Qué liica zaquiiñeʼ nin ti guiibaʼ ni gúnicabe para gucaalúcabe laanu

«Intiica guiibaʼ gúnicabe para gucaalúcabe lii, qué zabeendunedícabe ni gastiʼ.» (ISAÍAS 54:17.)

1, 2. Ximodo guca ni na ca diidxaʼ cá lu Isaías 54:17 luguiáʼ ca testigu stiʼ Jiobá ni nuu Albania.

DEDE dxi bizulú bicaalúcabe ca xpinni Cristu lu 1940 hasta 1990 ndaaniʼ ti guidxi ni nuu ladu gueteʼ stiʼ Europa la? guyuu ti gobiernu comunista ni qué runi cré Dios ni biʼniʼ stale cosa para nunduuxeʼ ti grupu de ca xpinni Cristu. Neca bininá gobiernu ca laacabe ne bicaa laacabe gúnicabe dxiiñaʼ nadipaʼ ne gundisaʼ falsu luguiácabe la? qué ñanda diʼ nucueeza laacabe. Tu ca binni riʼ yaʼ. Ca testigu stiʼ Jiobá de guidxi Albania. Neca guizáʼ nagana guca para laacabe guidagulisaacabe ne gucheechecabe diidxaʼ la? qué nireecabe gana ne pur nga stale iza bisihuínnicabe dxandíʼ xpinni Cristu laacabe ne bisisácacabe lá Jiobá. Lu iza 2006 dxi biluxe Betel stiʼ Albania, ti Testigu ni maʼ xadxí de cayuni ni na Dios guníʼ sicaríʼ: «¡Neca guni Binidxabaʼ stale cosa para gucueeza laanu la? qué liica ribeendube gastiʼ, guiráʼ biaje runi ganar Jiobá laabe!».

² Ca xpinni Cristu ca nga cayuuyacaʼ dxandíʼ cayaca ni na ca diidxaʼ cá lu Isaías 54:17 riʼ luguiacaʼ: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ, ne intiica guiníʼcabe para gucaalúcabe lii ora gaca juzgarluʼ la? zudxiibaluʼ donda íquecabe». Guiráʼ cani maʼ huayaca ca cusihuínnicani gastiʼ zanda guni Binidxabaʼ ne ca xpinni para gucueeza ca Testigu de guni adorarcaʼ Jiobá.

Gastiʼ ganda guni Binidxabaʼ

3, 4. 1) Xi huayuni Binidxabaʼ para gucueeza ca testigu stiʼ Jiobá de gucheechecaʼ diidxaʼ. 2) Xiñee zanda guininu qué ganda guni Binidxabaʼ gastiʼ.

³ Ca xhenemigu ca xpinni Dios rucueezacaʼ dxiiñaʼ stícabe, ridaagucaʼ para guninacaʼ laacabe, ruseguyoocaʼ laacabe ne riguíxhecaʼ ley ni gusabanáʼ laacabe; laacani nga zeeda gaca casi guiibaʼ ni caquiiñeʼ binni para gucaalú laacabe (Salmo 94:20). Ne nagasidupeʼ, laga cayuundaʼ ca testigu stiʼ Jiobá tema riʼ la? nuu guidxi cadiʼdiʼ cani dxandíʼ xpinni Cristu lu guendananá ni rusihuinni pa dxandíʼ nápacaʼ fe (Apocalipsis 2:10).

⁴ Ca xpinni Cristu ni runi dxiiñaʼ ndaaniʼ ti Betel stiʼ ca testigu stiʼ Jiobá guniʼcaʼ bininácabe ca xpinni Dios 32 biaje lu ti iza si laga canagucheechecaʼ diidxaʼ. Ne 59 biaje gunaazeʼ pulicia ca Testigu laga canagucheechecaʼ diidxaʼ, gunaazecabe cani maʼ nagola, cani nahuiiniʼ, hombre ne gunaa. Caadxi de ca Testigu ca bicaacabe laacaʼ gucaacaʼ huella sticaʼ lu ti guiʼchiʼ, guleecabe foto laacaʼ ne biseguyoocabe laacaʼ, casi ora ñácacaʼ binni malu. Xcaadxi gúdxicabe laacaʼ zuninácabe laacaʼ. Ndaaniʼ sti guidxi la? jma de ti mil ti gayuaa biaje biseguyoocabe ca Testigu ne bicaacabe multa laacaʼ ne gudíñecabe laacaʼ. Lade cani bizéʼtenu ca jma de chupa gayuaa biaje bíʼnicabe ni dxi bidagulisaa ca Testigu para guietenaláʼdxicaʼ guendaguti stiʼ Jesús. Peru guiráʼ biaje huazaaca ca xpinni Cristu zacá la? Jiobá huaquiiñeʼ espíritu stiʼ para gulá laacabe órapeʼ ruluíʼ guirutiʼ tu gacané laacabe (Zacarías 4:6). Neca daʼ ca xhenemigu ca Testigu xiana la? qué zanda diʼ gucueeza nga laacabe de gusisácabe Jiobá. Ne nanna dxíchinu nin ti guiibaʼ qué zucueeza Jiobá para guni ni naguixhe ique.

