Risaca para Jiobá guzúʼbanu diidxaʼ
«Guluu xpiaanuʼ xiiñehuiineʼ ne bisiecheʼ ladxiduáʼ.» (PROVERBIOS 27:11.)
1. Ximodo naca binni guidxilayú yanna riʼ.
YANNA riʼ jma rihuinni qué racalaʼdxi diʼ binni guni mandar Dios laacaʼ ne qué racaláʼdxicaʼ guzuubacaʼ diidxaʼ. Apóstol Pablu bisiene xiñee zacá laacabe lu ti carta ni biseendaʼ ra nuu ca xpinni Cristu de Éfeso: «[Dxiqué] yenanda tu ni na binni guidxilayú ne biʼni tu ni na xaíque sti ca binidxabaʼ, purti laa nga runi dxiiña ndaani ladxidóʼ cani qué na uzuuba stiidxa Dios» (Efesios 2:1, 2). Binidxabaʼ nga ni cayuni mandar guidxilayú riʼ, nga runi laabe nga rucaabe guiráʼ binni cadi guzuubaʼ diidxaʼ. Zacá bíʼnibe lu primé siglu que, ne jmaruʼ si cayúnibe ni yanna dede dxi guládxicabe laabe guibáʼ, dxi primé gudinde binni lu guidubi naca Guidxilayú (Apocalipsis 12:9).
2, 3. Xiñee naquiiñeʼ guzúʼbanu stiidxaʼ Jiobá.
2 Neca zacá nuu binni la? laanu ca xpinni Cristu nánnanu naquiiñeʼ guzúʼbanu stiidxaʼ si Jiobá Dios ne rúninu ni cadi purtiʼ si racaláʼdxinu guicaanu xiixa de laabe, sínuque purtiʼ laabe nga bizaʼbe laanu, cudiibe guendanabani laanu, nadxiibe laanu ne rulabe laanu (Salmo 148:5, 6; Hechos 4:24; Colosenses 1:13; Apocalipsis 4:11). Ca israelita ni guyuu dxiqué la? gúnnacaʼ Jiobá ngue bidii guendanabani laacaʼ ne ni bilá laacaʼ, ngue runi gudxi Moisés laacaʼ: «Naquiiñeʼ guuyaʼ chaahuitu pa cayúnitu cásipeʼ biʼniʼ mandar Jiobá Dios laatu gúnitu» (Deuteronomio 5:32). Nécapeʼ riquiiñeʼ nuzuubacabe stiidxa Dios ni bizáʼ guidubi naca guibáʼ ne Guidxilayú riʼ la? qué nindaa maʼ qué ninándacabe ca ley stibe.
3 Pabiáʼ risaca nga guzúʼbanu stiidxaʼ Dios ni bizáʼ guibáʼ ne Guidxilayú riʼ yaʼ. Ti dxi gudxi Dios Samuel ni riguixhená stiʼ chitidxi ca diidxaʼ riʼ rey Saúl: «Jma nga galán guzuubaluʼ diidxaʼ que guutiluʼ maniʼ» (1 Samuel 15:22, 23). Xiñee jma galán ngue nuzuubabe diidxaʼ yaʼ.
Xiñee jma galán guzúʼbanu diidxaʼ que guutinu tuuxa maniʼ para Dios
4. Xi zanda gudiʼnu Jiobá.
4 Cumu Jiobá nga bizáʼ guiráʼ cosa la? nga runi stibe guiráʼ ni nápanu. Yanna, ñee nuu xiixa ni zanda gudiʼnu laabe la? Nuu ne nabé risácani. Xi laani yaʼ. Lu conseju ni bidiibe riʼ zadúʼyanu xi laani: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa» (Proverbios 27:11). Textu riʼ cayabi laanu naquiiñeʼ guzúʼbanu stiidxaʼ Dios, ne ora gúninu ni la? casi ñaca nudiʼnu laabe xiixa. Ne ora ruzúʼbanu stiidxabe neca gadxé gadxé ni cadídinu ne de gadxé gadxé lugar laanu la? cada tobi de laanu zanda gusihuínninu cadi dxandíʼ diʼ nga na Binidxabaʼ qué zuzuubaʼ binni stiidxaʼ Dios ora tiidiʼ ra nagana. ¡Guizáʼ galán nga gúninu zacá!
