Rusiéchenu ladxidóʼ Jiobá ora qué ruchéʼnenu laa
«Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa.» (PRO. 27:11)
1, 2. 1) Casi na libru stiʼ Job, xii nga guníʼ Binidxabaʼ zuni ca xpinni Dios. 2) Ximodo nánnanu cadi cusaana Binidxabaʼ de guiníʼ mal de Jiobá.
JIOBÁ bidii lugar gutiidiʼ Binidxabaʼ Job lu stale guendanagana para guihuinni pa qué zucheenebe Dios. Ngue runi biniti Job guiráʼ ca maniʼ ni gupa, ca xiiñiʼ ne dede guca huará. Peru cadi Job si nga guníʼ Binidxabaʼ zucheené Dios, purtiʼ laabe guniʼbe: «Guiráʼ ni napa binni zudii ni pur xhialma». Pur ni guníʼ Binidxabaʼ ca nga nánnanu guníʼ íquebe stale binni nga zucheené Dios, ne dede yanna zacaca nga riníʼ íquebe (Job 2:4).
2 Biaʼ xhoopaʼ gayuaa iza despué, maʼ gudxi Jiobá Salomón gucaa ca diidxaʼ riʼ: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa» (Pro. 27:11). Nga rusihuinni laaca bicaaluruʼ Binidxabaʼ Jiobá ca dxi bibani Salomón. Despué maʼ biiyaʼ apóstol Juan Binidxabaʼ lu ti visión caníʼ mal de ca xpinni Dios guladxisicabe laa guibáʼ (nga bizaaca despué de guyuu Reinu stiʼ Dios guibáʼ lu iza 1914). Ne dede yanna ra maʼ cadxiña dxi guinitilú ca cosa malu riʼ, caníʼrube zucheené ca xpinni Dios laa (Apo. 12:10).
3. Xi chonna cosa rizíʼdinu lu libru stiʼ Job.
3 Lu tema riʼ chidúʼyanu chonna cosa nabé risaca ni rizíʼdinu lu libru stiʼ Job. Primé: Binidxabaʼ nga ni jma xhenemigu binni ne pur laa nga rucaalúcabe xquidxi Dios. Guiropa: pa chuʼnu jma gaxha de Jiobá, zanda gudxíʼlunu intiica guendanagana sin guchéʼnenu laabe. Ne guionna: zacané Dios laanu ora tiidinu lu ca guendanagana ni gápanu, cásica gucanebe Job. Ne riquiiñebe Stiidxabe, xquídxibe ne espíritu santu stibe para gacanebe laanu.
Cadi gusiáʼndanu tuu nga ni jma xhenemígunu
4. Tu laa napa donda pur modo nabani binni lu Guidxilayú riʼ.
4 Stale binni nuu xizaa pur ca cosa ni cazaaca lu guidubi naca Guidxilayú, peru qué ganda guiénecabe xiñee nabé feu modo nabáninu. Zacá nuucabe purtiʼ nácabe cadi dxandíʼ nuu Binidxabaʼ, ni cucaa binni gapa stale guendanagana. Nánnanu stale de ca guendanagana ca laaca binni nga ruyubi cani. Dede dxi bixeleʼ Adán ne Eva de Dios ni bizáʼ laacaʼ nga nabé cuchee guiráʼ binni. Peru Binidxabaʼ nga bisiguii Eva para cadi guzuubabe stiidxaʼ Dios. Pur laabe nga ruchee binni ne zeʼ dxi jma feu modo nabánicaʼ, ne laabe nga cucaabe binni guni ni nabe. Cumu Binidxabaʼ nga cayuni mandar binni guidxilayú la? nga runi nácacabe casi laabe: rudxiibacaʼ laca laacaʼ, nisi ruchelatíndecaʼ binni, nápacaʼ envidia, rachelucaʼ gápacaʼ jma, ribáʼnacaʼ ne qué ruzuubacaʼ diidxaʼ (2 Cor. 4:4; 1 Tim. 2:14; 3:6; biindaʼ Santiago 3:14, 15). Nga runi, nabé ridinde ca políticu ca, ca religión ca, nanaláʼdxisaa binni, ne cadi jneza ni rúnicaʼ, ne pur guiráʼ nga napa binni stale yuubaʼ.
