Gunnaxhii ca bíʼchiluʼ ne ca bizáʼnaluʼ ni qué runadiaga

XQUIDXI Dios naca ti familia nabé naroʼbaʼ casi ñaca bíʼchicabe ne bizáʼnacabe. Ne rúnicabe casi ca xpinni Dios de dxiqué casi Samuel, David, Sansón, Rahab, Moisés, Abrahán, Sara, Noé ne Abel. Lade familia ca nuu stale bíʼchinu ne bizánanu ni qué runadiaga. Casi ndaaniʼ guidxi Mongolia la? primeca ti guendaxheelaʼ ni qué runadiaga nga guca testigu stiʼ Jiobá raqué. Ne ndaaniʼ guidxi Rusia biʼniʼ ganar ca Testigu nezalú Tribunal Europeo de Derechos Humanos purtiʼ ca xpinni Cristu ni qué runadiaga qué nusaanacaʼ de ñúnicaʼ ni na Jiobá.

Cadi xadxí de bizulú «mozo ni nuu xpiaani ne ni runi jneza» de cabee libru ne revista lu videu lu diidxaʼ seña. Laaca raca guiráʼ ca guendaridagulisaa ca lu diidxaʼ seña (Mat. 24:45). Ni huayaca ca nabé huayacanécani ca xpinni Cristu ni qué runadiaga.a Ñee huaníʼ íqueluʼ pabiáʼ nagana guca para laacabe guiziidicabe ni dxandíʼ de Dios ne guibánicabe modo nabe ante guiree ca videu ca la? Ñee huaníʼ íqueluʼ xi zanda gúniluʼ para gacaneluʼ ca binni ni qué runadiaga ni nuu neza ra nabézaluʼ la?

Ante gápanu cani nuu yanna

Pa ninabadiidxaluʼ caadxi de ca xpinni Cristu ni qué runadiaga ne maʼ xadxí de nuucaʼ ndaaniʼ xquidxi Dios ximodo binibiaʼcaʼ laabe, xi raʼbuʼ nicábicabe lii yaʼ. Zándaca ñábicabe lii xi biʼniʼ sentírcabe ora biziidicabe tu lá Dios ne ximodo bicaa nga laacabe guchaacabe modo nabánicabe. Ne modo gucaneni laacabe cadi guireecabe ndaaniʼ xquidxi Dios ante chuʼ videu lu diidxaʼ seña ni nusiidiʼ laacabe cani jma nagana zeeda lu Biblia. Zándaca ñábicabe lii ximodo biʼniʼ sentírcabe dxi qué raca ca guendaridagulisaa ca lu diidxaʼ seña ne dxi qué ñuu tu nusiene laacabe xi cayeeteʼ lúcani. Lugar de nga la? guyuu tu gurí cuéʼcabe ne bicaa lu guiʼchiʼ ni cayeeteʼ lu ca guendaridagulisaa ca ti ganda guiénecabe cani. Zacá biziidiʼ ti xpinni Cristu de Dios biaʼ gadxe iza dede dxi yendá tobi ni nanna seña para bisiene laabe ni rieeteʼ lu ca guendaridagulisaa ca.

Ca xpinni Cristu ni maʼ nagola ni qué runadiaga rietenaláʼdxicaʼ pabiáʼ nagana guca para laacaʼ gucheechecaʼ diidxaʼ ra nuu binni ni runadiaga. Lu ti chú nácabe rinaazecabe ti ndaa guiʼchiʼ ra cá caadxi diidxaʼ, ne lu sti chú ca rinaazecabe revista Torre stiʼ ni rapa ne ¡Despertad! Ne nabé nagana guca para laacabe guʼndanécabe sti binni ni qué runadiaga purtiʼ ni napasícabe nga libru ne revista ni qué riene chaahuiʼ guirópacabe. Zándaca rietenalaʼdxiʼ stale de ca xpinni Cristu ni qué runadiaga pabiáʼ triste biʼniʼ sentircaʼ ora qué randa rusiénecaʼ xiixa, ne pur ngue maʼ qué randa riníʼrucaʼ de ni caziidicaʼ lu Stiidxaʼ Dios. Ne laaca nadxiicabe Jiobá, peru ni raca nagana para laacabe nga guiene chaahuicabe ximodo gúnicabe ni maʼ biziidicabe.

Neca zacá la? ca xpinni Cristu ni qué runadiaga ca qué huasaanacaʼ de gúnicaʼ ni na Dios (Job 2:3). De guidubi ladxidóʼcabe huayuni crécabe zacané Jiobá laacabe (Sal. 37:7). Ne yanna caguu ndaayabe laacaʼ jma de biaʼ guníʼ íquecabe ñúnibe.