5. Xi runi sentir Jiobá ora qué ruzúʼbanu stiidxaʼ, ne xi ejemplu cusihuinni zacá ni.
5 Para Dios la? risácapeʼ guiráʼ ni riguixhe íquenu gúninu. Pa tuuxa qué guzuubaʼ stiidxabe la? racaná ladxidoʼbe ora gúʼyabe laa cadi cayuni ni jneza (Salmo 78:40, 41). Guxuíʼlunu ti binni napa dxiña ni cadi zinanda ni gudxi doctor laa ne go guiráʼ ni zuniná laa. Ximodo rábiluʼ zuni sentir doctor ca pa dxandíʼ racalaʼdxiʼ guiándabe yaʼ. Qué zuni sentírdibe galán njaʼ. Zacaca nga racaná ladxidóʼ Jiobá ora qué ruzúʼbanu stiidxaʼ, purtiʼ nánnabe xi zazaacanu pa qué gúninu ni nabe para guibáninu galán.
6. Xi zacané laanu guzúʼbanu stiidxaʼ Dios.
6 Xi zacané laanu guzúʼbanu diidxaʼ yaʼ. Cada tobi de laanu naquiiñeʼ guinabaʼ Dios gacané laa guiale de ladxidóʼ guzuubaʼ diidxaʼ, casi biʼniʼ rey Salomón dxiqué. Laabe bidiibe cuenta naquiiñeʼ gánnabe xii nga ni jneza ne ni cadi jneza ti ganda guni juzgarbe ca israelita que (1 Reyes 3:9). Cumu nuunu lade binni ni qué riná guzuubaʼ diidxaʼ la? nga runi laanu laaca naquiiñeʼ guiale de ladxidoʼno guzúʼbanu diidxaʼ ti zacá gánnanu gunáʼ nga ni jneza ne ni cadi jneza. Nga runi, maʼ bidii Dios laanu Stiidxaʼ, libru ne revista ni zacané laanu guiénenu ni, ca guendaridagulisaa ni rápanu ca ne ca binnigola ni nachaʼhuiʼ. Jiobá cudii cani laanu purtiʼ nadxii laanu. Yanna, ñee rudiʼnu lugar gacanécani laanu la?
7. Xiñee jma risaca para Jiobá guzúʼbanu stiidxaʼ que guutinu ti maniʼ para gudiʼnu laa yaʼ.
7 Dxiqué guníʼ Jiobá jma risaca nga guzuubaʼ xquídxibe diidxaʼ que guuti tuuxa maniʼ para gudii laabe (Proverbios 21:3, 27; Oseas 6:6; Mateo 12:7). Peru, xiñee yaʼ. Ñee cadi laca laabe nga gudíxhebe guuti binni tuuxa maniʼ para laabe dxiqué la? Laaca pue. Yanna, xi naquiiñeʼ gucaa binni gusigaʼdeʼ laabe xiixa yaʼ. Ñee rúnicabe ni purtiʼ racaláʼdxicabe chúʼcabe galán ne Dios la? o rúnicabe ni purtiʼ si maʼ biaacabe ni la? Ti binni ni dxandíʼ racalaʼdxiʼ chuʼ galán ne Dios la? zinanda guiráʼ ni na ca mandamientu stibe. Dios cadi caquiiñeʼ diʼ guutinu maniʼ para laa, ni jma risaca para laabe nga guzúʼbanu stiidxabe.
