Ndaa ra rinabadiidxaʼ

◼ Xi guiráʼ ndiʼ naquiiñeʼ gánnanu ora chupa chonna neza binni ridagulisaa rucheeche diidxaʼ ti lugar si ne riniʼcaʼ gadxé gadxé diidxaʼ yaʼ.

Guiʼchiʼ ra cá «Gucheechenu diidxaʼ ra nuu ca binni ni qué riníʼ stiidxanu» bisiene sicaríʼ «cani rucheeche diidxaʼ stiʼ cada binni ridagulisaa naquiiñeʼ quixhe íquecaʼ gacanecaʼ ca binni ca». Rácani zacá la? purtiʼ ra rúnicabe dxiiñaʼ ca rilaani lúcabe pur diidxaʼ ni riníʼ ca binni ca. Ca binni ridagulisaa ni runi dxiiñaʼ ra riníʼcabe chupa chonna diidxaʼ la? zándaca iquiiñeʼ laacabe gucaacabe lu guiʼchiʼ gunáʼ ndiʼ ca yoo ni cadi tiidicabe. Dxiiñaʼ stiʼ ca binnigola ni ruuyaʼ modo rireeche diidxaʼ ca lugar riʼ nga quíxhecaʼ modo gaca dxiiñaʼ ra ucuaacaʼ, ti ganda gúnicabe guidubi ni ne cani guidxélacabe gucaadiaga la? chinécabe laacaʼ ra nuu ca binni ridagulisaa ni riníʼ stiidxacabe. Zacá la? maʼ qué zadiʼdiʼ cani rucheecheʼ diidxaʼ stiʼ xcaadxi neza binni ridagulisaa ca yoo queca ne dxi queca. «Cadi cuaqui [n]u xiixa ni ucueeza stiidxa Cristu» (1 Cor. 9:12).

Ora ca binni riulaʼdxiʼ guiziidiʼ riʼ chindézacaʼ sti ladu la? cadi guindaa diʼ gudiicatu ca binni rucheeche diidxaʼ de raqué guiʼchiʼ ra cá tu lácabe ne paraa nabézacabe. Ndiʼ zacané ti ganda gápacabe ca guiʼchiʼ stiʼ neza ra rucheechecabe diidxaʼ ca nacubi. Racá nga naquiiñeʼ guluinu nápanu guendarannaxhii, riénenu laacabe, riníʼ íquenu ante ni chigúninu ne racané saanu. (Fili. 4:5.)

Cani rucheeche diidxaʼ zándaca chinecaʼ guiʼchiʼ de xcaadxi diidxaʼ ora maʼ chigucheechecaʼ diidxaʼ lu caye o ratiica. Peru ora maʼ ziuunu de yoo pur yoo la? cadi gudiʼnu cani nápanu de sti diidxaʼ, sínuque cani nuu si lu stiidxaʼ ca binni ridagulisaa ra riuunu. Bietenalaʼdxiʼ de que ra rúnitu dxiiñaʼ ca gulaani lutu pur diidxaʼ riníʼ ca binni ca, ti cani bisaana xiixa guiʼchiʼ ra nuu tuuxa ni biluíʼ de que riulaʼdxiʼ gucaadiaga la? ganda chinécabe laacaʼ ca guendaridagulisaa ni raca lu diidxaʼ ni jma guiénecabe o ni gacaláʼdxicabe.

Ne nuu biaje zándaca guidxagalunu xcaadxi ni cucheeche diidxaʼ neza ra canazanu. Peru, casi na guiʼchiʼ ni maʼ bieeteʼ que, «galán gánnanu de que ni naguixhe íquenu nga gusiidinu binni chinanda Cristu... gusiidinu ni dxandiʼ ca laacabe (Mat. 28:19, 20). Dxiiñaʼ riʼ naquiiñeʼ gácani lu diidxaʼ ni jma guiene binni (1 Cor. 14:9)». Ra quixhe íquenu gacanenu ca binni ni jma riníʼ ti diidxaʼ o racalaʼdxiʼ diidxaʼ ni riníʼcabe ra ridagulisaanu ca la? zabeendunu stale lu dxiiñaʼ ni rúninu ca ne zacanenu jma binni guilá.