Bidxiña Dios
«Nannaʼ dxicheʼ xi guendananá cadíʼdicabe»
JIOBÁ nga ti Dios nayá (Isaías 6:3). Cumu chonna biaje nga cá diidxaʼ nayá lu textu ca la? nga rusihuinni guirútiruʼ nga jma nayá que Jiobá Dios. Ñee purtiʼ nayabe ca qué zanabe guidxíñanu laabe ne qué zazaláʼdxibe binni ruchee casi laanu la? Guidúʼyanu xiná Éxodo 3:1-10 para gánnanu de laani, racá cayeeteʼ dxi guniʼné Dios Moisés.
Ti dxi, laga cayapa Moisés dendxuʼ málasi biiyaʼ xiixa ni qué huayaca, biiyabe ti yagahuiiniʼ naze bele peru cadi cayaʼquiʼ diʼ (versículo 2). Cumu nuube gúʼyabe xi laani la? bidxíñabe jma gaxha. Óraque biree ridxi stiʼ ti ángel ni biseendaʼ Jiobá, rabi laabe: «Cadi guidxíñaluʼ raríʼ. Gulee guelaguidi cá ñeeluʼ ca, purtiʼ nayá lugar ra zuhuaaluʼ riʼ» (versículo 5). Maʼ bidiiluʼ cuenta guca layú que nayá purtiʼ casi ñaca ñuu Dios raqué la?
Xiñee ngue guniʼné Dios Moisés yaʼ. Jiobá gudxi laabe: «Maʼ biiyaʼ guendanagana cadiʼdiʼ xquidxeʼ Egipto, ne maʼ binadiagaʼ ridxi stícabe pur cani cucaa laacabe gúnicabe dxiiñaʼ, purtiʼ nannaʼ dxicheʼ xi guendananá cadíʼdicabe» (versículo 7). Racá ridúʼyanu qué ñuni Dios laa lú cheepaʼ ora cayacaná ca xpinni ne qué ñúnibe laabe diaga cuaataʼ ora gunábacaʼ gacanebe laacaʼ, sínuque guizáʼ biabe laacaʼ. Laapebe guniʼbe: «Nannaʼ dxicheʼ xi guendananá cadíʼdicabe». Ti libru na, diidxaʼ «nannaʼ dxicheʼ» ca culuiʼni «riácabe tuuxa, rizaaláʼdxicabe laa ne nadxiicabe laa». Ca diidxaʼ gudxi Jiobá Moisés ca rusihuínnini rizaalaʼdxiʼ Dios xquidxi de guidubi ladxidóʼ.
Cadi biá si Dios laacabe, sínuque gucané laacabe ora biiyaʼ modo cayacanácabe. Ngue runi, gudixhe íquebe cueebe laacaʼ de Egipto ne chinebe laacaʼ lu «ti layú ra ridá leche ne dxiña yaga» (versículo 8). Óraque gudxi Jiobá Moisés cuee xquídxibe de Egipto (versículo 10). Ne zaqué biʼniʼ Moisés ni, lu iza 1513 ante gueeda Jesús, guleebe guidxi Israel de Egipto.
Jiobá caʼruʼ guchaa diʼ dede nagasi. Ca dxi riʼ, ca xpínnibe ni ruzuubaʼ stiidxabe laaca zanda guni crecaʼ cayuuyabe modo nuucaʼ ne rucaadiágabe laacaʼ. Nanna dxíchibe xi yuubaʼ cadíʼdicaʼ. Ne cásica dxiqué qué riásibe laacaʼ, sínuque rúnibe xiixa para gacanebe laacaʼ. Xiñee yaʼ. Purtiʼ rizaaláʼdxibe ca xpínnibe de guidubi ladxidoʼbe (1 Pedro 5:7).
Guiranu ratadxí ladxidoʼno ora gánnanu riá Dios laanu. Neca gulenenu donda racanebe laanu chinándanu ca conseju stibe ti chuuláʼdxibe modo runi adorarnu laabe (1 Pedro 1:15, 16). Ridúʼyanu zacá ni pur ni bizaaca ti xpinni Cristu ni guca huará de depresión, laabe guniʼbe ximodo gucané relatu stiʼ yagahuiiniʼ naze bele que laabe. Sicaríʼ guníʼ íquebe: «Pa gunda biʼniʼ Jiobá gaca layú biidiʼ que nayá la? laaca zanda gúnibe naa zacaca. Nabé riguu relatu riʼ gana naa».
Ñee riuuláʼdxiluʼ gunibiaʼluʼ jma modo naca Jiobá, Dios nayáʼ riʼ, ne guidxíñaluʼ laabe la? Cadi ti bacaandaʼ diʼ ni, purtiʼ Dios «nanna dxíchibe ximodo guyanu, ne rietenaláʼdxibe de yú laanu» (Salmo 103:14).