Ñee ruchiña guiráʼ ca religión ca binni ra nuu ti Dios si la?

«Naa maʼ napaʼ religión stinneʼ ne cadi cá iqueʼ gusaanaʼ ni. Ne intiica religión gápanu zuchiña laanu ra nuu Dios.»

ÑEE huayuu tuuxa gabi lii ca diidxaʼ ca la? Stale tu riníʼ ruchiña guiráʼ ca religión ca binni ra nuu Dios ne racaneni laacaʼ gánnacaʼ xi pur nabáninu. Xcaadxi na ridxela binni ni galán ne ni cadi galán ndaaniʼ guiráʼ religión, ne guirutiʼ tu zanda guiníʼ religión si stiʼ nga dxandíʼ o laasini nga zanda guchíñani laanu ra nuu Dios.

Nabé riníʼ binni zacá yanna purtiʼ nacaʼ nabáninu ti tiempu ra zanda guni binni guiráʼ ni riuulaʼdxiʼ. Cumu zacá nga guiráʼ ladu la? maʼ gadxé si modo ruuyacabe binni ni qué riníʼ ique zacá o riníʼcabe deʼguʼ xpiaanicaʼ. Lii xi raʼbuʼ, ñee zanda guchiiñaʼ guiráʼ ca religión ca laanu ra nuu ti Dios si la? Ñee gastiʼ naca gápanu intiica religión la?

Ñee dxandíʼ gadxé gadxé nga ni rusiidicani la?

Ti libru na nuu 9,900 religión lu guidubi naca Guidxilayú, ne ndaaniʼ stale guidxi roʼ napa ca religión ca millón de binni. Biaʼ 70% de binni guidxilayú riecaʼ ndaaniʼ tobi de ca gaayuʼ religión ni jma napa binni, casi budismo, cani na zinanda Cristu, hinduismo, islam ne judaísmo. Yanna, pa ruchiña guiráʼ ca religión ca binni ra nuu ti Dios si, ñee cadi tobi si ni nusiidiʼ gaayuʼ religión ni bizéʼtenu ca la? Ñee cadi ngueca nga ni nusiidicabe de Dios ne cani naguixhe ique guni la? Peru, ñee zacá ni la?

Ti teólogo láʼ Hans Küng na rusiidiʼ ca religión ni jma napa binni ca xi naquiiñeʼ gaca para guibani binni galán. Stale de laacani rusiidiʼ cadi jneza nga guuti binni, guichaganáʼ laca binnilidxi, cuanaʼ ne gusiguii, ne laaca rusiidicani naquiiñeʼ guni respetar binni bixhoze ne jñaa ne gannaxhii ca xiiñiʼ. Peru ora maʼ cusiidiʼ ca religión ca de xcaadxi cosa, casi ximodo nga Dios la? gadxé gadxé modo rusiidicani de laabe.

Ca hindú runi crecaʼ nuu stale dios, peru ca budista nacaʼ zándaca nuu ti Dios. Ca islam rusiidicaʼ nuu ti Dios si. Ne ngaca nga ni rusiidiʼ ca yuʼduʼ ni na zinanda Cristu, peru stale de laacaʼ riniʼcaʼ naca Dios ti Trinidad. Ne dede ndaaniʼ ca yuʼduʼ riʼ rusiidicaʼ gadxé gadxé cosa. Casi ca católicu la? runi adorarcaʼ María, jñaa Jesús, peru ca protestante qué rúnicaʼ ni. Ca católicu nacaʼ cadi jneza nga guni binni stale cosa para cadi gapa xiiñiʼ, peru ca protestante nacaʼ zanda guni binni cani. Ne ca protestante cadi tobi si ni riníʼ íquecaʼ, nuu de laacaʼ nacaʼ zanda gaca binni muxeʼ ne nuu tu na coʼ.

