Nuu biaje naquiiñeʼ guyúbinu binni para güínenu laa de stiidxaʼ Dios
1. Xiñee nuu neza binni ridagulisaa para chigusiidiʼ binni de Dios lu cada diidxaʼ.
1 Gucuaa si ca discípulo stiʼ Jesús espíritu santu lu Pentecostés stiʼ iza 33 que, «bizulú uníʼ cabe adxé adxé idioma» para gunda guniʼnécabe ca binni ni zeeda de sti guidxi ni guyé saa que (Hech. 2:4). Pur ni guca ca, guyuunisa chonna mil binni. Ne laaca galán gánnanu stale de ca binni que riniʼcaʼ stiidxacaʼ ne zándaca laaca riniʼcaʼ hebreu o griegu. Peru ni gucalaʼdxiʼ Jiobá nga gucaadiaga ca binni que stiidxaʼ Reinu lu stiidxacaʼ. Ne nanna dxíchinu tobi de ca razón pur gúcani zacá nga jma riná binni gucaadiaga ora guiniʼnécabe laa lu stiidxaʼ. Nga runi, nuu neza binni ridagulisaa para chigusiidiʼ binni de Dios lu cada diidxaʼ (biiyaʼ ni rizaané Xhiiñaʼ Reinu ni Rúninu stiʼ febrero 2007, yaza 8, párrafo 1, 2). Ti grupu ni riníʼ diidxaʼ de sti guidxi nuucabe ndaaniʼ ti neza binni ridagulisaa, nga runi laaca rucheechecabe diidxaʼ ra riecaʼ, peru laaca rucheechecabe diidxaʼ ra rié xcaadxi neza binni ridagulisaa ni nuu gaxha.
2. 1) Xi naquiiñeʼ gúninu para gánnanu paraa nuu ca binni ni riníʼ sti diidxaʼ ne pora naquiiñeʼ gúninu zacá. 2) Ximodo zanda gacanesaa ca binni ridagulisaa ni nuu ra riníʼ binni gadxé gadxé diidxaʼ. 3) Xi naquiiñeʼ gúninu pa guidxélanu tuuxa ni riníʼ sti diidxaʼ ne racalaʼdxiʼ guiziidiʼ jma.
2 Cani rucheeche diidxaʼ ra riníʼ binni ti diidxaʼ si la? randa riecaʼ de yoo pur yoo. Peru casi cani nabeza ca lugar ra riníʼ binni gadxé gadxé diidxaʼ, zándaca naquiiñeʼ gudiicabe lugar chigucheeche xcaadxi neza binni ridagulisaa ni riníʼ sti diidxaʼ ra riécabe. Pa ora canagucheecabe diidxaʼ guidxélacabe tuuxa ni riníʼ sti diidxaʼ la? zanda gucaacabe labe ne paneza ralídxibe ti chiganna ca xpinni Cristu ni riníʼ stiidxabe laabe. Peru cadi guiaandaʼ laanu cani naquiiñeʼ guyubi laacabe nga ca neza binni ridagulisaa o grupu ni riníʼ stiidxacabe (biiyaʼ cuadru ni láʼ «Gacanésaanu»). Nga runi, laacabe nga naquiiñeʼ gúnicabe censu, o guyúbicabe ca binni ni riníʼ xiixa diidxaʼ ne gucaacabe tu lacaʼ ne paraa nabézacaʼ. Chiguidúʼyanu ximodo zanda gúninu ni.
3. Ximodo zanda gánnacabe pabiáʼ tiempu naquiiñeʼ gaca censu ca. Ñee naquiiñeʼ gácani guiráʼ ra nexheʼ gucheechecabe diidxaʼ la?
3 Xi naquiiñeʼ gaca para guidxela ca binni ca. Para gánnacabe pabiáʼ tiempu zanda guni censárcabe ca lugar ca la? naquiiñeʼ gúʼyacabe caadxi cosa, casi panda binni riníʼ diidxaʼ ca. Panda xpinni Cristu nuu ndaaniʼ neza binni ridagulisaa o grupu ra riníʼcabe diidxaʼ ca. Panda binni maʼ nápacabe lá ne ra nabeza. Ne cadi caquiiñepeʼ chúʼcabe guidubi ra nexheʼ gucheechecabe diidxaʼ, sínuque zándaca jma galán chécabe ra jma nuu binni ni riníʼ diidxaʼ ni canayúbicabe ca ne ca lugar ni cadi nuu zítupeʼ. Para ganda gaca nga la? naquiiñeʼ quixhe chaahuicabe modo gucheechecabe diidxaʼ ca lugar ca ti ganda gacanécabe jma binni gunibiaʼcaʼ lá Jiobá (Rom. 10:13, 14).
