Cuzaaniʼ lú Jiobá luguiácabe

LÚ BINNI napa jma de treinta músculo. Ne ora ruxídxinu riquiiñenu catorce de laacani. Pa qué ñuucani la? qué ñanda diʼ nininu diidxaʼ. Peru ca binni ni qué runadiaga ca, riquiiñecabe ca músculo ni nuu lúcabe para guiníʼnecabe binni ne para gúnicabe xcaadxi cosa. Ora runiibicabe lúcabe ne nácabe la? randa rusiénecabe binni intiica ni gacaláʼdxicabe. Stale binni ridxagayaa modo randa rusiénecabe xiixa ne ca seña ca, dede cosa ni nagana rusiene chaahuicabe.

Ca dxi stinu riʼ stale binni ni qué runadiaga cayuuyacaʼ lú sti binni ni jma cusiene laacaʼ stale cosa, laabe nga Jiobá (Lam. 2:19). Cadi málasi nga cusihuinni Jiobá zacá laa. Laabe maca rusihuínnibe nadxiibe ca binni ni qué runadiaga. Ne zacá huahuinni ni dede dxi guyuu guidxi Israel que (Lev. 19:14). Ca dxi stinu riʼ laaca rusihuinni Jiobá nadxii ca binni ni qué runadiaga purtiʼ racaláʼdxibe gulabe «irá binni, ne ganna ca ni dxandíʼ» (1 Tim. 2:4). Ne stale de cani qué runadiaga ca casi ñaca maʼ biiyacaʼ lú Jiobá purtiʼ maʼ biziidicaʼ de laabe. Ximodo nga maʼ biziidicabe de laabe pa qué randa runadiágacabe Stiidxabe yaʼ. Para gánnanu ximodo la? guidúʼyanu pabiáʼ risaca para laacabe guiziidicabe seña.

Runadiágacabe ne lúcabe

Stale nga tu riníʼ mal de ca binni ni qué runadiaga ne ca seña ni rúnicaʼ, peru cadi jneza diʼ cani riníʼcabe. Ca binni ni qué runadiaga ca randa rusacaʼ carru. Peru raca nagana para laacabe gánnacabe xi caníʼ binni ora guniibi ruaa. Seña ca cadi casi braille ni ne laaca cadi puru runiibinaʼ si binni, sínuque nuu ni riníʼcani. Cadi ti clase si seña runi binni lu guidubi naca Guidxilayú, sínuque cada guidxi napa seña stiʼ.

Ñee randa ruundaʼ ca binni ni qué runadiaga ca guiʼchiʼ la? Nuu caadxi nanna guʼndaʼ, peru jma stale de laacabe raca nagana para laacaʼ gúnicaʼ ni. Xiñee yaʼ. Purtiʼ diidxaʼ ni riníʼ binni nga ni rucaa. Guiníʼ íquenu ximodo riziidiʼ ti baʼduhuiiniʼ ni randa runadiaga guiníʼ stiidxaʼ. Dede gálebe nuube lade binni ni caniʼné laabe guiráʼ ora, ne pur nga nagueenda riziidibe guiniʼbe chupa chonna diidxaʼ. Ne cumu nabé runadiágabe riníʼ binni la? qué raca nagana para laabe guiziidibe guiniʼbe. Nga runi, ora maʼ cuzulú cayuundabe la? rusiidicabe laabe ximodo nga ricá diidxaʼ ni maca riniʼbe ca.