Ñee jneza nga guiníʼ íquenu zuchiña ca religión ca laanu ra nuu ti Dios si pa gadxé gadxé ni rusiidicaʼ la? Nagana huiiniʼ. Ni rúnicabe nga ruchéndacabe binni, nga runi maʼ qué gánnacaʼ tupeʼ nga Dios ne ni ribeza guni cani runi adorar laabe.

Ñee racanécani chuʼ binni tobi si la?

Pa ñacané ca religión ca binni nidxiña ra nuu ti Dios si la? nusiidicabe laacaʼ nibánicaʼ nayecheʼ ne ñuucaʼ tobi si. Peru, xi huadúʼyanu yaʼ. Lugar de ñacanécabe binni para ñuu tobi si, laga ruxhélecabe laacaʼ ne rucaacabe laacaʼ tíndecaʼ. Guzéʼtenu caadxi ejemplu.

Lu siglu XI dede XIII, gudinde ca guidxi ni na zinanda Cristu ne ca guidxi ni nuu lu religión islam, ca guerra que biree lá cani cruzada. Lu siglu XVII, gudinde ca católicu ne ca protestante ni guyuu Europa treinta iza. Lu iza 1947, cadi xadxí de biree continente stiʼ India lu naʼ Gran Bretaña, bizulú gudindesaa ca hindú ne ca musulmán. Ca últimu iza riʼ gudinde ca católicu ne ca protestante guidxi Irlanda del Norte stale iza. Ne lu Oriente Medio, ca judíu ne ca musulmán dede yanna cadínderucaʼ. Peru ni jma naroʼbaʼ guca nga dxi gudinde ca guidxi ca lu guiropa guendaridinde ni guca lu guidubi naca Guidxilayú. Luni gudinde ca binni ni nuu ndaaniʼ gaayuʼ religión ni bizéʼtenu ca, dede cani nuu ndaaniʼ ti religión si gudindesaacaʼ.

Lu guiráʼ ni bidúʼyanu ca rihuinni qué ganda gacané ca religión ca binni para cadi tíndecaʼ, chuʼcaʼ tobi si ne guidxíñacaʼ Dios. Ni huayúnicani nga huachéndacani binni, purtiʼ gadxé gadxé ni rusiidicani de Dios ne ximodo naquiiñeʼ gaca adorarbe. Nga runi, guiráʼ tu racalaʼdxiʼ guni adorar Dios ni dxandíʼ, naquiiñeʼ guʼyaʼ chaahuiʼ ximodo guni adorar laabe. Nga nga conseju cudii Biblia, tobi de ca libru ni maʼ xadxí nuu ne ni runibiáʼ ca religión ca.

Naquiiñeʼ cuiluʼ tu guni adorarluʼ

Biblia na naquiiñeʼ guiníʼ ique chaahuiʼ binni ne guni ni jneza pa racalaʼdxiʼ guni adorar Dios ni dxandíʼ. Josué, ti hombre ni biʼniʼ ni na Dios, gúdxibe ca israelita: «Lacuí yannadxí tu racaláʼdxitu gúnitu ni na, pa zúnitu ni na ca dios casi biʼniʼ ca bixhoze gólatu dxi nuurucaʼ chericaʼ Guiiguʼ ca la? o ni na ca dios stiʼ ca amorreu ra nabézatu yanna. Peru naa ne ca binnilidxeʼ la? zúnidu ni na Jiobá». Gudiʼdiʼ si iza, Elías ni riguixhená que laaca gúdxibe ca binni que ca diidxaʼ riʼ: «Dede padxí nga qué guidxélatu tupeʼ nga gúnitu ni na pue. Pa Jiobá nga Dios ni dxandíʼ la? lachinanda laabe; peru pa Baal [ti dios cananeu] nácani la? lachinanda laa» (Josué 24:15, 16; 1 Reyes 18:21).