4. 1) Ximodo naquiiñeʼ quixhe chaahuicabe gaca censu. 2) Bizeeteʼ caadxi modo zanda guyúbinu ca binni riníʼ sti diidxaʼ.
4 Para cadi gápacabe chupa dxiiñaʼ la? ca binnigola ca, ne jmaruʼ si binnigola ni ruuyaʼ modo rireeche diidxaʼ, naquiiñeʼ quixhe chaahuicaʼ ximodo gaca censu ca ne gúʼyacaʼ cayaca ni (1 Cor. 9:26). Ndaaniʼ ca grupu ni riníʼ diidxaʼ ni riníʼcabe sti guidxi la? ca binnigola stiʼ ca binni ridagulisaa ra nuu grupu ca zabicaʼ ti binni ni zanda guni dxiiñaʼ ca, ne naquiiñeʼ gácabe ti binnigola o ti siervu ministerial. Stale neza binni ridagulisaa ne grupu maʼ nápacaʼ ti modo para guyúbicaʼ ca binni riníʼ sti diidxaʼ. Zándaca riquiiñecabe ti directorio o Internet para guyúbicabe ca lá ni zándaca rusihuinni padé laacaʼ ne xi diidxaʼ riniʼcaʼ. De racá, riniʼnécabe laacaʼ pur teléfono o rigánnacabe laacaʼ para gúʼyacabe pa zanda cúʼcabe laacaʼ lu lista ra cá ca binni ni chigánnacabe. Ziuu biaje zanda gacané neza binni ridagulisaa ra nuu grupu ca guni censu (biiyaʼ cuadru ni láʼ «Xi zanda gaca para guidxela ca binni ni riníʼ sti diidxaʼ»).
5. 1) Xi naquiiñeʼ ganna cani chiguni censu. 2) Xi zanda gábicabe binni.
5 Dede ante naquiiñeʼ gánnacabe xipeʼ nga chigúnicabe ora gaca censu ca. Primeru la? naquiiñeʼ guzuchaahuicabe cásica ora rigucheechecabe diidxaʼ, purtiʼ censu ca nga sti modo para gaca dxiiñaʼ ca. Ne laga cayúnicabe censu ca laaca galán guni ensayárcabe ximodo gucheechecabe diidxaʼ ne guiníʼcabe diidxaʼ riníʼ ca binni ca, nga huayacané stale de ca xpinni Cristu gúnicaʼ dxiiñaʼ ca né stale gana ne guiziidiʼ chaahuicaʼ stiidxa ca binni ca. Zanda gucaacabe tiempu ni iquiiñecabe para gúnicabe censu ca, peru qué zanda diʼ guicá tiempu ni riquiiñeʼ para gaca ca mapa ra rireeche diidxaʼ nin ora raca ca lista ra zeeda lá ca binni ca. Ora guidxélacabe tuuxa ni riníʼ diidxaʼ ca la? naquiiñeʼ gúnicabe stipa pur guiniʼnécabe laabe de stiidxa Dios. Neca cadi gusihuinni binni ca qué racalaʼdxiʼ guiziidiʼ jma la? laaca naquiiñeʼ gábicabe binnigola ni ruuyaʼ modo rireeche diidxaʼ o ni naguíxhebe guni dxiiñaʼ ca tu láʼ binni ca ne paraa nabeza, ti gucaacabe laa lu lista. Peru naquiiñeʼ gánnacabe neca risaca nga gúnicabe censu ca la? laaca risaca nga gucheechecabe diidxaʼ xcaadxi modo (biiyaʼ cuadru ni láʼ «Xi naquiiñeʼ guininu ora gúninu censu»).
6. Xi guendanagana zadxaagalú cani rucheeche diidxaʼ ora guyúbicaʼ ca binni ni qué runadiaga.
6 Ximodo zanda guidxela ca binni ni qué runadiaga. Nuu biaje nagana nga para gaca dxiiñaʼ ca, riquiiñeʼ guni binni stipa ne cadi guiree gana. Ne cadi casi ca binni ni riníʼ sti diidxaʼ nga laacabe, purtiʼ nin lácabe, nin modo rihuínnicabe ne nin xhábacabe qué rusihuinni pa qué runadiágacabe. Ne cumu ca binnilídxicabe ne ca xhamígucabe nabé rápacaʼ laacabe la? zándaca qué zanacaʼ gábicaʼ cani rucheeche diidxaʼ tu lácabe o paraa nabézacabe. Raríʼ zeeda caadxi cosa ni zacané cani rucheeche diidxaʼ para guidxélacaʼ ca binni ca ne zaqueca cani riníʼ sti diidxaʼ.
