«Ca binni ni ruyubi Jehová qué ziaadxaʼ gastiʼ ni galán laacaʼ»

1. ¿Xii nga ca guendanagana bidxagalú David?

CANAGUCACHILÚ David de rey Saúl purtiʼ nuu guuti laabe. Cumu qué gapa David ni gó la? ngue runi biaanabe ndaaniʼ guidxi Nob ne gunábabe gudiicabe laabe gaayuʼ si pan (1 Sam. 21:1, 3). Despué yegucaachilú David né ca xpinni ndaaniʼ ti cueva (1 Sam. 22:1). ¿Xiñee cadxaagalú David ca guendanagana riʼ yaʼ?

2. ¿Ximodo guyuu Saúl lu ti guendanagana? (1 Sam. 23:16, 17).

² Ora biʼyaʼ Saúl maʼ biʼniʼ ganar David stale guerra ne maʼ stale binni runibiáʼ laa bizulú gupa envidia laabe. Pur bicheené Saúl Jehová, gunna bicaanáʼ Jehová laa ne gulí David para gacaʼ rey stiʼ guidxi Israel (biindaʼ 1 Samuel 23:16, 17). Peru cumu nácaruʼ Saúl rey stiʼ guidxi Israel la? náparuʼ ti ejércitu naroʼbaʼ ne stale binni ni cayacané laa, ngue runi gupa xidé bixooñeʼ David para cadi guutibe laa. ¿Ñee zanda xa gucueeza Saúl ni guníʼ Jehová de David? (Is. 55:11). Qué ruzeeteʼ diʼ Biblia pa nga nga ni guníʼ íquebe ni nánnanu nga ca binni ni rucaalú Dios la? siempre runíticaʼ.

3. ¿Ximodo biʼniʼ sentir David neca cadxaagalú guendanagana?

³ Guca David ti hombre humilde. Cadi laa diʼ gulí gaca rey, sínuque Jehová peʼ nga gulí laabe (1 Sam. 16:1, 12, 13). Ne pur ngue guizáʼ guca nanalaʼdxiʼ Saúl laabe dede biyubi modo guuti laabe, peru qué nugaaniʼ David donda ique Jehová pur ca guendanagana ni cadxaagalú que, laaca qué nidxiichinebe Dios pur huaxiéʼ guendaró nápabe ne xiñee canagucachilube ndaaniʼ ti cueva. Lugar de nga la? zándaca laga nuube ndaaniʼ cueva que bicaabe ti canción para gusisácabe Jehová ne laani nga ni zeeda lu textu stiʼ artículo riʼ: «Ca binni ni ruyubi Jehová qué ziaadxaʼ gastiʼ ni galán laacaʼ» (Sal. 34:10).

4. ¿Gunáʼ nga ca pregunta ni zacábinu, ne xiñee nabé risaca ca ni?

⁴ Tiempu riʼ stale de ca xpinni Jehová huaxiéʼ nápacaʼ ni gocaʼ ne qué gápacaʼ ca cosa ni iquiiñecaʼ.b Ne zacá huazaaca stale de laacabe lu pandemia riʼ. Ne jmaruʼ si nagana zácani ra maʼ zeeda dxiña gran tribulación (Mat. 24:21). Nga runi guicábinu tapa pregunta: ¿ximodo ndiʼ qué ñaadxaʼ gastiʼ ni galán David? ¿xiñee naquiiñeʼ chuʼnu nayecheʼ né biaʼ nápanu? ¿xiñee nanna dxiichinu zapa Jehová laanu? ne ¿ximodo zanda chuʼnu listu para ca dxi ni zeeda ca?

«GASTIʼ QUÉ ZIAADXAʼ NAA»

5, 6. ¿Ximodo racané Salmo 23 laanu guiénenu xii ngue caníʼ David ora bizeeteʼ qué ziaadxaʼ «gastiʼ ni galán» ca xpinni Dios?

⁵ ¿Xii ngue caníʼ David ora bizeeteʼ qué ziaadxaʼ «gastiʼ ni galán» ca xpinni Jehová? Ti cosa ni zacané laanu guiénenu ni nga ra guidúʼndanu ca diidxaʼ ni zeeda lu Salmo 23 (biindaʼ Salmo 23:1-6). Sicaríʼ bizulú David salmo riʼ: «Jehová nga Pastor stinneʼ. Gastiʼ qué ziaadxaʼ naa». Lu xcaadxi versículo stiʼ salmo riʼ bizeeteʼ David xcaadxi cosa nabé risaca. Laacani nga ca ndaayaʼ ni bidii Jehová laabe purtiʼ biiyabe laa casi pastor stibe, laaca guníʼ David riné Jehová laa lu neza de justicia stiʼ ne qué rusaanabe laa neca cadiʼdiʼ ra nagana, laaca gunna David neca nuu lu layú ni napa guixi gaʼ stiʼ Jehová zapa guendanagana. Zándaca guyuu ora bireebe gana casi ñaca nizabe lu ti valle nacahuidóʼ ne laaca guniʼbe zápabe enemigu. Peru cumu Jehová nga pastor stibe la? sicaríʼ guníʼ David: «Qué zadxibeʼ».

