Maʼ gadxé modo chiguiree revista Torre stiʼ ni rapa
1 Nabé sicarú nga ni bieeteʼ ndaaniʼ guiráʼ neza binni ridagulisaa ra bizulú iza riʼ. Lu beeu enero 2008 zaree chupa revista Torre stiʼ ni rapa, tobi ca para ca binni ora maʼ zigucheechenu diidxaʼ ne stobi ca para ca xpinni Cristu. Zándaca gunabadiidxanu laca laanu: «Xi tema zeeda lu ca revista ca yaʼ. Xi zabeendunu ra guiree chupa clase revista yaʼ. Ñee zedaneni xiixa nacubi la?».
2 Ni gusihuinni gadxé cani. Ti revista ca zareeni para gusaananenu binni ora maʼ zigucheechenu diidxaʼ ne guiracaʼ ziuuláʼdxicaʼ ca tema ni zeeda luni. Lu diidxazá revista riʼ zareeni cada chonna beeu. Sti revista Torre stiʼ ni rapa ni chiguiree 15 stiʼ cada beeu zedaneni tema para guiuundaʼ ra ridagulisaanu ne qué zusaananenu ni binni ora maʼ zigucheechenu diidxaʼ. Laaca zedaneni xcaadxi tema ni zacané ca xpinni Cristu. Cumu ziuuláʼdxinu guidúʼndanu revista ni chiguiree cada chonna beeu para gusaananenu binni la? zaqueca ziuulaʼdxiʼ binni guʼndaʼ revista riʼ. Revista ¡Despertad! zareeruʼ ni para guiráʼ binni, para cani qué runi cré Dios ne cani napa xiixa religión ni cadi zinanda Cristu.
3 Ximodo zacané cani. Lu revista ni chiguiree para guidúʼndanu ra ridagulisaanu maʼ cadi naquiiñeʼ diʼ gusiénenu ca diidxaʼ casi «precursor» para guiene cani nuu raqué. Laaca zedaneni caadxi tema ni caquiiñepeʼ ca testigu stiʼ Jiobá tiempu riʼ ti gacané ni laacaʼ ne cani caziidiʼ de Dios ni cusihuinni caniisi lu stiidxabe. Yanna, revista ni zaquiiñenu para gusaananenu binni ca yaʼ. Cumu maʼ gadxé ca tema gueeda luni ne maʼ gadxé modo zacá ca diidxaʼ ca la? cásica laanu zaqueca ca binni ni cadi naca Testigu ziuuláʼdxicaʼ gúʼndacaʼ guidubi naca revista ca. Lu chonna beeu zaquiiñenu ti revista Torre stiʼ ni rapa ne zanda guyúbinu gadxé gadxé modo gusaananenu ni binni ne laaca zanda gusaananenu laacaʼ ¡Despertad! stiʼ beeu ca.
4 Xi guiráʼ chiguieeteʼ lu cani. Revista ni zusaananenu binni zedaneni stale cosa ni ziuuláʼdxicaʼ gánnacaʼ. Cadi nagana modo zusiéneni caadxi tema ni rusiidiʼ Biblia. Zápani xcaadxi tema ni cayabi binni ximodo gacané binnilidxi. Zedaneni tema ni zucaa cani nahuiiniʼ guyúbicaʼ gánnacaʼ xiixa de lu Biblia. Laaca zedaneni ti tema ra cá historia ni zeeda lu Biblia ni zacané binni gunibiáʼ chaahuiʼ Jiobá.
5 Rinábadu Jiobá guzaabi ndaayaʼ guiráʼ cani chigaca lu revista riʼ. Riuuláʼdxidu chiné Torre stiʼ ni rapa ne ¡Despertad! ca diidxaʼ nacubi ne galán stiʼ Dios ra nuu guiráʼ binni ni racalaʼdxiʼ guiziidiʼ (Mat. 10:11).