7. 1) Xi zanda guinabadiidxaʼ cani rucheeche diidxaʼ binni ora chiyúbicaʼ cani qué runadiaga. 2) Xi zanda gúnicabe ti cadi guiníʼ ique binni mal de laacabe.
7 Ca neza binni ridagulisaa ne ca grupu ni nuu lu diidxaʼ seña jma nga rinabadiidxacaʼ ca binni ni nabeza ndaaniʼ xiixa colonia pa runibiáʼcabe tuuxa binni ni qué runadiaga. Zándaca nápacabe ti vecinu o tuuxa ni runinécabe dxiiñaʼ o tuuxa ni rinécabe scuela ni riníʼ seña. O dede zándaca nápacabe tuuxa binnilídxicabe ni qué runadiaga. Laaca zándaca huayuuyacabe nuu ti letreru ndaaniʼ neza ra na gusá binni xcarru chaahuiʼ purtiʼ nuu xcuidi huiiniʼ ni qué runadiaga neza que. Ne cadi naquiiñeʼ guiaandaʼ cani cayuni censu ca zándaca qué zaná binni guicabi ni gunabadiidxacabe laacaʼ. Peru pa guiníʼcabe né diidxaʼ nadóʼ, guiníʼcabe né respetu, nagueendaca guiníʼcabe xi zécabe ne cadi guindaapecabe la? qué zaníʼ ique binni mal de laacabe. Nuu tu laa riné Biblia o sti libru lu DVD para guluíʼ binni ne de racá rusiene ni racalaʼdxiʼ nga gusiidiʼ ca binni ni qué runadiaga xii nga ca ndaayaʼ ni riníʼ Biblia zedané Dios para binni. Peru ora guʼyaʼ cani cayuni censu ca qué náʼ binni guicabi ni gunabadiidxabe laa la? zanda gusaananecaʼ laabe ti tarjeta huiiniʼ ra cá lacaʼ ne teléfono sticaʼ o ti guiʼchiʼ huiiniʼ ni rusaananenu binni para guni invitarnu laacaʼ checaʼ guendaridagulisaa ti gudii ni tuuxa binni ni qué runadiaga.
8. Ximodo zanda gacané ca neza binni ridagulisaa ca xpinni Cristu ni nuu lu diidxaʼ seña.
8 Tobi o chupa biaje lu ti iza, zanda guinabaʼ ti neza binni ridagulisaa ni nuu lu diidxaʼ seña sti neza binni ridagulisaa ni nuu gaxha gacané laacabe gúnicabe censu ra nabeza stale binni ra nexheʼ gucheechecabe diidxaʼ. Ora guidagulisaacabe para chigucheechecabe diidxaʼ, ti xpinni Cristu ni nuu lade neza binni ridagulisaa ni nuu lu diidxaʼ seña ca naquiiñeʼ guni guendaridagulisaa ca ne zanda gusiénebe ximodo gaca censu ca ne gutiidibe ti modo zanda gaca ni. Pa cada grupu cheʼ ndaaniʼ ti carru la? naquiiñeʼ cheʼ neca tobi de seña lade cada grupu ne chiné ti mapa para guluíʼ laacabe paraapeʼ gúnicabe censu.
9. Xi zanda guni cani rucheeche diidxaʼ para gánnacaʼ paraa nabeza ca binni ni qué runadiaga ora checaʼ ca lugar ra riécabe.
9 Cani rucheecheʼ diidxaʼ ca laaca zanda checaʼ ca lugar ra rié ca binni ni qué runadiaga ca, casi ra riécabe para chúʼcabe nayecheʼ ti ratu o ra ridagulisaasícabe o ra riecabe para guicaacabe xiixa. Cani rucheeche diidxaʼ naquiiñeʼ gánnacaʼ ximodo jma jneza gácucaʼ lari pur lugar ra checaʼ. Lugar de guiniʼnécabe ti grupu de binni la? zándaca jma jneza guiniʼnécabe ti binni o chupa. Pa galán modo gucaadiaga binni laacabe la? zanda gudiicabe laa teléfono stícabe ne guinábacabe laa stiʼ.