Ti ejemplu ni culuíʼ xi naquiiñeʼ gúninu
8. Xiñee maʼ qué niná Dios ñácaruʼ Saúl rey.
8 Historia stiʼ rey Saúl rusihuinni pabiáʼ nga naquiiñeʼ guzúʼbanu diidxaʼ. Primé que la? qué ñuni crédibe laabe ne biaritiʼ bíʼyabe laabe; peru despué la? guiráʼ ni bíʼnibe bisihuinni maʼ runi crebe laabe ne maʼ cadi jneza riníʼ íquebe (1 Samuel 10:21, 22; 15:17). Ti biaje, dxi chitindené Saúl ca filisteu que gúdxicabe laabe cuézabe guedandá Samuel, purtiʼ laa nga chiguuti maniʼ ne guzaaquiʼ laacame para Jiobá ne laa nga gabi laabe xi gúnibe. Ora biiyabe nin gueedagá Samuel ne maʼ careeche ca xpínnibe la? gucuaabe ca maniʼ que biitibe laacaʼ ne bizaaquibe laacaʼ. Ni bíʼnibe ca guizáʼ bichiichini Jiobá. Yanna, ora bedandá Samuel la? gudxi Saúl laabe pur bindaabe que nga runi gupa xidé biiti maniʼ que ne bizaaquiʼ laame nezalú Jiobá ti gacané laa. Jma ngue bisaca para Saúl guuti maniʼ qué guzuubaʼ diidxaʼ ne nibeza ñeeda Samuel para ñúnini. Samuel gudxi laabe: «Guendanahuati nga ni bíʼniluʼ. Qué ñúniluʼ ni gudxi Jiobá, Dios stiluʼ, lii gúniluʼ». Cumu qué nuzuubaʼ Saúl stiidxaʼ Jiobá la? laa maʼ qué niná diʼ ñácarube rey (1 Samuel 10:8; 13:5-13).
9. Ximodo bisihuinni Saúl maʼ qué ruzuubaʼ diidxaʼ.
9 Ñee biziidiʼ Saúl xiixa ne ni bizaaca riʼ la? Coʼ. Sti dxi gudxi Jiobá laabe guutibe ca binni de Amaleq, purtiʼ bicaalúcabe ca israelita neca gastiʼ ñúnicaʼ laacabe, dede ne guiráʼ ca maniʼ stícabe na Jiobá naquiiñeʼ gati. Saúl qué ñuni diʼ guiráʼ ni guidxi Jiobá laa, ni bíʼnisibe nga bizulú biitibe binni ndaaniʼ guidxi Havilá dede yendabe guidxi Sur. Ora bidxaagalú Samuel laabe la? gúdxibe laa ca diidxaʼ riʼ purtiʼ guizáʼ cayéchebe pur ni bíʼnibe: «Cuʼ ndaayaʼ Jiobá lii. Maʼ biʼneʼ ni na Jiobá que». Peru gadxé nga ni guníʼ Jiobá guni Saúl ne ca israelita que ne gadxé ngue ni bíʼnicabe, purtiʼ qué ñuuticabe rey Agag ne qué ñuuticabe «ca dendxuʼ ne ca vaca ni jma sicarú que ne ca maniʼ ni riroo que, ca dendxuʼ ni napa cachu que ne guiráʼ ni galán» nuu raqué. Saúl guníʼ xiñee qué ñuuti rey que ne ca maniʼ que, nabe: «Binni guidxi riʼ qué ninacaʼ ñuuticaʼ ca dendxuʼ ne ca vaca ni jma sicarú que, ti gudiicabe laacame Jiobá, Dios stiluʼ» (1 Samuel 15:1-15).
10. Xi qué niziidiʼ Saúl.
10 Sicaríʼ bicabi Samuel Saúl: «Ñee jma nga riecheʼ Jiobá guzaaquicabe ofrenda para gusigáʼdecabe laa ne guuticabe maniʼ que guzuubacabe stiidxaʼ Jiobá la? ¡Biiyaʼ! Jma galán nga guzuubaʼ binni diidxaʼ que guuti maniʼ, jma galán gucaadiaga binni que gudii ca zá stiʼ ca dendxuʼ ni napa cachu» (1 Samuel 15:22). Cumu maca gudxi Jiobá laacabe guuticabe ca maniʼ que la? neca nudiicabe ca maniʼ que Jiobá maʼ qué nicaa diʼ laacame.
