Zacané Jiobá laanu pa guni crenu laa de guidubi ladxidoʼno
«Jiobá peʼ zucaadiaga naa ora gucaaʼ riʼdxeʼ laa.» (SAL. 4:3)
1, 2. 1) Xi guendanagana bidxaagalú David. 2) Xi Salmo nga chigúʼndanu lu tema riʼ.
MAʼ ZINÉ David stale iza de cayuni mandar ndaaniʼ guidxi Israel dxi bidxaagalú ti guendanagana. Cumu bitaagulisaa Absalón, xiiñibe, jma binni para gundisaʼ laabe lu trono stibe la? ngue runi bixooñebe de Jerusalén. Peru guca sti cosa. Lade ca hombre ni rudii conseju laabe guyuu tobi ni nabé gunnaxhiibe, peru dede né laa bidxiideche laabe. David bireené ti grupu de hombre ni qué nudxiideche laa, zebe xie ñeebe ne ziyuunabe ora ziguíʼbabe lu dani Olivo. Ne despué bíʼnicabe laabe sti cosa jma feu, Simeí tobi de ca binnilidxi Saúl bizulú bichá guié laabe, bichá yú laabe ne guluu dí laabe (2 Sam. 15:30, 31; 16:5-14).
2 Ñee zuuti ca desgracia ne ca guendananá que David la? Coʼ, purtiʼ runi crebe zacané Jiobá laabe, casi modo bizeetebe ni lu Salmo 3, racá caniʼbe xi bizaacabe dxi bixooñebe de Jerusalén. Rey David laaca gudixhe ca diidxaʼ ni zeeda lu Salmo 4, ne cásica bíʼnibe lu Salmo 3, bisihuínnibe dxandíʼ rucaadiaga Jiobá ne ricabi ca oración stiʼ ca xpinni ni runi ni na (Sal. 3:4; 4:3). Guiropaʼ Salmo riʼ, rusihuínnicani nuuné Jiobá laacabe dxi ne gueelaʼ, ne riguube ndaayaʼ laacaʼ ora racanebe laacaʼ, riguixhedxibe ladxidoʼcaʼ ne rápabe laacaʼ (Sal. 3:5; 4:8). Nga runi, galán gúninu guidúʼndanu guiropaʼ Salmo riʼ, ne ora gúninu ni guiníʼ íquenu ximodo racaneni laanu guni crenu de guidubi ladxidoʼno dxandíʼ zacané Jiobá laanu ne zápabe laanu.
«Cucaalú guirácabe naa»
3. Xi guendanagana na Salmo 3:1, 2 gudiʼdiʼ David.
3 Sicaríʼ gudxi ti xpinni David laa: «De guidubi ladxidóʼ ca hombre de Israel zinándacaʼ Absalón» (2 Sam. 15:13). Cumu nabé bidxagayaa David modo biʼniʼ xiiñiʼ para gupa stale binni ne zaqué gucaalú laabe la? guniʼbe ca diidxaʼ riʼ: «Jiobá, Dios stinneʼ, xiñee nabé maʼ cadale xhenemiguáʼ pue. Xiñee cucaalú guirácabe naa pue. Stale tu caníʼ de alma stinneʼ: “Qué zulá diʼ Dios laabe”» (Sal. 3:1, 2). Casi maʼ bidúʼyanu ca, lade ca israelita que nabé cayeeteʼ qué zulá diʼ Jiobá David de lu náʼ Absalón ne ca xpinni.
4, 5. 1) Xi nanna David zuni Jiobá. 2) Xi riníʼ ca diidxaʼ «Ni rindisaʼ iqueʼ».
4 Peru David nanna dxichi zapa Jiobá laa, purtiʼ runi crebe Jiobá de guidubi xhiálmabe. Nga runi biindabe sicaríʼ: «Peru, lii, Jiobá, nácaluʼ ti escudu ni naguu leʼ naa, nácaluʼ guendanandxóʼ stinneʼ ne Ni rindisaʼ iqueʼ» (Sal. 3:3). Nánnabe zapa Jiobá laabe, cásica rulá ti escudu ti soldadu. Maʼ nagola rey riʼ dxi cuxooñeʼ de xiiñiʼ, ne neca nusaba íquebe pur ni bíʼnicabe laabe, Dios ni jma nandxóʼ zuchaa modo nuube ne zusisaca laabe. Zacané Jiobá laabe para chuʼbe gana ti ganda guindisaʼ íquebe. Ngue runi, bicaabe ridxi Jiobá purtiʼ nánnabe zucaa diaga laabe. Xi zanda guininu de laanu yaʼ. Ñee runi crenu zacané Jiobá laanu cásica bíʼnibe la?