5. Xi naquiiñeʼ gúninu ne guiráʼ ni bizíʼdinu de Dios.
5 Peru laanu, ca xpinni Jiobá, zanda guininu naroʼbaʼ ndaayaʼ nga nápanu purtiʼ nánnanu tuu nga napa donda pur nuu guiráʼ cosa malu lu guidxilayú riʼ. Ñee qué rucaa nga lii chigucheecheluʼ diidxaʼ para gábiluʼ binni ni nánnaluʼ ca la? Ñee cadi nayecheʼ ziuuluʼ gusihuínniluʼ nuuluʼ pur Jiobá ne gusiéneluʼ xcaadxi binni zunduuxeʼ Jiobá Binidxabaʼ ne zabeebe guiráʼ ca yuubaʼ ni nápanu la?
6, 7. 1) Tuu nga napa donda pur rucaalúcabe ca xpinni Dios. 2) Ximodo zanda chinándanu ejemplu stiʼ Elihú.
6 Qué gapa si Binidxabaʼ donda pur stale guendanagana ni napa binni, sínuque laaca nápabe donda pur rizanándacabe ca xpinni Dios. Binidxabaʼ maʼ gudixhe ique gutiidiʼ laanu lu guendanagana. Jesucristu gudxi Pedru ca diidxaʼ riʼ: «Simón, Simón, biiya gá lii, ma gunaba binidxaba laatu para uniibi dxacha laatu casi ora riguibi cabe semiá» (Luc. 22:31). Zacaca nga zúnibe ne laanu purtiʼ zinándanu ejemplu stiʼ Jesús, laaca zutiidibe laanu lu guendanagana. Ngue runi guníʼ Pedru nuu Binidxabaʼ «canananda laa[n]u casi ti lion ni canaguu beedxeʼ, canayubi tu uxuuxe». Ne Pablu laaca guníʼ: «Irá ni racalaʼdxi sa modo na Cristu Jesús, zazabi nanda cabe laacaʼ» (1 Ped. 5:8; 2 Tim. 3:12).
7 Pa ti xpinni Cristu guizaaca xiixa desgracia, cadi jneza diʼ guiníʼ íquenu Jiobá nga napa donda pur ni bizaacabe ca. Casi maʼ bidúʼyanu ca, Binidxabaʼ nga napa donda pur cani rizaacanu. Ne lugar de guixélenu de xpinni Cristu ca casi biʼniʼ ca hombre ni qué niniʼcaʼ ni dxandíʼ nezalú Job que la? laanu zacanenu laabe gudxiilube Binidxabaʼ xhenemígunu ca, casi biʼniʼ Elihú ni bisihuinni dxandíʼ xhamigu Job que (Pro. 3:27; 1 Tes. 5:25). Ni racaláʼdxinu nga gacanenu laabe gudxiilube intiica guendanagana ni gápabe ti cadi gucheenebe Jiobá, purtiʼ zacá nga zusiéchebe ladxidóʼ Jiobá.
8. Xiñee qué ñanda nucueeza Binidxabaʼ Job de nusisaca Jiobá.
8 Binidxabaʼ bininá Job ora binduuxebe ca maniʼ ni napa, ne zándaca pur laacame nga jma gúpabe bidxichi. Ne biquiiñeʼ Job stale de ca maniʼ ca para bizaaquiʼ laacame para Jiobá. «Siadoʼroʼ riásabe [para gacanebe ca xiiñibe chuʼcaʼ nayá nezalú Dios] ne ruzaaquibe tuuxa maniʼ pur cada tobi de ca xiiñibe; purtiʼ guníʼ Job, zándaca maʼ bichee ca xiiñeʼ ne maʼ guniʼcaʼ mal de Dios ndaaniʼ ladxidoʼcaʼ. Qué nusaana Job de ñuni zacá.» (Job 1:4, 5.) Peru dxi maʼ bidxaagalube guendananá la? maʼ qué ñanda nuzaaquibe maniʼ para Dios casi rúnibe dxiqué, purtiʼ maʼ binítibe ca cosa risaca ni gúpabe para gusisácabe Jiobá (Pro. 3:9). Peru gúndaruʼ bisisácabe Jiobá ne ruaabe.