Guzúʼbanu stiidxaʼ Jiobá lu guiráʼ ni gúninu
11, 12. 1) Ximodo ruuyaʼ Jiobá stipa ni rúninu para guni adorarnu laa casi racalaʼdxiʼ. 2) Ximodo ndiʼ zándaca chuʼ tu quite laca laa ora guiníʼ ique cayuni ni na Dios peru zaqueca cayuni ni cadi jneza.
11 Guizáʼ riecheʼ Jiobá nga guʼyaʼ qué rusaana ca xpinni laa neca cucaalú binni laacaʼ, ne rucheechecaʼ stiidxaʼ Reinu neca nuu binni qué riuulaʼdxiʼ gucaadiaga ne riecaʼ ca guendaridagulisaa ca neca nadipaʼ para guidxélacaʼ ni caquiiñecaʼ para guibaninecaʼ. Nabé risaca gúninu cani maʼ bizéʼtenu ca para chuʼnu galán ne Jiobá. ¡Guizáʼ rusiéchenu ladxidoʼbe ora gúninu cani casi nabe! Jiobá nabé rusisaca stipa rúninu para guni adorarnu laa, peru, ora rúninu ni purtiʼ nadxiinu laabe. Zándaca qué ruuyaʼ xcaadxi binni pabiáʼ stipa nga cayúninu, peru Jiobá cayuuyaʼ cayúninu cani de guidubi ladxidoʼno ne qué rusiaandabe cani (Mateo 6:4).
12 Peru, para jma gusiéchenu ladxidóʼ Dios la? naquiiñeʼ guzúʼbanu stiidxabe lu guiráʼ xixé ni gúninu. Cadi quítenu laca laanu ra guiníʼ íquenu zanda gúninu xiixa ni cadi jneza purtiʼ si cayúninu ni na Dios lu xcaadxi cosa. Zándaca chuʼ tuuxa gacalaʼdxiʼ gapa jnadxii o guni sti cosa malu ne guiníʼ ique qué zabidxi Dios cuenta laa purtiʼ cayuni xcaadxi cosa para guni adorar laabe. Cadi jneza diʼ nga guiníʼ íquenu zacá (Gálatas 6:7, 8).
13. Xiñee zándaca gaca nagana para laanu guzúʼbanu stiidxaʼ Jiobá ora maʼ nuunu stúbinu ra lídxinu.
13 Nga runi, naquiiñeʼ guiníʼ íquenu: «Ñee cuzuubaʼ stiidxaʼ Jiobá lu cani runeʼ guiráʼ dxi dede ne ora nuaa stubeʼ la?». Sicaríʼ guníʼ Jesús ni zanda gúninu: «Ni guni jneza ne caadxi huiini la? laca zuni jneza ne stale. Ne ni qué guni jneza ne caadxi la? laca qué zuni jneza ne stale» (Lucas 16:10). Ñee rúninu stipa para cadi chuʼ xiixa cosa malu ndaaniʼ ladxidoʼno dede ne ora nuunu ndaaniʼ lídxinu ra cadi cayuuyaʼ guirutiʼ laanu la? (Salmo 101:2.) Neca ndaaniʼ lídxinu nuunu la? zándaca chuʼ xiixa ni gucaa laanu guchéʼnenu Dios. Dxiqué ora tuuxa racalaʼdxiʼ guʼyaʼ xiixa película de diidxaʼ guidxa, o diidxaʼ dxabaʼ la? naquiiñepeʼ cheʼ ti lugar ra ridiʼdiʼ ni. Peru yanna, ndaaniʼ ca guidxi ra maʼ napa stale binni computadora la? ne quiñenásicabe caadxi botón stini maʼ zanda gúʼyacabe cani. Jesús bidii conseju riʼ laanu: «Neca chuʼlaʼdxi si tuuxa ti gunaa ni cadi xheelaʼ, ne icá ique chuʼ né laabe la? ma bichee, neca qué ñuu né pe laabe». Ñee rúninu stipa para chinándanu conseju riʼ la? Ñee zúninu stipa para cadi guidúʼyanu ca cosa malu ca ora maʼ cadíʼdicaʼ la? (Mateo 5:28; Job 31:1, 9, 10; Salmo 119:37; Proverbios 6:24, 25; Efesios 5:3-5.) Yanna, xi gúninu ora guidúʼyanu ra cadinde binni o ra cayuuticabe binni lu tele yaʼ. Zacananaláʼdxinu cani cásica racananalaʼdxiʼ Jiobá cani la? (Salmo 11:5.) Ñee zadíʼdisunu ora guideʼnu xiixa nisa dxuʼniʼ pa nuunu stúbinu paxaraa la? Biblia na cadi jneza nga xhúdxinu, peru laaca rábini laanu cadi guideʼnu gatigá (Tito 2:3, NM; Lucas 21:34, 35; 1 Timoteo 3:3).
