Ximodo zanda gacanenu ca binni ni riníʼ sti diidxaʼ
1. Tu zándaca guidxaaganu ora maʼ zigucheechenu diidxaʼ.
1 Jesucristu maca guníʼ zareeche ca diidxaʼ nacubi ne galán ca lu guidubi naca Guidxilayú «para ganna irá xixé guidxi». Guiráʼ cani rucheeche diidxaʼ ni nuu yanna riʼ, rudiicaʼ cuenta pabiáʼ nga risaca gaca ni na ca diidxaʼ ca (Mat. 24:14; 28:19, 20). Ora maʼ zigucheechenu diidxaʼ, nuu tiru ridxaaganu binni ni riníʼ sti diidxaʼ. Laacabe laaca caquiiñeʼ gucaadiágacabe stiidxaʼ Reinu ne chúʼcabe ndaaniʼ xquidxi Jiobá ante gueedanebe dxi stibe (Mal. 3:18). Ximodo zanda gacanenu ca binni ni riníʼ sti diidxaʼ ni nuu neza ra rucheechenu diidxaʼ yaʼ.
2. Ximodo nga zusihuínninu zinándanu ejemplu stiʼ Jiobá ora guinínenu binni ni riníʼ sti diidxaʼ.
2 Guidúʼyanu ca binni ni riníʼ sti diidxaʼ cásica ruuyaʼ Jiobá laacabe. Para gusihuínninu nadxiinu ca binni ni nuu neza ra rucheechenu diidxaʼ cásica nadxii Jiobá laacabe la? naquiiñeʼ guiale de ndaaniʼ ladxidoʼno gacanenu laacabe gunibiáʼcabe Dios ni dxandíʼ neca riníʼcabe sti diidxaʼ (Sal. 83:18; Hech. 10:34, 35). Nécapeʼ jma nga rinínenu ca binni ni riníʼ diidxaʼ stiʼ ca binni ridagulisaa ra riuunu la? laaca galán nga guidúʼyanu xi caquiiñeʼ ca binni ni riníʼ sti diidxaʼ ne guyúbinu modo gusíʼdinu laacabe stiidxaʼ Reinu. Jiobá racalaʼdxiʼ guireeche diidxaʼ ra nuu guiráʼ binni, peru pa qué guinínenu binni ni riníʼ sti diidxaʼ la? qué zanda diʼ gaca ni racaláʼdxibe ca. Yanna, ximodo zanda gacanenu ca binni ca yaʼ.
3. Xi folletu zanda iquiiñenu, ne ximodo zanda chuʼnu listu para iquiiñenu ni.
3 Iquiiñenu folletu Buenas nuevas para gente de todas las naciones. Folletu riʼ gúcani para gacaneni laanu ora guidxaaganu binni ni riníʼ sti diidxaʼ ni qué riénenu. Guzané ni ratiica cheluʼ, biiyaʼ xi guiráʼ zeeda luni ne guyuu listu para iquiiñeluʼ ni. Guluu ti seña ra cá ca diidxaʼ ni riníʼ ca binni ni nuu neza ra rucheecheluʼ diidxaʼ, zacá jma nagueenda zadxélaluʼ diidxaʼ riníʼcabe. Ne pa nuu xcaadxi guiʼchiʼ casi folletu o libru lu ca diidxaʼ ca la? galán sáneluʼ chupa chonna de laacani, para gusaananeluʼ cani binni despué de gúʼndacaʼ ni zeeda lu folletu ca.
4. Ximodo zanda iquiiñenu folletu Naciones ora maʼ zigucheechenu diidxaʼ.
4 Pa qué gánnaluʼ xi diidxaʼ riníʼ binni ni guidxaagaluʼ ora maʼ zigucheecheluʼ diidxaʼ la? bixheleʼ folletu ca ne biluíʼ laabe ra cá mapa stini. De racá biluíʼ laabe padé lii ne gudxi laabe ñuuláʼdxiluʼ ñánnaluʼ padé laabe ne xi diidxaʼ riniʼbe. Ora maʼ gúdxibe ni lii la? guyé lu índice stini, de racá biyubi yaza ra cá diidxaʼ ni riniʼbe ne biluiʼnáʼ laabe ca primé diidxaʼ ni dieʼ jma nayaaseʼ ca para gúʼndabe guidubi yaza ca. Ora maʼ biluxe biindabe ni la? bidii laabe ti tratadu ni nuu lu stiidxabe o biluiʼnáʼ laabe ra dieʼ de color gris, ra na zuyubuʼ ti guiʼchiʼ ni nuu lu stiidxabe para gudiiluʼ laabe. De racá biluíʼ laabe ca diidxaʼ nayaaseʼ ra na «tu laʼyaʼ» ne guníʼ tu laluʼ. Laaca biluíʼ laabe ca diidxaʼ nayaaseʼ ra na «tu laluʼ» ne guleza guicábibe lii. Gudíxheca padxí zanda chigannuʼ laabe sti biaje.