Yanna guníʼ ique nuuluʼ ndaaniʼ ti guidxi ra riníʼcabe ti diidxaʼ ni qué riéneluʼ ne uguucabe lii ndaaniʼ ti cuartu de vidriu ra qué zanda gunadiágaluʼ gastiʼ. Guiráʼ dxi maʼ zeʼ binni ra nuuluʼ para guiniʼné lii, peru lii qué randa runadiágaluʼ laacabe; ni randa si ruuyaluʼ nga modo runiibi ruaacabe. Ne ora gúʼyacabe cadi cayéneluʼ laacabe la? rucaacabe lu ti ndaa guiʼchiʼ ne ruluíʼcabe ni lii purtiʼ ruzulúcabe zaqué maʼ ziéneluʼ laacabe. Ñee raʼbuʼ zacá ziéneluʼ laacabe la? Nagana para guiéneluʼ laacabe. Xiñee yaʼ. Purtiʼ ni bicaacabe lu guiʼchiʼ ca ti diidxaʼ ni qué liica huayunadiágaluʼ ni. Zacá nga rizaaca stale binni ni qué runadiaga.

Seña ca nga ni jma jneza iquiiñeʼ binni para ganda guiene ca binni ni qué runadiaga ca laacaʼ. Ora runi ti binni ni qué runadiaga seña stiʼ la? riquiiñebe lugar ra zuhuaabe para guniibinabe ne gusiénebe ni racaláʼdxibe. Ca seña ni rúnibe ora runiibibe cuerpu stibe ne lube la? zeeda gaca cani ti diidxaʼ ni napa gramática stiʼ. Zacá nga randa rábicabe binni xiixa ni racaláʼdxicabe.

Ne ora maʼ cayabi binni ni qué runadiaga ca sti binni xiixa la? guiráʼ modo runiibi nabe, modo runiibibe cuerpu stibe ne lube ca nuu xi riníʼcani. Cadi runiibisibe lube para gusiene chaahuibe xiixa, sínuque zacapeʼ nga stiidxabe. Guidúʼyanu ti ejemplu. Nuu guidxi cani runi seña ca nápacaʼ xidé guindísacaʼ ceja sticaʼ para guinabadiidxacaʼ xiixa ni gucaa si binni guiníʼ ique o para guicabisícabe ya o coʼ. Peru para guinabadiidxacabe xiixa casi «tu», «xi», «paraa», «padxí», «xiñee» o «ximodo» la? rindétecabe ceja stícabe. Ne modo runiibi ca binni ni qué runadiaga ca ruaacaʼ rusihuínnicaʼ pabiáʼ naroʼbaʼ xiixa o pabiáʼ naroʼbaʼ guca xiixa. Modo runiibi ique binni ni qué runadiaga ca, modo runiibi xíʼquebe, modo runiibi xhágabe, modo runiibi lágabe ne modo runiibi lube racanécani sti binni guiene ni racaláʼdxibe.

Guiráʼ modo rúnicabe ca racanécani binni ni cayuuyaʼ laacabe guiene chaahuicaʼ ni cayábicabe laacaʼ, randa rábicabe binni poesía, diidxaʼ ni riquiiñeʼ binni guzá scuela, laaca randa riníʼcabe nadxiicabe tuuxa, randa riníʼcabe xiixa ni gusixidxi tuuxa, ne laaca randa riníʼcabe de xiixa ni ruuyaʼ binni ne ni qué ruuyaʼ.

Ca videu ni cusiidiʼ binni ximodo guibani

Ora riquiiñecabe seña para gusiidicabe ca binni ni qué runadiaga ca de Jiobá la? casi ñaca ñunadiágacabe cani ne rápacabe fe Dios. Nga runi ca testigu stiʼ Jiobá rúnicaʼ stipa pur gusiidicaʼ cani qué runadiaga ca de Stiidxaʼ Dios lu guidubi naca Guidxilayú ne ribeecaʼ videu ni gacané laacabe (Rom. 10:14). Yanna riʼ, lu guidubi naca Guidxilayú nuu 58 grupu ni rutiixhi diidxaʼ seña ne nuu stale libru ne revista lu DVD lu 40 diidxaʼ de seña ca. Ñee cabeendúcabe xiixa pur ni cayúnicabe la?