5 Ora guníʼ David naca Jiobá tuuxa «Ni rindisaʼ ique[be]» la? bisihuínnibe ruuyabe Dios casi ti binni ni zanda gacané laabe. La Palabra de Dios para Todos (2008) rutiixhi versículo ca sicaríʼ: «Lii, Señor, nácaluʼ escudu stinneʼ. Lii rusisácaluʼ naa ne riguuluʼ gana naa». Guidúʼyanu modo cusiene ti diccionariu ca diidxaʼ guníʼ David ora bizeeteʼ: «Ni rindisaʼ iqueʼ»: «Ora rindisaʼ Dios [...] íquenu, racanebe laanu guidúʼyanu zaca chaahuiʼ ca cosa ca ne racanebe laanu guni crenu laabe». Cumu guleecabe David de rey la? nápabe razón para chuʼbe triste. Peru cumu gundisaʼ Jiobá íquebe la? gúcabe nadxibalú, biguidxi fe stibe ne biʼniʼ sentirbe cayapa Dios laabe.
«Laabe zacábibe naa»
6. Xiñee guníʼ David zacabi Jiobá oración stibe dede lu dani nayá stiʼ.
6 Cumu nanna David zacané Jiobá laa la? bicaabe xcaadxi diidxaʼ riʼ: «Né ridxi stinneʼ zucaaʼ ridxi Jiobá peʼ, ne laabe zacábibe naa dede lu dani nayá stibe» (Sal. 3:4). Guiña stiʼ pactu que nuuni lu dani Sión, laani rusihuínnini nuu Dios raqué ne David nga guníʼ chuʼni raqué (2 Sam. 15:23-25). Ngue runi jneza ngue guniʼbe zacabi Jiobá oración stibe dede lu dani nayá stiʼ.
7. Xiñee qué nidxibi David.
7 David nanna cadi pur gana si runi orar, nga runi bisihuínnibe cadi cadxíbibe ora bicaabe Salmo riʼ: «Peru naa la? dxandipeʼ zataʼ para gaseʼ; ne nannaʼ dxandíʼ zabaneʼ, purtiʼ cayapa Jiobá naa» (Sal. 3:5). Qué ridxibi David gasi huaxhinni, neca nanna zándaca jma nagueenda gucaalú ca xhenemigu laa. Nánnabe nabánibe ora guirá gueelaʼ sti dxi, purtiʼ runi crebe Jiobá de guidubi ladxidoʼbe ne maʼ stale biaje huayuuyabe modo huayacané Bixhózebe ni nuu guibáʼ laabe. Laanu laaca zanda guni crenu Jiobá casi bíʼnibe pa sanu lu «ca neza stiʼ» Dios ne qué chuʼ dxi guixélenu de laa (2 Sam. 22:21, 22).
8. Xi guníʼ David lu Salmo 27:1-4 ni rusihuinni runi crebe Dios.
8 Lu stobi de ca Salmo ni bicaa David, laaca bisihuinni runi sentir cayapa Jiobá laa, ne dxandíʼ runi crebe laa. Laabe guniʼbe: «Jiobá nga biaaniʼ stinneʼ ne ni rulá naa. Tuu nga zanda guchibi naa yaʼ. Jiobá zeeda gaca ti lugar ni nadipaʼ para naa lu xquendanabaneʼ. Tuu ndiʼ zanda guchibi naa yaʼ. [...] Neca gucuícabe ca tienda stícabe para gucaalúcabe naa, qué zadxibi diʼ ladxiduáʼ. [...] Ti cosa maʼ gunabaʼ Jiobá... ne laani nga chiyubeʼ, cuezaʼ ndaaniʼ lidxi Jiobá biaʼ dxi guibaneʼ, ti guuyaʼ pabiáʼ nacháʼhuibe ne chuaaʼ nayecheʼ guuyaʼ yuʼduʼ stibe» (Sal. 27:1-4). Ximodo rusihuínninu runi sentirnu cásica biʼniʼ sentir David yaʼ. Ra cadi gudiʼnu lugar chuʼ xiixa ni qué risaca ni gucueeza laanu de chuunu guiráʼ ca guendaridagulisaa ra rizíʼdinu de Dios (Heb. 10:23-25).