Gúninu stipa pur chuʼnu jma gaxha de Jiobá
9. Xii nga ni jma risaca gúninu.
9 Biaʼ tiica bueltu nápanu, biaʼ tiica iza nápanu ne pa nazaaca nuunu o coʼ la? zanda gúninu stipa pur chuʼnu jma gaxha de Jiobá. Zanda guidxaagalunu intiica guendanagana sin guchéʼnenu Jiobá ne gusiéchenu laabe pa nuunu gaxha de laabe. Dede ca binni ni nacubi cuzulú caziidiʼ de Dios rusihuínnicaʼ nadxibalucaʼ ne qué rucheenecaʼ laabe.
10, 11. 1) Ximodo bidxaagalú ti xpinni Cristu de Rusia ca guendanagana gupa. 2) Ximodo bisihuínnibe cadi dxandíʼ ni guníʼ Binidxabaʼ.
10 Guidúʼyanu ejemplu stiʼ Valentina Garnovskaya, tobi de ca xpinni Cristu de Rusia, ni naca casi Job purtiʼ qué nucheené Dios. Lu iza 1945, dxi nápabe 20 iza, guniʼné ti hombre Testigu laabe, peru chupa biaje si yeganna laabe para guiniʼné laabe de Biblia. Nécapeʼ maʼ qué ñuuyaruʼ Valentina xpinni Cristu que la? bizulube guníʼnebe ca xpesínube de ni biziidibe. Pur ngue biseguyoocabe laabe xhono iza ti lugar ra bíʼnibe dxiiñaʼ naná. Lu iza 1953 bireebe de ra deguyoobe que ne qué nindaa bicheechebe diidxaʼ. Peru gunaazecabe laabe sti biaje ne biteguyoocabe laabe chii iza. Chupa chonna iza de nuteguyoocabe laabe yesaanacabe laabe ti lugar ra nuu xcaadxi gunaa Testigu ne nápacaʼ ti Biblia raqué, ne ti dxi tobi de laacaʼ biluíʼ ni laabe. Guizáʼ biecheʼ Valentina ora biiyaʼ ni purtiʼ Biblia si ni biiyabe ante guideguyoobe que nga ni biluíʼ xpinni Cristu ni guniʼné laabe de Dios lu iza 1945 que.
11 Lu iza 1967, biree Valentina de ra deguyoo que ne guyuunisa para gusihuinni maʼ bidii laa Jiobá. Bireesi Valentina de ra deguyoo que bizulú bicheeche diidxaʼ ne stale gana. Nécapeʼ lu iza 1969 biseguyoocabe laabe xhonna iza la? qué liica nusaanabe de nucheechebe diidxaʼ. Ante gátibe lu iza 2001 maʼ gucanebe 44 binni gunibiaʼcaʼ Dios. Biaʼsi veintiún iza biseguyoocabe laabe ti lugar ra bíʼnibe dxiiñaʼ naná. Laabe qué nusaanabe de ñúnibe ni na Dios neca biseguyoocabe laabe ne qué ñápabe gastiʼ. Dxi mayaca gátibe guniʼbe: «Qué ñuu dxi ñapaʼ ti lidxeʼ. Guiráʼ cani gupaʼ biáʼsipeʼ gunda bidxácani ndaaniʼ ti maleta. Neca zacá nabé nayecheʼ nuaaʼ purtiʼ cayuneʼ ni na Jiobá». Ni biʼniʼ Valentina ca rusihuínnini cadi dxandíʼ diʼ ni guníʼ Binidxabaʼ que, purtiʼ laa na zucheené binni Dios pa tiidiʼ lu guendanagana (Job 1:9-11). Nanna dxíchinu bisiéchebe ladxidóʼ Jiobá ne cabeza si ora guindisaʼ laabe de lade gueʼtuʼ cásica zúnibe ne xcaadxi xpínnibe ni guti sin nucheené laabe (Job 14:15).