Zudxíʼbanu donda íquecabe pur rusiguiicabe

5. Ximodo guníʼcabe mal de ca xpinni Jiobá lu primé siglu que.

⁵ Isaías maca guníʼ zudxiibaʼ ca xpinni Dios donda ique cani guiníʼ xiixa para gucaalú laacabe, o zusihuínnicabe rusiguiicaʼ. Lu primé siglu que nabé gundísacabe falsu luguiáʼ ca xpinni Cristu, ne guníʼcabe malu laacaʼ. Ca diidxaʼ ni cá lu Hechos 16:20, 21 cusihuinni xi guiráʼ guníʼcabe de ca xpinni Cristu dxiqué: «Canayuni yaya[cabe] ndaani xquidxi nu. Cusiidi cabe costumbre ni cadi jneza icaa nu chi nanda nu purti romanu laanu». Sti dxi, ca xaíque stiʼ religión ni nanalaʼdxiʼ laacabe biyúbicaʼ ximodo ganináʼ cani runi mandar ndaaniʼ xquídxicaʼ laacabe. Ca binni que guniʼcaʼ sicaríʼ: «Canazá chupa hombre canautiixhi irá binni guidxilayú ne ma bedandá ca raríʼ. [...] Cuchee né cabe ca ley ni gudixhe César» (Hechos 17:6, 7). Casi apóstol Pablu la? guníʼcabe guca «casi ti enda huará lade ca judíu» ne guníʼcabe nácabe xaíque stiʼ ti secta ne «canazá be idubi guidxilayú canautinde be laacaʼ» (Hechos 24:2-5).

6, 7. Ximódoruʼ rudxíʼbanu donda ique cani riníʼ mal de laanu.

⁶ Nga runi, yanna riʼ qué ridxagayaanu guiníʼcabe mal de ca xpinni Cristu ne guindísacabe falsu luguiacaʼ. Yanna, ximodo rudxíʼbanu donda ique cani riníʼ mal de laanu ca yaʼ (Isaías 54:17).

⁷ Pur ca cosa galán ni rúninu huasihuínninu stale biaje cadi dxandíʼ diʼ guiráʼ ni huaníʼcabe ora rucaalúcabe laanu ne ora riníʼcabe mal de laanu (1 Pedro 2:12). Ora ruuyaʼ binni rinándanu ley, nabáninu jneza ne rizaaláʼdxinu binni la? rusihuínninu cadi dxandíʼ ni riníʼcabe de laanu. Laanu rusihuínninu canazanu jneza ora rúninu ni galán. Ora guʼyaʼ binni cani rúninu ca la? rucaa nga laacabe gusisácacabe Bixhózenu ni nuu guibáʼ ne guiníʼcabe jma jneza modo nabani ca xpinni (Isaías 60:14; Mateo 5:14-16).

8. 1) Xi zándaca caquiiñeʼ gúninu ti gusihuínninu dxandíʼ xpinni Cristu laanu. 2) Cásica biʼniʼ Cristu, ximodo rudxíʼbanu donda ique cani rucaalú laanu.

⁸ Aparte de gúninu ni jneza laaca ziuu ora zaquiiñeʼ gácanu nadxibalú para gusiénenu xiñee qué zanda gúninu xiixa ni na Biblia cadi jneza. Ne para gúninu nga la? ziuu ora ziuunu ra nuu cani runi mandar ndaaniʼ xquídxinu o nezalú ti juez ti gacanecaʼ laanu (Ester 8:3; Hechos 22:25-29; 25:10-12). Dxi guyuu Jesús lu Guidxilayú riʼ laaca guyuu biaje bisiene chaahuibe ni runi crebe nezalú ca binni ni guníʼ mal de laabe. Xiñee yaʼ. Para gusihuínnibe cadi dxandíʼ ni caníʼ ca binni que de laabe (Mateo 12:34-37; 15:1-11). Cásica Jesús, laanu laaca naquiiñeʼ gusiene chaahuinu xcaadxi binni de cani runi crenu ora guiniʼcaʼ mal de laanu (1 Pedro 3:15). Qué chuʼ dxi gudiʼnu lugar gucueeza cani guni burla laanu ra scuela, ra dxiiñaʼ o ralídxinu para cadi guininu de Stiidxaʼ Dios (2 Pedro 3:3, 4).

