2 Binibiáʼ chaahuiʼ Dios
«Zacaa cabe enda nabani ca ra gunibiáʼ cabe lii [...] tobi lucha Dios ni dxandíʼ.» (Juan 17:3)
XIÑEE RACA NAGANA PARA BINNI GUNI CRÉ DIOS. Purtiʼ gadxé gadxé nga ni runi cré binni de Dios. Stale tu riníʼ gastiʼ Dios. Xcaadxi na nácabe ti stipa ni qué rihuinni. Ne nuu tu runi cré nácabe tuuxa ni guizáʼ nuu xpiaaniʼ, peru qué ganda diʼ gusiene chaahuicabe tupeʼ nga laabe ne ximodo laabe.
XIMODO ZANDA GUNIBIÁʼ CHAAHUILUʼ DIOS. Apóstol Pablu guníʼ: «Qué zanda guʼya cabe enda nandxóʼ stibe ni qué ziuu dxi iluxe, ne qué zanda guʼya cabe ximodo laabe, peru dede dxi bizáʼ be guidxilayú rihuinni dxichi tu naca be pur irá ni biʼni be, para cadi iníʼ cabe qué ganna cabe» (Romanos 1:20). Nga runi, ti cosa ni naquiiñeʼ guʼnuʼ para gunibiaʼluʼ Dios nga gúʼyaluʼ guiráʼ ni bizaʼbe, purtiʼ zusiidicani lii pabiáʼ nuu xpiaanibe ne pabiáʼ naroʼbaʼ poder nápabe (Salmo 104:24; Isaías 40:26).
Ne sti cosa ni naquiiñeʼ guʼnuʼ pa racalaʼdxuʼ gunibiáʼ chaahuiluʼ Dios nga gúʼndaluʼ Biblia. Cadi galán diʼ gudiʼnu lugar gabi sti binni laanu xi guni crenu. Stiidxaʼ Dios na: «Ne ma cadi chi nanda tu ni na binni guidxilayú, sínuque laudii lugar uchaa Dios laatu ne cuee irá ni ucuá ique tu chiqué. Zacá zanna tu xii nga racalaʼdxi Dios guni tu, ni nachaʼhui ne ni chuʼlaʼdxiʼ ne ni jneza peʼ» (Romanos 12:2). Nga runi, liipeʼ nga caquiiñeʼ gúʼyaluʼ xi rusiidiʼ Biblia de Dios. Guidúʼyanu caadxi ejemplu.
Dios napa lá. Lá Dios ca zeedani biaʼ gadxe mil biaje lu ca guiʼchiʼ ra gucuá Biblia ca primé, ne stale Biblia casi Reina-Valera bicaacabe lá Dios ra naquiiñeʼ cheʼ ni. Xcaadxi casi Torres Amat, bicaacabe ni lu Salmo 82:19 (xcaadxi Biblia cá ni lu 83:18) ra na: «Gánnacabe lii nga laluʼ Señor, o Jiobá, ne lii si nga ni jma Nandxóʼ lu guidubi naca guidxilayú».
Riá Dios binni ne riuubaʼ ladxidóʼ ora rúnicabe xiixa ni cadi jneza. Ni bizaaca ca israelita que rusihuinni zacá ni. Gulee si Jiobá laacabe de Egipto, ra guyuucabe casi esclavu que la? stale biaje qué nuzuubacabe stiidxabe. Ñee gucaná ladxidóʼ Dios pur ni bíʼnicabe que la? Biblia na: «Bininácabe [...] ne bisiuubacabe ladxidóʼ Dios ni nayá stiʼ Israel» (Salmo 78:40, 41).
Rizaalaʼdxiʼ Jiobá cada tobi de laanu. Nga nga ni gudxi Jesús ca discípulo stiʼ ora guníʼ: «Laaca tu nanna tu ridoo chupa mani huiini pur chupa domiʼ, peru neca qué risaca came, qué ziaba si tobi de laacame layú pa qué na Dios. Zaqueca ma bigaba be irá xixé guicha ique tu. Nga runi cadi idxibi tu, purti jma risaca tu que ca mani huiiniʼ» (Mateo 10:29-31).
Dios qué rusisaca binni de ti raza jma que stobi. Para laabe biáʼqueca risaca guiráʼ binni, casi gudxi apóstol Pablu ca binni de Atenas: «De ti binni si ulee [Dios] binni de irá raza ni nuu ndaani guidxilayú». Ne cumu «cadi zitu nuu be» de cada tobi de laanu la? zanda guidxíñanu laabe (Hechos 17:26, 27). Ne apóstol Pedru guníʼ: «Biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hechos 10:34, 35).
XI RIBEENDÚ BINNI. Qué zácanu casi ca binni ni na cayuni ni na Dios peru cadi jneza modo rúnicaʼ ni (Romanos 10:2). Pa ganna chaahuiluʼ xi rusiidiʼ Biblia de Jiobá la? guirutiʼ tu zaguite lii ne zacatiʼ nga zanda chuʼluʼ gaxha de Dios (Santiago 4:8).
Pa riuuláʼdxiluʼ gánnaluʼ jma de laani la? biiyaʼ capítulo 1 stiʼ libru Xipeʼ ndiʼ cusiidiʼ Biblia,a ra na «Xipeʼ ndiʼ cusiidiʼ Biblia de Dios».
[Cani cá ñee yaza]
a Ni biʼniʼ ca testigu stiʼ Jiobá.
[Ca dibuju/foto ni zeeda lu yaza 6]
Ti modo para gunibiaʼluʼ Dios nga gúʼyaluʼ guiráʼ ni bizaʼbe