Torre stiʼ ni rapa ni nacubi biree para guiuundaʼ ra ridagulisaanu
REVISTA Torre stiʼ ni rapa ni naazeluʼ riʼ, laani nga primé númeru ni chiguiuundaʼ ra ridagulisaanu. Yanna racaláʼdxidu gusiénedu lii ximodo ni.
Revista riʼ para si ca testigu stiʼ Jiobá ni ne para cani ridúʼndanenu Biblia ni maʼ caniisi lu Stiidxaʼ Dios. Zareeni cada beeu ne zedaneni tapa o gaayuʼ tema para guiuundaʼ ra ridagulisaanu. Ca tema ni chiguiuundaʼ ca zeeda cani lu primé yaza stiʼ revista riʼ. Lu primé yaza ca qué zedané diʼ ni gadxé gadxé dibuju casi revista ni chigusaananenu guiráʼ binni, purtiʼ laani qué zaquiiñeʼ diʼ ni ora gucheechenu diidxaʼ.
Lu guiropa yaza stini zeeda guiníʼ xiñee biree ca tema ni chiguiuundaʼ ra ridagulisaanu. Laani zacaneni cani chiguundané laanu revista ra ridagulisaanu ora maʼ cayuundacaʼ dede ante para gusiénecaʼ tema stiʼ Torre stiʼ ni rapa ca laanu. Lu yaza ca laaca zeeda ti lista stiʼ xcaadxi tema ni zeeda luni.
Ca tema ni guiuundaʼ ra ridagulisaanu ca zaree cani de tapa o tapa yaza arondaʼ. Nga zacané laanu gápanu jma tiempu para guiene chaahuinu ca textu ni caníʼ de tema ca ora maʼ dagulisaanu. Rinábadu laatu guyúbitu guiráʼ textu ca ora maʼ cayuundatu. Nuu tiru zuuyatu diidxaʼ «biindaʼ» ante de xiixa textu, nga riníʼ naquiiñeʼ guiuundaʼ textu ca ne gusiénetu cani ora maʼ cayuundatu revista ca ra ridagulisaatu. Pa gudii tiempu la? laaca zanda guiuundaʼ xcaadxi versículo stini. Lu ca tema ca laaca zuuyaluʼ diidxaʼ «zanda guiuundaʼ» ante de xiixa textu. Laacani cadi naquiiñepeʼ guiuundaʼ cani ra ridagulisaatu, purtiʼ cadi canípecani de ni na párrafo ca, sínuque cuzeeteʼ cani xcaadxi cosa de ni cayeeteʼ racá. Pur nga la? canábadu laatu guyúbitu ca textu ca ra lídxitu ora maʼ cayuundatu ne ora maʼ caníʼ íquetu xi guicábitu. Ti zacá ganda guicábitu de ni caníʼ ca textu ca, pa racaláʼdxitu gúnitu ni.
Maʼ qué zeeda diʼ lu Torre stiʼ ni rapa pabiáʼ dxiiñaʼ guca lu ti iza. Ra chuʼnu 2008 zeedani lu ni rizaané Xhiiñaʼ Reinu ni Rúninu, ne lu Anuario. Yanna, casi maʼ bizéʼtenu, revista ca zedaneni xcaadxi tema ni zacané laanu. Stale de ca tema ca qué ziuundaʼ cani ra ridagulisaanu, peru rinábadu laatu guʼndaʼ chaahuitu cani, purtiʼ zacané cani laanu chuʼnu jma gaxha de Dios ne purtiʼ «mozo ni nuu xpiaaniʼ ne ni runi jneza» cudii cani laanu (Mateo 24:45-47).
Últimu la? racaláʼdxidu gábidu laatu cásica revista Torre stiʼ ni rapa. Ni caníʼ de Reinu stiʼ Jiobá ni gudiʼnu binni ora maʼ zigucheechenu diidxaʼ ne revista ni guidúʼndanu ra ridagulisaanu tobi si cani. Nga runi, lu guiropa yaza stiʼ revista ni chigusaananenu binni ra cá xiñee bireeni, ngaca zeeda lu guiropa yaza stiʼ revista ni chiguidúʼndanu ra ridagulisaanu. Ne guiropaʼ cani ziuu cani lu volumen ni riree guiráʼ iza. Ne ndaa ra na «Rietenaláʼdxiluʼ la?» zeedani lu revista ni guiuundaʼ ra ridagulisaanu, zanabadiidxaʼ ni laanu caadxi cosa ni zeeda lu ca tema stiʼ guiropaʼ revista ca.
Dede iza 1879, Torre stiʼ ni rapa cayúnini xhiiñani: cusiidini binni de Reinu stiʼ Dios neca nuu guendaridinde, gastiʼ bueltu ne neca canazá nándacabe laanu. Rinábadu Jiobá gacané ne uguu ndaayaʼ ca dxiiñaʼ riʼ ti cadi gusaana de gacané ca revista riʼ laanu. Ne laaca rinábadu Jiobá uguu ndaayaʼ stipa stiluʼ ne iquiiñeluʼ ca tema ni chiguiuundaʼ ra ridagulisaanu ca.