Gacanenu xcaadxi binni para guihuinni jneza caquiiñenu gracia bidii Dios laanu
«Laganaxhii saa casi enda biʼchiʼ, cada tobi usisaca stobi ne cadi laca laa.» (ROM. 12:10)
1. Xiñee nánnanu zacané Jiobá laanu.
STALE biaje rieeteʼ lu Stiidxaʼ Dios zacané Jiobá laanu ora cayuubaʼ ladxidoʼno. Casi ca diidxaʼ riʼ riguixhedxícani ladxidoʼno: «Jiobá cayacané cani cayaba, ne candísabe guiráʼ cani nuu triste». «Jiobá cusianda cani cayuubaʼ ladxidóʼ, ne cuchéndabe benda ra naná laacaʼ.» (Sal. 145:14; 147:3.) Bixhózenu ni nuu guibáʼ cayabi laanu: «Naa, Jiobá, Dios stiluʼ, naazeʼ dxiicheʼ naluʼ ladu derechu, Ni cayabi lii: “Cadi guidxíbiluʼ. Naa dxandipeʼ zacaniáʼ lii”» (Isa. 41:13).
2. Ximodo racané Jiobá ca xpinni.
2 Ximodo guinaazeʼ Jiobá nanu ne guindisaʼ laanu ora maʼ nuunu triste pa nuube guibáʼ yaʼ. Nuu stale modo rúnibe ni. Tobi de laacani nga rudiibe espíritu santu laanu para guni huantarnu (2 Cor. 4:7). Laaca riquiiñebe Stiidxabe para gudiibe stipa laanu (Heb. 4:12). Ne nuuruʼ sti modo racané Jiobá laanu. Xi laani yaʼ. Para gánnanu ni la? guidúʼndanu primé guiʼchiʼ bicaa apóstol Pedru.
Stale modo racané Jiobá laanu
3. 1) Xi bizeeteʼ Pedru de ca guendanagana ni zadxaagalú ca xpinni Cristu. 2) Xi guníʼ Pedru ra maʼ ziluxe primé carta stiʼ.
3 Lu carta ni bicaa Pedru ra nuu ca xpinni Cristu ni bibí pur espíritu santu, gúdxibe laacaʼ nápacaʼ razón para guiéchecaʼ purtiʼ nabé naroʼbaʼ ndaayaʼ chiguicaacaʼ. Peru bizeetebe: «Naquiiñe acaná tu caadxi yanna riʼ, peru tobi zidiʼdi si nga» (1 Ped. 1:1-6). Lu diidxaʼ gucuá Biblia biquiiñeʼ Pedru ti diidxaʼ para guzeeteʼ zapa ca xpinni Cristu stale guendanagana. Ñee zanda guni huantar ca xpinni Cristu guiráʼ ca guendanagana ca la? Pedru bisiene zacané Jiobá laacabe guni huantárcabe intiica guendanagana gápacabe. Ca diidxaʼ ca zeedacani ra maʼ ziluxe carta bicaabe, ra bizeetebe «ma zeda dxiña dxi iluxe irá xixé ni nuu ndaani guidxilayú» (1 Ped. 4:7).
4. Xiñee riguixhedxí ca diidxaʼ ni zeeda lu 1 Pedro 4:10 ladxidoʼno.
4 Pedru bizeeteʼ: «Cada tobi iquiiñe gracia ni bidii Dios laa para acané ca xcaadxi, para ihuinni jneza cayuni né gracia bidii Dios laa» (1 Ped. 4:10). Raríʼ laaca bizeeteʼ Pedru zapa ca xpinni Cristu stale guendanagana. Neca zadxaagalunu stale guendanagana ne gadxé gadxé modo gueedacani la? laabe bizeetebe zanda gacané Dios laanu lu guiráʼ cani. Xiñee riguixhedxí ndiʼ ladxidoʼno yaʼ. Purtiʼ racaneni laanu gánnanu zanda gacané Jiobá laanu gudxíʼlunu intiica guendanagana guidxaagalunu. Peru, ñee bidiiluʼ cuenta xi riquiiñeʼ Jiobá para gusihuinni nachaʼhuiʼ ne laanu la? Riquiiñebe ca xpinni Cristu.