14. Ximódoruʼ naquiiñeʼ guzúʼbanu stiidxaʼ Dios.
14 Sti cosa ni naquiiñeʼ guidúʼyanu nga ximodo racaláʼdxinu gápanu bidxichi. Ñee ziuʼnu lu ti negocio o lu sti cosa para gápanu bidxichi neca gusiguiinu binni para cuánanu laa la? Ñee ruquiinde laanu gúninu xiixa ni cadi jneza para cadi quíxenu impuestu la? O riguíxenu impuestu stinu cásipeʼ na conseju bidii Pablu que (Romanos 13:7).
Ruzúʼbanu stiidxaʼ Dios purtiʼ nadxiinu laa
15. Xiñee ruzúʼbanu stiidxaʼ Jiobá.
15 Pa chinándanu ca conseju stiʼ Dios la? zabeendunu stale ni galán. Nga runi, pa cadi gápanu jnadxiinu, cadi cúbanu gueza ne gápanu respetu rini ca la? qué zaca huaranu casi raca huará ca binni ni runi zacá. Ne ora chinándanu ni na Biblia lu xcaadxi cosa ni gúninu la? zándaca qué zunítinu stale bueltu, ne ziuʼnu galán ne ca binnilídxinu zaqueca ne xcaadxi binni (Isaías 48:17). Cani guninu ca zeeda gácacani ndaayaʼ ni ricaanu pur rinándanu ca ley stiʼ Jiobá. Peru cadi pur nga diʼ ruzúʼbanu stiidxabe, sínuque ruzúʼbanu stiidxabe purtiʼ nadxiinu laabe. Ne qué rúninu ni na Jiobá purtiʼ racaláʼdxinu guicaanu xiixa (Job 1:9-11; 2:4, 5). Jiobá rudii lugar cuinu tu racaláʼdxinu guzúʼbanu stiidxaʼ, ne laanu maʼ gulinu guzúʼbanu stiidxabe purtiʼ racaláʼdxinu gusiéchenu laabe ne cá íquenu gúninu ni jneza (Romanos 6:16, 17; 1 Juan 5:3).
16, 17. 1) Ximodo bisihuinni Jesús pur nadxii Dios nga bizuubabe stiidxaʼ. 2) Ximodo zanda chinándanu ejemplu stiʼ Jesús.
16 Jesús bizuubaʼ stiidxaʼ Jiobá purtiʼ dxandíʼ nadxii laabe, nga runi Jesús nga bidii ti ejemplu ni jma galán (Juan 8:28, 29). Dxi guyuube lu Guidxilayú riʼ «udiʼdi be irá enda naná que para biziidi be uzuuba be diidxaʼ» (Hebreos 5:8, 9). Ximodo yaʼ. «Bidii be lugar uca be biaʼ ri tiʼ, ne bizuuba be diidxa dede uná be guti be lu [ti yaga] casi rati cani qué iquiiñeʼ.» (Filipenses 2:7, 8.) Neca bizuubabe diidxaʼ dxi guyuube guibáʼ la? ora guyuube lu Guidxilayú riʼ bisihuínnibe ruzuubabe diidxaʼ lu xcaadxi cosa. Nga runi, nanna dxíchinu Jesús nga ni jma zanda gaca xaíque stiʼ cani ruzaaquiʼ guʼxhuʼ para guiniʼbe nezalú Dios pur ca bíʼchibe ne ca bizáʼnabe ne pur guiráʼ binni ni guni cré laabe (Hebreos 4:15; 1 Juan 2:1, 2).
