guendariuudxi, ne cadi guixéleluʼ de laani.» (Salmo 34:14.) Laanu, cani dxandíʼ xpinni Cristu la? qué rúninu ca cosa ni nanalaʼdxiʼ Dios. Caadxi de cani nanaláʼdxibe nga: gápanu jnadxiinu, cuánanu, iquiiñenu espiritismu para gúninu xiixa, xhúdxinu, cúbanu guixi, cúbanu gueza o guidúʼyanu película de diidxaʼ guidxa o diidxaʼ dxaba; ne laaca qué rininu de laacani para gusihuínninu riuuláʼdxinu ca cosa malu ca (Efesios 5:10-12). Ni rúninu nga riquiiñenu tiempu stinu para gúninu ni jneza. Dxiiñaʼ ni jma galán ni naquiiñeʼ gúninu nga gucheechenu stiidxaʼ Reinu gatigá ne gacanenu binni gaca discípulo stiʼ Jesús ti ganda guilacaʼ (Mateo 24:14; 28:19, 20). Laaca zahuinni rúninu cosa galán ora guidúʼndanu dede ante cani chitiidiʼ lu ca guendaridagulisaa stinu, ora gudiʼnu bueltu para xhiiñaʼ Reinu ni cayaca lu guidubi naca Guidxilayú, ora gápanu Yoo stiʼ Reinu ne gacanenu ca bíʼchinu ne ca bizáʼnanu ora caquiiñecaʼ xiixa.
11. 1) Ximodo bisihuinni David biʼniʼ ni guníʼ ora gudxi xcaadxi binni guyúbicaʼ gápacaʼ guendariuudxi. 2) Xi qué riquiiñeʼ gúninu para cadi chuʼdíndenu ne ca binni ni ridagulisaanenu.
11 David qué nuyubi nidindené binni. Ñanda ñuutibe Saúl chupa biaje, peru lu guirópani bicueezabe laabe, ne guníʼnebe rey que ne stale respetu, purtiʼ nánnabe zaqué zanda guiree xiana ni napa hombre que laabe (1 Samuel 24:8-11; 26:17-20). Xi zanda gúninu pa nuu xiixa ni cuchiiñaʼ guendariuudxi stiʼ ca binni ni ridagulisaanenu yaʼ. Riquiiñeʼ guyúbinu gápanu guendariuudxi, «ne cadi guixéle[nu] de laani». Nga runi pa guca xiixa ni cuxheleʼ laanu de ti bíʼchinu o ti bizáʼnanu la? naquiiñeʼ gúninu ni na conseju stiʼ Jesús riʼ: «Uyé biene né ni bichee neu que». Ora maʼ bíninu nga la? oracaruʼ maʼ zanda guni adorarnu Jiobá casi maca cayúninu ni (Mateo 5:23, 24; Efesios 4:26).
Zabeendunu stale cosa galán pa guidxíbinu Dios
12, 13. 1) Xi ribeendú cani ridxibi Dios. 2) Xi ndaayaʼ zacaa cani guzuubaʼ stiidxaʼ Jiobá.
12 «Guielú Jiobá cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ.» (Salmo 34:15.) Modo gupa Jiobá David rusihuínnini dxandíʼ ni na ca diidxaʼ ca. Ora gánnanu cayapa Jiobá laanu la? riguixhedxí nga ladxidoʼno ne rusiécheni laanu. Runi crenu zudii Jiobá guiráʼ ni caquiiñenu, neca naná modo cadídinu xiixa guendanagana. Ne nánnanu maʼ cadi candaa diʼ zucaalú Gog de guidxi Magog guiráʼ cani dxandíʼ xpinni Dios, ne laaca zuuyacaʼ «dxi stiʼ Jiobá, naroʼbaʼ ne ruchibi» (Joel 2:11, 31; Ezequiel 38:14-18, 21-23). Intiica si guizaaca ora maʼ guihuinni cani la? zadúʼyanu laaca dxandíʼ zaca ni na ca diidxaʼ guníʼ David riʼ para laanu: «Bicaacabe ridxi, ne bicaadiaga Jiobá, ne bilabe laacaʼ de guiráʼ yuubaʼ gúpacaʼ» (Salmo 34:17).