Jerusalén, «ti guié ni nanaa»

9. Xi Jerusalén ndiʼ ni rieeteʼ lu Zacarías 12:3 ni zeeda gaca «guié ni nanaa», ne tuu nga cani cayuni xhiiñaʼ Jerusalén ca lu Guidxilayú riʼ.

⁹ Lade ca diidxaʼ ni riguixhená bicaa Zacarías rieeteʼ xiñee rucaalú ca guidxi ca cani dxandíʼ xpinni Cristu. Guidúʼyanu xiná Zacarías 12:3: «Dxi ca napaʼ xidé guneʼ Jerusalén ti guié ni nanaa para guiráʼ ca guidxi ca». Xi Jerusalén cayeeteʼ raríʼ yaʼ. «Jerusalén ni nuu ibáʼ», ne laani nga Reinu ra chichuu ca xpinni Cristu ni bibí ne espíritu (Hebreos 12:22). Nuuruʼ xcaadxi de cani chichuu lu Reinu ca lu Guidxilayú riʼ. Laacabe ne cani zeeda gaca «xcaadxi dendxu» ca cayábicabe binni gudiicaʼ lugar guni mandar Reinu stiʼ Dios laacaʼ laga zándaruʼ (Juan 10:16; Apocalipsis 11:15). Ñee culabi binni ni cayábicabe laacaʼ la? Yanna, ximodo cayacané Jiobá ca xpinni ca dxi stinu riʼ yaʼ. Para guicábinu ni gunabadiidxanu ca la? guiduʼndaʼ chaahuinu xi caníʼ capítulo 12 stiʼ Zacarías. Zacá zánnanu qué liica zaquiiñeʼ nin ti guiibaʼ ni gúnicabe para gucaalúcabe cani gulí Dios ne espíritu stiʼ ne xcaadxi dendxuʼ ni cayuniné laacaʼ dxiiñaʼ.

10. 1) Xiñee cucaalú ca guidxi ca xpinni Jiobá. 2) Xi huazaaca cani racalaʼdxiʼ guindisaʼ «guié ni nanaa» ca para guireeni de lucaʼ.

¹⁰ Zacarías 12:3 na «guizáʼ zaraa naʼ» ca guidxi ca. Xiñee yaʼ. Dios maca gudixhe guireeche ca diidxaʼ nacubi stiʼ Reinu ca, ne ca testigu stiʼ Jiobá rúnicaʼ dxiiñaʼ ca ne stale gana. Peru para ca guidxi ca zeeda gaca stiidxaʼ Reinu casi «ti guié ni nanaa». Nga runi nuucabe cueecabe ni, ne nánnanu zacá ni purtiʼ cayúnicabe stale cosa para gucueezacabe cani cucheeche stiidxaʼ Reinu. Peru gastiʼ huabeenducaʼ ne guiráʼ ni huayúnicaʼ, dede riníʼ binni mal de laacaʼ. Zacá nga casi ñaca caraa nacaʼ ne caruugu guiráʼ ladu laacaʼ. Qué ganda guseegucabe ruaa ca xpinni Dios, purtiʼ jma risaca para laacaʼ gucheechecaʼ stiidxaʼ Reinu «ni qué ziuu dxi initilú» ca ante guiluxe guiráʼ cosa malu nuu yanna riʼ (Apocalipsis 14:6). Ora biiyaʼ ti hombre de África ni runi dxiiñaʼ ndaaniʼ ti lidxi guiibaʼ modo cayuninácabe ca xpinni Jiobá la? guníʼ ca diidxaʼ riʼ: «Gastiʼ zanda gúnicabe neca canazanándacabe laatu. Qué liica riabayú ca Testigu. Ne cadálerucaʼ».