Gacanésaanu
5. 1) Xi naquiiñeʼ guni ca xpinni Cristu. 2) Xi zándaca guinabadiidxaʼ tuuxa.
5 Pedru cayabi guiráʼ cani ni nuu ndaaniʼ ca neza binni ridagulisaa sicaríʼ: «Ni jma naquiiñe la? ganaxhii saa tu». Peru despué guniʼbe: «Cada tobi iquiiñe gracia ni bidii Dios laa para acané ca xcaadxi» (1 Ped. 4:8, 10). Cada tobi de laanu naquiiñeʼ gacané ca xpinni Cristu. Jiobá bidii laanu ti cosa nabé risaca ne galán iquiiñenu ni para gacanenu xcaadxi binni. Xi laani yaʼ. Pedru na laani nga gracia bidii Dios binni. Xi gracia ca yaʼ. Ne ximodo zanda iquiiñenu ni para gacanenu xcaadxi binni yaʼ.
6. Xi gracia maʼ bidii Dios laanu.
6 Stiidxaʼ Dios cayabi laanu: «Ni nachaʼhui ne irá ni dxandí sicarú reeda de ibáʼ» (Sant. 1:17). Jiobá rusihuinni nachaʼhuiʼ ra rudii laanu gracia stiʼ. Tobi de ca cosa jma risaca rudiibe laanu nga espíritu santu stibe. Laani racaneni laanu gápanu ca guenda ni naquiiñeʼ gapa ca xpinni Cristu, casi gannaxhiicaʼ, gácacaʼ nachaʼhuiʼ ne nadóʼ. Ca guenda ca racanécani laanu gannaxhiinu ca xpinni Cristu ne gacanenu laacaʼ. Espíritu santu ca laaca racaneni laanu gápanu guendabiaaniʼ ne gánnanu stale (1 Cor. 2:10-16; Gál. 5:22, 23). Zanda guininu guiráʼ cani nánnanu gúninu ne ca guenda sicarú ni nápanu, nácacani casi ti regalu o gracia ni bidii Bixhózenu ni nuu guibáʼ laanu para gusisácanu laa. Ne ribeza Dios iquiiñenu cani para guihuinni nadxiibe ca xpínnibe.
Ximodo zanda iquiiñenu gracia bidii Dios laanu
7. 1) Ximodo zanda guiénenu ca diidxaʼ «cada tobi iquiiñe gracia [biaʼ] bidii Dios laa». 2) Xi naquiiñeʼ guinabadiidxanu laca laanu, ne xiñee.
7 Pedru guníʼ de gracia bidii Dios laanu: «Cada tobi iquiiñe gracia [biaʼ] bidii Dios laa». Ca diidxaʼ ca cusiénecani cadi guiráʼ diʼ binni napa ti guenda casi napa xcaadxi ne cadi guirádicabe nánnacabe gúnicabe xiixa biaʼca runi xcaadxi. Neca zacá, Pedru na iquiiñenu intiica gracia bidii Dios laanu para gacanenu xcaadxi binni. Ra bizeetebe diidxaʼ «iquiiñe» ca, cayuni mandarbe laanu gacanenu xcaadxi binni. Nga runi, naquiiñeʼ guinabadiidxanu laca laanu: «Ñee caquiiñeʼ gracia bidii Jiobá naa para gacaniáʼ xcaadxi xpinni Cristu la?» (zanda gúʼndaluʼ 1 Timoteo 5:9, 10). «O caquiiñeʼ cani para gapaʼ stale bidxichi, gacaʼ binni risaca o gapaʼ xcaadxi cosa para naa la?» (1 Cor. 4:7.) Nabé riecheʼ Jiobá ora guʼyaʼ caquiiñenu gracia bidii laanu para gacanésaanu (Pro. 19:17; biindaʼ Hebreos 13:16).
