Guzúʼbanu diidxaʼ ne gácanu nadxibalú cásica guca Jesús

«Cadi idxibi tu purti ma udixhe dxie guidxilayú.» (JUAN 16:33)

1. Ximodo bisihuinni Jesús bizuubaʼ stiidxaʼ Dios.

JESÚS qué nusaana de ñuni ni na Bixhoze ni nuu guibáʼ. Laabe qué ñuu dxi niníʼ íquebe nucheenebe Dios (Juan 4:34; Heb. 7:26). Peru nagana guca para laabe guzuubabe diidxaʼ pur guiráʼ guendanagana ni bidxaagalube lu Guidxilayú. Dede dxi bizulube bicheechebe diidxaʼ gucalaʼdxiʼ ca xhenemígube, dede ne Binidxabaʼ, nucaacaʼ laabe nucheenebe Dios (Mat. 4:1-11; Luc. 20:20-25). Guirácabe nabé bininácabe laabe, bininácabe ladxidoʼbe ne biiticabe laabe ora bicaacabe laabe lu ti yaga (Mat. 26:37, 38; Luc. 22:44; Juan 19:1, 17, 18). Neca nabé naná yuubaʼ nga gudiʼdiʼ Jesús la? «bizuuba be diidxa dede uná be guti be» (Fili. 2:8).

2, 3. Xi zanda guizíʼdinu de Jesús purtiʼ bizuubaʼ diidxaʼ neca bidxaagalú guendananá.

² Guiráʼ cani bizaaca Jesús lu Guidxilayú riʼ bisiidicani laabe xcaadxi modo zanda guzuubabe stiidxaʼ Dios (Heb. 5:8). Peru, xiruʼ zanda guiziidiʼ Jesús pa maʼ nanna ximodo guzuubaʼ diidxaʼ yaʼ. Laabe maca bibánibe stale millón de iza ne Bixhózebe ne gucanebe laa casi tobi ni runi xhiiñaʼ Dios jnézapeʼ dxi bizáʼ guibáʼ ne Guidxilayú (Pro. 8:30). Peru ora gudíʼdibe guiráʼ guendananá ni gúpabe lu Guidxilayú riʼ, bisihuínnibe qué ziuu dxi gucheenebe Dios ne qué ziuu dxi gusaanabe de guzuubabe stiidxaʼ. Guiráʼ nga gucané Xiiñiʼ Dios chuʼ jma gaxha de Bixhoze. Xi rusiidiʼ ejemplu stibe laanu yaʼ.

³ Nécapeʼ guca Jesús ti binni sin donda, gúnnabe naquiiñeʼ guinábabe Jiobá gacané laabe para cadi liica gusaanabe de guzuubabe stiidxaʼ (biindaʼ Hebreos 5:7). Laanu laaca cadi naquiiñeʼ gudxíʼbanu laca laanu ne cadi gusaananu de guinábanu Dios gacané laanu para ganda guzúʼbanu stiidxaʼ. Sicaríʼ gudxi apóstol Pablu ca xpinni Cristu: «Laguietenalaʼdxi pabiáʼ nadóʼ uca Cristu Jesús dxi uzá ndaani guidxilayú, ne lachinanda ejemplu stiʼ [...], bidii be lugar uca be biaʼ ri tiʼ, ne bizuuba be diidxa dede uná be guti be» (Fili. 2:5-8). Ejemplu stiʼ Jesús ca bisihuínnini zanda guzuubaʼ ti binni stiidxaʼ Dios neca nabani ndaaniʼ ti guidxilayú malu. Yanna laanu yaʼ, ñee zanda guzúʼbanu diidxaʼ neca gulenenu donda la?

Zanda guzúʼbanu diidxaʼ neca gulenenu donda

4. Xi zanda gúninu purtiʼ bizáʼ Dios laanu para cuinu ni gúninu.

⁴ Dios bidii lugar cuí Adán ne Eva xi racaláʼdxicaʼ gúnicaʼ. Laanu, ca xiiñicabe, laaca zanda cuinu xi gacaláʼdxinu gúninu. Guiranu zanda cuinu guzúʼbanu stiidxaʼ Dios o coʼ. Nga runi, naquiiñeʼ gánnanu zabídxicabe cuenta laanu pur cani quixhe íquenu gúninu. Racá ridúʼyanu, zanda gacané cani quixhe íquenu ca binni o guninácani laacabe, ne dede zanda guibáninu o gátinu pur laacani.