10. Ximodo zanda guyúbicabe ca binni ni qué runadiaga ni nuu ndaaniʼ xiixa negocio.
10 Sti cosa ni zanda gaca nga guicá lu mapa paraa nuu ca negocio ti ganda chigánnacabe ca binni ca ora jma zanda gucaadiágacaʼ laacabe. Lu ti mapa zanda guicá caadxi gasolinera, lu xcaadxi zanda guicá ra nuu tintontería, lavandería, restaurán, hotel o xcaadxi clase negocio. Pa lu cada mapa zeeda ti clase si negocio, zanna ca xpinni Cristu ximodo gucheechecaʼ diidxaʼ ca lugar ca ne zúnicaʼ ni jma jneza. Guzéʼtenu ti modo zanda gaca ni. Despué de gusiénecabe binni ni ridxaagalú cani riguiaana ndaaniʼ ti hotel la? zanda gudiicabe laabe ti libru lu DVD ne ti invitación para cheʼ binni guendaridagulisaa ti gudiibe cani binni ni qué runadiaga ni cayaana ndaaniʼ hotel ca. Peru ndaaniʼ xcaadxi negocio zándaca ni caquiiñeʼ si nga guinabadiidxacabe pa nuu tuuxa binni ni runi dxiiñaʼ raqué o tuuxa binni ni rizíʼ lúcabe nanna seña. Pa neza ra rucheechenu diidxaʼ nuu ti scuela ra rié cani qué runadiaga, zanda gusaananécabe laacaʼ chupa chonna libru o revista lu DVD para gápacaʼ ndaaniʼ biblioteca sticaʼ.
11. Xiñee zeeda gaca censu ca ti dxiiñaʼ nabé risaca lu xhiiñaʼ Reinu.
11 Ti dxiiñaʼ nabé risaca. Zándaca gaca nagana para guidxela ca binni ni riníʼ sti diidxaʼ. Ne caadxi lugar nabé ridxaa binni de yoo, nga runi raca nagana gápacabe lá guiráʼ binni ni nabeza ra rucheechecabe diidxaʼ. Peru cumu zeʼ dxi jma ziroobaʼ ca guidxi ca la? nga runi censu ca zeeda gaca ti dxiiñaʼ nabé risaca lu xhiiñaʼ Reinu. Ne Jiobá nga bidii laanu dxiiñaʼ ca, para laabe nabé «risaca irá binni» (Hech. 10:34). Nga runi, racaláʼdxibe guilá «irá binni, ne ganna ca ni dxandíʼ» (1 Tim. 2:3, 4). Pur cani bieeteʼ ca la? galán gacanenu Jiobá ne ca xpinni lu dxiiñaʼ ni cayúnicaʼ para guidxélacaʼ guiráʼ ca binni ni «naguudxi ládxidóʼ» ne riníʼ sti diidxaʼ (Luc. 8:15).
[Cuadru ni zeeda lu yaza 5]
Gacanésaanu
Pa ti neza binni ridagulisaa o ti grupu ni nuu lu diidxaʼ ni riníʼcabe sti guidxi racaláʼdxicaʼ gacanécabe laacaʼ para ganda guidxélacaʼ jma binni la? binnigola ni ruuyaʼ modo rireeche diidxaʼ ca zanda guiníʼnebe ca binnigola ni nuu ndaaniʼ ca neza binni ridagulisaa ni riaana gaxha. Ne jma jneza guiniʼnécabe ca neza binni ridagulisaa ni qué riaana zítupeʼ o cani jma napa binni ni riníʼ diidxaʼ ca. Naquiiñeʼ gábicabe cani rucheeche diidxaʼ ni nuu ndaaniʼ ca neza binni ridagulisaa ca pa guidxélacaʼ tuuxa ni riníʼ diidxaʼ ca la? naquiiñeʼ gucaacabe paraa nabeza ne gudiicabe ni binnigola ni ruuyaʼ modo rireeche diidxaʼ ra nuucabe ne maʼ laa gudii ni neza binni ridagulisaa o grupu ni gunabaʼ laacabe gacanécabe laacaʼ. Ca binnigola ni ruuyaʼ modo rireeche diidxaʼ naquiiñeʼ quíxhecaʼ ti modo ni gacané laacaʼ chindacaʼ jma nagueenda ra nuu guiráʼ ca binni ni riníʼ sti diidxaʼ ne para gacanecaʼ binni ni racalaʼdxiʼ guiziidiʼ jma cheʼ lade ca neza binni ridagulisaa o grupu ni riníʼ stiidxacaʼ.