Ca textu ni maʼ bidúʼndanu ca ne xcaadxi, bicaani ca binni ni racalaʼdxiʼ guni ni na Dios guiníʼ ique chaahuicaʼ xi naquiiñeʼ gúnicaʼ. Ngaca nga ni naquiiñeʼ gúninu yanna. Pa racaláʼdxinu gúninu ni na Dios ni dxandíʼ la? naquiiñeʼ guni adorarnu laabe modo riuuláʼdxibe. Xi zanda gacané laanu guyúbinu xi religión gápanu. Ximodo zanda gánnanu tuu nga cani dxandíʼ cayuni adorar Dios jneza.

Cani runi adorar Dios jneza runibiáʼcabe laacaʼ pur ni rúnicaʼ

Ora caníʼ Jesús de ca binni ni runi adorar Dios jneza ne cani qué runi ni, gúdxibe cani zinanda laabe que sicaríʼ: «Ñee na tu zanda icá uva lu yaga guichi birubaʼ, o icá duʼga lu yaga bii la? Ndi nga laani: ti yaga ni nazaaca, zudii cuananaxhi galán, peru ti yaga yuudxu la? zudii cuananaxhi ni qué zaquiiñeʼ. [...] Nga runi rabe laatu, pur ni guni cabe zacabiáʼ tu tu laacabe». Nga runi, cani dxandíʼ runi adorar Dios runibiáʼcabe laacaʼ pur cani rúnicaʼ. Xii nga cani rúnicabe yaʼ (Mateo 7:16-20).

Primé, cani dxandíʼ runi adorar Dios jneza la? nadxiisaacaʼ. Jesús gudxi ca discípulo stiʼ: «Chi tixhe caʼ xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. Pa ganaxhii saa tu zacá la? zanna binni xpinne laatu». Cani dxandíʼ zinanda Cristu nadxiisaacaʼ, ne guiráʼ cani ruuyaʼ laacabe rudiicaʼ cuenta dxandíʼ religión stícabe (Juan 13:34, 35).

Nga runi, qué zanda guiníʼ íquenu ziuu dxi guinaaze cani dxandíʼ xpinni Cristu guiibaʼ para tindesaacaʼ. Ñee zacaca runi ca binni de xcaadxi religión la? Lu guiropa guendaridinde ni guca lu guidubi naca Guidxilayú riʼ, religión si ni qué liica nidinde raqué nga ca testigu stiʼ Jiobá. Hanns Lilje, ti hombre ni guca obispo stiʼ Iglesia Protestante ni nuu Hannover (Alemania), bicaa ca diidxaʼ riʼ de ca Testigu: «Laasicabe nga grupu ni zanda guiníʼ qué ñuu pur Tercer Reich, ne qué ñúnicabe ni pur cani maʼ biziidicabe». Dxi guca guendaridinde que, ca Testigu ni nuu ndaaniʼ stale guidxi qué ninacaʼ ñuucaʼ luni neca nabé bininácabe laacaʼ.

Xiruʼ guníʼ Jesús zusihuinni tuu nga cani dxandíʼ xpínnibe yaʼ. Lu oración stiʼ padrenuestro que guniʼbe: «Bixhoze du ni nuu ibáʼ, [«guisácapeʼ laluʼ. Biseendaʼ reinu stiluʼ»] ne gaca ni na luʼ. Cásica raca ni ibáʼ, zaqueca gaca ni ndaani guidxilayú». Ni bizeeteʼ Jesús primé nga guisaca lá Dios, Jiobá. Laaca guniʼbe zaquiiñeʼ Dios Reinu stiʼ ni nuu guibáʼ para gaca ni na lu guidubi naca Guidxilayú. Yanna riʼ nuu ti religión ni nabé runibiáʼ binni purtiʼ rusiidiʼ lá Dios nga Jiobá. Laaca rusiidini Reinu si stiʼ Dios nga zanda gacané para guibani binni nayecheʼ. Ñee nannuʼ xi religión ca la? Laacabe nga ca testigu stiʼ Jiobá, rusiidicabe ca diidxaʼ nacubi ne galán stiʼ Reinu ndaaniʼ 236 guidxi roʼ ni nuu lu Guidxilayú, ne rusaananécabe binni libru ne revista lu jma de tapa gayuaa setenta diidxaʼ (Mateo 6:9, 10; NM).