Sicaríʼ guníʼ Jeremy, ti hombre ni qué runadiaga bixhoze ne jñaa: «Rietenalaʼdxeʼ dxi napaʼ 12 iza, guyuu bixhozeʼ ndaaniʼ ti cuartu chupa chonna hora purtiʼ gucaláʼdxibe ñénebe chupa chonna párrafo stiʼ ti revista Torre stiʼ ni rapa. Málasi bireebe ndaaniʼ yoo que ne cayéchebe gúdxibe naa ne seña: “¡Maʼ bieneʼ ni! ¡Maʼ bieneʼ ni!”, óraque bisiénebe naa ni na ca párrafo que. Nagueendaca biindaʼ revista que ne gudxeʼ laabe ne seña: “Apá, zuluaʼsiaʼ cadi nga diʼ nani”. Ante nusieneʼ laabe jma la? bicueezabe naa, bieequebe zebe ne guyuube ndaaniʼ cuartu que sti biaje para ganda guiénebe tema que. Qué ziuu dxi gusiaandaʼ pabiáʼ triste guyuube pur ni gúcabe que, ne guizáʼ bidxagayaa ora biiyaʼ bíʼnibe stipa pur guiénebe ni. Yanna ra maʼ cutiixhicabe ni na ca libru ne revista ca lu DVD lu diidxaʼ seña ca la? maʼ randa riene chaahuibe cani. Para naa gastiʼ sti cosa jma galán que guuyaʼ nayecheʼ nuube ora maʼ caniʼbe ni runi sentirbe pur Jiobá».

Guidúʼyanu yanna ni bizaaca ti guendaxheelaʼ Testigu, laacabe guníʼnecabe Jessenia, ti dxaapahuiiniʼ ni qué runadiaga de guidxi Chile. Gudxisícabe jñaa Jessenia pa zaa guiníʼnecabe laa la? biluíʼcabe laabe ti DVD ra zeeda Libru stinneʼ de ca historia stiʼ Biblia lu diidxaʼ seña ni riquiiñecabe guidxi ca. Sicaríʼ guníʼcabe ni bizaaca despué: «Ora biʼyaʼ Jessenia videu que bixidxi, ne de raqué biinaʼ. Óraque gunabadiidxaʼ jñaabe laabe xiñee cayuunabe, laabe gúdxibe jñaabe cayuunabe purtiʼ nabé cayuuláʼdxibe ni cayuuyabe que. Óraque gunna jñaabe dxandíʼ cayénebe guiráʼ ni cayuuyabe que».

Ndaaniʼ ti guidxihuiiniʼ ni nuu Venezuela nabeza ti guendaxheelaʼ ne nápacaʼ ti dxaapahuiiniʼ ne maʼ nacaxiiñiʼ gunaa que sti biaje. Gunaa que qué runadiaga ne cumu qué gapapécabe bueltu la? guníʼ íquecabe gutiidiʼ xiiñibe. De raqué guyé chupa ni rucheeche diidxaʼ ralídxicabe, ne sin gánnacaʼ xi cá ique guendaxheelaʼ riʼ, biluíʼcabe laacaʼ ndaa 12 stiʼ videu ni láʼ Xi canabaʼ Dios lii guʼnuʼ lu diidxaʼ seña de guidxi Venezuela, ra cusiene pa jneza ruuyaʼ Dios gutiidiʼ xiiñiʼ binni ne guuti. Despué bidii gunaa que xquíxepeʼ laacabe pur biluíʼcabe laa tema que, purtiʼ gucané ngue laabe ne xheelabe guchaacabe modo guníʼ íquecabe que. Zacá ni, pur ni bíʼyacabe lu DVD que nga bilá xiiñicabe que.