9, 10. Xiñee zanda guininu rusihuinni ca diidxaʼ ni zeeda lu Salmo 3:6, 7 qué nuquixe David ni bíʼnicabe laa.
9 Nécapeʼ bidxiideche xiiñiʼ David laa, ne bisaana stale de ca xpínnibe laabe la? guniʼbe: «Qué zadxibediáʼ neca naguu chii millar de binni nanda guiibaʼ leʼ naa. ¡Rinabaʼ lii guiásaluʼ Jiobá, Dios stinneʼ! ¡Bilá naa Dios stinneʼ! Purtiʼ napa xidé cápaluʼ dxita ruaa guiráʼ ca xhenemiguáʼ. Ne zusábaluʼ laya ca binni malu» (Sal. 3:6, 7).
10 David qué nuquixe diʼ ni bíʼnicabe laa. Pa chuʼ tuuxa ni naquiiñeʼ capa «dxita ruaa guiráʼ ca» xhenemígube la? nga nga Dios, cadi laadibe. Rey ni ruzuubaʼ diidxaʼ riʼ maʼ biʼniʼ ti copia stiʼ Ley ne lu Ley que guníʼ Jiobá: «Naa guquixeʼ ni laacabe, ne naa gusabanayaʼ laacabe» (Deu. 17:14, 15, 18; 32:35). Laaca nánnabe casi ora nusaba Dios ni jma nandxóʼ laya «ca binni malu» nga ora gucueezabe laacaʼ de guninacaʼ binni. Dios nanna dxichi tuu nga naca binni malu, purtiʼ «ruuya[be] ni nuu ndaaniʼ ladxidóʼ binni» (1 Sam. 16:7). ¡Nabé rudiʼnu xquíxepeʼ Jiobá purtiʼ ruquidxi fe stinu ne rudii stipa laanu para gudxíʼlunu binni ni jma malu: nga nga Binidxabaʼ! Maʼ cadi candaa diʼ para gulaa Jiobá xhenemigu ndaaniʼ ti lugar ni zeeda gaca casi ti «bizé roʼ». Para dxi gaca nga la? zácarube casi ti lión ni riguu beedxeʼ, peru ni maʼ qué gapa laya, ni cabeza si guinitilú (1 Ped. 5:8, 9; Apo. 20:1, 2, 7-10).
«Jiobá nga rulá»
11. Xiñee naquiiñeʼ guni orarnu pur ca bíʼchinu ne ca bizáʼnanu.
11 David nanna Jiobá si nga zanda gulá laa de lu náʼ ca xhenemigu. Peru cadi caníʼ íquebe de laasibe, sínuque laaca caníʼ íquebe de xquidxi Dios, nga runi bilúxebe diidxaʼ riuundaʼ stibe né ca diidxaʼ riʼ: «Jiobá nga rulá. Nuu ndaayaʼ stiluʼ luguiáʼ xquídxiluʼ» (Sal. 3:8). Dxandíʼ nabé nagana cani bidxaagalú David, peru neca zaqué guníʼ íquebe guiráʼ binni xquídxibe ne nánnabe zaguu Jiobá ndaayaʼ laacaʼ. Ñee cadi laaca zacaca nga naquiiñeʼ gúninu pur ca bíʼchinu ne ca bizáʼnanu ni nuu ndaaniʼ xquidxi Dios la? Naquiiñeʼ guzéʼtenu laacabe lu ca oración stinu, ne guinábanu Jiobá gudii laacabe espíritu stiʼ ni gacané laacabe gácacabe nadxibalú ne guni crécabe zacané Jiobá laacabe gucheechecabe ca diidxaʼ nacubi ne galán stiʼ Reinu (Efe. 6:17-20).
12, 13. Xi bizaaca Absalón, ne xi biʼniʼ David ora gunna ni.
12 Nabé triste modo biluxe xquendanabani Absalón, ne ni bizaacabe ca cusihuinni ximodo guiluxe cani runiná sti binni, ne jmaruʼ si zeni para cani rucaalú ca xpinni Dios ni bibí, casi rey David. Biblia na: «Purtiʼ nanalaʼdxiʼ Jiobá binni ni rucaachiʼ tu naca, peru riuube gaxha de cani runi ni jneza» (Proverbios 3:32). Ora biniti Absalón ne ca soldadu stiʼ guendaridinde que la? gupa xidé bixooñeʼ ne gudxiʼbaʼ deche ti burru. Peru cumu ziuulaʼ guicha íquebe la? bireenda ni lu ti rama stiʼ ti yaga ngola ne raqué gúndabe. Neca nabánirube, peru maʼ qué ganda gúnibe gastiʼ, ne raqué nga nándabe dede ora beeda Joab bicuí chonna flecha huiiniʼ ladxidoʼbe ne raqué gútibe (2 Sam. 18:6-17).
