Ñee nuu tu zanda guiníʼ xi chigaca la?

«Naa nga Dios [...]; Ni riníʼ ximodo riluxe xiixa ni ruzulú, ne ni riníʼ dede ante ca cosa ni caʼruʼ gaca.» (Isaías 46:9, 10)

NABÉ cuchaa stale cosa ca dxi stinu riʼ. Nga runi, cani ruuyaʼ dxiiñaʼ stiʼ ca políticu ca, cani ruuyaʼ pabiáʼ bidxichi napa ca guidxi ca ne cani ruuyaʼ ximodo nabani binni la? ruundacaʼ de historia ne de ni cayaca yanna. Xiñee yaʼ. Purtiʼ racaláʼdxicabe gánnacabe xi chiguizaaca despué. Xcaadxi binni ni rapa gana ganna xi cabeza laa la? ruyúbicaʼ binni ni ruundaʼ de ca beleguí ca o riecaʼ ra nuu ca espiritista. Neca rúnicabe guiráʼ ndiʼ la? qué ridxélacabe ni cuyúbicabe. Yanna, ñee qué ziuu dxi nga gánnanu xi chigaca lu guidxilayú riʼ, xi guizaaca ca binnilídxinu o laanu la? Ñee nuu tuuxa ni zanda gabi laanu xipeʼ nga chigaca la?

Jiobá, Dios ni jma nandxóʼ na zanda ganna xi chiguizaaca, nga nga ni caníʼ ca versículo stiʼ Isaías ni bidúʼndanu luguiáʼ ca. Jiobá peʼ nga gudxi Isaías zaree ca israelita que de esclavu Babilonia ne zabiguétacaʼ Jerusalén para gucuicaʼ guidxi ne yuʼduʼ stini sti biaje. Peru, xi guiráʼ ngue gudxi Dios Isaías chigaca yaʼ. Biaʼ chupa gayuaa iza ante, guníʼ Isaías tu láʼ hombre chigunitilú Babilonia que: laabe nga Ciro. Laaca guniʼbe zabeechú hombre riʼ guiiguʼ Éufrates, laa ndani nga tobi de cani gupa guidxi que para gulá laa. Ne dede guniʼbe qué zudii ca binni que cuenta zusaanaxélecaʼ guiropa puertaʼ ngola stiʼ guidxi que, ngue runi jma nagueenda zunitilú Ciro ni (Isaías 44:24–45:7).

Binni guidxilayú qué zanda diʼ ganna xi chiguizaaca, cásica nanna Dios. Rey Salomón, ti hombre nuu xpiaaniʼ ni bibani dxiqué bicaa sicaríʼ: «Cadi uguuluʼ naróʼ de ni chigúniluʼ sti dxi, purtiʼ qué gannuʼ xi gueeda guizaaca dxi ca» (Proverbios 27:1). Zacaca nga rizaaca yanna, binni qué zanda ganna ni cabeza laa sti dxi. Peru, xiñee zanda ganna Dios ni yaʼ. Purtiʼ laabe runibiáʼ chaahuibe guiráʼ ni bizaʼbe, dede ni riníʼ ique binni o ni zándaca gueeda guni pur modo guyáʼ. Nga runi, laasibe zanda guiniʼbe xi gueeda gaca de ti binni o guidubi ti guidxi ora gacaláʼdxibe gúnibe ni. Peru cadi ngasi, laaca zanda guiniʼbe ximodo gueeda guiluxe xixa. Cada biaje guiníʼ cani riguixhená stibe xiixa ni maʼ guniʼbe chigaca la? laabe «rúnibe ni guiníʼ xpínnibe ca» ne «rúnibe guiráʼ xixé ni riníʼ ni riné stiidxabe» (Isaías 44:26). Tobi lucha si Jiobá nga zanda guni nga.

Isaías ni riguixhená, ni bibani jma de gadxe gayuaa iza ante gale Jesús, laaca bicaa ximodo nga gueeda Mesías que. Peru lu siglu XVIII que guyuu caadxi binni ni guníʼ cadi dxandíʼ diʼ ngue ni cá lu libru stiʼ Isaías. Nácabe cadi dxandíʼ ca diidxaʼ riguixhená ni bicaa Isaías de Mesías que. Para laacabe la? gadxé tu bicaani despué de gúcani. Peru, ñee dxandíʼ nga la? Lu iza 1947 bidxélacabe caadxi rollo yooxhoʼ ndaaniʼ ti cueva nuu gaxha de mar Muerto, lade ca rollo que zeeda ti copia de libru stiʼ Isaías. Ca binni ni nanna stale de ca rollo riʼ, guniʼcaʼ gucuá copia riʼ jma de ti gayuaa iza ante gale Mesías, o Cristu. Nga rusihuinni riníʼ Biblia de ni chiguizaaca despué.

Isaías ne xcaadxi ni riguixhená ni bicaa Biblia qué ñanda diʼ ñánnacaʼ de laasicaʼ xi guiráʼ chigaca, «sínuque uníʼ ca ni na Dios casi gudxi Espíritu Santu ni laacaʼ» (2 Pedro 1:21). Lu xcaadxi tema zeeda riʼ zadúʼyanu xcaadxi cosa ni bicaa Isaías de modo bibani Jesús. Despué zazíʼdinu de xcaadxi cosa ni guníʼ Jesús ne ca discípulo ni cayaca ca dxi stinu riʼ ne de ni chigaca despué.