5. Xii nga raca nagana para laanu gúninu, ne ximodo zanda gudxíʼlunu cani.

⁵ Laanu cadi biaʼnu guzúʼbanu diidxaʼ purtiʼ dede gálenu binni ruchee laanu, nga runi stale biaje raca nagana para laanu gúninu ni na ca ley stiʼ Dios. Ne apóstol Pablu guníʼ guca nagana para laa guzuubaʼ diidxaʼ, sicaríʼ guniʼbe: «Peru ruuya ma adxé ley nuu luguiaʼyaʼ ne nuu dinde né ni ley ni maca cá lu xquenda biaaneʼ, ne laani nga rucaa ni naa yaga lu ná pecadu ni runi mandar naa» (Rom. 7:23). Nánnanu ruluíʼ si jma nagueenda ruzuubaʼ binni diidxaʼ ora cadi cadiʼdiʼ ra nagana o cadi cayacaná. Peru xi rizaaca ora nuu xiixa ni cucaa laanu gúninu cosa malu ne racaláʼdxinu guzúʼbanu diidxaʼ yaʼ. Óraca raca nagana para laanu gúninu ni jneza purtiʼ gulenenu donda ne nabé nadipaʼ «espíritu sti binni guidxilayú» (1 Juan 2:16; 1 Cor. 2:12). Nga runi, para ganda gudxíʼlunu ca nga la? naquiiñeʼ chuʼnu listu: dede ante guidxaagalunu xiixa guendanagana naquiiñeʼ quixhe íquenu cadi guchéʼnenu Jiobá neca guizaacanu intiica cosa (Sal. 78:8). Lu Stiidxaʼ Dios zeeda stale ejemplu stiʼ ca xpínnibe ni qué nucheené laabe, purtiʼ dede ante gudixhe íquecaʼ cadi gucheecaʼ (Esd. 7:10; Dan. 1:8).

6, 7. Xi ejemplu rusihuinni pabiáʼ riquiiñeʼ guidúʼndanu Biblia stúbinu ti gánnanu xi gúninu.

⁶ Para ganda chuʼnu listu naquiiñeʼ guidúʼndanu Biblia guiráʼ dxi ne ca libru ne revista ni caníʼ de laani. Bixuiʼlú cayuundaluʼ Stiidxaʼ Dios stúbiluʼ gueelaʼ gudíxheluʼ para gúniluʼ ni. Lii maʼ gunábaluʼ Jiobá gudii lii espíritu stiʼ ne gacané lii gúniluʼ ni caziidiluʼ. Ne sti dxi que chitiidiʼ ti película lu televisión ni nápaluʼ gana gúʼyaluʼ. Peru nécapeʼ cayeeteʼ nabé galán película que la? gúnnaluʼ luni zeeda ra cadíndecabe ne ra cayuunécabe ni cadi xheelacabe.

⁷ Ngue runi guníʼ íqueluʼ conseju ni bidii apóstol Pablu ni zeeda lu Efesios 5:3: «Yáquexa ma xpinni Dios laatu la? ma cadi lica guiete enda rapa jnadxii lade tu, nin guni tu gasti ru ni nadxabaʼ, nin uyubi tu gapa tu xiixa para laasi tu». Laaca bietenaláʼdxiluʼ conseju ni bidii apóstol ca lu Filipenses 4:8 (biindaʼ ni). Ne óraque guníʼ íqueluʼ: «Pa guuyaʼ película ni chitiidiʼ guixíʼ ca, ñee zusihuinneʼ ruzuubaʼ stiidxaʼ Dios casi biʼniʼ Jesús la?». Yanna, ñee zuuyaluʼ película ca neca nánnaluʼ xi chitiidiʼ luni la?

8. Xiñee cadi jneza diʼ nga guiníʼ íquenu zanda gusaananu de gúninu ni na ca ley stiʼ Jiobá.

⁸ Cadi jneza diʼ nga guiníʼ íquenu zanda gusaananu de gúninu ni na ca ley stiʼ Jiobá purtiʼ si rábinu qué zácanu gastiʼ pa guidxaaganu binni ni cadi naca xpinni Cristu, casi cani ridinde ne riuunecaʼ xheelaʼ stobi, neca lu televisión guidúʼyanu laacabe. Naquiiñeʼ gápanu laanu ne ca xiiñinu para cadi guicá modo riníʼ ique Binidxabaʼ laanu. Cásica rapa binni laa para cadi guicá xiixa guendahuará malu laa la? laanu laaca naquiiñeʼ gápanu laanu para cadi guicá modo riníʼ ique «binidxaba [...] ne enda nexhená stiʼ» laanu (Efe. 6:11).