8, 9. 1) Ximodo racané ca xpinni Cristu ca bíʼchicaʼ ne ca bizáʼnacaʼ. 2) Ximodo racanesaa ca xpinni Cristu ra ridagulisaaluʼ.
8 Biblia ruzeeteʼ modo gucané ca xpinni Cristu ni bibani lu primé siglu que ca bíʼchicaʼ ne ca bizáʼnacaʼ (biindaʼ Romanos 15:25, 26 ne 2 Timoteo 1:16-18). Ca dxi stinu riʼ, cani dxandíʼ xpinni Cristu riquiiñecaʼ gracia bidii Dios laacaʼ para gacanecaʼ ca bíʼchicaʼ ne ca bizáʼnacaʼ, zacá rusihuínnicaʼ ruzuubacaʼ diidxaʼ. Guidúʼyanu ximodo rúnicabe ni.
9 Stale de ca xpinni Cristu ribeecaʼ tiempu sticaʼ guiráʼ beeu para gúnicaʼ libana sticaʼ ti ganda gusiidicaʼ ndaaniʼ ca neza binni ridagulisaa. Ora rúnicabe zacá, ruyúbicabe xi guiníʼcabe ti ganda gacanécabe ca xpinni Cristu para guni huantarcaʼ (1 Tim. 5:17). Nuu xpinni Cristu nabé runibiáʼ binni laa pur nachaʼhuiʼ ne pur riaʼ binni (Rom. 12:15). Nuu tu laa nabé riganna ca binni nuu triste ne runi orarné laacabe (1 Tes. 5:14). Ne nuu tu rucaa carta para uguu gana cani cadiʼdiʼ lu xiixa guendanagana. Xcaadxi de ca xpinni Cristu ricaacaʼ ca bíʼchicaʼ ni huará para chinecaʼ laacabe guendaridagulisaa. Ne stale de laacabe racanécabe ca bíʼchicabe ne ca bizáʼnacabe cuí lídxicaʼ ora guizaacacaʼ xiixa desgracia. Ca xpinni Cristu riʼ rusihuínnicabe pabiáʼ nachaʼhuiʼ Dios ora rannaxhiicabe ne racanécabe ca bíʼchicabe ne ca bizáʼnacabe (biindaʼ 1 Pedro 4:11).
Xi dxiiñaʼ nga jma risaca
10. 1) Xi chupa cosa risaca biʼniʼ Pablu. 2) Ximodo zanda chinándanu ejemplu stibe.
10 Cadi gracia si para gacanenu ca xpinni Cristu nga gucuaanu, sínuque laaca gucuaanu dxiiñaʼ de gucheechenu diidxaʼ. Apóstol Pablu bidii cuenta naquiiñeʼ guni guiropaʼ cosa riʼ purtiʼ nabé risaca cani. Laabe bicaabe ra nuu neza binni ridagulisaa ni nuu ndaaniʼ guidxi Éfeso: Dios «gudixhe naa güe nia laatu stiidxa Cristu» (Efe. 3:2). Peru laaca guniʼbe: «Bisaana Dios stiidxa ladxi ná du purti nanna zanda güi du ni jneza» (1 Tes. 2:4). Laaca maʼ biaana lu nanu gucheechenu stiidxaʼ Reinu stiʼ Dios cásica biʼniʼ Pablu. Laabe qué nusaana de nucheechebe diidxaʼ ne laanu laaca rúninu stipa pur chinándanu ejemplu stibe (Hech. 20:20, 21; 1 Cor. 11:1). Nánnanu zanda gulá dxiiñaʼ ni rúninu riʼ binni, peru laaca caquiiñeʼ cueenu tiempu para guinínenu ca xpinni Cristu de «stiidxa Dios» cásica biʼniʼ Pablu (biindaʼ Romanos 1:11, 12; 10:13-15).