Lorraine, ti gunaa Testigu ni qué runadiaga, guníʼ sicaríʼ: «Ora biziideʼ cani zeeda lu Biblia beeda gácacani para naa casi ora ñuuni binni ti rompecabeza. Xi si la? casi ñaca cayaadxa xcaadxi ndaa stini, purtiʼ qué ñeneʼ chaahueʼ ni na Biblia. Peru gucuaasiaʼ ca videu ni nuu lu diidxaʼ seña que maʼ bieneʼ ni nani, casi ñaca nidxelaʼ ca ndaa ni cayaadxaʼ para gusaaʼ rompecabeza que». Yanna, George, ti hombre ni qué runadiaga ne maʼ ziné treinta y ocho iza de naca testigu stiʼ Jiobá, guníʼ sicaríʼ: «Ora stúbiluʼ guiéneluʼ xiixa la? jma rucaa nga lii guni creluʼ jneza ni cayúniluʼ ne zusiécheni lii. Ca DVD ni nuu lu diidxaʼ seña ca nga ni jma huayacané naa chuaaʼ jma gaxha de Jiobá».

«¡Ti guendaridagulisaa ni guca lu stiidxapiaʼ!»

Ca testigu stiʼ Jiobá cadi ribeesicaʼ videu lu diidxaʼ seña, sínuque laaca nápacabe neza binni ridagulisaa ra rusiidicabe puru si ne seña. Yanna nuu jma de ti gayuaa mil ti gayuaa neza binni ridagulisaa lu guidubi naca Guidxilayú. Ne racá riziidiʼ ca xpinni Dios cani dxandíʼ rusiidiʼ Biblia lu diidxaʼ ni riníʼcabe, ti diidxaʼ ni rusihuinni modo riníʼ íquecabe, costumbre stícabe ne modo nabánicabe.

Xi huabeendú xquidxi Dios pur huayuni neza binni ridagulisaa lu diidxaʼ seña yaʼ. Ejemplu stiʼ Cyril zuluíʼ laanu xi huabeendú xquidxi Dios. Xpinni Cristu ca guyuunísabe lu iza 1955 ne stale iza bíʼnibe stipa pur guiénebe ca libru ne ca revista ca. Laabe qué nusaanabe de ñebe ca guendaridagulisaa ca neca cadi guiráʼ diʼ ora guyuu tu nusiene laabe ne seña xi cusiidicabe raqué. Ora guirutiʼ tu gusiene laabe ne seña la? xcaadxi xpinni Cristu rucaacaʼ lu ti guiʼchiʼ ni caníʼ ca binni ni cudii libana que. Peru lu iza 1989 dxi maʼ ziné Cyril treinta y cuatro iza de cayuni ni na Jiobá bizulú primé neza binni ridagulisaa lu diidxaʼ seña ndaaniʼ guidxi Nueva York, ne lu guidubi naca Estados Unidos guidxi ca si nga guyuu neza binni ridagulisaa lu diidxaʼ seña. Ximodo runi sentir Cyril dede dxi guyuube lade neza binni ridagulisaa ca yaʼ. Sicaríʼ guniʼbe: «Casi ñaca nireeʼ ndaaniʼ ti guiʼxhiʼ o casi ñaca nireeʼ de ti lugar ra nacahuidóʼ. Guníʼ ique si: ¡ti guendaridagulisaa ni guca lu stiidxapiaʼ!».

Ca neza binni ridagulisaa lu diidxaʼ seña ca nga ra riuu ca binni ni qué runadiaga para guni adorarcaʼ Dios ne guizíʼdicaʼ de laabe. Ndaaniʼ guidxilayú riʼ rúnicabe menu cani qué runadiaga ca, peru lade ca neza binni ridagulisaa ca ratadxí ladxidóʼcabe, rápacabe xhamígucabe ne tu gábicabe xi cayácacabe. Racá zanda guizíʼdicabe, ne guiníʼ íquecabe jneza ne gúnicabe xhiiñaʼ Dios jma jneza. Stale de laacaʼ huayácacaʼ precursor. Ne xcaadxi huayecaʼ ndaaniʼ xcaadxi guidxi para gacanecaʼ cani qué runadiaga gunibiaʼcaʼ Jiobá. Ne nuu tu maʼ nanna gusiidiʼ chaahuiʼ, quixhe chaahuiʼ dxiiñaʼ ne gaca pastor, ne dede huacaacaʼ dxiiñaʼ risaca lade ca binni ridagulisaa.

