Gudiʼnu de guidubi ladxidoʼno ne chuʼnu nayecheʼ ora gúninu ni

APÓSTOL Pablu bicaa ximodo naquiiñeʼ gudiʼnu: «Cada tobi udii biaʼ ruluiʼlaʼdxiʼ, ne cadi acaná ladxidóʼ ti ma bidii ni, nin udii ni purti canaba cabe ni laa, purti nadxii Dios ni rudii ni laa de idubi ladxidóʼ» (2 Cor. 9:7). Jiobá qué rucaa diʼ binni guni adorar laa. Laabe rudiibe lugar guiale de ndaaniʼ ladxidóʼ ca xpínnibe gudiicaʼ laabe xiixa ne chuʼcaʼ nayecheʼ ora gúnicaʼ ni, zacá rusihuínnicaʼ cayuni adorarcaʼ laabe. Ne dede dxiqué nga maca riuulaʼdxiʼ ca xpínnibe gudii laabe xiixa. Guidúʼyanu chonna ejemplu.

Gulee si Jiobá ca israelita que de Egipto, gúdxibe laacaʼ guzaʼcaʼ ti tabernáculo ne gúdxibe laacaʼ gudiicaʼ guiráʼ ni iquiiñeʼ para gaca ni. Ne «guiráʼ cani biale de ladxidóʼ gudii» la? bidiicaʼ oro, plata, bigáʼ sticaʼ ne xcaadxi ofrenda. Nabé stale ni bidii ca binni que, dede guyuu tu gudxi laacabe maʼ cadi gudiirúcabe (Éxo. 35:5, 21; 36:6, 7).

Gayuaa iza despué gurí yuʼduʼ stiʼ Jiobá, dxi ca laaca bisihuinni xquídxibe racaláʼdxicaʼ guni adorarcaʼ laabe jneza. Rey David bidii stale cosa para gaca ni ne laaca gúdxibe xcaadxi israelita gudiicaʼ xiixa para gacanecaʼ. Ne zaqué bíʼnicabe ni, purtiʼ bidiicabe stale oro ne plata, ne yanna riʼ nisácacani jma de 100 mil millón de dólar. Xi guleendúcabe pur ni bíʼnicabe ca yaʼ. Biblia na guizáʼ biecheʼ ca israelita que purtiʼ de ladxidoʼcaʼ biale gudiicaʼ Jiobá ca ofrenda que (1 Cró. 29:3-9; 2 Cró. 5:1).

Ca primé xpinni Jesús que laaca zacaca bíʼnicaʼ. Lu Pentecostés stiʼ iza 33 que guyuunisa biaʼ chonna mil binni, ne stale de laacabe cadi nabézacaʼ Jerusalén. Para ganda guiaana ca binni ni qué gápapecaʼ bueltu que raqué ti guiziidirucaʼ de ni deruʼ cayuni crecaʼ la? cani maʼ naca xpinni Cristu bitoocaʼ ni nápacaʼ ne yenecaʼ bueltu que ra nuu ca apóstol. ¡Nabé biecheʼ Jiobá ora biiyaʼ modo bisihuínnicabe fe nápacabe ne pabiáʼ nadxiisaacabe! (Hech. 2:41-47.)

Dede yanna laaca cayúniruʼ ca xpinni Cristu zacaca, ne nayecheʼ rúnicabe ni para guni adorárcabe Jiobá jneza, laacabe rudiicabe tiempu stícabe, stipa stícabe ne cani nápacabe para gúnicabe xhiiñaʼ Reinu. Lu cuadru ni zeeda xagueteʼ ca zeeda caadxi modo zanda gúninu zacá.

MODO ZANDA GUDIʼNU

BUELTU NI RUDIʼNU PARA DXIIÑAʼ RACA LU GUIDUBI GUIDXILAYÚ

Stale tu riguixhe pabiáʼ bueltu gusaba ndaaniʼ ca caja ra cá «Dxiiñaʼ raca lu guidubi Guidxilayú».

Guiráʼ beeu ruseendaʼ ca neza binni ridagulisaa bueltu ni rudiicabe ca Betel ni ruuyaʼ dxiiñaʼ raca xquídxicabe. Ca binni gacalaʼdxiʼ la? laaca zanda guseendaʼ bueltu dirección riʼ: Watchtower Bible and Tract Society of New York, Inc., Attention Treasurerʼs Office, 25 Columbia Heights, Brooklyn, New York 11201-2483, o Betel ni ruuyaʼ dxiiñaʼ raca xquídxicabe. (Xcaadxi modo zanda gudii binni bueltu ni zeeda jma xagueteʼ ca laaca zanda guseendacabe cani Betel ni nuu xquídxicabe). Ca cheque ca naquiiñeʼ guseendacabe cani para «Watchtower» ne chécani dirección ni maʼ bizéʼtenu ca. Laaca zanda gudiicabe bigáʼ o xcaadxi cosa risaca nápacabe, ne ora gúnicabe nga la? naquiiñeʼ guseendacabe ti carta huiiniʼ para gusiénecabe cusigáʼdecabe cani.