11. Ximodo cayuni Dios ni na ca diidxaʼ ni guníʼ lu Zacarías 12:4.

¹¹ Biindaʼ Zacarías 12:4. Racá caníʼ Jiobá zuniná ne zusicheepaʼ lú ca binni ni gucaalú cani canagucheeche stiidxaʼ Reinu. Ne maʼ cayúnibe ni guniʼbe ca. Guidúʼyanu ni lu ejemplu riʼ. Guyuu ti guidxi ra bicueeza ca xhenemigu ca xpinni Dios dxiiñaʼ ni cayúnicaʼ, peru ni qué ñanda ñuni ca xhenemígucabe nga nucueezacaʼ laacabe de nicaacabe ca guiʼchiʼ ni cusiidiʼ de Dios. De laacabe bizeeteʼ ti periódicu ra na biquiiñeʼ ca testigu stiʼ Jiobá vejiga para guluucaʼ guiʼchiʼ ni cusiidiʼ de Dios ndaaniʼ guidxi que. Racá nga rihuinni cayuni Dios ni maca guníʼ que: «Zuxheleʼ luaʼ, ne zusicheepaʼ lú guiráʼ caballu stiʼ ca guidxi ca». Cumu nabé cadxiichi cani nanalaʼdxiʼ Reinu ca la? qué gánnacaʼ paneza guicaacaʼ casi ñaca nacheepaʼ lucaʼ. Yanna laanu la? nanna dxíchinu zapa Jiobá xquidxi ne zazaaláʼdxibe chuʼcaʼ galán (2 Reyes 6:15-19).

12. 1) Xiñee rieeteʼ beeda gusaba Jesús guí lu Guidxilayú. 2) Xi cayuni cani bibí ne espíritu ca casi ñaca laaca cusábacaʼ guí lu Guidxilayú riʼ, ne xi cazaaca pur nga.

¹² Biindaʼ Zacarías 12:5, 6. Racá cayeeteʼ de «ca xaíque stiʼ Judá». Tuu nga ca xaíque riʼ yaʼ. Laacabe nga cani bibí ne espíritu ne zaniruʼ lade ca xpinni Dios. Ne Jiobá cayacané laacabe para gácacabe nadxibalú ti cadi gudiicabe lugar chuʼ tu gucueeza xhiiñaʼ Reinu ca lu Guidxilayú riʼ. Ti dxi gudxi Jesús ca discípulo stiʼ: «Naná ni zeda gune ndaani guidxilayú. Casi ñaca zeda usaba gui ndaani ni» (Lucas 12:49). Ne bíʼnibe ni zacá. Ne stale gana guniʼbe nabé risaca Reinu stiʼ Dios. Pur nga guizáʼ bidxiichi ca judíu que (Mateo 4:17, 25; 10:5-7, 17-20). Zacaca nga cayuni cani zinanda Cristu yanna riʼ, laaca casi ñaca cusábacabe guí pur ni caníʼcabe, zeeda gácacabe «casi braseru napa guí ni nuu lade yaga ne casi ti antorcha ni caguí ni nuu lu ti fila biidxiʼ ni deruʼ biruuguʼ». Casi lu iza 1917 la? libru The Finished Mysterya (Maʼ bihuinni ni gaʼchiʼ) nabé bizeeteʼ pabiáʼ rusiguii cani nacaʼ zinándacaʼ Cristu, ne nga bichiichini ca xaíque stiʼ ca religión ca. Ne nacubigá biree ti tratadu Ca diidxaʼ nacubi stiʼ Reinu núm. 37 ni láʼ «¡Mayaca guinitilú religión ni cadi dxandíʼ!», laani bicaani stale binni chuʼ pur Reinu stiʼ Dios ne nuu binni bichiichini laa.

Bilá Jiobá «ca yoo de lari stiʼ Judá»

13. Xi riníʼ ca diidxaʼ «ca yoo de lari stiʼ Judá», ne xiñee rulá Jiobá cani.

¹³ Biindaʼ Zacarías 12:7, 8. Dxiqué, ni jma rihuinni ndaaniʼ guidxi Israel que nga ca yoo de lari gúpani, purtiʼ laacani nga biquiiñeʼ ca pastor ne cani runi dxiiñaʼ lu layú. Nga runi primeca laacabe nga zaquiiñecabe tu gulá laacabe ora gucaalú ca xhenemigu Jerusalén laa. Ora rieeteʼ «ca yoo de lari stiʼ Judá» ca la? cusihuínnini nuu xcaadxi de cani bibí ca ti lugar ra gastiʼ ni gulá laacaʼ ca dxi stinu riʼ. Zanda guininu casi ñaca nuucabe ti lugar ra napampa ne de racá nga cucaalúcabe sin guidxíbicabe para cadi guiaanadxí xhiiñaʼ Reinu. Jiobá Dios stiʼ stale binni nanda guiibaʼ «zulá ca yoo de lari stiʼ Judá primé», purtiʼ laapécabe nga cucaalú Binidxabaʼ.