Yanna, pa ti xpinni Cristu guidxela tuuxa ni dxandíʼ riuulaʼdxiʼ guiziidiʼ de Dios ne riníʼ sti diidxaʼ (o ti binni ni qué runadiaga) la? nagueendaca naquiiñeʼ guchabe guiʼchiʼ ni láʼ Sírvase visitar (S-43-S) ne gudiibe ni secretariu ni nuu ra ridagulisaabe. Zacá zanda gacanécabe laabe nagueendaca para guiziidibe de Dios (biiyaʼ km 5/11 yaza 3).
[Cuadru ni zeeda lu yaza 6]
Xi zanda gaca para guidxela ca binni ni riníʼ sti diidxaʼ
• Gunabadiidxaʼ cani ruundaneluʼ Biblia, ca binnilídxiluʼ, cani runineluʼ dxiiñaʼ ne xcaadxi binni.
• Biyubi lu ti directorio stiʼ teléfono ra zeeda ca lá ni rusihuinni padé laaca o xi diidxaʼ riniʼcaʼ. Laaca nuu xcaadxi guiʼchiʼ ra zeeda pa neza lidxi binni ne racá laaca zeeda lácabe, ne zanda guidxélaluʼ cani lu Internet o ra nuu ca binni ni runi dxiiñaʼ de teléfono.
• Gunabadiidxaʼ xcaadxi lugar ra rié stale binni, casi ra biblioteca, ra oficina stiʼ gobiernu ne ra scuela. Peru gupa cuidadu ora gúniluʼ ni.
• Biyubi lu periódicu pa cayeeteʼ chiguni ca binni ni riníʼ sti diidxaʼ xiixa ra chiguidagulisaa stale binni.
• Zanda cheluʼ ra nuu ca negocio ra nabé rié ca binni ni riníʼ sti diidxaʼ.
• Zanda cueeluʼ ti mexaʼ ra quíxheluʼ ca libru ne ca revista stinu ra nuu ca negocio, ca scuela roʼ o ra ribeza binni tren o camión ra nabé rié ca binni ni riníʼ diidxaʼ cuyúbiluʼ ca. Para gúniluʼ nga napa xidé guyúbiluʼ tu naquiiñeʼ guinábaluʼ permisu.
• Zanda siluʼ ti directorio o ti programa para computadora ni zanda guyubi ca binni ni riníʼ diidxaʼ ca lu Internet.
[Cuadru ni zeeda lu yaza 7]
Xi naquiiñeʼ guininu ora gúninu censu
Guniʼné binni né diidxaʼ nadóʼ, guníʼ xi zeluʼ ne cadi gutáleluʼ diidxaʼ ti cadi guiníʼ íquecabe mal de lii. Jma zanácabe guiníʼcabe pa primé guluiʼluʼ laacabe xiixa guiʼchiʼ lu diidxaʼ ni cuyúbiluʼ ca.
Bigapadiuxi laacabe, de racá guníʼ: «Canayúbidu binni ni riníʼ ______ para gábidu laacaʼ xi ndaayaʼ zedané Dios para binni. Ñee runibiaʼluʼ tuuxa ni riníʼ diidxaʼ ca la?».
Ora chiyúbiluʼ ca binni ni qué runadiaga, zanda guiniʼluʼ: «Padiuxi. Ñee zanda gulueeʼ lii ti videu la? [Biluíʼ laabe ti versículo stiʼ Biblia ni biree lu Traducción del Nuevo Mundo de las Santas Escrituras lu diidxaʼ seña lu ti aparatu ni rutiidiʼ DVD.] Lu Biblia zeeda ni biiyaluʼ ca. Nápadu stale videu para gacané ca binni ni qué runadiaga guiziidicaʼ de Dios. Nga runi, ñuuladxeʼ ñannaʼ pa runibiaʼluʼ tuuxa ni qué runadiaga o huaxiéʼ runadiaga ni nanna seña». Pa qué ganda guietenaláʼdxibe la? bizeeteʼ lube pa qué huayuuyabe tuuxa ra rúnibe dxiiñaʼ, ra scuela o neza ra nabézabe ti ganda guietenaláʼdxibe.