Biree sti revista Torre stiʼ ni rapa lu diidxaʼ inglés ni ziene binni jma nagueenda
RIÉCHEDU stale gábidu laatu zuzulú zaree sti revista Torre stiʼ ni rapa lu diidxaʼ inglés ni ziene binni jma nagueenda. Zareeni guidubi ti iza, ne pa guihuinni nabé cayacaneni binni la? zácaruʼ ni. Zindani ra nuu ca neza binni ridagulisaa tiempu ca rindá sti revista ni maca runibiaʼnu. Lu revista cubi riʼ, zeeda ca tema ni riuundaʼ cada semana, ne ora ganda la? zaguucabe xcaadxi tema luni. Xi para chiguiree revista riʼ yaʼ. Para gacaneni stale testigu stiʼ Jiobá guiene chaahuicaʼ guiráʼ ni caquiiñeʼ gánnacaʼ ora maʼ cayuundacaʼ ni.
Ndaaniʼ ca guidxi casi Fiyi, Ghana, Kenia, Liberia, Nigeria, Papúa Nueva Guinea ne ca isla Salomón jma riníʼ binni inglés. Nga nga diidxaʼ ni riquiiñeʼ ca bíʼchinu ne ca bizáʼnanu lu ca guendaridagulisaa rápacaʼ ne ora rucheechecaʼ diidxaʼ, neca gadxé diidxaʼ riniʼcaʼ ralídxicaʼ. Peru inglés ni riquiiñenu lu ca libru ne revista stinu, jma nagana ni que ni riníʼcabe. Ne stale de ca xpinni Jiobá nabézacaʼ zitu de guidxi ra gúlecaʼ ne para ganda guiníʼnecaʼ binni naquiiñeʼ guiniʼcaʼ inglés, neca huaxiéʼ nánnacaʼ diidxaʼ ca. Ne nuu de laacabe qué randa riecaʼ ndaaniʼ ti neza binni ridagulisaa ra riníʼcabe stiidxacaʼ.
Casi maʼ nánnanu, lu ca tema ni ridúʼndanu lu revista Torre stiʼ ni rapa nga rizíʼdinu guiráʼ ni naquiiñeʼ gánnanu órapeʼ caquiiñenu ni. Nga runi, para ganda guiene chaahuiʼ ca bíʼchinu ne ca bizáʼnanu ni riníʼ diidxaʼ inglés guiráʼ libru ne revista ni ribee xquidxi Dios la? zaree sti revista tiempu ca riree revista ni maca ridúʼndanu guiráʼ semana, peru zaquiiñeni diidxaʼ ni cadi nagana para guiene binni. Gadxé modo chiguiree primé yaza stini, peru ca subtítulo stini, ca párrafo, ca guendarinabadiidxaʼ stini ne ca dibuju gueeda luni, zeeda cani cásica sti revista ca. Nga runi, cada xpinni Cristu zanda guʼyaʼ gunáʼ revista Torre stiʼ ni rapa jma ziuulaʼdxiʼ guʼndaʼ. Pa riniʼluʼ inglés, ñuuláʼdxiluʼ ñánnaluʼ ximodo jma nagueenda riene binni ni cá lu revista cubi ca la? Ñee yaza riʼ zuuyaluʼ ti ejemplu ra cá caadxi diidxaʼ ni biree lu guiropa párrafo stiʼ primé tema ni chiguiuundaʼ lu revista riʼ.
Stale xpinni Cristu maʼ huanábacaʼ Jiobá: «Bisiene naa, ti ganda guiziideʼ ca mandamientu stiluʼ» (Sal. 119:73). Nanna dxíchidu zacané revista cubi riʼ ca xpinni Cristu para gúnicaʼ ni rinábacaʼ Jiobá. Ribézadu gacaneni cani nahuiiniʼ ne ca binni ni huaxiéʼ riníʼ inglés para guiene chaahuicaʼ ni guiuundaʼ lu revista Torre stiʼ ni rapa guiráʼ semana. ¡Xquíxepeʼ lii Jiobá, pur cusihuínniluʼ «[nadxiiluʼ] irá ca hermanu» ne pur caquiiñeluʼ «mozo ni nuu xpiaaniʼ ne ni runi jneza» para gudii laadu guiráʼ ni caquiiñedu! (1 Ped. 2:17; Mat. 24:45.)
Grupu ni Zaniruʼ stiʼ ca Testigu stiʼ Jiobá