13 ¡Guizáʼ galán nga guidúʼyanu modo gusisaca Jiobá lá! Zadxagayaanu stálepeʼ ne casi qué huayuu dxi gúninu ni, peru ca xhenemígunu naná modo guinitilucaʼ. «Jiobá cayuuyaʼ tuxhu cani cayuni cosa malu, ti cadi guzeeteruʼ binni de laacaʼ ndaaniʼ guidxilayú riʼ.» (Salmo 34:16.) Nga runi, lu guidxilayú cubi ni chigudii Dios laanu zabáninu nayecheʼ purtiʼ luni ziuu binni ni guni puru si ni jneza.
Cani maʼ guníʼ Jiobá guni racané laanu guni huantarnu
14. Xi zacané laanu para guni huantarnu ca guendanagana ni gápanu.
14 Yanna, para ganda guzúʼbarunu stiidxaʼ Jiobá ndaaniʼ guidxilayú qué iquiiñeʼ riʼ la? naquiiñeʼ guni huantarnu. Pa laanu ridxíbinu Dios la? zacané nga laanu para ganda guzúʼbarunu diidxaʼ. Pur ca cosa malu ni cahuinni lu ca últimu dxi riʼ la? nuu xpinni Jiobá cayapa guendanagana, ne zanda guininu casi ora cayunideni ladxidóʼ ne ribeeni gana laa. Peru runi crécabe zacané Jiobá laacabe guni huantárcabe pa guinábacabe ni laabe. David caguixhedxí ladxidoʼno sicaríʼ: «Jiobá nuu gaxha de cani maʼ gucadé ladxidóʼ; ne rulabe cani maʼ biree gana» (Salmo 34:18). Ne guníʼrube xcaadxi diidxaʼ ni laaca riguu gana binni: «Stale guendanagana ridxaagalú binni runi ni jneza, peru Jiobá ribee laabe de laacani» (Salmo 34:19). Intiica guendanagana guidxaagalunu la? Jiobá napa poder para gulá laanu de laacani.
15, 16. 1) Xi desgracia gunna David biluxe bicaa si Salmo 34. 2) Xi zanda gacané laanu para gudxíʼlunu ca guendanagana ca.
15 Gudiʼdiʼ si caadxi dxi de bicaa David Salmo 34 ca la? gúnnabe binduuxeʼ Saúl guidxi Nob, ne bilá ñuuti guiráʼ xixé ni ruzaaquiʼ guʼxhuʼ de raqué. Cumu nanna David bidxiichi Saúl pur guyebe guidxi que la? zándaca nabé bisiuubaʼ ngue ladxidoʼbe (1 Samuel 22:13, 18-21). Nánnanu zándaca guníʼnebe Jiobá para gacané laabe ne gutadxí ladxidoʼbe purtiʼ nánnabe zabani ca binni nachaʼhuiʼ ca sti biaje (Hechos 24:15).
16 Cumu zanda guiasa ca gueʼtuʼ ca sti biaje la? laaca riguixhedxí nga ladxidoʼno, purtiʼ nánnanu zanda cuee Jiobá intiica yuubaʼ ni gápanu ora guniná ca xhenemígunu laanu (Mateo 10:28). David bidii cuenta zacá ni ora guníʼ: «Laabe cayápabe dxita ladi guiráʼ [binni runi ni jneza]; nin tobi de laacani qué zaluuza» (Salmo 34:20). Guca ni na ca diidxaʼ ca luguiáʼ Jesús. Nécapeʼ naná modo biiticabe laabe la? nin ti dxita ládibe qué niluuza (Juan 19:36). Laaca zaca ni na ca diidxaʼ ca luguiáʼ xcaadxi binni. Salmo 34:20 na zanda guiree intiica guendanagana gapa ca xpinni Cristu ni cheʼ guibáʼ ne guendanagana ni gapa ca xcompañérucabe ni zeeda gácacaʼ «xcaadxi dendxu» ca. Ne ora guiree ca guendanagana ca nga casi ñaca qué zaluuza nin ti dxita ládicabe (Juan 10:16).