13 Ñee biecheʼ David ora gunna guti xiiñiʼ la? Coʼ, sínuque bizulú guzabe cheríʼ chericaʼ canayuunabe ne cayúnibe ridxi: «¡Xiiñehuiineʼ, Absalón, xiiñehuiineʼ, xiiñehuiineʼ, Absalón! ¡Naa nga ñateʼ, naapiaʼ lugar stiluʼ, Absalón, xiiñehuiineʼ, xiiñehuiineʼ!» (2 Sam. 18:24-33). Joab si nga gunda bicueeza rey que de guʼnaʼ pur ca diidxaʼ ni gudxi laabe. ¡Guizáʼ triste modo biluxe xiiñibe! Absalón peʼ biyubi ni, purtiʼ casi ora ñé xpiaanibe ora gucaláʼdxibe ñácabe tuuxa binni risaca, ngue runi bicaalube rey que neca bixhózebe laa ne neca naca tobi ni gulí Dios (2 Sam. 19:1-8; Pro. 12:21; 24:21, 22).
Biʼniʼ cré David zacané Dios laa sti biaje
14. Xi zanda guininu de modo gudixhe chaahuiʼ David Salmo 4.
14 Cásica Salmo 3 que, zaqueca nga Salmo 4, laaca ti oración ni biʼniʼ David ni, purtiʼ rusihuínnibe runi crebe Jiobá de guidubi ladxidoʼbe (Sal. 3:4; 4:3). Zándaca gudixhe chaahuibe oración ca para gábibe Dios rudiibe xquíxepeʼ laa purtiʼ maʼ cadi cuchiiñaʼ guirutiʼ laabe ora guti Absalón ne biluxe guendaridinde que. O zándaca bicaabe ni para iquiiñeʼ ca levita ni ruundaʼ que ni. Pa zacá ni o pa coʼ la? ora guiníʼ íquenu de Salmo riʼ racaneni laanu para gánnanu dxandíʼ zacané Jiobá laanu.
15. Xiñee nánnanu zucaadiaga Jiobá ca oración stinu.
15 Sti biaje ca laaca bisihuinni David runi cré rucaadiaga Jiobá ca oración ne ricabi cani. Laabe guniʼbe: «Ora gucaaʼ ridxi, bicabi naa, Dios stinneʼ ni runi ni jneza. Ne napuʼ xidé gacaneluʼ naa ora maʼ nuaaʼ ra nagana. Guca nachaʼhuiʼ né naa ne bicaadiaga oración stinneʼ» (Sal. 4:1). Pa cayúninu ni na ca ley stiʼ Jiobá lu xquendanabáninu la? zanda guni crenu Jiobá de guidubi ladxidoʼno, cásica biʼniʼ David. Nánnanu laabe nga Dios «ni runi ni jneza» ne riguube ndaayaʼ ca binni nachaʼhuiʼ. Pur fe ni nápanu lu guendaguti stiʼ Cristu, zanda guidxíñanu Bixhózenu pur laabe ne runi crenu dxandíʼ zucaadiaga Dios laanu (Juan 3:16, 36). ¡Nabé riguixhedxí ndiʼ ladxidoʼno!