12. Xi rucaa laanu chuʼnu gaxha de Jiobá.
12 Riuuláʼdxinu chuʼnu gaxha de Jiobá purtiʼ nadxiinu laabe. Nabé riuuláʼdxinu ca guenda ni nápabe ne rúninu stipa pur guibáninu modo nabe. Laanu dxandíʼ nadxiinu Jiobá de guidubi ladxidoʼno ne cadi purtiʼ racaláʼdxinu guicaanu xiixa casi guníʼ Binidxabaʼ que. Cumu dxandíʼ nadxiinu Jiobá la? nga rudii stipa laanu ne racané laanu para gudxíʼlunu ca guendanagana ca sin guchéʼnenu laabe. Ne laaca racané Jiobá laanu purtiʼ laabe rápabe «neza stiʼ cani qué rusaana laabe» (Pro. 2:8; Sal. 97:10).
13. Ximodo ruuyaʼ Jiobá dxiiñaʼ ni rúninu.
13 Ni rucaa laanu gusisácanu lá Jiobá nga purtiʼ nadxiinu laabe. Peru zándaca guiníʼ íquenu huaxiéʼ nga ni rúninu para gusisácanu labe. Pa zacá riníʼ íquenu la? naquiiñeʼ gánnanu nanna Jiobá xi nuu ndaaniʼ ladxidoʼno ne rusisácabe biaʼ ganda gúninu. Neca risaca nga gusisácanu labe la? laaca risaca nga xi cucaa laanu gúninu ni. Neca nabé triste guyuu Job pur guiráʼ ni bizaaca que la? gúdxibe ca hombre ni guyé ra nuube que pabiáʼ nadxiibe ca ley stiʼ Jiobá (biindaʼ Job 10:12; 28:28). Lu últimu capítulo stiʼ libru stiʼ Job que, gudxi Dios Elifaz, Bildad ne Zofar cadxiichinebe laacaʼ purtiʼ cadi dxandíʼ ni guniʼcaʼ de laabe. Peru Jiobá guníʼ galán de Job purtiʼ tapa biaje gúdxibe laa «siervu stinneʼ» ne gúdxibe Job guiníʼ pur guionnaʼ hombre que (Job 42:7-9). ¡Nabé risaca nga gúninu ni jneza para chuulaʼdxiʼ Jiobá cani gúninu!
Jiobá cayacané ca xpinni ni qué rucheené laa
14. Ximodo gucané Jiobá Job para gunda bichaa modo guníʼ ique.
14 Neca gulené Job donda la? qué nucheené Jiobá. Dxandíʼ nga guyuu ora nabé nagana ra gudiʼdiʼ Job, ne pur nga maʼ cadi jneza ni guníʼ íquebe. Ti dxi gúdxibe Jiobá: «Cucaaʼ ridxeʼ lii gacaneluʼ naa, peru qué guicábiluʼ naa; [...] ne guiráʼ stipa napa naluʼ ca cucaaluluʼ naa». Ne jma gucuá ique Job gusihuinni qué liica gapa donda. Casi ra guniʼbe: «Qué gapaʼ donda» ne «Qué ñunenaʼyaʼ guirutiʼ, ne de guidubi ladxiduáʼ runeʼ orar lii» (Job 10:7; 16:17; 30:20, 21). Neca guníʼ Job zacá, nachaʼhuiʼ guca Jiobá ne laa. Jiobá gunabadiidxaʼ laabe stale cosa, ne zacá gunda gucané laabe para maʼ cadi guiníʼ íquebe de laabe ne gúʼyabe pabiáʼ nandxóʼ Dios ne pabiaʼti nga binni nezalú. Job gucuaa conseju ni bidii Dios laa ne bichaa modo guníʼ ique (biindaʼ Job 40:8; 42:2, 6).
15, 16. Ximodo racané Jiobá laanu yanna.
15 Yanna riʼ laaca rusihuinni Jiobá nadxii laanu ora rusiene laanu xiixa ne ora rudii conseju laanu. Laaca cudiibe stale ndaayaʼ laanu. Guidúʼyanu ti ejemplu. Jesucristu guti pur laanu ne pur nga zanda gutiidilaʼdxiʼ Jiobá stóndanu, ne neca gulenenu donda zanda chuʼnu gaxha de laabe (Sant. 4:8; 1 Juan 2:1). Pa guinábanu Jiobá gudii laanu espíritu santu stiʼ la? zanda gudiibe ni laanu para ganda gudxíʼlunu ca guendanagana ni gápanu. Sti ndaayaʼ nga purtiʼ maʼ nápanu Biblia. Pa guidúʼndanu ni ne guiníʼ íquenu ni cá luni la? zanda gudxíʼlunu intiica guendanagana. Ora guidúʼndanu Biblia zanda guiénenu xiñee naquiiñeʼ gusihuínninu Jiobá si nga napa derechu para guni mandar ne xiñee cadi naquiiñeʼ guchéʼnenu laabe.