⁶ Yanna, ¿ximodo nga qué ñaadxaʼ «gastiʼ ni galán» David yaʼ? Laani nga ra gúpabe guiráʼ ni caquiiñebe para chuʼbe gaxha de Jehová. Cadi caquiiñeʼ David gapa stale cosa material para chuʼ nayecheʼ, guyuube nayecheʼ né ca cosa ni bidii Jehová laabe, ni jma bisaca para David nga uguu ndaayaʼ Jehová laa ne gápabe laa.

7. Casi ná Lucas 21:20-24, ¿xi guendanagana bidxagalú ca xpinni Cristu de primé siglu ni bibani ndaaniʼ guidxi Judea?

⁷ Ca diidxaʼ ni guníʼ David rusiidiʼ ca ni laanu cadi naquiiñeʼ gusisácanu ca cosa material. Dxandíʼ zanda guiechenenu ca cosa material ni nápanu peru cadi laacani nga naquiiñeʼ cuʼnu primé lu xquendanabáninu. Ndiʼ nga ti cosa nabé risaca biziidiʼ ca xpinni Cristu ni bibani lu primé siglu ndaaniʼ guidxi Judea (biindaʼ Lucas 21:20-24). Maca guníʼ Jesús ziuu «campamentu stiʼ ca ejércitu guidubi vuelta Jerusalén» ne ora guizaaca ni napa xidé guxooñeʼ ca xpinni Cristu lu ca dani que para guilacaʼ, peru napa xidé gusaanacaʼ stale cosa sticaʼ. Raca caadxi iza sicaríʼ bizeeteʼ revista La Atalaya: «Bisaanacabe lídxicabe, layú stícabe ne qué nutópacabe ca cosa ni nápacabe ra lídxicabe. Gúpacabe confianza zapa Jehová ne zacané laacabe purtiʼ ni jma bisaca para laacabe nga guni adorárcabe Jehová».

8. ¿Xi rizíʼdinu de ni bizaaca ca xpinni Cristu ni bibani Judea?

⁸ ¿Xi rizíʼdinu de ni bizaaca ca xpinni Cristu de Judea? Sicaríʼ ná La Atalaya ni bizéʼtenu lu párrafo gudiʼdiʼ que: «Lu ca dxi ni zeeda ca zándaca zadxaagalunu prueba ra zusihuínninu pabiáʼ risaca ca cosa material ca para laanu. ¿Ñee jma risaca ca ni para laanu la? o jma rusisácanu guilanu ne cadi guchéʼnenu Dios? Ne ora guedandá ca guendanagana ca zándaca caquiiñeʼ guni huantarnu ne ziaadxaʼ laanu caadxi cosa. Naquiiñeʼ chuʼnu listu dede ca yanna, cásica biʼniʼ ca xpinni Cristu ni bibani lu primé siglu dxi bixooñecaʼ de Judea».c

9. ¿Ximodo racané conseju ni bidii Pablo ca hebreu que lii?

⁹ ¿Ñee ruxuíʼlunu pabiáʼ nagana guca para ca xpinni Cristu riʼ gusaanacaʼ ca cosa ni nápacaʼ ne chindézacaʼ sti lugar la? Caquiiñeʼ gápacabe fe purtiʼ zacaneni laacabe gápacabe confianza zudii Jehová ni caquiiñecabe. Peru gaayuʼ iza ante cuʼ ca romanu leʼ Jerusalén bidii apóstol Pablo caadxi conseju ca hebreu ne zacaneni laacaʼ. Sicaríʼ guniʼbe: «Lagusihuinni cadi nadxiitu bueltu pur modo nabánitu, sínuque lachuu nayecheʼ né ca cosa si ni nápatu. Purtiʼ ndiʼ nga ni maʼ guníʼ Dios: “Qué zusaanaʼ lii ne qué ziaanadxieeʼ de gacaniaʼ lii”. Nga runi zanda guininu né stale confianza: “Jehová nga racané naa. Qué zadxibeʼ diaʼ. ¿Xi zanda guni binni naa yaʼ?”» (Heb. 13:5, 6). ¿Xi guleendú ca xpinni Cristu ni yenanda conseju ni bidii Pablo ante cuʼ ca romanu leʼ Jerusalén? Pur yenándacabe conseju riʼ qué ñaca nagana para laacabe guiaacabe sti lugar purtiʼ gunna dxíchicabe zudii Jehová laacabe ca cosa ni caquiiñecabe. Ca diidxaʼ ni guníʼ Pablo laaca racané ni laanu guni crenu zudii Jehová ni iquiiñenu.

