Ni rinabadiidxaʼ ca ni ruundaʼ
¿Xi ruzeeteʼ Biblia de modo ranna Jehová ni chiguizaaca despué?
Lu Biblia riete riníʼ Jehová ni chiguizaaca despué (Is. 45:21). Qué ruzeeteʼ peʼ Biblia ximodo chigúnibe ni, padxí gúnibe ni ne laaca qué riete pa ruyúbibe gánnabe xi guiráʼ chiguizaaca. Cumu qué riene chaahuinu ximodo runi Jehová ni la? qué zanda guininu nuu peʼ ti modo ranna Jehová ni chiguizaaca despué. Peru nánnanu caadxi cosa.
Zanda guni Jehová intiica cosa, peru nuu biaje riguixhe íquebe cadi gúnibe xiixa. Cumu nabé nuu xpiaanibe la? zanda gánnabe intiica cosa chiguizaaca despué (Rom. 11:33). Ne cumu rucueezabe laca laabe la? riguixhe íquebe cadi gúʼyabe guiráʼ ni chiguizaaca (bichaaga ni né Isaías 42:14).
Runi Jehová gaca ni racalaʼdxiʼ. ¿Ximodo racané ndiʼ laanu gánnanu zanda ganna Jehová xi chiguizaaca despué yaʼ? Isaías 46:10 ná: «Dede ti principiu rinieeʼ xi chigaca ne dede ante rinieeʼ ca cosa ni caʼruʼ gaca. Naa rinieeʼ: “Qué zuchaaʼ ni maʼ gudixheʼ iqueʼ, ne zuneʼ intiica cosa ni gacalaʼdxeʼ”».
Randa riníʼ Jehová xi chiguizaaca despué purtiʼ napa poder para guni ni. Cadi caquiiñeʼ guchaaziʼ náʼ Jehová ti botón para guʼyaʼ xi chiguizaaca despué, casi xa ñaca ñuuyabe xiixa ni maʼ bizaaca. Coʼ, cadi zacá diʼ ni, laabe riguíxhebe padxí chiguizaaca xiixa cosa, ne ora redandá dxi ca rúnibe gaca ni (Éx. 9:5, 6; Mat. 24:36; Hech. 17:31).
Nga runi, riquiiñeʼ Jehová caadxi diidxaʼ casi, maʼ gudixheʼ chaahueʼ, maʼ bineʼ «maʼ gudixheʼ iqueʼ» para gusiene xi biʼniʼ né caadxi cosa ni chiguizaaca despué (2 Rey. 19:25; Is. 46:11). Lu hebreu riquiiñecabe diidxaʼ alfareru lu ca versículo ca (Jer. 18:4). Cásica zanda iquiiñeʼ ti alfareru ti ndaa beñe para guni ti guisu guizáʼ sicarú, zaqueca nga Jehová, zanda guni o quixhe chaʼhuiʼ xiixa para gaca ni racalaʼdxiʼ (Efes. 1:11).
Rudii Jehová lugar guicaanu ca decisión stinu. Cadi maca gudixhe Jehová xi chiguizaaca cada binni. Ne qué runi obligarbe binni nachaʼhuiʼ guni xiixa para si gacaná ne guinitilú. Ni rúnibe nga rusiidibe laanu modo jma jneza naquiiñeʼ guibáninu, ne despué rudiibe lugar cada tobi guni decidir xi guni né xquendanabani.
Guzéʼtenu chupa ejemplu. Primé, guininu de ca binni ni bibani Nínive. Nuu stale guendaquéiquiiñeʼ ndaaniʼ guidxi riʼ ne maca guníʼ Jehová zanitilú ni. Peru cumu guca arrepentírcabe la? ngue runi «bichaa Dios ni dxandíʼ ni cá ique guni ne maʼ qué ñeedané guendananá ni maca guníʼ guedané luguiácabe» (Jon. 3:1-10). Bichaa Jehová ni cá ique guni, ¿xiñee yaʼ? Purtiʼ bizuubaʼ ca binni de Nínive stiidxaʼ Jehová ne guca arrepentircaʼ.
Guiropa ejemplu nga profecía ni caníʼ de Ciro, laabe nga ni chigulá ca judíu ne zuni mandarbe cuiʼ templu stiʼ Jehová sti biaje (Is. 44:26–45:4). Rey Ciro de Persia nga biʼniʼ cumplir profecía riʼ (Esd. 1:1-4). Peru qué runi adorar Ciro Dios ni dxandíʼ. Biquiiñeʼ Jehová laabe para guni cumplirbe profecía stiʼ, peru qué ñuni obligar laabe gúnibe ni ná (Prov. 21:1).
Ndiʼ nga chupa chonna cosa ni ruuyaʼ Jehová para guiníʼ xi chiguizaaca despué. Nin ti binni guidxilayú qué zanda guiene ximodo riníʼ ique ne xi pur runi Jehová ti cosa, ne laaca qué zanda guiénenu ximodo ránnabe xi chiguizaaca despué (Is. 55:8, 9). Neca zacá, ni nánnanu de Jehová racané ni laanu chuʼnu seguru siempre rúnibe ni jneza, dede né ora riniʼbe xi chiguizaaca despué.