Guníʼ ique pabiáʼ stipa biʼniʼ ti xpinni Cristu ni maʼ bichaganáʼ ne napa xiiñiʼ. Ante chuʼ videu lu diidxaʼ seña, laabe maca ruundanebe binnilídxibe. Sicaríʼ guníʼ xiiñibe: «Nabé nagana guca para bixhozeʼ guʼndané laadu, purtiʼ ni nápasibe nga libru ne revista para gusiidibe laadu. Stale biaje qué ñénebe cani biindabe. Ne cumu nahuiinidu la? qué ñanda diʼ ñácanedu laabe. Ne ora qué rusiene chaahuibe laadu xiixa la? laadu rábidu laabe cadi jneza nuube. Neca zacá, qué nusaanabe de ñuundanebe laadu, purtiʼ jma risaca para laabe gunibiáʼ chaahuidu Jiobá que guituílube pur qué guiene chaahuibe xiixa lu diidxaʼ inglés».

Sti ejemplu ni nápanu nga Richard, ti xpinni Cristu ni napa jma de 70 iza ni nabeza Brooklyn (Nueva York). Neca qué ruuyabe ne qué runadiágabe la? guiráʼ cani ridagulisaanebe nanna qué liica riaadxabe ca guendaridagulisaa ca. Ne ora riebe ca guendaridagulisaa ca riguíʼbabe lu metru stúbibe ne rugábabe panda biaje ruzuhuaadxini para gánnabe paraa guiétebe. Ti biaje dxi nabé nananda ne biaba stale hielu maʼ qué ñaca diʼ guendaridagulisaa. Ne gúdxicabe ni guiráʼ ca binni ridagulisaa, peru qué ñanda ñábicabe laabe pur xiixa ni guca. Ora bietenaláʼdxicabe qué ñábicabe laabe la? yeyúbicabe laabe ne ora yendácabe ra Yoo stiʼ Reinu biiyacabe zuhuaabe raqué, cabézabe ora guixeleʼ puertaʼ stini. Ora gunabadiidxacabe laabe xiñee bireebe de ralídxibe neca cayaba hielu que la? laabe bicábibe laacaʼ: «Purtiʼ nadxieeʼ Jiobá».

Xi zanda gúniluʼ

Pa nabeza caadxi binni ni qué runadiaga neza ra nabézaluʼ, xiñee qué gúniluʼ stipa pur guiziidiluʼ caadxi seña. Ca binni ni qué runadiaga ca nabé nadóʼcabe ne nánnacabe gusiidicabe binni seña sin guireecabe gana. Zándaca guidxélaluʼ tuuxa binni ni qué runadiaga ora maʼ zigucheecheluʼ diidxaʼ. Xi zanda gúniluʼ óraca yaʼ. Biyubi ximodo guiníʼneluʼ laacabe. Biniibi luluʼ ne naluʼ ora guiníʼneluʼ laacabe, ne bicaa xiixa lu guiʼchiʼ, biʼniʼ xiixa dibuju ne biluíʼ laacabe xiixa foto. Neca gudiiluʼ cuenta casi ora qué racalaʼdxiʼ binni ca guiziidiruʼ de Biblia la? bizeeteʼ lú tuuxa Testigu ni qué runadiaga o ni nanna seña xi guníʼneluʼ laabe. Xiñee yaʼ. Purtiʼ jma ziuuláʼdxibe guiziidibe de Biblia pa gábicabe ni laabe lu stiidxabe.

Zándaca caziidiluʼ diidxaʼ seña ne rieluʼ lade ti neza binni ridagulisaa lu diidxaʼ ca. Ximodo zanda gúniluʼ para guiziidiʼ chaahuiluʼ ni yaʼ. Neca nuu cani rucheeche diidxaʼ ni runadiaga ra ridagulisaaluʼ, xiñee qué guiníʼneluʼ laacaʼ ne seña. Nga jma zacané lii guiníʼ íqueluʼ ximodo jma jneza gúniluʼ ca seña ca. Ziuu biaje zuquiinde lii guiniʼluʼ lugar de gúniluʼ seña. Peru cadi naquiiñeʼ guireeluʼ gana purtiʼ zacá nga riziidiʼ binni sti diidxaʼ, pa gúniluʼ zacá zanna chaahuiluʼ diidxaʼ ni caziidiluʼ ca.