5. Xi naquiiñeʼ gúninu para ganda gacanenu binni ni riníʼ sti diidxaʼ ne rapa gana guiziidiʼ.
5 Gacanenu cani riuulaʼdxiʼ guiziidiʼ. Biʼniʼ stipa pur chigannuʼ binni ni riuulaʼdxiʼ gucaadiaga stiidxaʼ Reinu neca riniʼbe sti diidxaʼ. Ora maʼ biiyaluʼ dxandíʼ riuuláʼdxibe guiziidibe de Dios ne de ni cá lu Biblia la? bichá guiʼchiʼ ni láʼ Sírvase visitar (S-43-S) ne nagueendaca bidii ni secretariu stiʼ ca binni ridagulisaa, ne maʼ laa guseendaʼ ni Betel. Betel zuseendaʼ ni ra nuu tobi de ca grupu ni riníʼ diidxaʼ ca. Ora chindá guiʼchiʼ ca ra nuu ti neza binni ridagulisaa la? nagueendaca ruyúbicabe binni ca. Laaca galán pa gudii secretariu ca ti copia stiʼ guiʼchiʼ ca binnigola ni ruuyaʼ modo rireeche diidxaʼ, para gánnabe pa stale binni ni riníʼ sti diidxaʼ nga cayuulaʼdxiʼ guiziidiʼ. Peru cadi guiaandaʼ lii, biquiiñeʼ guiʼchiʼ ca ora gúʼyaluʼ dxandíʼ rihuinni napa binni ca gana guiziidiʼ.
6. Xi naquiiñeʼ gúninu ora guinínenu ti binni ni riníʼ sti diidxaʼ ne racalaʼdxiʼ guiziidiʼ jma.
6 Peru ridiʼdiʼ ti tiempu nga dede ora guseendacabe guiʼchiʼ S-43-S hasta ora cheʼ ti xpinni Cristu ni riníʼ stiidxaʼ binni ca para guiniʼné laabe. Nga runi, laga cabézaluʼ gaca ndiʼ la? yegánnaruʼ laabe neca maʼ biseendaluʼ guiʼchiʼ ca para ganda gacaneluʼ laabe xcaadxi. Dede zándapeca guzulú gúʼndaneluʼ laabe de Biblia. Yanna, ximodo zanda guyubuʼ guiʼchiʼ ni nuu lu diidxaʼ ni riníʼ binni ca yaʼ.
7. Xi zanda gúninu para gápanu xiixa guiʼchiʼ de sti diidxaʼ ni riníʼ ca binni ni nuu neza ra rucheechenu diidxaʼ.
7 Ca guiʼchiʼ ni nuu lu xcaadxi diidxaʼ. Qué riquiiñeʼ diʼ gapa ca neza binni ridagulisaa stale guiʼchiʼ ni nuu lu gadxé gadxé diidxaʼ. Peru zándaca guiníʼ binnigola ni ruuyaʼ modo rireeche diidxaʼ ca galán gápacabe caadxi de laacani pa gúʼyabe nuu ti grupu ni riníʼ sti diidxaʼ ne riuuláʼdxicaʼ guiziidicaʼ de Dios. Pa qué gapa neza binni ridagulisaa ca nin ti guiʼchiʼ ni nuu lu stiidxaʼ ca binni ca la? zanda guinábacabe ni. Yanna, cumu cadi nagueendaca nga reeda ca guiʼchiʼ ni rinábacabe ca la? caadxi de cani rucheeche diidxaʼ ruyúbicaʼ tema ni ziuulaʼdxiʼ ca binni ca ne runi imprimircaʼ ni de lu Internet lu www.watchtower.org, racá nga ridxela cani rucheeche diidxaʼ o ca binni ni riuulaʼdxiʼ guiziidiʼ jma, ca libru ne revista ni nuu lu stale diidxaʼ. Nánnanu zanda iquiiñenu ni para gacanenu binni ni riníʼ sti diidxaʼ ni rapa gana guiziidiʼ jma de Dios.
8. Xi zanda guni ca binni ridagulisaa para gacanecaʼ ca binni ni riníʼ sti diidxaʼ ne rapa gana guiziidiʼ jma.
8 Xi zanda guni ca binni ridagulisaa. Nuu biaje ruzulú ridale binni ni riníʼ sti diidxaʼ ti lugar, peru gastiʼ nin ti neza binni ridagulisaa ni riníʼ diidxaʼ ca gaxha de ra nuucabe. Ora zacá ni la? naquiiñeʼ guni invitarnu ca binni ni riuulaʼdxiʼ guiziidiʼ ca checaʼ ra ridagulisaanu. Ora gúʼyacabe pabiáʼ galán ridxaagalunu laacabe ne rizaaláʼdxinu laacabe la? zucaa nga laacabe chuuláʼdxicabe chérucabe. Zándaca gácani nagana ora guzulú chécabe purtiʼ riníʼcabe sti diidxaʼ ne zeedacabe de gadxé lugar, peru lade ca testigu stiʼ Jiobá gastiʼ nin ti cosa ni zanda gucueeza laacaʼ de gusihuínnicaʼ nadxiicaʼ binni casi runi Cristu (Sof. 3:9; Juan 13:35). Ñee nánnaluʼ guiniʼluʼ sti diidxaʼ la? Ñuuláʼdxiluʼ nigánnaluʼ binni ni riníʼ diidxaʼ ca la? Pa zacá ni la? gudxi ni secretariu stiʼ ca binni ridagulisaa ra nuuluʼ ti guseendabe ti guiʼchiʼ ra cá tu laluʼ ne paneza raliʼdxuʼ Betel. Guizáʼ riquiiñeʼ guiʼchiʼ ni guseendabe ca ora maʼ cadxela tu chiganna ti binni ni riuulaʼdxiʼ guiziidiʼ jma.