Ndaaniʼ guidxi Estados Unidos nuu jma de 100 neza binni ridagulisaa ne biaʼ 80 grupu lu diidxaʼ seña. Ndaaniʼ guidxi Brasil nuu biaʼ 300 neza binni ridagulisaa ne jma de 400 grupu. Ne ndaaniʼ guidxi Méjicu nuu jma de 300 neza binni ridagulisaa, ne ndaaniʼ guidxi Rusia nuu jma de 30 neza binni ridagulisaa ne 113 grupu. Cani guninu ca cusihuínnicani pabiáʼ cadale ca neza binni ridagulisaa lu diidxaʼ seña ni nuu lu guidubi naca Guidxilayú.

Laaca raca guendaridagulisaa naroʼbaʼ lu diidxaʼ seña. Iza gudiʼdiʼ ca guca jma de 120 guendaridagulisaa de chonna gubidxa lu guidubi naca Guidxilayú. Lu ca guendaridagulisaa ca ruuyaʼ cani qué runadiaga ca modo nadxiisaa ca xpinni Dios lu guidubi naca Guidxilayú casi ti familia, ne ricaacabe cani rudii xquidxi Dios laacabe para guiziidicabe.

Ti xpinni Cristu ni láʼ Leonard ni maʼ napa jma de veinticinco iza de guyuunisa ne qué runadiaga, guníʼ sicaríʼ: «Neca maca nannaʼ Jiobá nga Dios ni dxandíʼ la? qué huayeneʼ chaahueʼ xiñee rudiibe lugar chuʼ guendananá. Ne pur nga guyuu biaje bidxiicheniaʼ laabe. Peru lu ti guendaridagulisaa de chonna gubidxa ni guca lu diidxaʼ seña gudiʼdiʼ ti libana ni gucané naa guieneʼ xiñee rudii Dios lugar chuʼ guendananá. Ora biluxe libana que, bidii xheelaʼ ti codo naa ne cuxídxibe gúdxibe naa: “Maʼ biéneluʼ ni yanna la?”. Ne dxiqueruʼ nga gudxeʼ laabe maʼ bieneʼ ni. Naa qué huasaanaʼ de gannaxhieeʼ Jiobá, peru ni qué ñanda ñeneʼ nga xiñee cudiibe lugar chuʼ cosa malu. Peru yannadxí maʼ bieneʼ ni. ¡Galan bineʼ qué ñuu dxi nixeleʼ de Jiobá!».

Nabé cudiicabe xquíxepeʼ Jiobá

Yanna, ora riziidiʼ cani qué runadiaga ca de Jiobá, xi ruuyacabe de laabe yaʼ. Ruuyacabe nadxiibe binni, riabe laacaʼ, rúnibe ni jneza, qué rusaanabe laacaʼ, nacháʼhuibe ne ruuyarúcabe xcaadxi cosa de laabe.

Guiráʼ xixé ca Testigu ni qué runadiaga ni nuu lu guidubi naca Guidxilayú casi ñaca cayuuyacaʼ lú Jiobá ne zeʼ ora jma nayaʼniʼ zuuyacabe lube. Jiobá nabé nadxii laacabe, nga runi cuzaaniʼ lúbe luguiácabe (Núm. 6:25). ¡Nabé rudiicabe xquíxepeʼ Jiobá pur binibiáʼcabe laa!

[Ca dibuju/foto ni zeeda lu yaza 25]

Nuu jma de ti mil ti gayuaa neza binni ridagulisaa lu diidxaʼ seña lu guidubi naca Guidxilayú

[Ca dibuju/foto ni zeeda lu yaza 26]

Cuzaaniʼ lú Jiobá luguiáʼ cani qué runadiaga