«NÉ NGA SI ZIUʼNU NAYECHEʼ»

10. ¿Xi conseju bidii Pablo ni zanda gacané laanu?

¹⁰ Laaca bidii Pablo ti conseju Timoteo casi bidiibe ca hebreu que, ne laaca racané ni laanu tiempu riʼ. Sicaríʼ bicaabe: «Nga runi, inque si nápanu ni guidoʼno ne ni gácunu la? né nga si ziuʼnu nayecheʼ» (1 Tim. 6:8). ¿Ñee riníʼ nga qué zanda guidoʼno ti guendaró nanixe, gápanu ti lugar galán ra cuézanu o sinu ti lari gácunu ora ganda la? coʼ, cadi nga diʼ nga ni caníʼ Pablo ni caniʼbe nga naquiiñeʼ chuʼnu nayecheʼ né biaʼ nápanu (Filip. 4:12). Ngue nga ni nanna Pablo ni huaxiéʼ si tu nanna. Ni jma risaca para laanu nga gaca xhamígunu Dios ne cadi ca cosa material ca (Hab. 3:17, 18).

11. ¿Xi rizíʼdinu de ni gudxi Moisés ca israelita?

¹¹ Zándaca riníʼ íquenu caquiiñenu xiixa cosa peru Jehová maʼ gadxé modo riníʼ ique de laanu. Sicaríʼ gudxi Moisés ca israelita despué de guzacaʼ 40 iza lu desiertu: «Maʼ guluu Jehová Dios stiluʼ ndaayaʼ lii lu guiráʼ ni maʼ bíʼniluʼ cayuuyabe guiráʼ ni cazaacaluʼ, ra zeluʼ lu desiertu naroʼbaʼ riʼ. Lu 40 iza riʼ qué huasaana Jehová Dios stiluʼ lii ne qué huayaadxaʼ gastiʼ lii» (Deut. 2:7). 40 iza bidii Jehová maná laacabe para gócabe ne qué ñuxe lari stícabe ni bireenécabe de Egipto (Deut. 8:3, 4). Zándaca guyuu caadxi israelita guníʼ íquecaʼ huaxiéʼ cosa nápacaʼ peru bisietenalaʼdxiʼ Moisés laacabe nápacabe biaʼ caquiiñecabe. Ziecheʼ Jehová pa guizíʼdinu chuʼnu nayecheʼ né biaʼ ni nápanu ra gusisácanu guiráʼ cosa rudiibe laanu, guidúʼyanu ca ni casi ti ndaayaʼ ne gudiʼnu xquixe peʼ laabe.

CADI GUIAANDAʼ LAANU ZAPA JEHOVÁ LAANU

12. ¿Ximodo nánnanu gupa David confianza Jehová ne cadi laaca laa?

¹² Gunna David qué rusaana Jehová ca xpinni ne rizaaláʼdxibe laacaʼ. Neca nuu ca enemigu stibe guuticaʼ laabe dxi bicaabe Salmo 34 peru naguidxi guyuu fe stibe dede biʼniʼ sentirbe naguu ti ángel stiʼ Jehová leʼ laabe (Sal. 34:7). Zándaca bichaaga David ángel stiʼ Jehová né ti soldadu ni nexhená ne cayapa pa málasi gucaalú ti enemigu. Neca naca David ti soldadu ni nanna gundaa guié, nanna iquiiñeʼ espada ne nanna guníʼ Jehová zaca rey peru qué niníʼ ique stubi si zanda gudxiilú ca guendanagana stiʼ (1 Sam. 16:13; 24:12). Ni bíʼnibe nga gúpabe confianza riquiiñeʼ Dios ca ángel stiʼ para gulá ca xpinni. Tiempu riʼ qué zabézanu guni Jehová ti milagru para gulá laanu peru nánnanu pa gápanu confianza Jehová neca gátinu zudiibe laanu guendanabani ni qué zaluxe.

13. Ora gucaalú Gog de Magog laanu, ¿xiñee zaníʼ íquecaʼ cadi nagana para gunitilucaʼ laanu, peru xiñee qué zadxíbinu? (Biiyaʼ dibuju ni zeeda lu portada).