14. Ximodo cayapa Jiobá cani nabeza ndaaniʼ «yoo de lari stiʼ Judá» ne xi runi Jiobá para cadi guiabayúcabe.

¹⁴ Dxandipeʼ cahuinni lu ca iza ni maʼ gudiʼdiʼ ca cayapa Jiobá cani chichuu lu Reinu stiʼ, cani nabeza ndaaniʼ yoo de lari ni nuu ti lugar ra napampa.b Racané Jiobá laacabe para gácacabe naguidxi ti cadi guiabayúcabe ne gácacabe nadxibalú cásica David, ti hombre ni nabé gudinde.

15. Xiñee guníʼ Jiobá zunduuxeʼ guiráʼ ca guidxi ca, ne pora gúnibe ni.

¹⁵ Biindaʼ Zacarías 12:9. Xiñee guníʼ Jiobá: «Zunduuxeʼ guiráʼ ca guidxi» ca. Purtiʼ cadi cusaana de gucaalúcabe Reinu stiʼ Dios. Ca guidxi ca nuucaʼ para guinitilucaʼ purtiʼ canazanándacaʼ ne cayuninacaʼ xquidxi Dios. Maʼ cadi candaa zucaalú ca xpinni Binidxabaʼ cani dxandíʼ xpinni Dios, purtiʼ zacaláʼdxicaʼ gunduuxecaʼ laacabe ne nga nga ni chigúnicabe últimu. Peru dxi ca nga guedandá dxi ni na Biblia láʼ Armagedón (Apocalipsis 16:13-16). Óraca nga zucaalú Juez ni jma risaca ca para gulá ca xpinni ne zusisácabe labe nezalú ca guidxi ca (Ezequiel 38:14-18, 22, 23).

16, 17. 1) Xii nga ni «zeeda gaca ti herencia para ca xpinni Jiobá». 2) Xi rusihuínninu ora runi huantarnu intiica ni gulaa Binidxabaʼ luguianu.

¹⁶ Binidxabaʼ qué gapa nin ti guiibaʼ para gusabayú fe stinu o ni cuee gana laanu. Nuudxí ladxidoʼno purtiʼ nánnanu caquiiñeʼ Jiobá poder stiʼ para gulá laanu, ne «nga nga ni zeeda gaca ti herencia para ca xpinni Jiobá» (Isaías 54:17). Qué ziuu tu guchibi laanu ne qué zusaana de guni adorarnu Jiobá casi racalaʼdxiʼ (Salmo 118:6). Binidxabaʼ qué zusaana de gucaalú laanu ne zutiidiʼ laanu lu stale guendanagana. Peru ora guni huantarnu ne qué gusaananu Jiobá neca guindísacabe falsu luguianu la? rusihuínninu nápanu espíritu stiʼ Dios (1 Pedro 4:14). Lu guidubi naca Guidxilayú careeche ca diidxaʼ nacubi ne galán stiʼ Reinu ni maʼ nuu guibáʼ. Dxandíʼ nga cucaalúcabe laanu casi ñaca cuchácabe «guié» laanu. Cumu cudii Dios stipa laanu la? randa runi huantarnu intiica ni rulaacabe luguianu (Zacarías 9:15). ¡Guirutiʼ zanda gucueeza xcaadxi de cani bibí ne espíritu ca nin ca xcompañérucabe ni cayacané laacabe!

¹⁷ Racaláʼdxinu guedandá dxi maʼ cadi gucaalú Binidxabaʼ laanu. Peru laga cabézanu gaca nga la? riguixhedxí ca diidxaʼ ni guníʼ Jiobá riʼ ladxidoʼno: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ, ne intiica guiníʼcabe para gucaalúcabe lii ora gaca juzgarluʼ la? zudxiibaluʼ donda íquecabe».

[Cani cá ñee yaza]

Xi nicábiluʼ

• Xi cusihuinni qué liica iquiiñeʼ nin ti guiibaʼ stiʼ Binidxabaʼ.

• Xiñee naca Jerusalén ni nuu guibáʼ casi «ti guié ni nanaa».

• Ximodo culá Jiobá «ca yoo stiʼ Judá» yanna riʼ.

• Xi zanda quixhedxí ladxidoʼno laga cabézanu gueeda Armagedón.

[Ca dibuju/foto ni zeeda lu yaza 23]

Ca testigu stiʼ Jiobá de Albania biʼniʼ huantarcaʼ guiráʼ guendanagana ni bilaa Binidxabaʼ luguiacaʼ

[Dibuju/foto ni zeeda lu yaza 25]

Jesús guníʼ cani runi cré nezalú ca binni ni guníʼ mal de laa

[Dibuju/foto ni zeeda lu yaza 26]

Qué liica zaquiiñeʼ nin ti guiibaʼ ni gúnicabe para gucaalúcabe cani rucheeche ca diidxaʼ nacubi ne galán stiʼ Reinu