9. Xiñee naquiiñeʼ quixhe íquenu guzúʼbanu stiidxaʼ Jiobá guiráʼ dxi.

⁹ Guiráʼ dxi nápanu xidé guidúʼyanu pa zúninu ca cosa ca modo riuulaʼdxiʼ Jiobá. Pa racaláʼdxinu gulabe laanu la? naquiiñeʼ guzúʼbanu stiidxabe ne chinándanu ca conseju stibe. Para gusihuínninu dxandíʼ nápanu fe la? naquiiñeʼ chinándanu ejemplu stiʼ Jesús ne guzúʼbanu stiidxaʼ Dios dede gátinu pa caquiiñepeʼ. Jesús guníʼ: «Peru tu qué ixhacalaʼdxi dede dxi iluxe irá ni la? zalá» (Mat. 24:13). Para nga naquiiñeʼ gácanu nadxibalú cásica modo guca Jesús (Sal. 31:24).

Jesús nga ejemplu ni jma risaca purtiʼ guca nadxibalú

10. Xi guiráʼ cosa nga ridxaagalú ca xpinni Cristu, ne ximodo naquiiñeʼ gudxíʼlunu cani.

¹⁰ Cumu nabáninu lade binni ni runi cosa malu la? naquiiñeʼ gácanu nadxibalú para cadi guicá xpiáʼcabe laanu ne cani rúnicabe. Nabé ridxaagalunu stale cosa ni zándaca guxheleʼ laanu de Jiobá, casi ca cosa malu ca, ca binni ni qué runi ni jneza, ora guiaadxaʼ bueltu laanu, ne ca costumbre ni runi ca binni ni nuu ndaaniʼ ca religión ni cadi dxandíʼ ca. Ndaaniʼ stale guidxi nabé rusiidicabe binni ndaaniʼ ca scuela ca ziúpanu de maniʼ, ne jma cadale binni ni qué runi cré Dios. Pa racaláʼdxinu gápanu laanu ne gudxíʼlunu ca binni ni racalaʼdxiʼ gucaa laanu gúninu cosa malu la? naquiiñeʼ gúninu xiixa. Ejemplu stiʼ Jesús rusiidini laanu ximodo gudxíʼlunu cani.

11. Xiñee racané ejemplu stiʼ Jesús laanu gácanu nadxibalú.

¹¹ Jesús gudxi ca discípulo stiʼ: «Laga nuu tu ndaani guidxilayú ri la? zadiʼdi tu ni nagana, peru cadi idxibi tu purti ma udixhe dxie guidxilayú» (Juan 16:33). Laabe qué ñuu dxi nudiibe lugar nicá modo riníʼ ique binni guidxilayú laabe. Ne laaca qué ñuu dxi nudiibe lugar nucueeza cani laabe de nucheechebe diidxaʼ o nucaa cani laabe nusaanabe de ninándabe ca ley stiʼ Jiobá. Laanu laaca zaqueca naquiiñeʼ gúninu. Sicaríʼ guníʼ Jesús de ca discípulo stiʼ ora biʼniʼ orar: «Cásica naa cadi zinanda guidxilayú zaqueca laacabe, cadi zinanda cabe guidxilayú» (Juan 17:16). Pa guidúʼndanu ejemplu stiʼ Jesús ne guiníʼ íquenu de laani zanda gudxíʼlunu ca cosa malu stiʼ guidxilayú riʼ sin guidxíbinu.

Gácanu nadxibalú casi guca Jesús

12-14. Bizeeteʼ chupa chonna modo bisihuinni Jesús guca nadxibalú.

¹² Dxi bicheeche Jesús diidxaʼ bisihuinni naca ti hombre nabé nadxibalú. Cumu Xiiñiʼ Dios laabe la? gúpabe derechu para «biuu be ndaani yuʼdu roʼ sti Dios, ne guladxi be irá cani cutoo ne ni cazíʼ ndaani yuʼdu que, ne bitiixhi be jmexa cani cuchaa bidxichi ne xpangu cani cutoo paloma» (Mat. 21:12). Gueelaʼ ante gátibe que, ora guyé ti grupu de soldadu para guinaazeʼ laabe, qué nudiibe lugar ñuninácabe ca discípulo stibe, ne gúdxibe laacaʼ: «Pa naa cuyubi tu la? laudii lugar che ca xcaadxi riʼ» (Juan 18:8). Ne despué ora gulee Pedru espada stiʼ gúdxibe laa gudxiguetaʼ ni jlugar ni, zaqué bisihuínnibe runi crebe Jiobá si nga zanda gacané laabe ne cadi guiibaʼ casi espada ni naaze Pedru que (Juan 18:11).