16. Xi guendanagana bidxaagalú David ni ñándaca nibee gana laa.
16 Nuu tiru ridxaagalunu xiixa guendanagana ni riguu laanu triste ne rucaani laanu guiníʼ íquenu qué zanda gúninu xiixa. Zándaca zacaca nga biʼniʼ sentir David ti tiempu, ngue runi biindabe sicaríʼ: «Xiiñiʼ binni guidxilayú, hasta padxí nga maʼ gusaanatu de guiniʼtu mal de guendanandxóʼ stinneʼ, laga cayannaxhiitu ca cosa ni qué risaca, ne cuyúbitu ti cosa ni cadi dxandíʼ pue» (Sal. 4:2). Ora guniʼbe «xiiñiʼ binni guidxilayú» caniʼbe de guiráʼ binni. Dxi guniʼbe ca diidxaʼ riʼ, bíʼnibe ni para guiniʼbe cadi jneza cayuni ca xhenemígube, cani cayannaxhii «ca cosa ni qué risaca». Nueva Versión Internacional rutiixhi versículo ca sicaríʼ: «Hasta padxí nga gannaxhiitu bidóʼ ni qué risaca ne chinándatu ni zidiʼdiʼ si yaʼ». De ejemplu stiʼ David rizíʼdinu ti cosa: neca chuʼnu triste pur xiixa ni guni sti binni laanu la? cadi naquiiñeʼ gusaana de guni orarnu Dios ni dxandíʼ ne gusihuínninu runi crenu laabe de guidubi ladxidoʼno.
17. Bisiene ti modo zanda gúninu ni na Salmo 4:3.
17 Guidúʼyanu ximodo bisihuinni David runi cré zacané Dios laa sti biaje, laabe guniʼbe: «Nga runi, laganna zuuyaʼ Jiobá tuu nga ni qué rusaana de guni ni nabe; Jiobá peʼ zucaadiaga naa ora gucaaʼ riʼdxeʼ laa» (Sal. 4:3). Para ganda gúninu ni na Dios la? naquiiñeʼ gácanu nadxibalú ne gaca fe stinu naguidxi. Ne jma naquiiñeʼ gápanu ca guenda riʼ ora guchee ti binnilídxinu ne cueecabe laa de ndaaniʼ xquidxi Dios pa qué gaca arrepentir. Peru cani runi stipa para cadi gucheenecaʼ Jiobá ne rúnicaʼ ni na ca ley stibe la? ricaacaʼ ndaayaʼ. Ne ora rúninu ni na Dios rusihuínninu dxandíʼ runi crenu laabe ne racané nga para chuʼnu nayecheʼ ndaaniʼ xquídxibe (Sal. 84:11, 12).
18. Xi cayabi Salmo 4:4 laanu naquiiñeʼ gúninu pa chuʼ tuuxa guiníʼ o guni laanu xiixa ni cadi jneza.
18 Yanna, xi zanda gúninu pa chuʼ tu guchiichi laanu o guniná laanu pur ni guni o pur ni guiníʼ yaʼ. Pa chinándanu conseju ni bidii David riʼ la? zacanenu para chuʼnu nayecheʼ. Laabe guniʼbe: «Lagaca diti, peru cadi gucheetu. Laguiníʼ guiráʼ ni gápatu gana ndaaniʼ ladxidoʼto lu cama stitu, ne cadi gábitu ni sti binni» (Sal. 4:4). Pa guníʼcabe xiixa ni bichiichi laanu o bíʼnicabe laanu xiixa ni cadi jneza la? cadi galán guquíxenu laacabe ni bíʼnicabe laanu (Rom. 12:17-19). Zanda chigátanu ne guininu ni gápanu gana ndaaniʼ ladxidoʼno. Zándaca ora gábinu Jiobá ni cazaacanu maʼ zadúʼyanu ni de sti modo ne zucaa nga laanu gutiidiláʼdxinu stonda binni ca purtiʼ nadxiinu laa (1 Ped. 4:8). Galán guietenaláʼdxinu bidii apóstol Pablu conseju riʼ, ne ruluíʼ gucuaabe ni de lu Salmo 4:4: «Ne pa idxiichi tu la? cadi udii tu lugar guiaazi gubidxa cadxiichi ru tu, sínuque lauyubi tidi ni nagueenda. Pacaa zuchee tu. Cadi udii tu lugar aca xcustu binidxabaʼ» (Efe. 4:26, 27).
19. Ximodo zanda gúninu ni na Salmo 4:5 ora runi adorarnu Dios.
19 David laaca guníʼ naquiiñeʼ gusihuínninu nápanu fe Dios, ora guníʼ: «Laguuti ti maniʼ para Jiobá ni chuulaʼdxiʼ, ne laguni cré laabe» (Sal. 4:5). Ca ofrenda bidii ca israelita que risaca cani pa gudiicabe ni de guidubi ladxidóʼcabe (Isa. 1:11-17). Zacaca nga yanna, ziuulaʼdxiʼ Dios modo runi adorarnu laa pa gúninu ni de guidubi ladxidoʼno ne gusihuínninu runi crenu laa. Biblia na: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu» (Proverbios 3:5, 6; biindaʼ Hebreos 13:15, 16).
