Para ni cayuundaʼ guiʼchiʼ riʼ

RIÉCHEDU nga gábidu lii bidxaa caadxi cosa lu revista riʼ. Peru ante gábidu lii gunáʼ nga cani bidxaa, primeru guidúʼyanu gunáʼ nga cani qué zuchaa lu revista riʼ.

Lá revista riʼ qué zadxaa diʼ, zaree láruni Torre stiʼ ni rapa. Ni caníʼ de Reinu stiʼ Jiobá. Revista riʼ qué zusaana diʼ ni de gusisácani Jiobá, Dios ni dxandíʼ ne laaca zaguixhedxíruni ladxidóʼ ca binni ruundaʼ ni ora gánnacaʼ guiráʼ ca diidxaʼ nacubi ne galán stiʼ Reinu. Casi lu revista ni cayuundaluʼ riʼ, zudiiluʼ cuenta jma caniʼni de Reinu stiʼ Dios ne padxí gueeda Reinu ca lu ca yaza 5 dede 9. Ne cásica huayúnini ca iza maʼ gudiʼdiʼ ca revista Torre stiʼ ni rapa ca qué zusaana diʼ ni de gacaneni binni gapa fe Jesucristu, ne laaca zuluiʼni xii nga ni dxandíʼ ne zusiéneni ximodo cayaca ca diidxaʼ riguixhená zeeda lu Biblia ca dxi nabáninu riʼ.

Xii nga cani chiguidxaa luni yaʼ. Guidúʼyanu cani chiguichaa lu revista ni chiguiree cada chonna beeu riʼ.a

Nuu caadxi ndaa stiʼ revista riʼ zaree cani stale biaje ne ziuuláʼdxiluʼ gúʼndaluʼ cani. Casi ra na «Ñee nannuʼ ni la?» zacaneni lii guiene chaahuiluʼ caadxi historia zeeda lu Biblia. Ne ca ndaa ra na «Guidxíñanu Dios», zacanécani lii guiéneluʼ ni rusiidiʼ caadxi historia de Jiobá. Ndaa ra na «Cani ruundaʼ revista riʼ racaláʼdxicaʼ gánnacaʼ», zacábini ca guendarinabadiidxaʼ ni runi stale binni. Casi lu yaza 13 stiʼ revista riʼ zuuyaluʼ cacábini ti guendarinabadiidxaʼ ni runi stale binni: «Ñee nuu Reinu stiʼ Dios ndaaniʼ ladxidoʼno la?».

Ziuu ora zedané revista riʼ caadxi tema ni zaníʼ de familia. Casi ndaa ra na «Ni zacané binnilídxiluʼ chuʼ nayecheʼ», ca zuzeeteni xii nga ca guendanagana rapa binni ndaaniʼ lidxi ne chigusiéneni ximodo zanda guni chaahuicabe ca guendanagana rápacabe. Ndaa ra na «Ni gusiiditu ca xiiñitu», zareeni para guʼndané binni ni xiiñiʼ. Lu xcaadxi númeru ca zaree ndaa ra na «Para ca hombrehuiiniʼ ne ca dxaapahuiiniʼ». Tema riʼ zacaneni cani nahuiiniʼ ca gúʼndacaʼ jma de ca historia zeeda lu Biblia.

Ziuu biaje zaree xcaadxi tema lu revista riʼ ni láʼ «Ejemplu stiʼ cani gupa fe», ca ndaa riʼ zaguucani gana laanu chinándanu ejemplu stiʼ ti xpinni Dios ni bibani dxiqué. Lu ca yaza 18 dede 21 stiʼ revista riʼ zeeda ti historia ni caníʼ ni bizaaca hombre riguixhená ni láʼ Elías, ne zuluiʼni laanu ximodo zanda gápanu fe casi gúpabe. Ndaa ra ná «Carta ni zeeda de...» zaniʼni de ca misioneru ne xcaadxi xpinni Dios ni nabeza gadxé gadxé guidxi. Ne ndaa ra na: «Cani bisiidiʼ Jesús», zusiéneni laanu xi rusiidiʼ Biblia, ne ziénenu ni purtiʼ cadi nagana modo chigusiéneni.

Nánnadu zuundaʼ ca binni ni runi respetar Biblia revista Torre stiʼ ni rapa riʼ purtiʼ riuuláʼdxicaʼ ganna xipeʼ nga rusiidiʼ Biblia. Ni racaláʼdxidu nga gacané revista riʼ lii ti gánnaluʼ guiráʼ ni racaláʼdxiluʼ de ni na Stiidxaʼ Dios.

CANI BICAA REVISTA RIʼ

[Cani cá ñee yaza]