16 Laaca ti ndaayaʼ para laanu nga nuunu ndaaniʼ xquidxi Jiobá ra caquiiñebe «mozo ni nuu xpiaani ne ni runi jneza» para gudiibe guiráʼ ni caquiiñenu (Mat. 24:45-47). Ndaaniʼ ti gayuaa mil neza binni ridagulisaa ni nuu lu guidubi naca Guidxilayú riʼ riziidiʼ ca xpinni Jiobá ximodo gaca fe sticaʼ naguidxi para gudxiilucaʼ intiica guendanagana gápacaʼ. Dxandíʼ zacá ni pur ni bizaaca Sheila, ti dxaapahuiiniʼ Testigu de Alemania. Guidúʼyanu ni lu sti párrafo ca.
17. Guníʼ ti ejemplu ni rusihuinni pabiáʼ jneza nga chinándanu ca conseju ni rudii xquidxi Jiobá.
17 Ti dxi, ora biree maestru stiʼ Sheila de ndaaniʼ salón stiʼ que oraqueca gulee ca xcompañérube ti tabla ouija. Ora biʼyaʼ Sheila ni chigúnicabe que bireeca de ndaaniʼ salón que. Despué maʼ gúnnabe biʼniʼ sentir caadxi de laacaʼ nuu demonio raqué ne bixooñecaʼ purtiʼ nabé bidxíbicaʼ. ¡Guizáʼ galán ngue ni biʼniʼ Sheila que! Yanna, xi bicaa laabe guireebe de raqué nagueendaca yaʼ. Sicaríʼ guniʼbe: «Ante guizaaca nga bizeetecabe lu ti guendaridagulisaa xiñee malu nga tabla ouija ca. Ngue runi maca nannaʼ xi naquiiñeʼ guneʼ. Ne naa racalaʼdxeʼ guneʼ ni riuulaʼdxiʼ Jiobá, casi na Proverbios 27:11». ¡Jneza ngue biʼniʼ Sheila guyé guendaridagulisaa que ne bicaadiaga chaahuiʼ cani bieeteʼ raqué!
18. Xi naguixhe íqueluʼ gúniluʼ yanna.
18 Cadi gusaananu de chinándanu ni gabi xquidxi Dios laanu. Naquiiñeʼ chuunu guiráʼ ca guendaridagulisaa ca, guidúʼndanu Biblia, ca libru ne revista ni ricaanu ne xcaadxiruʼ ni rusiidiʼ de Dios. Zacá zazíʼdinu xi naquiiñeʼ gúninu ne zacanécabe laanu. Laaca naquiiñeʼ guni orarnu guiráʼ ora ne gaca xhamígunu ca xpinni Cristu ni zuhuaa dxiichiʼ lu stiidxaʼ Dios. Jiobá qué racalaʼdxiʼ guchéʼnenu laa, ne nánnabe zanda gúninu ni. Nanna dxíchinu ti ndaayaʼ nga gusisácanu lá Jiobá, cadi guchéʼnenu laabe ne gusiéchenu ladxidoʼbe.
Nánnaluʼ xi guicábiluʼ la?
• Ximodo nánnanu napa Binidxabaʼ donda pur guiráʼ ni cayaca yanna.
• Xii nga ni jma risaca nápanu.
• Xi racané laanu chuʼnu gaxha de Jiobá.
• Ximodo racané Jiobá laanu yanna.
[Dibuju/foto ni zeeda lu yaza 8]
Ñee riuuláʼdxiluʼ guiniʼluʼ cani maʼ biziidiluʼ de Dios la?
[Dibuju/foto ni zeeda lu yaza 9]
Zanda gacanenu xcaadxi xpinni Cristu para cadi gucheenecaʼ Dios
[Dibuju/foto ni zeeda lu yaza 10]
Qué nucheené Valentina Dios neca qué ñapa gastiʼ