¹³ Jesús qué nidxibi diʼ ora guníʼ cadi jneza cani runi ca xaíque yuʼduʼ que ne cani rusiidicaʼ. Sicaríʼ gúdxibe laacaʼ: «Lagapa gá laatu, maistru de ley ne fariseu caʼ, purti nisi rusiguii tu. Ne pur laatu qué ganda chuʼ binni lade ca xpinni Dios». Ne laaca gúdxibe laacaʼ: «Peru qué rulabi tu ni jma naquiiñe guni tu ni zeeda lu ley. Ruchee né tu binni ne qué riá tu laacaʼ, ne qué runi cre tu Dios [...], de luguiá si ruluíʼ nachaʼhui tu, peru ndaani ladxidóʼ to nabiidi purti ribaʼna tu sti binni ne nalá tu» (Mat. 23:13, 23, 25). Ca discípulo stiʼ Jesús laaca gupa xidé gúcacaʼ nadxibalú purtiʼ despué guzananda ca xaíque yuʼduʼ que laacaʼ dede nuu de laacaʼ biiticabe (Mat. 23:34; 24:9).

¹⁴ Nin ca demonio ca qué nuchíbicaʼ Jesús. Ti biaje guyé ti hombre ni nuu demonio luguiáʼ ra nuube, hombre riʼ guirutiʼ tu huayanda gundiibi laa nin ne cadena purtiʼ nabé nadipaʼ. Peru qué nidxibi diʼ Jesús ne guleebe ca demonio ni nuu luguiáʼ hombre que (Mar. 5:1-13). Ca dxi stinu riʼ, cadi cudii diʼ Dios laanu poder para gúninu milagru cásica biʼniʼ Jesús. Peru ora rucheechenu diidxaʼ ne rusíʼdinu binni la? cusihuínninu cudxíʼlunu Binidxabaʼ, ni rusicahui xquendabiaaniʼ cani qué runi cré (2 Cor. 4:4). Cásica Jesús, cani riquiiñenu para gucáʼlunu Binidxabaʼ cadi nácacani casi cani riquiiñeʼ «binni guidxilayú, sínuque nandxóʼ [ca]ni casi nandxóʼ Dios ni bidii cani laadu para uchiá né du intiica ni quixhe cabe para cadi chindá stiidxa Dios ra nuu cabe», nga nga cani rusiidiʼ ca religión ni cadi dxandíʼ (2 Cor. 10:4). Ximodo zanda iquiiñenu cani nápanu para gucáʼlunu Binidxabaʼ yaʼ. Guidúʼyanu ximodo biʼniʼ Jesús ni.

15. Xi pur gunda guca Jesús nadxibalú.

¹⁵ Qué nusihuinni diʼ Jesús nadxibalú para si guʼyaʼ binni laa. Laabe gúcabe nadxibalú purtiʼ dxandíʼ gúpabe fe Dios. Ne laaca zacaca naquiiñeʼ gúninu (Mar. 4:40). Ximodo zanda gápanu fe yaʼ. Sti biaje ca gudixhe Jesús ti ejemplu ni zanda chinándanu. Laabe binibiáʼ chaahuibe Stiidxaʼ Dios ne biʼniʼ crebe cani zeeda luni. Jesús qué niquiiñeʼ diʼ ti espada para nulá laa, sínuque biquiiñebe Stiidxaʼ Dios. Qué nusaanabe de nusiidibe ni zeeda luni. Ne cada guzulú guiníʼnebe binni bizeetebe ca diidxaʼ riʼ: «Cá lu Xquiʼchi Dios», ne óraque ruluiʼbe ra cá ni lu Stiidxaʼ Dios.a

16. Ximodo zanda iguidxi fe stinu.

¹⁶ Para ganda gacané fe stinu laanu gudxíʼlunu intiica guendanagana la? naquiiñeʼ guidúʼndanu Stiidxaʼ Dios guiráʼ dxi para guiénenu ni ne chuunu ca guendaridagulisaa ca. Zacá qué ziaandaʼ diʼ laanu cani rusiidiʼ Biblia, cani racané laanu iguidxi fe stinu (Rom. 10:17). Laaca naquiiñeʼ guiníʼ íquenu cani para ganda chindácani ndaaniʼ ladxidoʼno. Pa naguidxi fe stinu la? zanda gudxíʼlunu xiixa guendanagana sin guidxíbinu (Sant. 2:17). Ne laaca naquiiñeʼ guinábanu Dios Espíritu santu stiʼ, purtiʼ fe ca nga tobi de ca guenda rudii espíritu ca laanu (Gál. 5:22).