Laaca zinándacabe ejemplu stiʼ Jesús, purtiʼ qué riuucabe lu política ne ora ridinde binni. Sicaríʼ guníʼ Jesús de ca discípulo stiʼ: «Purti cadi zinanda cabe guidxilayú, casi naa laca cadi zinanda guidxilayú». Ca Testigu laaca runi crecaʼ Biblia nga Stiidxaʼ Dios, ne nánnacabe «irá Xquiʼchi Dios, Espíritu Santu uníʼ xi icá, ne nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios, ti iziidi chaahui ca xpinni Dios para ganda guni irá ni riree ndu» (Juan 17:14, 17; 2 Timoteo 3:16, 17).

Rihuínnica gunáʼ nga religión ni dxandíʼ

Guzéʼtenu caadxi cosa ni rusihuinni tuu nga ca binni cayuni ni na Dios ne nápacaʼ religión ni dxandí: nadxiisaacaʼ, rusisácacaʼ lá Jiobá, rucheechecaʼ stiidxaʼ Reinu, cadi zinándacaʼ guidxilayú ne runi crecaʼ ni cá lu Biblia. Ti gunaa guníʼ sicaríʼ despué de guniʼné ca testigu stiʼ Jiobá laa chupa chonna biaje: «Huayuuyaʼ stale religión ne ruluíʼ tobi si cani. Laasitu nga maʼ gadxé laatu».

Casi maʼ bidúʼyanu ca, cadi guiráʼ diʼ ca religión ca nga ruchíñacaʼ binni ra nuu ti Dios si. Peru nuu ti religión ni rihuinni maʼ gadxé lade guiráʼ ni, laacabe nga ca testigu stiʼ Jiobá, ne maʼ nácacabe jma de gadxe millón lu guidubi naca Guidxilayú. Cumu rusiidicabe ne rúnicabe ni na Biblia la? nga runi laasicabe cayúnicabe ni qué ganda guni xcaadxi religión o grupu. Xi laani yaʼ. Cayacanécabe binni de guiráʼ guidxi, ni riníʼ gadxé gadxé diidxaʼ, ne de guiráʼ raza para chuʼcaʼ tobi si ne guni adorarcaʼ Jiobá, tobi lucha Dios ni dxandíʼ. Ca Testigu ziuuláʼdxicaʼ gusiidicaʼ lii de Jiobá, gánnaluʼ xii nga riuuláʼdxibe gúninu ne chuʼluʼ nayecheʼ ora guni adorarluʼ laabe modo nabe. Ñee cadi dxandíʼ galán nga quixhe íquenu gúninu ni na Jiobá la?

[Ca dibuju/foto ni zeeda lu yaza 20]

Yaza 20: ti gunaa budista: © Yan Liao/Alamy; ti asceta hindú: © imagebroker/Alamy; yaza 21: ti hombre ni cayuundaʼ Corán: Mohamed Amin/Camerapix; ti hombre judiu: Todd Bolen/Bible Places.com

[Ra gucuaacabe dibuju o foto]

GENIA SAVILOV/AFP/Getty Images

[Ca dibuju/foto ni zeeda lu yaza 22]

Ti sacerdote ortodoxo caguu ndaayaʼ caadxi soldadu (Ucrania, 2004)

[Paraa gucuaacabe dibuju o foto ni zeeda lu yaza 23]

Ca testigu stiʼ Jiobá cayacanecaʼ binni de guiráʼ ladu guiziidiʼ de Dios ne de Reinu stiʼ