17 Yanna laanu xi gúninu yaʼ. Pa jma risaca para laanu gúninu ni na Dios lu xquendanabáninu la? zusihuínninu cayúninu cásica biʼniʼ Jesús (1 Pedro 2:21). Riuʼnu nayecheʼ ora rúninu ni na Dios purtiʼ nadxiinu laa neca chuʼ tu gucaa laanu gúninu xiixa cosa malu o uquiinde laanu gúninu ni (Romanos 7:18-20). Laaca cayúninu ni na Dios nga ora rinándanu de guidubi ladxidoʼno ni gabi ca binnigola ni zaniruʼ lade ca binni ridagulisaa laanu, neca binni gulené donda laacabe (Hebreos 13:17). Ora chinándanu ca mandamientu stiʼ Jiobá neca guirutiʼ tu cayuuyaʼ laanu la? guizáʼ risácani para laabe.
18, 19. Xi zabeendunu pa guzúʼbanu stiidxaʼ Dios de guidubi ladxidoʼno.
18 Para guzúʼbanu stiidxaʼ Dios la? zándaca naquiiñeʼ guni huantarnu ora gucaalú binni laanu ti cadi guchéʼnenu Dios (Hechos 5:29). Jiobá cayuni mandar laanu gucheechenu stiidxaʼ ne gusíʼdinu xcaadxi binni, peru para gúninu cani la? naquiiñeʼ guni huantarnu dede dxi guinitilú guiráʼ cosa malu riʼ (Mateo 24:13, 14; 28:19, 20). Laaca naquiiñeʼ guni huantarnu ti cadi gusaananu de guidagulisaanenu ca bíʼchinu ne ca bizáʼnanu neca cadiidinu stale guendanagana pur guiráʼ cosa ni cayaca lu Guidxilayú riʼ. Dios stinu ni nadxii laanu cayuuyaʼ guiráʼ stipa ni cayúninu pur gusihuínninu cuzúʼbanu stiidxaʼ lu cani maʼ bizéʼtenu ca. Peru para gúninu ni nabe lu guiráʼ cosa la? naquiiñeʼ gucáʼnanu guiráʼ cosa malu ni ruquiinde laanu gúninu, guixélenu de ca cosa malu ne guyúbinu chuuláʼdxinu gúninu ni jneza (Romanos 12:9).
19 Ora rúninu ni na Jiobá purtiʼ nadxiinu laa ne purtiʼ rudiʼnu xquíxepeʼ laabe la? ridúʼyanu dxandíʼ nga «rulabi be cani uyubi laabe» (Hebreos 11:6). Nuu stale cosa ni naquiiñeʼ gudiʼnu Jiobá, peru ni jma riuuláʼdxibe nga guzúʼbanu stiidxabe purtiʼ nadxiinu laabe (Proverbios 3:1, 2).
Xi nicábiluʼ
• Xiñee rininu nuu xiixa ni zanda gudiʼnu Jiobá.
• Ximodo bicheené Saúl Jiobá.
• Ximodo zusihuínninu nánnanu jma galán nga guzúʼbanu stiidxaʼ Dios qué guutinu maniʼ para gudiʼnu laa.
• Xi rucaa laanu guzúʼbanu stiidxaʼ Jiobá.
[Dibuju/foto ni zeeda lu yaza 18]
Ximodo zuni sentir ti doctor ni racalaʼdxiʼ guianda ti binni huará pa qué chinanda binni huará riʼ ni cayábibe laa yaʼ
[Dibuju/foto ni zeeda lu yaza 20]
Xiñee maʼ qué ñapa Saúl ndaayaʼ stiʼ Jiobá
[Dibuju/foto ni zeeda lu yaza 21]
Ñee ruzuubaluʼ stiidxaʼ Dios dede ne ora nuuluʼ stúbiluʼ ra lídxiluʼ la?