17, 18. Ximodo bisihuinni Kitty qué nidxibi.

¹⁷ Pur ni bizaaca Kitty, ti dxaapahuiiniʼ ni naca xpinni Cristu, bidiibe cuenta fe ca nga racané laanu gácanu nadxibalú. Dede dxi nahuiinibe gúnnabe cadi naquiiñeʼ guituílube ora guiniʼbe de Stiidxaʼ Dios ra scuela, ne riuuláʼdxibe guiníʼnebe cani rizanebe scuela de laani (Rom. 1:16). Guiráʼ iza rúnibe stipa para guiníʼnebe laacaʼ de cani runi crebe, peru ridxíbibe gúnibe ni. Dxi maʼ ziniisibe guyebe sti lugar para chiguundabe. Laabe guniʼbe: «Yanna huaxa zuneʼ ni qué huayuu dxi guneʼ». Kitty gunabaʼ Jiobá gacané laa para cadi guidxibi ne gudii laabe guendabiaaniʼ ne guni laabe nadxibalú, ne guidxélabe ti binni guiníʼnebe.

¹⁸ Primé dxi guyebe scuela que la? guiráʼ ca xcompañérube que guniʼcaʼ tu lacaʼ. Nuu de laacaʼ guniʼcaʼ nápacaʼ religión sticaʼ, peru bisiénecaʼ cadi zinándacaʼ cani rusiidini. Óraque nga bidii Kitty cuenta naquiiñeʼ guiníʼ de cani runi cré. Ora chiguiniʼbe tu labe la? qué nidxíbibe guniʼbe sicaríʼ: «Testigu stiʼ Jiobá naa ne runeʼ stipa pur guneʼ ni na Biblia». Laga caniʼbe que la? caadxi de ca xcompañérube qué ñuuláʼdxicaʼ ni guniʼbe que, peru guyuu xcaadxi ni bicaadiaga laabe ne despué gunabadiidxacaʼ laabe xcaadxi cosa. Maestru stiʼ Kitty guníʼ nácabe ti ejemplu purtiʼ bisiénebe cani runi crebe, ne nabé nayecheʼ guyuube purtiʼ gúcabe nadxibalú cásica guca Jesús.

Gácanu nadxibalú ne gápanu fe cásica gupa Jesús

19. 1) Ximodo rusihuínninu dxandíʼ nápanu fe. 2) Ximodo zanda gusiéchenu Jiobá.

¹⁹ Ca apóstol que bidiicaʼ cuenta naquiiñeʼ gápacaʼ fe para gácacaʼ nadxibalú, ngue runi gúdxicabe Jesús: «Bitale fe stidu» (biindaʼ Lucas 17:5, 6). Cadi naquiiñeʼ si guni crenu nuu Dios para gusihuínninu nápanu fe, sínuque naquiiñeʼ guni crenu dxandíʼ zacané Jiobá laanu ne chuʼnu gaxha de laabe casi runi ti baʼduhuiiniʼ ne bixhoze. Salomón bicaa sicaríʼ: «Xiiñeʼ huiineʼ, pa maʼ riene ladxidoʼloʼ, ziecheʼ ladxiduáʼ, ya, ladxiduáʼ. Ne ca riñón stinneʼ ziecheʼ cani ora guiniʼluʼ ni jneza» (Pro. 23:15, 16). Zacaca ziecheʼ Jiobá ora guininu ca conseju stiʼ sin guidxíbinu, ne gánnanu nga racané laanu gácanu jma nadxibalú. Nga runi, chinándanu ejemplu stiʼ Jesús ne gusiénenu pabiáʼ jneza nga cani runi Dios sin guidxíbinu.

[Cani cá ñee yaza]

Ñee zanda gusiéneluʼ ni la?

• Xi zacané laanu guzúʼbanu diidxaʼ neca gulenenu donda.

• Xi racané laanu iguidxi fe stinu, ne ximodo racaneni laanu gácanu nadxibalú.

• Xi zabeendunu pa guzúʼbanu diidxaʼ ne gácanu nadxibalú cásica guca Jesús.

[Dibuju/foto ni zeeda lu yaza 13]

Ñee maʼ cayuuluʼ listu para ganda gudxiiluluʼ ca guendanagana ni gápaluʼ la?

[Dibuju/foto ni zeeda lu yaza 15]

Jesús guca nadxibalú purtiʼ gupa fe Dios. Ne zacaca naquiiñeʼ gácanu