9. Pora nga zanda gaca ti cursu para guiziidicabe sti diidxaʼ, ne ximodo naquiiñeʼ gaca ni.
9 Cursu para guiziidicabe sti diidxaʼ. Para gacanenu binni ni riníʼ sti diidxaʼ la? galán gábinu laacabe pa ganda chécabe ca guendaridagulisaa ni raca lu stiidxacabe. Peru ora qué randa riécabe la? nuu de cani rucheeche diidxaʼ riguixhe íquecaʼ guiziidicaʼ diidxaʼ ca para ganda gacanecaʼ laacabe. Pa gastiʼ nin ti neza binni ridagulisaa gaxha de ra nuucabe ne stale binni ni riníʼ sti diidxaʼ o stale nga tu zeeda de sti guidxi la? zanda guiníʼ Betel gaca ti cursu racá para guiziidicabe diidxaʼ ca. Óraca zabi Betel ca neza binni ridagulisaa nuu gaxha de lugar ca pabiáʼ caquiiñeʼ gacanécabe ca binni ca, ne zábicabe cani rucheeche diidxaʼ chigaca ti cursu para guiziidicabe diidxaʼ ca. Cani guinabaʼ cheʼ cursu ca naquiiñeʼ quixhe íquecaʼ guidxaacaʼ ra nuu grupu o neza binni ridagulisaa riníʼ diidxaʼ ca para gacanécabe laacaʼ.
10. Pora maʼ zanda chuʼ ti grupu ni riníʼ sti diidxaʼ, ne ximodo rácani.
10 Pora nga zanda gaca ti grupu. Riquiiñeʼ tapa cosa para ganda gaca ti grupu lu sti diidxaʼ: 1) Naquiiñeʼ guihuinni riuulaʼdxiʼ ca binni ni riníʼ diidxaʼ ca guiziidicaʼ jma ne despué gácacaʼ xpinni Cristu. 2) Naquiiñeʼ chuʼ caadxi de cani rucheeche diidxaʼ ni riníʼ diidxaʼ ca o maʼ bizulú caziidicaʼ ni. 3) Naquiiñeʼ chuʼ neca ti binnigola o ti siervu ministerial ni ganda sániruʼ lu grupu ca ne guni neca ti guendaridagulisaa lu diidxaʼ ca guiráʼ semana. 4) Naquiiñeʼ chuʼ ti grupu de binnigola ni gacané ca binni ca. Ora maʼ raca cani bizéʼtenu ca la? grupu de binnigola ca zucaa Betel para gabi laacabe ni naquiiñeʼ gánnacabe de grupu ca ne guinábacabe Betel gudii lugar gúʼyacabe guiráʼ dxiiñaʼ chiguni grupu ni riníʼ sti diidxaʼ ca (biiyaʼ ni rizaané Xhiiñaʼ Reinu ni Rúninu, febrero 2007, yaza 6 ne 7). Binnigola o siervu ministerial ni chiguni dxiiñaʼ racá zaree lá «binnigola ni runi tender grupu» o «siervu de grupu», ne laabe nga gúʼyabe gapa grupu ca guiráʼ ni iquiiñeʼ.
11. Xiñee ti ndaayaʼ naroʼbaʼ nga gacanenu ca binni ni riníʼ sti diidxaʼ ni nabeza neza ra rucheechenu diidxaʼ.
11 Para ganda gucheechenu diidxaʼ lu guidubi naca Guidxilayú casi guníʼ Cristu la? naquiiñeʼ gacanenu ca binni ni riníʼ sti diidxaʼ ni nabeza neza ra rucheechenu diidxaʼ. Guiranu rápanu gana gúninu dxiiñaʼ riʼ ne stale guendanayecheʼ, laga cuniibi Jiobá ca guidxi ca para cuee ca cosa ni jma risaca para laa (Ageo 2:7). ¡Ridxá tipa ladxidoʼno nga gacanenu lu dxiiñaʼ riʼ! Ribézanu uguu Jiobá ndaayaʼ ca stipa cayúninu pur gacanenu ca binni ni riníʼ sti diidxaʼ ni nuu neza ra rucheechenu diidxaʼ. Cadi guiaandaʼ ndiʼ laanu, neca gaca nagana para laanu guinínenu ca binni ni riníʼ sti diidxaʼ la? ¡zanda gacané Dios laacabe guiniisicabe lu stiidxaʼ! (1 Cor. 3:6-9.)