Ora guidxaaganu binni ni riníʼ gadxé diidxaʼ
1. Xiñee yánnapeʼ nga caquiiñeʼ gacanésaanu ora maʼ cucheechenu diidxaʼ.
1 Yanna riʼ nabé ridxaaganu binni ni riníʼ sti diidxaʼ ora maʼ zigucheechenu diidxaʼ, ne rapa ca binni riʼ gana guiziidicaʼ de stiidxaʼ Reinu. Para ganda guireeche diidxaʼ ra nuu ca binni ca la? stale yoo Betel cayuuyacaʼ naquiiñeʼ chuʼ grupu o neza binni ridagulisaa ni riníʼ stiidxaʼ ca binni ca. Yanna, pa neza ra rucheechenu diidxaʼ nuu binni ni riníʼ gadxé gadxé diidxaʼ la? zándaca zie xcaadxi neza binni ridagulisaa ni riníʼ gadxé diidxaʼ raqué. Ximodo zanda gacané ca binni ridagulisaa para gatachaahuiʼ modo guireeche diidxaʼ ca lugar ca yaʼ (1 Cor. 14:33).
2. Ximodo zanda gacanenu ti grupu o ti neza binni ridagulisaa ni riníʼ sti diidxaʼ ora maʼ zigucheechenu diidxaʼ de yoo pur yoo lugar ca ra riécabe.
2 Gacanésaanu. Ora maʼ cucheechenu diidxaʼ lu calle o ratiica nuu binni la? zanda guinínenu guiráʼ binni, neca riníʼcabe sti diidxaʼ, ne zanda gusaananenu laacabe xiixa revista o libru lu diidxaʼ ni jma chuuláʼdxicabe gúʼndacabe. Peru ora maʼ ziuunu de yoo pur yoo ne lugar ra cucheechenu diidxaʼ ca laaca nuu xcaadxi ni riníʼ gadxé diidxaʼ la? jma galán chuunu ra nuu ca yoo ra riníʼcabe diidxaʼ stiʼ neza binni ridagulisaa ra riuunu ca. Ora gadxé gadxé neza binni ridagulisaa rucheeche diidxaʼ ti lugar si la? riquiiñeʼ gápacabe ti guiʼchiʼ ra cá paraa chigucheechecabe diidxaʼ. Ca binnigola ni ruuyaʼ modo rireeche diidxaʼ naquiiñeʼ quixhe chaahuicaʼ ximodo jma jneza gacanécabe ca binni ca (Pro. 11:14). Peru, xi guni tuuxa pa guidxela ti binni ni riníʼ sti diidxaʼ ora maʼ zigucheeche diidxaʼ de yoo pur yoo yaʼ. Pa gastiʼ nin ti neza binni ridagulisaa ni riníʼ diidxaʼ ca gaxha la? naquiiñeʼ gúnibe stipa para guiníʼnebe binni ca de Stiidxaʼ Dios ne gacanebe laa guiziidiʼ jma.
3. Xi gúninu pa guidxaaganu xcaadxi xpinni Cristu ni cucheechecaʼ diidxaʼ neza ca ziuunu.
3 Ngueca nga dxiiñaʼ cayúninu. Ziuu ora zucheeche chupa neza binni ridagulisaa diidxaʼ ti lugar si ne dxi queca. Xi gúnicabe óraca yaʼ. Guendarannaxhii ni napa ca xpinni Cristu zacané laacaʼ para cadi chuʼ nin ti guendanagana purtiʼ si riniʼcaʼ gadxé gadxé diidxaʼ. Nga runi, jma zacá íquecaʼ gacanecaʼ ca binni ni riníʼ sti diidxaʼ ni nuu neza ra cucheechecabe diidxaʼ (Juan 13:34, 35). Cani ziné grupu ca zuuyacaʼ pa jma galán cheʼ tobi de ca grupu ca chigucheeche diidxaʼ sti lugar ti ratu (Sant. 3:17, 18).
4. Xii nga maca cá ndaaniʼ Biblia zaca ca dxi riʼ.
4 Maca gucuá lu Biblia zucaadiaga binni ni riníʼ gadxé gadxé diidxaʼ ca diidxaʼ nacubi ne galán stiʼ Reinu (Apo. 14:6, 7). Pa gúninu dxiiñaʼ tobi si la? qué zadídinu ra maca gudiʼdiʼ xcaadxi ne zacá zanda gusíʼdinu jma binni de ca diidxaʼ nacubi ne galán ca, neca riniʼcaʼ sti diidxaʼ (Efe. 4:16).