Gucheechenu diidxaʼ ra nuu ca binni ni qué riníʼ stiidxanu
1 Ca dxi riʼ maʼ cadi guendaridxagayaa diʼ nga guidxélanu binni ni riníʼ gadxé gadxé diidxaʼ ni nabézacaʼ ti lugar si ndaaniʼ ca guidxi roʼ ca, ne ndaaniʼ ca guidxihuiiniʼ ca. Laaca naquiiñeʼ nga chinenu ca diidxaʼ stiʼ Reinu ra nuu ca binni ni qué riníʼ stiidxanu (Apo. 14:6). Pur cani rizaacanu ora maʼ zinenu stiidxaʼ Reinu ra nuu ca binni ni riníʼ sti diidxaʼ ca la? lu riʼ zeeda ximodo zanda gúninu ni.
2 Lagusiidiʼ binni chinanda Cristu. Intiica guidxaagalunu la? galán gánnanu de que ni naguixhe íquenu nga gusiidinu binni chinanda Cristu... gusiidinu ni dxandíʼ ca laacabe (Mat. 28:19, 20). Dxiiñaʼ riʼ naquiiñeʼ gácani diidxaʼ ni jma guiene binni (1 Cor. 14:9). Peru cadi guiráʼ diʼ ora zanda gácani zacá. Stale lugar ti neza si binni ridagulisaa runi dxiiñaʼ ra nabeza ca binni ca; peru, laaca nabeza binni qué riníʼ diidxaʼ ni riníʼcabe racá. Xi gúninu para gacanenu ca binni ca guiziidicaʼ ni dxandíʼ yaʼ.
3 Biquiiñeʼ guiʼchiʼ ni láʼ Buenas nuevas para todas las naciones. Zacá, neca huaxiéʼ ni gábiluʼ tuuxa la? zannuʼ pa riuláʼdxibe gánnabe ni dxandíʼ ca o coʼ. Pa guluiʼbe de que riuláʼdxibe gucaadiágabe ne lii napuʼ guiʼchiʼ ni cá lu stiidxabe la? zanda gusaananeluʼ ni laabe. De racá la? gunabadiidxaʼ ca binnigola o ni riganna ca binni ridagulisaa ca, pa nuu ti grupu o ti neza binni ridagulisaa gáxhapeʼ ni rúnicaʼ guendaridagulisaa sticaʼ lu stiidxabe. Zándaca tobi de laacabe gacanécabe laabe. Peru pa coʼ la? zándaca guidxélatu tobi ni rucheeche diidxaʼ nabeza racaca ne riníʼ stiidxabe, ne zanda chiganna laabe. Zacaca naquiiñeʼ gaca ne ca binni ni riníʼ sti diidxaʼ stiʼ Méjicu o seña.
4 Peru, pa racá gastiʼ Testigu ni riníʼ stiidxaʼ binni ni riulaʼdxiʼ ucaadiaga ni dxandíʼ ca yaʼ, xi zanda gaca. Caadxi ni rucheeche diidxaʼ maʼ ridxélacaʼ xi gúnicaʼ ora guiníʼnecaʼ binni riníʼ sti diidxaʼ ne guiʼchiʼ ¡Disfrute para siempre de la vida en la Tierra! Pa maʼ biree guiʼchiʼ ca lu diidxaʼ ni riníʼ binni ca la? jmapeʼ galán. Ra iquiiñeluʼ ca dibuju ne guinabuʼ laabe gúʼndabe lu Biblia ca textu ni cá luni ca la? zaziidibe ni naquiiñeʼ gánnabe de lu Stiidxaʼ Dios. Nuu tiru la? binni ca napa binnilidxi ni nanna guiníʼ stiidxabe galán para gusiene laabe.
5 Ra qué raca guendaridagulisaa lu diidxaʼ ni riníʼ binni ni caníʼneluʼ ca la? gudxi laabe chebe ca guendaridagulisaa ni raca racá. Guidxaagabe cani zinanda Cristu la? zacané laabe guiniisibe lu stiidxaʼ Dios; ne para guiniisirube jma la? lii zanda guiziiduʼ stiidxabe (Mat. 18:20). Qué chiguiaanda lii de que ni naguixhe íquenu nga gusiidinu binni chinanda Cristu.