Pa gúniluʼ stipa pur iquiiñeluʼ ca seña ni maʼ biziidiluʼ la? zusihuínniluʼ nadxiiluʼ ca xpinni Cristu ni qué runadiaga ne runi respetarluʼ laacaʼ. Bixuiʼlú si pabiáʼ triste runi sentírcabe guiráʼ dxi ora qué riénecabe cani runinécabe dxiiñaʼ o cani rinécabe scuela. Sicaríʼ guníʼ tobi de laacabe: «Guiráʼ dxi ruuyaʼ riníʼ binni. Stale biaje runeʼ sentir stubeʼ ne casi ora rúnicabe menu naa, nga runi nabé ridxiicheʼ. Ne qué randa riniéʼ ximodo runeʼ sentir nuu biaje». Nga runi, naquiiñeʼ gúninu stipa pur guni sentir ca xpinni Cristu ni qué runadiaga ca galán ora maʼ nuunenu laacabe ra ridagulisaanu, ti zacá cadi guiziidisícabe de Dios, sínuque guiniʼnécabe xcaadxi xpinni Cristu ne guni sentírcabe galán ládecaʼ (Juan 13:34, 35).

Laaca zacaca naquiiñeʼ gúninu ne ca grupuhuiiniʼ ni qué runadiaga ni nuu ra ridagulisaa ca xpinni Cristu ni riníʼ. Ra ridagulisaacabe ca naquiiñeʼ chuʼ tu gutiixhi ni guieeteʼ racá lu diidxaʼ seña. Para ganda guiene ca xpinni Cristu ni qué runadiaga ca ni cayeeteʼ la? ribícabe delante purtiʼ zacá qué ziuu tu guchiiñaʼ laacabe ora maʼ cayuuyacabe binni ni cayuni seña ca ne stobi ni cudii libana ca. Ra huayúnicabe ni zacá rihuinni nagueenda riaa xcaadxi binni ridagulisaa gácani zacá, ne qué ruchiiñadini laacaʼ. Laaca rutiixhicabe ni rieeteʼ lu ca guendaridagulisaa naroʼbaʼ ca lu diidxaʼ seña. Nabé risaca dxiiñaʼ ni runi ca xpinni Cristu ni rutiixhi diidxaʼ ca, purtiʼ rúnicabe stipa pur guiene binni ni, casi ñaca nusiene ti xpinni Cristu ni qué runadiaga ni.

Zándaca nuuluʼ lade ti neza binni ridagulisaa ra nuu ti grupu lu diidxaʼ seña o ra nuu caadxi si xpinni Cristu ni qué runadiaga ne rutiixhicabe cani rieeteʼ lu guendaridagulisaa ca para guiénecaʼ cani. Xi zanda gúniluʼ para gusihuínniluʼ rizaaláʼdxiluʼ ca xpinni Cristu ni qué runadiaga ca yaʼ. Zanda guni invitarluʼ laacabe ralídxiluʼ ne pa ganda la? biziidiʼ caadxi seña. Cadi guituíluluʼ purtiʼ si qué gánnaluʼ diidxaʼ seña ca. Gunna dxichi despué maʼ zanda guiníʼneluʼ laacabe ne seña ne ziuuluʼ nayecheʼ ora gusihuínniluʼ nadxiiluʼ laacabe (1 Juan 4:8). Ca xpinni Cristu ni qué runadiaga ca nápacabe stale ni gusiidicabe laanu. Riuuláʼdxicabe guiniʼnécabe binni, nabé nuu xpiaanicabe ne nayéchecabe. Ti xpinni Cristu ni qué runadiaga bixhoze ne jñaa guníʼ sicaríʼ: «Dede dxi guleʼ nuaaʼ lade binni ni qué runadiaga ne huasiidicabe naa stale cosa ni qué ziuu dxi gusiideʼ laacabe. Zanda guizíʼdinu stale de ca bíʼchinu ne bizáʼnanu ni qué runadiaga».

Nadxii Jiobá ca binni ni qué rusaana de guni ni nabe neca binni ni runadiaga o ni qué runadiaga laacabe. Cumu nabé napa ca xpinni Cristu ni qué runadiaga ca fe ne runi huantarcaʼ la? nga racané guihuinni sicarú xquidxi Jiobá. Nga runi, ¡gunnaxhii laacabe!

[Cani cá ñee yaza]

[Dibuju/foto ni zeeda lu yaza 31]

Jma nagueenda ziuulaʼdxiʼ ti binni ni qué runadiaga guiziidiʼ de stiidxaʼ Reinu pa gábicabe ni laa lu diidxaʼ seña

[Ca dibuju/foto ni zeeda lu yaza 32]

Naquiiñeʼ gúninu stipa pur guni sentir ca xpinni Cristu ni qué runadiaga ca galán ora ridagulisaanenu laacaʼ