Acanenu xcaadxi binni para uzuubacaʼ diidxaʼ de idubi ladxidoʼcaʼ
1. Xi rinabaʼ Dios guni ca xpinni.
1 Endaruzuubaʼ diidxaʼ ca nabé risaca ni purtiʼ zacá ziulaʼdxiʼ Jiobá modo runi adorarnu laa (Deu. 12:28; 1 Ped. 1:14-16). Maʼ cadi candaa diʼ zusabanáʼ Dios «cani qué nicaa stiidxaʼ, ne qué ñunibiáʼ» laabe (2 Tes. 1:8). Ximodo zanda acanenu stuudxi binni uzuubacaʼ stiidxaʼ Dios de idubi ladxidoʼcaʼ yaʼ (Rom. 6:17).
2. Xiñee riquiiñepeʼ nga acanenu sti binni gapa ti fe ni naguidxi.
2 Acanenu laacabe gápacabe fe ne endarannaxhii. Ndaaniʼ Biblia la? endarannaxhii ca dxaaganeni fe. Apóstol Pablu bizeeteʼ ni biʼniʼ mandar Dios: «Irá binni guni cre ca laabe ne guni ca ni na be» (Rom. 16:26). Lu capítulo 11 stiʼ Hebreos zeeda ti lista de binni ni uca ejemplu pur fe sticaʼ ne stale de laacabe bíʼnicabe cásipeʼ modo na Jiobá (Heb. 11:7, 8, 17). Pur nga runi, ni qué ruzuubaʼ Stiidxaʼ Dios la? rusihuinni qué gapa fe (Juan 3:36; Heb. 3:18, 19). Riquiiñeʼ gúninu ti stipa pur usíʼdinu Stiidxaʼ Dios jneza ne zacá acanenu sti binni gapa ti fe ni acané laa uzuubaʼ diidxaʼ (2 Tim. 2:15; Sant. 2:14, 17).
3. 1) Ximodo nga zeeda aca endaruzuubaʼ diidxaʼ ne endarannaxhii ca tobi si yaʼ. 2) Ximodo zanda acanenu ni caziidiʼ de lu Biblia ca gannaxhii Jiobá.
3 Uzúʼbanu diidxaʼ ne gannaxhiinu Dios la? laaca casi ñaca tobi si cani (Deu. 5:10; 11:1, 22; 30:16). Lu 1 Juan 5:3 na: «Sicarí nga gannaxhii nu Dios: guni nu ni na. Ne cadi nagana ni na be guni nu». Ximodo zanda acanenu ni caziidiʼ de lu Biblia gannaxhii Dios sicaríʼ yaʼ. Uyúbinu modo usisácabe ca guenda stiʼ Jiobá ora maʼ cayúʼndanenu laabe. Gábinu laabe ni runi sentirnu pur Dios. Acanenu laabe gánnabe ximodo zanda gunibiáʼ chaahuibe Jiobá. Endarannaxhii ni gápanu Jiobá la? jma naquiiñeʼ isaca ni que sti cosa, ne nga nga ni zucaa iráʼ binni ne zucaa laanu uzúʼbanu stiidxabe de idubi ladxidoʼno (Mat. 22:37).
4. 1) Xiñee riquiiñepeʼ nga quíxhenu ejemplu para stobi. 2) Xi riquiiñeʼ gúninu ti cadi usaana de uzúʼbanu diidxaʼ de idubi ladxidoʼno yaʼ.
4 Ne ejemplu stinu. Para ganda acanenu stobi guni ni na ca diidxaʼ nacubi ne galán ca nga, quíxhenu ejemplu ca laanu. Para nga la? nápanu xidé gúninu stipa para cadi usaananu de uzúʼbanu diidxaʼ de idubi ladxidoʼno (1 Rey. 3:9; Pro. 4:23). Xi riníʼ ndiʼ yaʼ. Ndiʼ riníʼ cadi usaananu de gúʼndanu Biblia ne chuunu ca endaridagulisaa ca, zacá zuchá típanu ladxidoʼno de cani rizíʼdinu de Dios (Sal. 1:1, 2; Heb. 10:24, 25). Laaca riquiiñeʼ uyúbinu idxaaganu binni nuu xpiaaniʼ ni runi adorar Jiobá de idubi ladxidóʼ (Pro. 13:20). Ne laaca riquiiñeʼ ucheechenu diidxaʼ purtiʼ ni dxandíʼ racaláʼdxinu nga acanenu binni ni nuu neza ra rucheechenu diidxaʼ, ne inábanu Jiobá lu oración acané laanu aca ladxidoʼno nayá (Sal. 86:11). Peru laaca riquiiñeʼ ixélenu de iráʼ ni zanda guni biidiʼ ladxidoʼno, casi gúʼyanu película ra cadíndecabe o ra cayápacabe xnadxiicabe. Riquiiñeʼ iníʼ íquenu jma lu ca cosa ni uchiña laanu gaxha de Dios ne cani acané laanu aca xhamígunu laabe jma (Sant. 4:7, 8.
5. Pabiáʼ ndaayaʼ rudii Jiobá cani ruzuubaʼ Stiidxabe yaʼ.
5 Jiobá gúdxibe xquídxibe de dxiqué zuzabi ndaayabe laacaʼ pa uzuubacaʼ stiidxabe (Deu. 28:1, 2). Yanna riʼ laaca rudii Jiobá stale ndaayaʼ iráʼ «cani ruzuubaʼ stiidxa[be]» purtiʼ nánnacaʼ laabe nga runi mandarbe (Hech. 5:32). Nga runi, acanenu xcaadxi binni para uzuubacaʼ diidxaʼ de idubi ladxidoʼcaʼ pur ni rusíʼdinu laacaʼ ne pur ejemplu stinu.