20. Xi riníʼ ca diidxaʼ: «Guzaaniʼ biaaniʼ stiʼ luluʼ luguiadu».
20 David guniʼruʼ: «Stale tu riníʼ: “Tu laa guluíʼ laanu ni galán ya”. Guzaaniʼ biaaniʼ stiʼ luluʼ luguiadu, Jiobá, Dios stidu» (Sal. 4:6). Ora guníʼ David ca diidxaʼ «guzaaniʼ biaaniʼ stiʼ luluʼ luguiadu» la? canábabe Dios gaca nachaʼhuiʼ né laacabe (Sal. 89:15). Cumu runi crenu Jiobá la? ricaanu ndaayaʼ stibe ne nuunu nayecheʼ purtiʼ cayúninu ni nabe.
21. Xi zuni sentirnu pa gucheechenu diidxaʼ né guiráʼ stipa stinu.
21 David nanna zusiecheʼ Jiobá laa jma que biaʼ riecheʼ binni ni runi dxiiñaʼ layú ora guindisaʼ cosecha. Nga runi biindabe para Jiobá: «Dxandipeʼ zusiécheluʼ ladxiduáʼ jma que biaʼ riéchecabe tiempu rudii stale biidxiʼ ne vinu cubi stícabe» (Sal. 4:7). Laanu laaca zanda chuʼnu nayecheʼ pa gucheechenu diidxaʼ né guiráʼ stipa stinu, ni zeeda gaca casi ora nindísanu ti cosecha (Luc. 10:2). Ridxá tipa ladxidoʼno ora ridúʼyanu cadale binni ni cayacané ca xpinni Cristu ni bibí, cani zeeda gaca casi ti guidxi naroʼbaʼ (Isa. 9:3). Cada tobi de laanu galán ninabadiidxaʼ: «Ñee nayecheʼ runeʼ sentir ora guneʼ dxiiñaʼ riʼ la?».
Zúnirunu ni na Dios purtiʼ runi crenu laabe de guidubi ladxidoʼno
22. Ximodo na Salmo 4:8 riuu ti israelita ni zinanda Ley stiʼ Dios.
22 David binduuxeʼ diidxaʼ riuundaʼ stiʼ né ca diidxaʼ riʼ: «Nuudxi ladxiduáʼ ora gataʼ ne ora gaseʼ, purtiʼ lii, ya, lii si, Jiobá Dios stinneʼ, rápaluʼ naa» (Sal. 4:8). Ora yenanda ca israelita que Ley stiʼ Jiobá la? guyuucabe nayecheʼ né Jiobá ne bibánicabe galán. Casi dxi biʼniʼ mandar rey Salomón, «Judá ne Israel guirutiʼ tu nuchiichi laacaʼ» (1 Rey. 4:25). Yanna, ximodo guyuucabe ora bicaalú ca guidxi nuu gaxha que laacabe yaʼ. Cani runi cré zacané Dios laacaʼ la? guyuucaʼ nayecheʼ. Laanu laaca nuunu cásica guyuu David que: gastiʼ qué ribee xpacaandanu, purtiʼ riguixhedxí Dios ladxidoʼno.
23. Ximodo runi sentirnu ora runi crenu Dios de guidubi ladxidoʼno.
23 Nga runi, qué chuʼ dxi guiníʼ íquenu pa zúninu ni na Dios. Pa laanu guni crenu zacanebe laanu ora guyúbinu laabe la? zatadxí xquendabiaaninu (Fili. 4:6, 7). ¡Nabé nayecheʼ runi sentirnu! Ne zanda gudxíʼlunu intiica ni gueeda, purtiʼ runi crenu Jiobá de guidubi ladxidoʼno.
Xi nicábiluʼ
• Xi guendanagana bidxaagalú David runi Absalón.
• Ximodo racané Salmo 3 laanu guni crenu zanda gacané Jiobá laanu.
• Ximodo racané Salmo 4 laanu guni crenu Jiobá jma.
• Xi ribeendunu ora gusihuínninu runi crenu Dios de guidubi ladxidoʼno.
[Dibuju/foto ni zeeda lu yaza 29]
Neca bixooñeʼ David de Absalón, qué nusaanabe de ñuni crebe zacané Jiobá laabe
[Ca dibuju/foto ni zeeda lu yaza 32]
Ñee runi crenu Jiobá de guidubi ladxidoʼno la?