ZANDA GUININU XIMODO GUDIʼNU

Nuu sti modo ni láʼ fideicomisu para gudiʼnu bueltu Watch Tower Bible and Tract Society of Pennsylvania para iquiiñeni lu dxiiñaʼ ni raca lu guidubi Guidxilayú, ne zanda guicaanu bueltu ca ora guinábanu ni. Para gánnaluʼ jma la? guníʼ ra Tesorería (Treasurerʼs Office) lu teléfono (718) 560-7500 o bicaa lu dirección ni maʼ bizéʼtenu lu párrafo gudiʼdiʼ ca.

XCAADXI MODO ZANDA GUDIILUʼ BUELTU

Aparte de ni maʼ guninu ca la? nuu xcaadxi modo zanda gudiʼnu bueltu para gaca xhiiñaʼ Reinu lu guidubi naca Guidxilayú, casi cani zeeda raríʼ:

Seguro. Zanda gucaʼnu lá Watch Tower Bible and Tract Society of Pennsylvania para guiaanané seguro de vida stinu o plan de jubilación.

Cuenta bancaria. Zanda uguʼnu ca certificado stiʼ depósito, cuenta bancaria ne cuenta stinu pur guca jubilarnu ca lu ti fideicomisu ne naquiiñeʼ gucaacabe ni para Watch Tower Bible and Tract Society of Pennsylvania o guséʼndanu bueltu lu cuenta ca ora gátinu, pa ca ley de xquídxinu gudii lugar gúninu zacá.

Acción ne bono. Zanda gusigáʼdenu acción ne bono Watch Tower Bible and Tract Society of Pennsylvania. Pa tuuxa racalaʼdxiʼ gucaa zudii acción ne bono stiʼ gati si la? laaca zanda gucaabe cheni ra maʼ bizéʼtenu ca.

Inmuebles. Zanda gudiʼnu cani nápanu ni zanda guidoo casi yoo, ne gábinu laacabe xi zanda gúnicabe para guicaacabe ni o pa nabézanu ndaaniʼ yoo ca la? zanda cuézanu ndaaniʼ ni dede dxi gátinu. Ante gudiʼnu xiixa yoo nápanu la? jma jneza guininu Betel.

Para ganda guicaanu xiixa bueltu cada iza. Zanda gudii binni bueltu o sti cosa risaca ni napa para ti corporación stiʼ ca testigu stiʼ Jiobá, peru cada iza biaʼ dxi guibani binni ca zanda guicaa ti ndaa bueltu. Ne qué zaguíxebe impuestu pa gudiibe bueltu casi guninu ca.

Testamentu ne fideicomisu. Zanda gudiʼnu xiixa ni nápanu casi layú o bueltu stinu Watch Tower Bible and Tract Society of Pennsylvania, ne nezalú ti notariu gudiʼnu testamentu stini o gucaʼnu laani nga beneficiariu lu ti fideicomisu. Ca fideicomisu ni rudiicabe xiixa religión la? zándaca maʼ qué zaguíxecabe impuestu stini.

Casi maʼ guninu ra cá «xcaadxi modo zanda gudiiluʼ bueltu» ca la? cani gudii bueltu ca nga naquiiñeʼ quixhe ximodo gudii. Maʼ guyáʼ ti folletu huiiniʼ lu inglés ne diidxastiá ni láʼ Donaciones planificadas para favorecer el servicio del Reino en todo el mundo ni gacané cani racalaʼdxiʼ gudii bueltu para dxiiñaʼ stiʼ ca testigu stiʼ Jiobá ni raca lu guidubi naca Guidxilayú. Lu folletu ca zeeda xi guiráʼ modo zanda gudiicabe bueltu o ximodo gusigáʼdecabe xiixa risaca. Stale binni ora maʼ biluxe biindaʼ cani ne ora maʼ guniʼné abogadu o contador stiʼ la? óraca maʼ randa rudiicaʼ bueltu sticaʼ para gacanecaʼ gaca xhiiñaʼ Reinu lu guidubi naca Guidxilayú ne gacanecaʼ casi ra guniná ti xu ne zacá maʼ qué runi cobrar gobiernu laacaʼ impuestu. Zanda guinábatu folletu ca ra Oficina de Donaciones Planificadas (Charitable Planning Office).

Pa racaláʼdxiluʼ gánnaluʼ jma la? bicaa o guníʼ ra Oficina de Donaciones Planificadas, dirección ni zeeda xagueteʼ riʼ o guníʼ ra nuu Betel ni ruuyaʼ dxiiñaʼ raca xquídxiluʼ.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Teléfono: (845) 306-0707