6 Ximodo gúninu dxiiñaʼ ra riníʼcabe xcaadxi diidxaʼ. Nuu ra chupa o chonna neza binni ridagulisaa rucheeche diidxaʼ raqueca, peru cada tobi riganna ca binni ni riníʼ stiidxacaʼ. Zacá la? cani rucheeche diidxaʼ stiʼ cada binni ridagulisaa naquiiñeʼ quixhe íquecaʼ gacanecaʼ ca binni ca. Cumu zacá ni la? ca bíchinu stiʼ chupa neza binni ridagulisaa o jma la? nuu biaje ridíʼdicabe ca yoo queca. Peru, ca binnigola ne ca binni ridagulisaa ni runi dxiiñaʼ ca lugar ca la? tobi si nuucabe para gacanécabe ca binni riʼ lu ni caquiiñecaʼ ne chinécabe ra nuucaʼ ca diidxaʼ nacubi ne galán ca lu diidxaʼ ni jma guiénecaʼ. Ne ti modo rúnicabe ni nga rábicabe ca binni ridagulisaa paneza lidxi tuuxa ni riníʼ stiidxacabe (Fili. 2:4). Naquiiñeʼ guiene cani rucheeche diidxaʼ stiʼ cada binni ridagulisaa de que ra ucuaacabe para gucheechecabe diidxaʼ nga ra riníʼ binni diidxaʼ ni nánnacabe. Pur nga runi, naquiiñeʼ gúʼyacabe gaca dxiiñaʼ guidubi ra ucuaacabe. Ca yoo ra nuu binni ni rienechaahuiʼ diidxaʼ stiʼ ca binni ridagulisaa ni runi dxiiñaʼ racá la? naquiiñeʼ guiaana ni para laacabe. Ca bíchinu ni gusaana xiixa guiʼchiʼ lu náʼ binni la? zandaruʼ chigánnacabe cani riulaʼdxiʼ ucaadiaga ne chinécabe laacaʼ ra nuu ca binni ridagulisaa ni riníʼ stiidxacabe.
7 Nuu lugar la? ni huayacané ca binni ridagulisaa nga gápacaʼ ti guiʼchiʼ ra cá paraa nabeza ca binni ni jma riuláʼdxicaʼ guiniʼcaʼ xiixa diidxaʼ. Xcaadxi neza binni ridagulisaa de racaca la? zanda gúnicabe ti guiʼchiʼ ra icá gunáʼ ndiʼ ca yoo ni cadi chúʼcabe. Zacá la? maʼ qué zadiʼdiʼ cani rucheecheʼ diidxaʼ stiʼ xcaadxi neza binni ridagulisaa yoo queca. Xcaadxi lugar la? ca binni ridagulisaa maʼ naguíxhecaʼ modo gúnicaʼ dxiiñaʼ guidubi ra rucheechecaʼ diidxaʼ ne modo chinécabe binni riulaʼdxiʼ ganna de Biblia ra nuu ca binni ridagulisaa ni riníʼ stiidxacabe. Gastiʼ naca gúninu ni zacá purtiʼ cadi néxhepeʼ ximodo gaca ni (1 Cor. 14:33, 40).
8 Stale ni zabeendunu ra guiníʼnenu ca diidxaʼ nacubi ne galán riʼ binni ni qué riníʼ stiidxanu pa guiranu gacanenu, pa gusihuínninu de que riénenu laacabe ne guluinu de que dxandipeʼ nuunu chuʼ ca dendxuʼ stiʼ Señor galán (Juan 13:34, 35; Fili. 2:14; Sant. 3:17, 18). Pa primé ni icá íquenu nga chuʼ ca binni nachaʼhuiʼ casi dendxuʼ ca galán, ne ni naguixhe íquenu nga gacanenu laacabe chinándacabe Cristu la? zándaca gacanérunu stale binni de guiráʼ guidxi ne diidxaʼ para chuʼcaʼ tobi si ne laanu para guni adorarnu Jiobá (Isa. 2:2, 3).