¹³ Maʼ cadi candaa zahuinni pa nápanu confianza zapa Jehová laanu. Ora gucaalú Gog de Magog o ti grupu de guidxi roʼ laanu, zándaca guiníʼ íquenu zuuticaʼ laanu peru ora guizaaca ndiʼ naquiiñeʼ guni crenu zulá Jehová laanu. Zaníʼ ique ca guidxi riʼ nácanu casi dendxuʼ ni qué gapa tu gulá laa (Ezeq. 38:10-12). Zaníʼ íquecaʼ cadi nagana para gunitilucaʼ laanu purtiʼ qué riquiiñenu guiibaʼ ne qué gánnanu tíndenu. Cumu nápanu fe la? nánnanu cayapa ca ángel stiʼ Jehová laanu ne nuucaʼ listu para guni defendercaʼ laanu. Peru cumu ca guidxi ca qué gápacaʼ fe Jehová la? ¡Zadxagayaacaʼ ora gúʼyacaʼ gulá ca ángel ca xquidxi Jehová! (Apoc. 19:11, 14, 15).

CHUʼNU LISTU DEDE CA YANNA

14. ¿Xi caquiiñeʼ gúninu dede ca yanna ti chuʼnu listu para ca dxi ni zeeda ca?

¹⁴ ¿Xi naquiiñeʼ gúninu dede ca yanna ti chuʼnu listu para ca dxi ni zeeda ca? Primé, cadi naquiiñeʼ guiníʼ íquenu nabé risaca ca cosa material ca, purtiʼ ziuu ti dxi zusaananu ca ni. Laaca naquiiñeʼ chuʼnu nayecheʼ né biaʼ nápanu ne chuʼnu nayecheʼ purtiʼ nácanu xhamigu Jehová. Ra jma gunibiaʼnu Dios stinu jma zápanu confianza zápabe laanu ora gucaalú Gog de Magog laanu.

15. ¿Xi bizaaca David ni gucané laa ganna qué zusaana Jehová laa?

¹⁵ Guidúʼyanu xiruʼ gucané David para gudxiilú ca guendanagana bidxagalú. Sicaríʼ guniʼbe: «Lagudii cuenta ne laguuyaʼ pabiáʼ nachaʼhuiʼ Jehová; nayecheʼ nga riuu hombre ni guyubi laabe para guilá» (Sal. 34:8). Rusihuinni ca diidxaʼ riʼ xiñee gunna David zacané Jehová laa, nabé biyúbibe gacané Dios laabe ne siempre gucané Jehová laabe. Dxi joven David bidxiilú ti soldadu nasoo ni lá Goliat ne gudxi laabe: «Yannadxí zudii Jehová lii lu nayaʼ» (1 Sam. 17:46). Despué bíʼnibe dxiiñaʼ para rey Saúl ne stale biaje gucalaʼdxiʼ hombre riʼ ñuuti laabe peru «qué nusaana Jehová David» (1 Sam. 18:12). Cumu biiyaʼ David ximodo gucané Jehová laa dxiqué la? gúnnabe zacaneruʼ Jehová laabe. Ngaca nga ni zanda gacané laanu ti chuʼnu listu para ca prueba ni guidxaagalunu.

16. ¿Ximodo nánnanu nachaʼhuiʼ Jehová né laanu?

¹⁶ Ra jma guyúbinu gacané Jehová laanu yanna, jma zápanu confianza zacanebe laanu lu ca dxi ni zeeda ca. Guzéʼtenu ti ejemplu, naquiiñeʼ guni crenu zacané Jehová laanu ora guinábanu patrón stinu gudii permisu laanu para chuunu asamblea, chuunu reunión ne guni predicarnu jma. Yanna guiníʼ íquenu qué nudii patrón stinu laanu permisu ne binítinu dxiiñaʼ stinu. ¿Ñee nápanu fe qué zusaana Jehová laanu ne siempre zudii ni caquiiñenu la? (Heb. 13:5). Stale hermanu ni cayuni xhiiñaʼ Jehová de tiempu completu huayuuyacaʼ ximodo racané Jehová laacaʼ ora jma caquiiñecaʼ ni. Qué rusaana Jehová ca xpinni.

17. ¿Gunáʼ nga textu stiʼ iza 2022, ne xiñee biaʼsi ni?

¹⁷ Cadi naquiiñeʼ guidxíbinu ca cosa ni chiguizaaca despué pa nuu Jehová gaxha de laanu. Pa gúninu ni nabe primé lu xquendanabáninu qué zusaanabe laanu. Para cadi guiaandaʼ laanu pabiáʼ risaca chuʼnu listu para ca dxi ni zeeda ca ne gápanu confianza qué zusaana Jehová laanu. Maʼ gulí Grupu ni Zániru Salmo 34:10 para textu stiʼ iza 2022: «Ca binni ni ruyubi Jehová qué ziaadxaʼ gastiʼ ni galán laacaʼ».