11. Ximodo naquiiñeʼ gúʼyanu dxiiñaʼ de gucheechenu diidxaʼ ne gacanenu ca xpinni Cristu.
11 Ñee jma huaxiéʼ risaca ti dxiiñaʼ riʼ que stobi la? Coʼ, risaca guiropaʼ cani. Zeeda gácacani casi ca xhiaa ti manihuiiniʼ ni ripapa. Cásica riquiiñeʼ ti manihuiiniʼ guiropaʼ xhiia para guipapa la? laanu laaca naquiiñeʼ gúninu guiropaʼ dxiiñaʼ ca ti guihuinni dxandíʼ nácanu xpinni Cristu. Nga runi, cadi jneza guiníʼ íquenu jma huaxiéʼ risaca gacanenu ca xpinni Cristu que gucheechenu diidxaʼ, sínuque caquiiñeʼ gúninu guiropaʼ cani casi biʼniʼ apóstol Pedru ne Pablu. Xiñee rininu caquiiñeʼ gúninu guiropaʼ cani yaʼ.
12. Ximodo zanda iquiiñeʼ Jiobá laanu para gúninu xhiiñaʼ.
12 Ora maʼ zigucheechenu diidxaʼ riquiiñenu gracia bidii Dios laanu para gusíʼdinu binni ne para guyúbinu modo chindá stiidxaʼ Dios ndaaniʼ ladxidoʼcaʼ. Zacá racanenu laacabe gácacabe xpinni Cristu. Peru laaca riquiiñenu cani nánnanu ne ca guenda stinu para uguʼnu gana ca bíʼchinu ne ca bizáʼnanu. Ca diidxaʼ ni guininu ne cani rúninu pur laacabe sin cuézanu gudiicabe laanu xiixa rusihuínnicani nachaʼhuiʼ Dios ne laacabe (Pro. 3:27; 12:25). Pa gúninu zacá la? zacanenu laacabe cadi gusaana de gácacabe xpinni Cristu. Ti ndaayaʼ naroʼbaʼ nga iquiiñeʼ Jiobá laanu para gucheechenu diidxaʼ ne gacanenu ca bíʼchinu ne ca bizáʼnanu (Gál. 6:10).
«Laganaxhii saa»
13. Xi zazaaca pa gusaana de gacanésaanu.
13 Pablu biquiiñeʼ ca diidxaʼ riʼ para uguu gana ca xpinni Cristu: «Laganaxhii saa casi enda biʼchiʼ, cada tobi usisaca stobi ne cadi laca laa» (Rom. 12:10). Cumu nadxiinu ca bíʼchinu ne ca bizáʼnanu la? rucaani laanu gacanenu laacaʼ de guidubi ladxidoʼno ne gusihuínninu caquiiñenu gracia bidii Dios laanu jneza. Nánnanu maʼ qué ziuʼnu tobi si pa gudiʼnu lugar gucaa Binidxabaʼ laanu gusaana de gacanésaanu (Col. 3:14). Pa maʼ qué chuʼnu tobi si la? maʼ qué zudii gana laanu gucheechenu diidxaʼ. Binidxabaʼ nanna zusaba laanu pa gucueeza de gúninu tobi de ca dxiiñaʼ bidii Dios laanu.