17. Xi chiguizaaca ca binni ni cadi cusaana de gucaalú xquidxi Jiobá.
17 Peru ca binni qué iquiiñeʼ ca gadxé modo guilúxecaʼ, purtiʼ maʼ cadi candaa diʼ zutópacabe guiráʼ guendaquéiquiiñeʼ ni bidxiibacabe. «Laaca ca guendananá ca guuti binni qué iquiiñeʼ ca; ne cani racananalaʼdxiʼ binni runi ni jneza la? zugaanicabe donda íquecaʼ.» (Salmo 34:21.) Cani cadi cusaana de gucaalú xquidxi Dios la? cabeza ti yuubaʼ roʼ laacaʼ, dede nin qué riníʼ íquecaʼ pabiáʼ naná ni. Ora gueeda Jesucristu la? zunitilube ca binni ca ne maʼ qué ziuu dxi guibánicaʼ sti biaje (2 Tesalonicenses 1:9).
18. Ximodo ndiʼ maʼ bilá «jma binni», ne xi cabézacabe gaca para laacabe.
18 Salmo bicaa David ca rilúxeni ne ca diidxaʼ ni riguixhedxí ladxidoʼno riʼ: «Jiobá culá xhialma ca xpinni; ne nin tobi de cani guyubi laabe para gápabe laa qué zapa donda» (Salmo 34:22). Dxi mayaca gusaa David cuarenta iza de cayuni mandar la? guníʼ: «[Dios] maʼ bilá xhialmaʼ de guiráʼ xixé yuubaʼ beeda luguiaʼyaʼ» (1 Reyes 1:29). Guiráʼ cani ridxibi Dios cásica David la? maʼ cadi candaa diʼ ziéchecaʼ ora guchaagacaʼ modo guyuucaʼ dxiqué ne modo guibánicaʼ purtiʼ maʼ qué zucheecaʼ pur pecadu ni gúpacaʼ, ne pur bilacaʼ de guiráʼ yuubaʼ. Maʼ casi de guiráʼ ca xpinni Jesús ni bibí ne espíritu maʼ nuucaʼ guibáʼ. Xcaadxi de laacaʼ ni nabániruʼ ndaaniʼ Guidxilayú riʼ la? cayúnicaʼ xhiiñaʼ Dios. Lu dxiiñaʼ ni cayúnicabe ca maʼ bidaaguʼ «jma binni» de guiráʼ ladu laacabe. Ca binni riʼ maʼ ruuyaʼ Jiobá laacaʼ casi binni ni maʼ bireechú para laa, purtiʼ runi crecaʼ zanda guixá donda sticaʼ pur rini bixhii Jesús. Ora maʼ guni mandar Cristu ti mil iza la? óraca maʼ zaree guiráʼ pecadu stiʼ ca binni ca pur rini bixhiibe ne maʼ zácacabe binni ni qué gapa donda (Apocalipsis 7:9, 14, 17; 21:3-5).
19. Xi maʼ gudixhe ique stale binni guni.
19 Xiñee chiguicaa guiráʼ ca binni ni naca xpinni Dios guiráʼ ca ndaayaʼ ca yaʼ. Purtiʼ maʼ gudixhe íquecabe guidxíbicabe Jiobá, guni adorárcabe laabe ne guzuubacabe stiidxabe. Yanna maʼ nánnanu nabé nayecheʼ zabáninu pa guidxíbinu Jiobá ne zacaneni laanu para guicaanu ti «enda nabani ni qué zaluxe» ndaaniʼ guidxilayú cubi stiʼ Dios (1 Timoteo 6:12, 18, 19; Apocalipsis 15:3, 4).
Rietenalaʼdxuʼ la?
• Xiñee riquiiñeʼ guidxíbinu Dios, ne ximodo zahuinni ridxíbinu laabe.
• Ximodo zusihuínninu ridxíbinu Dios lu cani rúninu.
• Xi zabeendunu pa guidxíbinu Dios.
• Xii nga cani cabézanu gaca ni racané laanu guni huantarnu.
[Dibuju/foto ni zeeda lu yaza 28]
Ca binni ni ridxibi Jiobá la? ruyúbicaʼ ximodo gusisácacaʼ laabe neca nuu tu cucueeza laacaʼ gúnicaʼ ni
[Dibuju/foto ni zeeda lu yaza 30]
Gusíʼdinu binni ca diidxaʼ nacubi ne galán stiʼ Reinu nga modo jma galán zanda gacanenu laacaʼ