14. Xi rizaaca ora racanenu ca xpinni Cristu. Bizeeteʼ ti ejemplu.
14 Laaca ribeendunu ni galán ora racanenu ca xpinni Cristu (Pro. 11:25). Zacá rihuínnini pur ni biʼniʼ Ryan ne Roni, ti guendaxheelaʼ de guidxi Illinois (Estados Unidos). Cumu nadxiicabe ca bíʼchicabe ne ca bizáʼnacabe la? ora gúnnacabe binitilú huracán Katrina lídxicaʼ bisaanacabe xhiiñacabe ne lugar ra nabézacabe que. Guzíʼcabe ti yoo ni maca biquiiñeʼ binni ni rábicabe casa remolque. Biʼniʼ chaahuisícabe ni yenécabe ni guidxi Luisiana ni nuu 1,400 kilómetru (900 millas) de ra nuucabe que. Biaanacabe raqué jma de ti iza ne biquiiñecabe tiempu stícabe, stipa ne xpuéltucabe para gunda gucanécabe ca bíʼchicabe ne ca bizáʼnacabe. Ryan, ni napa 29 iza, guníʼ: «Guyuaa jma gaxha de Dios ra gucaniáʼ ca bicheʼ ne ca bizanaʼ. Biiyaʼ pabiáʼ galán modo rapa Jiobá xquidxi». Ne laaca guniʼbe: «Ra bineniáʼ ca xpinni Cristu ni maʼ huaniisi dxiiñaʼ biziideʼ gapaʼ ca bicheʼ ne ca bizanaʼ. Laaca biziideʼ nuuruʼ ni zanda gúnidu ndaaniʼ xquidxi Jiobá laga nahuíʼnidu». Roni, ni napa 25 iza, na: «Nuaa nayecheʼ purtiʼ gunda gucaniáʼ ca bendaʼ ne ca bizanaʼ. Qué huayuu dxi chuaa nayecheʼ casi nuaa yanna. Nannaʼ zacané guiráʼ ni biziideʼ riʼ naa stale iza».
15. Xi razón nápanu para iquiiñenu gracia bidii Dios laanu para gacanenu xcaadxi binni.
15 Casi maʼ bidúʼyanu ca, ribeendunu stale cosa ora rucheechenu diidxaʼ ne racanenu xcaadxi xpinni Cristu. Ca binni ni racanenu ca jma riuucaʼ gaxha de Dios ne laanu riuʼnu jma nayecheʼ purtiʼ gunda gucanenu laacaʼ (Hech. 20:35). Ca binni ridagulisaa ca runi sentircaʼ galán ora cada tobi de laacaʼ rizaaláʼdxisaacaʼ. Cadi guiaandaʼ laanu, ni rusihuinni dxandíʼ xpinni Cristu laanu nga guendarannaxhii ni nápanu. Jesús guníʼ: «Pa ganaxhii saa tu zacá la? zanna binni xpinne laatu» (Juan 13:35). Rudiʼnu xquíxepeʼ Jiobá, Bixhózenu ni nadxii laanu, purtiʼ riquiiñebe ca xpínnibe ni nuu lu Guidxilayú riʼ para gacanecaʼ cani caquiiñeʼ chuʼ tu gacané laacaʼ. Nga runi, nápanu stale razón para iquiiñenu gracia bidii Dios laanu para gacanenu xcaadxi binni, ti guihuinni jneza cayúninu. Ñee zúniluʼ stipa pur cadi gusaana de gacaneluʼ laacabe la? (Biindaʼ Hebreos 6:10.)
Rietenalaʼdxuʼ la?
• Ximodo racané Jiobá ca xpinni.
• Xi maʼ bisaana Jiobá gúninu.
• Ximodo zanda gacanenu ca bíʼchinu ne ca bizáʼnanu.
• Xi zucaa laanu cadi gusaana de iquiiñenu gracia bidii Dios laanu para gacanenu ca xpinni Cristu.
[Dibuju/foto ni zeeda lu yaza 13]
Ñee caquiiñenu gracia bidii Dios laanu para gacanenu la? o caquiiñenu ni para gápanu ni racaláʼdxinu
[Dibuju/foto ni zeeda lu yaza 15]
Naquiiñeʼ gucheechenu diidxaʼ ne gacanenu ca bíʼchinu ne ca bizáʼnanu
[Dibuju/foto ni zeeda lu yaza 16]
Naquiiñeʼ gusisácanu cani riuulaʼdxiʼ gacané ca bíʼchinu ne ca bizáʼnanu